Kico Kiermen Stima Nos Prohimo?

“Stima bo prohimo manera bo mes.”—MATEO 22:39.

1. Con nos ta mustra cu nos ta stima Dios?

KICO Jehova ta rekeri di hende cu ta ador’e? Cu poco palabra simpel pero di peso, Hesus a resumi e contesta. El a bisa cu e mandamento di mas grandi ta pa stima Jehova cu henter nos curason, alma, mente y forsa. (Mateo 22:37; Marco 12:30) Manera nos a mira den e articulo anterior, amor pa Dios ta ensera obedec’e y cumpli cu su mandamentonan como reaccion riba e amor cu el a mustra na nos. Pa hende cu ta stima Dios, hacimento di su boluntad no ta un carga. Al contrario, e ta un delicia pa nan.—Salmo 40:8; 1 Juan 5:2, 3.

2, 3. Pakico nos mester presta atencion na e mandamento pa stima nos prohimo, y ki pregunta ta surgi?

² Segun Hesus, e di dos mandamento di mas grandi ta conecta cu e prome: “Stima bo prohimo manera bo mes.” (Mateo 22:39) Ta na e mandamento aki nos ta bai presta atencion awor, y pa un bon motibo. E tempo den cua nos ta biba ta marca pa un forma egoista y troci di amor. Den apostel Pablo su descripcion inspira di “e ultimo dianan”, el a skirbi cu hende lo no stima otro, sino nan mes, placa y placer. Hopi hende lo no tin “cariño” [BPK], of manera un otro traduccion di Bijbel ta bisa, nan lo no tin e “cariño normal pa nan famianan.” (2 Timoteo 3:1-4) Hesucristo a profetisa: “Hopi ... lo entrega [“traiciona”, NW] otro y odia otro . . . Amor di hopi hende lo fria.”—Mateo 24:10, 12.

³ Sinembargo, ripara cu Hesus no a bisa cu e amor di tur hende lo fria. Semper tabatin y semper lo tin hende cu ta desplega e clase di amor cu Jehova ta rekeri y merece. Hende cu realmente ta stima Jehova lo trata di mira otro hende manera e ta mira nan. Pero ken ta nos prohimo cu nos tin cu stima? Con nos mester mustra amor pa nos prohimo? E Scritura por yuda nos contesta e preguntanan importante aki.

 Ken Ta Mi Prohimo?

4. Segun Levitico capitulo 19, na ken e Hudiunan mester a mustra amor?

⁴ Ora Hesus a bisa e farizeo cu e di dos mandamento di mas grandi ta pa stima bo prohimo mescos cu bo mes, el a referi na un lei specifico cu a ser duna na Israel y cu ta para na Levitico 19:18. Den e mesun capitulo ei, Dios a bisa e Hudiunan cu nan mester a mira otro hende, ademas di nan paisanonan Israelita, tambe como nan prohimo. Versiculo 34 ta declara: “E stranhero cu ta biba cerca boso mester ta pa boso manera un yiu di tera meimei di boso; stim’e manera bo mes, pasobra boso tabata stranhero na tera di Egipto.” Pues, asta e hendenan cu no tabata Hudiu, specialmente e proselitonan, mester a ser trata cu amor.

5. Ki concepto e Hudiunan tabatin di amor pa prohimo?

⁵ Sinembargo, e lidernan Hudiu di e tempo di Hesus tabatin un otro punto di bista. Algun di nan a pretende cu e palabranan “amigo” y “prohimo” a conta solamente pa Hudiu. Hende cu no tabata Hudiu mester a wordo odia. E maestronan ei a rasona cu hende cu ta adora Dios mester desprecia hende sin Dios. Un buki di consulta ta bisa: “Den un ambiente asina tabata imposibel pa caba cu odio. Ei el a haya tereno fertil pa sigui plama.”

6. Ki dos punto Hesus a menciona ora el a papia tocante amor pa prohimo?

⁶ Den Hesus su Sermon Riba Sero, el a papia riba e asunto aki, indicando ken mester ser trata cu amor. El a bisa: “Boso a tende cu a wordo bisa: ‘Stima bo prohimo y odia bo enemigo.’ Ma ami ta bisa boso, stima boso enemigonan . . . y haci oracion pa esnan cu ta maltrata boso y ta persigui boso, pa boso por ta yiunan di boso Tata cu ta den shelo; pasobra e ta haci su solo sali riba mal hende y riba bon hende, y ta laga awa yobe riba hende husto y riba hende inhusto.” (Mateo 5:43-45) Aki Hesus a menciona dos punto. Na prome luga, Jehova ta generoso y bondadoso tanto pa bon hende como pa mal hende. Na di dos luga, nos mester sigui su ehempel.

7. Ki les nos ta siña for di e comparacion di e bon Samaritano?

⁷ Na un otro ocasion, un Hudiu versa den e Lei a puntra Hesus: “Ken ta mi prohimo?” Hesus a contest’e contando un comparacion tocante un Samaritano cu a topa un homber, un Hudiu, kende ladron a asalta y kita tur cos for di dje. Aunke e Hudiunan por lo general a desprecia e Samaritanonan, e Samaritano a verband e homber su heridanan y a hib’e na un posada, fuera di peliger, caminda e por a recupera. Ki les nos ta siña? Amor pa prohimo no mester ta limita solamente na hende di nos mes rasa, nacionalidad of religion.—Lucas 10:25, 29, 30, 33-37.

Kico Kiermen Stima Nos Prohimo?

8. Kico Levitico capitulo 19 ta bisa tocante e maneranan cu e Israelitanan mester a mustra amor?

⁸ Amor pa prohimo, mescos cu amor pa  Dios, no ta djis un sintimento; e ta ensera accion. Ta bon pa considera mas aleu e contexto di e mandamento registra na Levitico 19 cu a anima e pueblo di Dios pa stima nan prohimo mescos cu nan mes. Ei nos ta lesa cu e Israelitanan mester a laga e hendenan den necesidad y e stranheronan cu tabata biba den e pueblo di Israel recohe loke a resta di e cosecha. No tabatin espacio pa ladronicia, gañamento of estafa. Den asuntonan hudicial e Israelitanan no tabatin mag di mustra parcialidad. Aunke nan mester a duna reprendemento ora tabata necesario, e Scritura a bisa nan specificamente: “No odia bo ruman den bo curason.” Esakinan y hopi otro mandamento a ser resumi den e siguiente palabranan: “Stima bo prohimo manera bo mes.”—Levitico 19:9-11, 15, 17, 18.

9. Pakico Jehova a manda e Israelitanan pa keda separa for di e otro nacionnan?

⁹ Aunke e Israelitanan mester a mustra amor pa otro hende, nan mester a keda separa tambe for di hende cu a adora dios falso. Jehova a spierta nan di e peliger- y consecuencianan di mal asociacion. Por ehempel, relaciona cu e nacionnan cu e Israelitanan mester a core cu ne, Jehova a manda: “No emparenta [“sera aliansa matrimonial”, NW] cu nan; no duna bo yiu muher na nan yiu homber, ni tuma nan yiu muher pa bo yiu homber. Pasobra nan lo kita bo yiu homber di sigui mi pa sirbi otro diosnan; e ora ei e rabia di SEÑOR lo sende contra bo.”—Deuteronomio 7:3, 4.

10. Kico nos tin cu tene cuidou cu ne?

¹⁰ Di mes manera, cristiannan ta tene cuidou pa no sera amistad cu hende cu por debilita nan fe. (1 Corintionan 15:33) Bijbel ta spierta nos: “No uni boso mes den yugo desigual cu incredulonan”, esnan cu no ta parti di e congregacion cristian. (2 Corintionan 6:14) Ademas, Bijbel ta conseha cristiannan pa casa solamente “den Señor.” (1 Corintionan 7:39) Pero hamas nos mester haci bofon di personanan cu no ta kere den Jehova manera nos. Cristo a muri pa pecadornan, y hopi hende cu un tempo a practica cosnan baho a bandona nan mal caminda y a reconcilia cu Dios.—Romanonan 5:8; 1 Corintionan 6:9-11.

11. Con ta e mihor manera pa mustra amor pa hende cu no ta sirbi Jehova, y pakico?

¹¹ Ora ta trata di mustra amor na hende cu no ta sirbi Dios, e mihor cos cu nos por haci ta di imita Jehova mes. Aunke e ta odia maldad, e ta mustra bondad amoroso na tur hende, extendiendo e oportunidad na nan pa bira bek for di nan mal caminda y ricibi bida eterno. (Ezekiel 18:23) Jehova ta desea “pa tur [hende] bin na arepentimento.” (2 Pedro 3:9) Su boluntad ta pa “tur hende wordo salba y yega na conocemento di e berdad.” (1 Timoteo 2:4) P’esei mes Hesus a encarga su siguidonan cu e trabou di predica y siña y pa ‘haci hende di tur e nacionnan discipel di dje.’ (Mateo 28:19, 20) Cu nos participacion den e trabou aki, nos ta mustra amor pa Dios y pa nos prohimo, si, asta pa nos enemigonan!

Amor pa Nos Rumannan Cristian

12. Kico apostel Juan a skirbi tocante stima nos ruman?

¹² Apostel Pablo a skirbi: “Laga nos haci bon na tur hende, y specialmente na esnan cu ta di e famia di fe.” (Galationan 6:10) Como cristian, nos tin e obligacion di mustra amor pa hende cu ta di e famia di fe—nos rumannan spiritual. Con importante e amor aki ta? Apostel Juan a enfatisa e punto aki ora el a skirbi: “Ken cu odia su ruman ta un matado ... Si un hende bisa: ‘Mi ta stima Dios’, y ta odia su ruman, e ta un gañado; pasobra esun cu no ta stima su ruman cu el a mira, no por stima Dios, kende e no a mira.” (1 Juan 3:15; 4:20) Esakinan ta palabranan fuerte. Hesucristo a aplica e palabranan “matado” y “gañado” na Satanas e Diabel. (Juan 8:44) Hamas nos lo kier pa e palabranan ei aplica na nos!

13. Den ki maneranan nos por mustra amor pa nos rumannan den fe?

 ¹³ “Dios ta siña [cristiannan berdadero pa] stima otro.” (1 Tesalonicensenan 4:9) Nos tin cu stima no “cu palabra ni cu lenga, ma cu echo y berdad.” (1 Juan 3:18) Nos amor mester ta “sin hipocresia.” (Romanonan 12:9) Amor ta impulsa nos pa ta bondadoso, compasivo, dispuesto pa pordona, pa mustra pasenshi, y no jaloers, gabado, arogante of egoista. (1 Corintionan 13:4, 5; Efesionan 4:32) E ta impulsa nos pa “sirbi otro.” (Galationan 5:13) Hesus a bisa su discipelnan pa stima otro mescos cu el a stima nan. (Juan 13:34) P’esei un cristian mester ta dispuesto pa sacrifica asta su bida na fabor di su rumannan ora esei ta necesario.

14. Con nos por manifesta amor den famia?

¹⁴ Amor mester ser manifesta specialmente den un famia cristian y particularmente entre esposo y esposa. Lasonan matrimonial ta asina intimo cu Pablo a bisa: “Esposonan tambe mester stima nan esposa manera nan mes curpa.” Anto el a agrega: “Esun cu ta stima su esposa ta stima su mes.” (Efesionan 5:28) Pablo ta ripiti e conseho aki cinco versiculo mas despues. Un esposo cu ta stima su esposa lo no imita e Israelitanan di e tempo di Malakias cu a trata nan casa cu traicion. (Malakias 2:14) Lo e balor’e. Lo e stim’e mescos cu Cristo a stima e congregacion. Mescos tambe, amor lo motiva un esposa pa respeta su esposo.—Efesionan 5:25, 29-33.

15. Kico algun persona a sinti nan impulsa pa bisa y haci ora nan a observa amor fraternal na accion?

¹⁵ Sin duda e clase di amor aki ta identifica cristiannan berdadero. Hesus a bisa: “Na esaki tur hende lo sa cu boso ta mi discipel, si boso tin amor un pa otro.” (Juan 13:35) Nos amor pa otro ta atrae hende na e Dios cu nos ta stima y representa. E experencia di un famia Testigo na Mozambique ta ilustra esaki. Nan a conta: “Nunca nos a yega di mira un cos asina. Atardi a cuminsa supla un biento feros sigui pa awasero pisa y hagel. E bientonan fuerte a destrui nos cas di bambu, y e dak di zim a bula bai. Ora nos rumannan di e congregacionnan den bisindario a bin yuda reconstrui nos cas, nos bisiñanan asombra a bisa: ‘Boso religion ta hopi bon. Nunca nos iglesia no a yuda nos di e manera ei.’ Nos a habri nos Bijbel y mustra nan Juan 13:34 y 35. Aworaki hopi di nos bisiñanan ta studiando Bijbel.”

Amor pa un Hende en Particular

16. Kico ta e diferencia entre stima un grupo di hende y stima un persona en particular?

¹⁶ No ta dificil pa stima nos prohimo como grupo. Pero pa stima un hende en particular si kisas no ta dje facil ei. Por ehempel, algun hende ta manifesta e amor cu nan tin pa prohimo dor di djis haci un donacion na un organisacion caritativo. En berdad, ta hopi mas facil pa bisa cu nos ta stima nos prohimo cu stima un colega di trabou cu aparentemente no ta precupa cu nos, un bisiña cu tin mal manera of un amigo cu ta desapunta nos.

17, 18. Con Hesus a mustra amor pa personanan individual, y kico tabata su motivacion?

¹⁷ Den e asunto di stima un persona en particular, nos ta siña for di Hesus, kende a refleha e cualidadnan di Dios a la perfeccion. Aunke el a bin na tera pa kita pica di mundo, el a mustra amor pa hende individual, por ehempel pa un señora enfermo, un leproso y  un mucha. (Mateo 9:20-22; Marco 1:40-42; 7:26, 29, 30; Juan 1:29) Di mes manera, nos ta mustra amor pa nos prohimo den e manera cu nos ta trata cu e personanan cu nos tin contacto cu ne riba un base diario.

¹⁸ Pero nos no mester lubida nunca cu amor pa prohimo ta liga cu amor pa Dios. Aunke Hesus a yuda hende pober, a cura e enfermonan y a alimenta hende cu hamber, su motivacion tras di tur e cosnan aki y pa siña e multitudnan tabata pa yuda hende reconcilia cu Jehova. (2 Corintionan 5:19) Hesus a haci tur cos pa e gloria di Dios, sin lubida nunca cu el a representa y refleha e Dios cu el a stima. (1 Corintionan 10:31) Dor di imita e ehempel di Hesus, nos tambe por mustra berdadero amor pa prohimo y na mes momento evita di bira parti di e mundo malbado di humanidad.

Con Nos Ta Stima Nos Prohimo Manera Nos Mes

19, 20. Kico kiermen stima nos prohimo manera nos mes?

¹⁹ Hesus a bisa: “Stima bo prohimo manera bo mes.” Ta normal pa ta interesa den nos mes y pa nos tin un grado rasonabel di respet propio. Si esei no tabata e caso, e mandamento lo no tabatin mucho sentido. Pero nos no mester confundi e amor apropia aki di nos mes cu e amor egoista cu apostel Pablo a menciona na 2 Timoteo 3:2. Mas bien, e ta un sentido rasonabel di balor propio. Un erudito di Bijbel a describie como un “amor propio balansa cu no tin un aire egocentrico di ‘mi ta superior’ ni un actitud masokista di ‘mi ta inferior.’”

²⁰ Stima otro hende mescos cu nos mes kiermen mira otro hende manera nos kier wordo mira y trata otro hende manera nos kier wordo trata. Hesus a bisa: “P’esei, tur loke boso kier pa hende haci pa boso, haci mescos pa nan.” (Mateo 7:12) Ripara cu Hesus no a bisa pa nos keda corda loke otro hende a haci cu nos den pasado y despues paga nan bek. Mas bien, nos mester pensa riba con nos kier ser trata anto actua di acuerdo cu esei. Ripara tambe cu Hesus no a limita su palabranan na amigonan y rumannan spiritual. El a uza e palabra “hende”, talbes pa indica cu nos mester actua den e manera aki cu tur hende, ken cu nos topa.

21. Ora nos ta mustra amor na otro hende, kico nos ta demostra?

²¹ Amor pa prohimo lo proteha nos for di haci loke ta malo. Apostel Pablo a skirbi: “‘No comete adulterio, no mata, no horta, no cudisha’, y si tin algun otro mandamento, esaki ta keda resumi den e palabra aki: ‘Stima bo prohimo manera bo mes.’ Amor no ta haci daño na prohimo.” (Romanonan 13:9, 10) Amor lo impulsa nos pa busca maneranan pa haci loke ta bon pa otro hende. Dor di stima otro hende, nos ta demostra cu nos ta stima tambe esun cu a crea hende den Su imagen, Jehova Dios.—Genesis 1:26.

Con Lo Bo Contesta?

• Na ken nos tin cu mustra amor, y pakico?

• Con nos por mustra amor na hende cu no ta sirbi Jehova?

• Con Bijbel ta describi e amor cu nos mester tin pa nos rumannan?

• Kico kiermen stima nos prohimo manera nos mes?

[Preguntanan di Estudio]

[Plachi na pagina 26]

“Ken ta mi prohimo?”

[Plachi na pagina 29]

Hesus a stima hende individualmente