Storia di Bida

Nos Lucha pa Keda Spiritualmente Fuerte

Segun e relato di Rolf Brüggemeier

E prome carta cu mi a haya tempo mi tabata den prizon tabata di un amigo. El a informa mi cu autoridadnan a aresta mi mama y tambe mi ruman hombernan mas jong, Peter, Jochen y Manfred. Esei a laga mi dos ruman muhernan chikito sin mayor y sin ruman. Dicon e autoridadnan di Alemania Oriental a persigui nos famia? Kico a yuda nos keda spiritualmente fuerte?

SEGUNDO GUERA MUNDIAL a destrosa nos dushi infancia; nos a experencia personalmente e crueldadnan di guera. Tata a drenta ehersito Aleman y a muri como prizonero di guera. Esaki a nifica cu mi mama, Berta, mester a percura pa seis yiu di un pa 16 aña.

E misa cu mi mama tabata bai a lag’e sinti totalmente desapunta cu religion y esei a pone cu e no kier a tende nada mas tocante Dios. Pero un dia na aña 1949, Ilse Fuchs, un señora cortico y discreto, a bin na nos porta pa papia tocante e Reino di Dios. Su preguntanan y rasonamento a lanta mi mama su curiosidad. Un estudio di Bijbel a duna mi mama speransa.

Sinembargo, ami cu mi ruman hombernan, na principio tabatin nos dudanan. E Nazinan y despues e comunistanan a priminti cosnan grandi, pero tur nan promesanan a caba na decepcion. Aunke nos tabata desconfia tur promesa nobo, nos a keda impresiona ora nos a haya sa di algun Testigo cu tabata sera den campo di concentracion pasobra nan a nenga di participa den guera. E siguiente aña, ami cu mi mama y Peter a batisa.

Nos ruman homber mas jong Manfred tambe a batisa, pero aparentemente e berdad biblico no tabata hancra den su curason. Ora cu e comunistanan a prohibi nos obra na aña 1950  y polis secreto—e notorio Stasi—a pone presion riba dje, el a bisa nan na unda nos reunionnan tabata tuma luga. Esaki ta loke despues a hiba na e aresto di mi mama y mi otro ruman hombernan.

Nos A Sirbi bou di Prohibicion

Debi na e prohibicion, nos tabatin cu trece literatura biblico di contrabanda na Alemania Oriental. Como mensahero, mi tabata recohe literatura den e seccion Occidental di Berlin caminda e literatura no tabata prohibi, y a crusa frontera cu nan. Mas cu un biaha mi a scapa di polis, pero na november 1950, nan a aresta mi.

Stasi a pone mi den un cel bou di tera sin bentana. Den dia mi no tabatin mag di drumi, y anochi nan tabata interoga mi y tin biaha bati mi. Mi no tabatin ningun contacto cu mi famia, sino te na maart 1951 ora cu mi mama, Peter y Jochen a bin pa sigui mi caso den corte. Mi a haya un sentencia di seis aña.

Peter, Jochen y mi mama a keda aresta seis dia despues di mi huicio. Despues di esei, un ruman den fe a cuida mi ruman muher Hannelore, cu tabatin 11 aña, y un tanta a tuma Sabine, cu tabatin 7 aña. E bewakernan di Stasi a trata mi mama cu mi rumannan manera criminalnan peligroso, y asta a kita nan feter di sapato. Nan tabatin cu keda para durante henter e interogacionnan. Nan tambe a keda sentencia na seis aña cada un.

Na 1953, autoridadnan a asigna ami cu algun otro Testigo pa traha un pista di aterisahe militar, locual nos a nenga di haci. Nan a castiga nos cu 21 dia di encarselacion solitario, locual a nifica nada di trabou, nada di carta y tiki cuminda. Algun ruman muher cristian a warda pida pan di e tiki racion cu nan mes tabata haya y a duna nos na scondi. Asina mi a sera conoci cu Anni, un di e ruman muhernan ei. Y despues mi a casa cu ne ora nos a sali liber na 1957 y 1956 respectivamente. Un aña despues cu nos a casa, nos yiu muher, Ruth, a nace. Peter, Jochen y Hannelore tambe a casa rond di mesun tempo.

Rond di tres aña despues cu mi a sali liber, nan a bolbe aresta mi. Un funcionario di Stasi a purba combence mi pa bira un informante. E di: “Kerido Sr. Brüggemeier, por fabor sea rasonabel. Bo sa con bida den prizon ta, y nos no kier pa bo pasa den tur esei atrobe. Bo por keda un Testigo, sigui cu bo estudionan y papia tocante Bijbel manera cu bo kier. Unicamente nos kier pa bo tene nos informa. Pensa riba bo casa y bo yiu muher chikito.” E ultimo palabranan ei a dal mi hopi duro. Sinembargo, mi tabata sa cu tanten mi ta den prizon, Jehova lo a percura pa mi famia mihor cu ami lo tabata por, y el a hacie!

 E autoridadnan a purba obliga Anni traha full-time y laga otro hende cuida Ruth p’e den siman. Anni a resisti y a bai traha anochi di manera cu e por a cuida Ruth den dia. Nos rumannan spiritual tabata sumamente amoroso y atento y nan a duna mi casa asina hopi cos cu e por a comparti cu otro rumannan. Mientrastanto, ami a pasa casi seis aña mas den prizon.

Con Nos A Mantene Fe den Prizon

Ora mi a bai bek prizon, mi compañeronan Testigo den mi cel tabata ansioso pa sa kico tabatin den e publicacionnan recientemente. Esta contento mi tabata cu mi a studia mi revista Toren di Vigilancia cuidadosamente y cu mi a asisti cu regularidad na e reunionnan, di manera cu mi por tabata un fuente di animacion spiritual pa nan!

Ora nos a pidi e bewakernan un Bijbel, nan a contesta: “Duna Testigonan di Jehova un Bijbel ta mes peligroso cu duna un ladron encarsela herment pa kibra sali.” Tur dia, e rumannan cu tabata hiba delantera tabata scohe un texto biblico pa considera. Durante nos caminatanan diario di mei ora den cura, nos no tabata dje interesa ei den ehercicio y aire fresco sino den beneficia di e texto di dia. Aunke nos tabatin cu keda cinco meter leu for di otro y no tabatin mag di papia, toch nos a haya maneranan pa pasa e texto di un pa otro. Unabes bek den nos cel, nos a pone hunto loke cada un a logra tende, y a tene nos consideracion biblico diario.

Cu tempo un informante a reda nos, y nan a sera mi mi so den un cel. Mi tabata hopi contento cu pa e tempo ei ya mi a siña centenares di texto biblico for di cabes! Mi por a yena e dianan bashi ei meditando riba un variedad di topico biblico. Despues nan a hiba mi na un otro prizon, caminda un bewaker a pone mi den un cel cu dos otro Testigo y—e cos di mas maraviyoso—a duna nos un Bijbel. Despues di tabata seis luna sera mi so den un cel, mi tabata masha gradicido di por a considera topiconan biblico atrobe cu rumannan den fe.

Peter, mi ruman homber, ta describi kico a yud’e persevera den un otro prizon: “Mi tabata imagina con bida lo ta den e mundo nobo y a tene mi mente ocupa cu pensamentonan biblico. Nos cu tabata Testigo tabata fortalece otro cu preguntanan biblico of cu testnan basa riba e Scritura. Bida no tabata facil. Tabatin biaha cu nan a sera nos 11 hende den un espacio di mas o menos 12 meter cuadra. Einan nos mester a haci tur cos; come, drumi, baña, asta nos necesidadnan. Esei a haci nos crepchi.”

Jochen, un di mi ruman hombernan, ta corda esaki di su experencianan den prizon: “Ami tabata canta e canticanan cu mi por a corda for di nos buki di cantica. Tur dia mi a medita riba un texto biblico cu mi a siña for di cabes. Despues cu mi a sali liber, mi a sigui cu un bon rutina di instruccion spiritual. Tur dia mi ta lesa e texto di dia cu mi famia. Nos ta prepara tambe pa tur reunion.”

Mi Mama A Sali for di Prizon

Despues di tabata sera pa poco mas cu dos aña, nan a laga mi mama bai. El a uza su libertad pa studia Bijbel cu Hannelore y Sabine, y asina a yuda nan pone un bon fundeshi pa nan fe. El a siña nan tambe con pa trata cu cuestionnan cu a surgi na scol debi na nan fe den Dios. Hannelore ta remarca: “Nos no a worry cu e consecuencianan pasobra na cas nos tabata anima otro. Nos lasonan familiar fuerte a compensa cualkier problema cu nos a experencia.”

Hannelore ta sigui bisa: “Ademas, nos a percura cuminda spiritual pa nos ruman hombernan den prizon. Cu letter chikito riba papel di wax, nos tabata copia na man henter un edicion di E Toren di Vigilancia. Caba nos a lora e blachinan den papel waterproof y a sconde nan meimei di algun preimo cu nos tabata manda den e pakete mensual. Tabata un goso pa haya e mensahe cu e preimonan tabata ‘masha dushi.’ Nos tabata asina absorba den nos trabou cu, en realidad, esei tabata un tempo maraviyoso.”

 Bida bou di Prohibicion

Peter ta describi con tabata pa biba pa decadanan bou di prohibicion na Alemania Oriental: “Nos tabata reuni den casnan priva den gruponan chikito, y nos no tabata ni yega ni sali pareu. Na cada reunion, nos tabata haci areglo pa e siguiente. Nos a haci esaki cu seña y notanan skirbi como cu constantemente tabatin e peliger cu Stasi tabata tap nos combersacionnan.”

Hannelore ta splica: “Tabatin biaha cu nos a haya sinta di grabacion di programanan di asamblea. Esaki semper tabata trece hopi alegria den e reunion. Nos grupo chikito tabata reuni pa scucha instruccion biblico durante varios ora. Aunke nos no por a mira e oradornan, nos a sigui e programa cuidadosamente y a haci anotacion.”

Peter ta bisa: “Nos rumannan cristian den otro pais tabata haci tur nan esfuerso pa manda literatura biblico pa nos. E ultimo decada prome cu e Muraya di Berlin a basha abou na 1989, nan a produci publicacionnan pa nos di tamaño chikito. Algun ruman a risca nan auto, nan placa y asta nan libertad pa transporta cuminda spiritual pa Alemania Oriental. Un anochi un pareha cu nos tabata warda riba dje no a presenta. Luga ta polis a descubri e literatura y a confisca nan auto. A pesar di e peligernan, nunca nos no a pensa pa stop cu e trabou afin di hiba un bida mas trankil.”

Manfred, mi ruman homber mas jong cu a traiciona nos na 1950, ta describi kico a yud’e recobra su fe y mantene esaki: “Despues cu nan a detene mi pa algun luna, mi a muda pa Alemania Occidental y a bandona e berdad. Mi a bolbe na Alemania Oriental na 1954 y a casa e siguiente aña. Poco despues, mi casa a acepta e berdad y a batisa na 1957. Cu tempo, mi consenshi a cuminsa molestia mi, y cu yudansa di mi casa, mi a bolbe na e congregacion.

Rumannan cristian cu tabata conoce mi prome cu mi a bandona e berdad a acepta mi bek na un manera amoroso, como si fuera nada no a pasa. Ta dushi pa bo ser saluda cu un sonrisa caluroso y un abraso. Mi ta masha contento cu mi a haci bon cu Jehova y cu mi rumannan.”

E Lucha Spiritual Ta Sigui

Tur miembro di nos famia tabatin cu hiba un lucha fuerte pa e fe. Mi ruman homber Peter a bisa: “Awe, mas cu nunca, nos ta rondona pa hopi distraicion y tentacion material. Bou di e prohibicion, nos tabata contento cu loke nos tabatin. Por ehempel, ningun di nos no kier a bai un otro grupo di estudio djis pa motibonan personal, y ningun hende no tabata keha cu e reunionnan tabata mucho leu ni mucho lat. Nos tur tabata contento di por a reuni hunto, maske algun di nos tabatin cu warda te diesun or djanochi pa nos por a sali for di e luga di reunion.”

Na 1959, mi mama a dicidi di muda pa Alemania Occidental hunto cu Sabine, cu e  tempo ei tabatin 16 aña. Como cu nan kier a sirbi caminda tabatin mester di mas publicador di Reino, sucursal a dirigi nan pa Ellwangen, na Baden-Württemberg. Mama su celo a pesar cu su salud no tabata bon, a motiva Sabine pa cuminsa traha pionero ora e tabatin 18 aña. Ora cu Sabine a casa, mi mama—na edad di 58 aña—a siña core auto pa e por a participa mas tanto den e trabou di predica. El a disfruta di e sirbishi aki te na su morto na 1974.

Pa loke ta ami, despues di a sinta casi seis aña di mi di dos castigo di prizon, nan a deporta mi na 1965 pa Alemania Occidental, sin cu mi famia tabata sa. Sinembargo, cu tempo Anni mi casa, y nos yiu muher Ruth, a bin cerca mi. Mi a puntra sucursal si nos por a sirbi caminda tin mester di mas publicador, pues nan a pidi nos pa bai Nördlingen, na Bavaria. Einan Ruth, y nos yiu homber, Johannes, a lanta. Anni a drenta den sirbishi di pionero. Su bon ehempel a motiva Ruth pa cuminsa traha pionero asina cu el a caba scol. Tur nos dos yiunan a casa cu pionero. Awor nan tin nan mes famia, y nos ta bendiciona cu seis dushi nieto.

Na 1987, mi a probecha di e oportunidad pa baha cu pension adelanta y a join Anni den e sirbishi di pionero. Tres aña despues, mi a haya invitacion di e oficina di sucursal na Selters pa yuda expande e facilidadnan. Despues di esei, nos a yuda traha e prome Salon di Asamblea di Testigonan di Jehova na loke tabata Alemania Oriental, na Glauchau, caminda mas despues nos a bira cuidadonan di e luga. Pa motibonan di salud, nos a bai bek cerca nos yiu muher den e Congregacion Nördlingen, y ei nos ta sirbi como pionero.

Mi ta hopi contento cu tur mi rumannan y mayoria miembro di nos famia ta sigui sirbi nos maraviyoso Dios, Jehova. Atrabes di añanan, nos a siña cu tanten cu nos keda spiritualmente fuerte, nos por experencia e berdad di e palabranan di Salmo 126:3: “[Jehova] a haci cosnan grandi pa nos; p’esei nos ta contento.”

[Plachi na pagina 13]

Dia nos a casa, 1957

[Plachi na pagina 13]

Hunto cu mi famia na 1948: (dilanti, di robes pa drechi) Manfred, Berta, Sabine, Hannelore, Peter; (patras, di robes pa drechi) ami cu Jochen

[Plachi na pagina 15]

Un buki di tamaño chikito cu nos a uza durante e prohibicion y Stasi su ekipo di tap combersacion

[Reconocemento]

Forschungs- und Gedenkstätte NORMANNENSTRASSE

[Plachi na pagina 16]

Hunto cu mi rumannan: (dilanti, di robes pa drechi) Hannelore y Sabine; (patras, di robes pa drechi) ami, Jochen, Peter y Manfred