Pakico Identifica e Anticristo?

“Boso a tende cu anticristo ta bin”, e apostel inspira a skirbi hopi tempo pasa. (1 Juan 2:18) E palabranan ei ta masha remarcabel! Pa hopi siglo, hende a puntra nan mes kico nan ta nifica. Ken ta e anticristo? Ki tempo lo e bin? Kico lo e haci ora e bin?

E LISTA di persona acusa di ta e anticristo ta masha largo. Den pasado, personanan denomina como “anticristo” a inclui Hudiunan, papanan catolico y emperadonan Romano. Por ehempel, ora Emperador Frederick II (1194-1250) a dicidi di no participa den un Crusada na fabor di iglesia, Papa Gregorio IX a identific’e como e anticristo y a excomulg’e. Despues Inocencio IV, sucesor di Gregorio, a bolbe excomulg’e. Como contesta, Frederick a declara cu ta Inocencio tabata e anticristo.

Apostel Juan ta e unico escritor biblico cu a uza e palabra “anticristo.” E palabra ta aparece cinco biaha den dos di e cartanan cu ta carga su nomber, y e ta papia di un of hopi anticristo. Den e cuadro riba e siguiente pagina bo ta haya e versiculonan caminda e palabra ta aparece. For di e versiculonan aki, nos por mira cu e anticristo ta un mentiroso, un gañado, cu ta determina pa destrui hende su relacion cu Cristo y cu Dios. Ta p’esei e apostel a urgi su rumannan cristian: “Stimanan, no kere tur spirito [“expresionnan inspira”, NW], ma pone e spiritonan na prueba pa mira si nan ta bin di Dios, pasobra hopi profeta falso a sali bai den mundo.”—1 Juan 4:1.

Hesus tambe a duna spiertamento contra hende engañoso, of profeta falso, bisando: “[Nan] ta bin cerca boso bisti manera carne, ma di paden nan ta lobo hambra. Na nan fruta [of, obranan] boso lo conoce nan.” (Mateo 7:15, 16) Ta pa e anticristo figurativo Hesus tambe a spierta su siguidonan? Laga nos wak con nos por identifica e gañado malicioso aki.