Pregunta di Lector

Hesus a falta respet pa su mama of a papia malo cu ne na un fiesta di casamento na Cana?—Juan 2:4.

Un poco despues cu Hesus a batisa, e cu su discipelnan a ser invita pa un fiesta di casamento na Cana. Su mama tambe tabat’ei. Ora biña a caba, Maria a bisa Hesus: “Nan no tin mas biña.” Hesus a contesta su mama: “Muher, kico mi tin di haci cu bo? Mi ora no a yega ainda.”—Juan 2:1-4.

Awe, si un persona yama su mama “muher” y bis’e “kico mi tin di haci cu bo?”, hende lo considera esei un falta di respet y asta ofensivo. Pero si un hende acusa Hesus di esei, lo e no ta na haltura di e contexto cultural y linguistico di e suceso. Un comprondemento di e manera cu nan tabata uza e expresionnan aki den tempo di Bijbel lo yuda.

Relaciona cu e palabra “muher”, Vine’s Expository Dictionary of Old and New Testament Words ta declara: “Ora un persona uz’e pa dirigi su mes na un hende muher, no ta pa scual e ni pa respond’e bruto; mas bien e ta un expresion di cariño of respet.” Otro fuentenan tambe ta di acuerdo cu esaki. Por ehempel, The Anchor Bible ta bisa: “Esaki no ta un reprendemento, ni un palabra grosero, ni un indicacion di falta di cariño ... Tabata e forma normal y cortes cu Hesus a dirigi su mes na hende muher.” The New International Dictionary of New Testament Theology ta splica cu e palabra “ta ser uza como un expresion sin ningun nificacion secundario irespetuoso.” Y e Theological Dictionary of the New Testament di Gerhard Kittel ta bisa cu e uzo ei sigur “no ta irespetuoso ni ofensivo.” Pues, nos no mester conclui cu Hesus tabata bruto of sin consideracion ora el a dirigi su mes na su mama cu e palabra “muher.”—Mateo 15:28; Lucas 13:12; Juan 4:21; 19:26; 20:13, 15.

Kico nos por bisa di e expresion, “kico mi tin di haci cu bo?” Aparentemente esaki ta un dicho Hudiu comun cu ta aparece varios biaha den Bijbel. Por ehempel, na 2 Samuel 16:10 nos ta mira con David a stroba Abisai di mata Simei, bisando: “Kico mi tin di haci cu boso, o yiu hombernan di Sarvia? Si e maldiciona, y si SEÑOR a bis’e: ‘Maldiciona David.’” Mescos tambe, na 1 Reinan 17:18 nos ta lesa cu ora e viuda di Sarepta a haya sa cu su yiu a muri, el a bisa Elias: “Kico mi tin di haci cu bo, o homber di Dios? Bo a bin cerca mi pa trece mi inikidad na memoria y pa mata mi yiu!”

For di e ehempelnan di Bijbel aki, nos por mira cu e expresion “kico mi tin di haci cu bo?” ta ser uza hopi biaha, no pa mustra menosprecio of arogancia, sino pa nenga di participa den un ke otro accion proponi of sugeri of pa expresa un otro punto di bista of opinion. Kico nos por bisa e ora ei di e palabranan cu Hesus a papia cu Maria?

Ora Maria a bisa Hesus, “nan no tin mas biña”, aparentemente e no a simplemente informa Hesus di e echo ei sino a sugerie pa e haci algo tocante e asunto. Hesus a uza e dicho comun ei pa rechasa Maria su sugerencia sutil, y e palabranan cu el a agrega, “mi ora no a yega ainda”, ta yuda nos mira e motibo pakico el a haci esei.

For di tempo cu Hesus a batisa y a ser ungi na aña 29 di nos era, e tabata masha conciente cu Jehova tabata kier pa e, como e Mesias priminti, sigui un caminda di integridad cu lo a culmina den su morto, resureccion y glorificacion. Hesus di: “E Yiu di Hende no a bin pa wordo sirbi, ma pa sirbi, y pa duna su bida como prijs di rescate pa hopi.” (Mateo 20:28) Ora e tempo di su morto tabata cerca, Hesus a bisa bon cla: “E ora a yega.” (Juan 12:1, 23; 13:1) Pues, den e oracion cu el a haci e anochi prome cu su morto, el a bisa: “Tata, e ora a yega; glorifica bo Yiu, pa e Yiu glorifica bo.”  (Juan 17:1) Y finalmente, ora e multitud desordena a yega pa aresta Hesus den e hofi di Getsemani, el a lanta e apostelnan for di soño y a bisa nan: “E ora a yega; mira, e Yiu di hende ta wordo entrega den man di pecador.”—Marco 14:41.

Sinembargo, tempo di e casamento na Cana, Hesus a caba di cuminsa su ministerio como e Mesias, y su “ora” no a yega ainda. Su meta principal tabata pa haci e boluntad di su Tata den e forma y na e tempo cu su Tata a indica, y ni un hende no por a strob’e den su determinacion pa haci esei. Ora Hesus a laga su mama compronde esaki, e tabata firme, pero sigur no a falta respet p’e ni papia malo cu ne. Maria tampoco no a sinti cu su yiu a pon’e na berguensa of a ofend’e. De echo, comprondiendo e nificacion di Hesus su palabranan, Maria a bisa esnan cu tabata sirbi na e casamento: “Kico cu e bisa boso, hacie.” En bes di ignora su mama, Hesus a haci e prome milager como e Mesias—combertiendo awa den biña di calidad—demostrando asina cu e tabata balansa, ya cu el a cumpli cu e boluntad di su Tata pero na mes momento a tene cuenta cu e precupacion di su mama.—Juan 2:5-11.

[Plachi na pagina 31]

Hesus a papia cu su mama na un manera firme pero cariñoso