E Palabra di Jehova Ta Bibo

Puntonan Sobresaliente di e Buki di Isaias—I

“KEN lo mi manda y ken lo bai pa nos?” Riba e invitacion aki di Jehova Dios, Isaias, yiu homber di Amos, a contesta: “At’ami aki! Manda ami!” (Isaias 1:1; 6:8) E ora ei Dios a asign’e como profeta. Isaias su actividadnan profetico ta para den e buki biblico cu ta carga su nomber.

Skirbi pa e profeta mes, e buki di Isaias ta abarca un periodo di 46 aña, for di alrededor di aña 778 te algo despues di 732 prome cu nos era. Aunke e buki tin declaracionnan formal contra Juda, Israel y nacionnan bisiña, su tema principal no ta uno di huicio sino di ‘salbacion mediante Jehova Dios.’ (Isaias 25:9) De echo, e nomber Isaias mes ta nifica “Salbacion di Jehova.” E articulo aki lo trata puntonan sobresaliente di Isaias 1:1–35:10.

“SOLAMENTE UN RESTANTE DI NAN LO BOLBE”

(Isaias 1:1–12:6)

Bijbel no ta bisa si e mensahe profetico registra den e prome cinco capitulonan di e buki di Isaias a ser entrega na e pueblo prome cu Isaias a keda nombra como profeta of despues. (Isaias 6:6-9) Loke si ta hopi cla ta cu Juda y Jerusalem ta spiritualmente enfermo “for di plant’i pia te na cabes.” (Isaias 1:6) Ta reina hopi idolatria. Lidernan ta corupto. Muhernan a bira arogante. E hendenan no ta adora e Dios berdadero na e manera aceptabel. Isaias ta haya e encargo pa bai y papia bes tras bes cu esnan cu ta “sigui scucha” y no ta compronde y cu no kier conocemento.

E forsanan militar combina di Israel y Siria ta menasa di invadi Juda. Uzando Isaias y su yiunan como “señalnan y maraviyanan”, Jehova ta sigura Juda cu e aliansa entre Israel cu Siria lo no tin exito. (Isaias 8:18) Sinembargo, pas duradero lo bin solamente mediante e gobernacion di e “Prins di Pas.” (Isaias 9:6, 7) Jehova lo regla cuenta tambe cu Asiria, e nacion cu e ta uza como “e bara di [su] rabia.” Juda cu tempo lo bai den cautiverio, y “solamente un restante di nan lo bolbe.” (Isaias 10:5, 21, 22) Berdadero husticia lo bira un realidad bou di e gobernacion di un “spruit [simbolico cu] lo sali for di e troncon di Isai.”—Isaias 11:1.

Contesta Riba Pregunta Biblico:

1:8, 9—Den ki sentido e yiu muher di Sion lo “keda manera un cabaña den un cunucu di wendruif, manera un chosa den un cunucu di concomber”? Esaki ta nifica cu durante e invasion di Asiria, Jerusalem lo parce masha indefenso, manera un simpel cabaña den un cunucu di wendruif of manera un chosa cu facilmente por cai den otro den un cunucu di concomber. Pero Jehova lo yuda  Jerusalem y lo e no permitie bira manera Sodoma y Gomora.

1:18, NW—Kico Jehova kiermen cu e palabranan: “Bini awor, y laga nos rectifica asuntonan entre nos”? Esaki no ta un invitacion pa papia riba un asunto y yega na un acuerdo mutuo despues cu ambos partido a haci cierto concesion. Mas bien, e versiculo ta referi na e situacion den cua e Hues husto, Jehova, ta duna Israel un oportunidad pa cambia y limpia su mes.

6:8a—Dicon den e pregunta ta uza e pronomber “mi” y “nos”? E pronomber “mi” ta referi na Jehova Dios. E pronomber plural “nos” ta indica cu tin un otro persona hunto cu Jehova. Naturalmente esaki ta su “Yiu unigenito.”—Juan 1:14; 3:16.

6:11—Kico Isaias tabata kiermen ora el a puntra: “Pa cuanto tempo mas, Señor?” Isaias no tabata puntra pa cuanto tempo lo e tabatin cu entrega e mensahe di Jehova na hende indiferente. Mas bien, e kier a sa pa cuanto tempo mas e condicion spiritualmente enfermo di e hendenan lo a sigui trece deshonor pa e nomber di Dios.

7:3, 4—Dicon Jehova a salba e Rei malbado Acaz? E reinan di Siria y Israel a sera cabes pa destrona Rei Acaz di Juda y pone na su luga un rei cu lo a fungi como nan marioneta, e yiu homber di Tabeel, un homber cu no tabata descendiente di David. En realidad, e complot diabolico aki lo a interumpi e pacto di Reino cu David. Jehova a salba Acaz pa asina conserva e liña di descendiente mediante cua e “Prins di Pas” priminti lo a bin.—Isaias 9:6.

7:8—Con Efrain a ser “destrosa” denter di 65 aña? Tabata “den e dianan di Peca, Rei di Israel”, un poco despues cu Isaias a declara e profesia aki, cu a cuminsa deporta e pueblo di e reino di dies tribu y a cuminsa trece stranheronan pa habita e tera. (2 Reinan 15:29) Tur esei a sigui pa hopi tempo te den e dianan di Rei Esarhadon di Asiria, yiu y sucesor di Senakerib. (2 Reinan 17:6; Esdras 4:1, 2; Isaias 37:37, 38) E strategia Asirio aki di move hende constantemente pa y for di Samaria por a dura e periodo di 65 aña menciona na Isaias 7:8.

11:1, 10—Con Hesucristo por ta ‘un spruit for di e troncon di Isai’, y a la bes “e raiz di Isai”? (Romanonan 15:12) Hesus tabata “for di e troncon di Isai” den sentido carnal. E tabata un descendiente di Isai via David, yiu di Isai. (Mateo 1:1-6; Lucas 3:23-32) Sinembargo, e poder cu Hesus a ricibi como rei a cambia su relacion cu su antepasadonan. Como cu Hesus a haya poder y autoridad pa duna humanidad obediente bida eterno riba tera, e ta bira nan “Tata Eterno.” (Isaias 9:6) P’esei, e ta tambe “e raiz” di su antepasadonan, incluso di Isai.

Les pa Nos:

1:3. Nenga di biba di acuerdo cu loke nos Creador ta rekeri di nos ta nifica cu nos sa menos cu un buey of un burico. Di otro banda, si nos cultiva aprecio pa tur loke Jehova a haci  pa nos, nos lo no bandon’e ni comporta nos mes sin comprondemento.

1:11-13. Ceremonianan religioso hipocrita y oracionnan djis pa formalidad ta un cansancio pa Jehova. Nos accion- y oracionnan mester sali for di un curason bon motiva.

1:25-27; 2:2; 4:2, 3. Sclabitud y e desolacion di e tera di Juda lo a termina ora cu un resto arepenti lo a regresa Jerusalem y restaura adoracion berdadero. Jehova ta tene misericordia cu malechornan cu arepenti.

2:2-4. Si nos ta participa cu entusiasmo den e trabou di predica e Reino y haci discipel, nos por yuda personanan di hopi nacion siña e camindanan di pas y busca pa alcansa pas cu otro.

4:4. Jehova lo elimina, of laba kita, impuresa moral y culpa di sanger.

5:11-13. Pone limite y moderacion un banda ora di scohe recreo, ta mescos cu nenga di actua di acuerdo cu conocemento.—Romanonan 13:13.

5:21-23. Anciano- of superintendentenan cristian mester evita di ta “sabi den nan mes wowo.” Nan mester ta modera tambe den “bebemento di biña” y no mester demostra faboritismo.

11:3a. E ehempel y siñansanan di Hesus ta mustra cu tin goso den e temor di Jehova.

JEHOVA “LO TENE COMPASION DI JACOB”

(Isaias 13:1–35:10)

Capitulonan 13 pa 23 ta declaracionnan formal contra e nacionnan. Sinembargo, Jehova “lo tene compasion di Jacob” y permiti tur e tribunan di Israel regresa cas. (Isaias 14:1) E mensahe di desolacion pa Juda den capitulonan 24 pa 27 ta ser compaña pa e promesa di restauracion. Jehova ta declara su rabia contra “e burachenan di Efrain [Israel]”—pasobra nan a sera un aliansa cu Siria—y contra “e sacerdote y e profeta” di Juda, pasobra nan a purba sera un aliansa cu Asiria. (Isaias 28:1, 7) Isaias ta proclama ai contra “Ariel [Jerusalem]” pasobra nan a “baha bai Egipto” en busca di proteccion. (Isaias 29:1, BPK, nota na pia di pagina; 30:1, 2) A pesar di esei, Isaias ta predeci salbacion pa personanan cu eherce fe den Jehova.

Mescos cu un “leon jong ta gruña riba su prooi”, asina Jehova lo proteha “Sero Sion.” (Isaias 31:4) Tin un promesa tambe: “Mira, un rei lo reina cu husticia.” (Isaias 32:1) Mientras cu e menasa di Asiria contra Juda ta pone asta “e embahadornan di pas” yora amargamente, Jehova ta priminti cu su pueblo lo ser cura, “pordona pa nan inikidad.” (Isaias 33:7, 22-24) Jehova “su indignacion ta contra tur e nacionnan, y su furia ta contra tur nan ehersitonan.” (Isaias 34:2) Juda lo no keda desola. “Tera seco y desierto lo ta contento, y Araba lo regociha y floria manera rosa.”—Isaias 35:1.

Contesta Riba Pregunta Biblico:

13:17—Den ki sentido e Medonan no tabatin interes den plata ni placer den oro? E Medonan y e Personan a duna mucho mas balor na e gloria di conkista cu na e botin di guera. Esaki a resulta di ta berdad den e caso di Ciro, kende a duna e exiliadonan cu tabata bai cas bek e articulonan di oro y plata cu Nabucodonosor a sakea for di e tempel di Jehova.

14:1, 2—Con e pueblo di Jehova ‘lo a captura esnan cu antes a captura nan, y goberna riba esnan cu a oprimi nan’? Esaki a  cumpli den e caso di personanan manera Daniel, kende tabatin un puesto halto den Babilonia bou di e Medo- y Personan; Ester, kende a bira un reina Perso; y Mardokeo, kende a keda nombra como prome minister di e Imperio Perso.

20:2-5—Di berdad Isaias a cana rond completamente sunu durante tres aña? Isaias podise a kita su paña djariba y a cana rond ‘cu tiki paña bisti.’ E palabra Hebreo traduci como “sunu” por referi tambe na un hende cu ta parcialmente bisti of cu tin tiki paña bisti.—2 Samuel 6:14, 20.

21:1—Ta cua region Bijbel ta yama “desierto na lama”? Aunke Babilonia no tabata situa cerca di ningun lama, Bijbel ta referi na dje den e manera aki. Ta asina debi cu tur aña Riu Eufrates y Riu Tigris a desborda y nan awanan a inunda e region, creando un “lama” di lodo.

24:13-16—Con e Hudiunan lo a bira ‘den e tera meimei di e pueblonan manera ta sacudi palo di oleifi, manera fruta cu ta keda atras despues di cosecha di wendruif’? Mescos cu ta laga algun fruta na un palo of na un rama di wendruif despues di cosecha, asina tambe un tiki hende so lo a sobrevivi e destruccion di Jerusalem y Juda. Na unda cu e sobrevivientenan lo a ser deporta, sea ta “pariba” [na Babilonia cu ta keda den oost] of na “e teranan na costa di lama [Mediteraneo]”, nan lo a glorifica Jehova.

24:21—Ken ta “e ehersito di shelo, den haltura” y “e reinan di tera”? “E ehersito di shelo” lo por ta referi na e forsanan spiritual malbado. Pues “e reinan di tera” ta e gobernantenan aki na tera riba ken e demoñonan tin un gran influencia.—1 Juan 5:19.

25:7—Kico ta “e velo cu ta tapa tur pueblo, si, e mantel cu ta habri over di tur nacion”? E comparacion aki ta hala atencion na dos enemigo grandi di humanidad: pica y morto.

Les pa Nos:

13:20-22; 14:22, 23; 21:1-9. Jehova su palabra profetico semper ta cumpli, manera a sosode den caso di Babilonia.

17:7, 8. Aunke mayoria di hende den Israel no a scucha, tabatin algun persona cu a acudi na Jehova. Asina tambe, tin hende den cristiandad cu ta reacciona faborablemente riba e mensahe di Reino.

28:1-6. Israel lo a cai den man di Asiria, pero Dios lo a percura pa personanan fiel sobrevivi. E huicionan di Jehova no ta laga hende husto sin speransa.

28:23-29. Jehova ta reahusta personanan sincero segun nan necesidad- y circunstancianan specifico.

30:15. Pa nos haya salbacion cerca Jehova, nos mester demostra fe y ‘sosega’, es decir no bai busca salbacion pa medio di esfuersonan humano. Ora nos ta keda “den kietud”, es decir, trankil y sin miedo, nos ta demostra tambe cu nos ta confia den Jehova su capasidad di proteha nos.

30:20, 21. Nos ta “mira” Jehova y ta “tende” su bos di salbacion ora nos ta obedece loke e ta bisa mediante su Palabra inspira, Bijbel, y mediante “e esclabo fiel y prudente.”—Mateo 24:45.

E Profesia di Isaias Ta Fortifica Nos Confiansa den e Palabra di Dios

Esta gradicido nos por ta pa e mensahe di Dios den e buki di Isaias! E profesianan cu a cumpli caba ta fortifica nos confiansa cu e ‘palabra cu ta sali for di Jehova su boca, lo no bolbe bashi cerca dje.’—Isaias 55:11.

Kico di e profesianan Mesianico, manera esnan cu nos ta haya na Isaias 9:7 y 11:1-5, 10? Acaso nan no ta fortifica nos fe den Jehova su provision pa salba nos? E buki ta contene tambe profesianan di cua nan cumplimento principal ta tumando luga den nos tempo of tin cu tuma luga ainda. (Isaias 2:2-4; 11:6-9; 25:6-8; 32:1, 2) Si, e buki di Isaias ta duna nos mas prueba cu “e palabra di Dios ta bibo”!—Hebreonan 4:12.

[Plachi na pagina 8]

Isaias cu su yiunan tabata manera “señalnan y maraviyanan den Israel”

[Plachi na pagina 8, 9]

Jerusalem lo a bira “manera un cabaña den un cunucu di wendruif”

[Plachi na pagina 10]

Con hende di e nacionnan ta haya yudansa pa “bati nan spadanan traha ploeg cu nan”?