Stima e Dios Cu Ta Stima Bo
Stima e Dios Cu Ta Stima Bo
“Stima SEÑOR bo Dios cu henter bo curason, y cu henter bo alma, y cu henter bo mente.”—MATEO 22:37.
1, 2. Kico lo por tabatin tras di e pregunta tocante e mandamento di mas grandi?
APARENTEMENTE e farizeonan den tempo di Hesus a debati ampliamente riba un pregunta. Cua di e mas cu 600 leinan di e Lei di Moises tabata esun di mas importante? Tabata un lei cu tabatin di aber cu sacrificio? Al fin y al cabo, nan tabata haci sacrificio pa ricibi pordon di pica y pa ofrece gradicimento na Dios. Of ta e lei tocante circuncision tabata e lei supremo? Esei tambe tabata importante, ya cu circuncision tabata un señal di e aliansa cu Jehova a sera cu Abraham.—Genesis 17:9-13.
2 Di otro banda, aparentemente esnan cu a pega na tradicion a rasona cu maske algun lei por a parce di tin menos peso, tabata un kibocacion pa considera un mandamento mas importante cu otro ya cu tur lei cu Dios a duna tabata importante. E farizeonan a dicidi di presenta e pregunta controversial aki na Hesus. Podise e lo a bisa algo cu lo por a pon’e perde su credibilidad. Un di nan a acerca Hesus y a puntr’e: “Cua ta e mandamento di mas grandi di Lei?”—Mateo 22:34-36.
3. Kico segun Hesus tabata e mandamento di mas grandi?
3 E contesta cu Hesus a duna ta di gran importancia pa nos awe. Den su contesta, el a resumi loke semper tabata y loke semper lo ta e esencia di adoracion berdadero. Citando for di Deuteronomio 6:5, Hesus a bisa: “‘Stima SEÑOR bo Dios cu henter bo curason, y cu henter bo alma, y cu henter bo mente.’ Esaki ta e gran mandamento y e di prome.” Aunke e farizeo a puntra pa djis un mandamento, Hesus a dun’e un mas. Citando for di Levitico 19:18, el a bisa: “E di dos ta semehante: ‘Stima bo prohimo manera bo mes.’” Despues Hesus a indica cu e dos leinan aki a abarca henter e adoracion puro. Cu e meta di stroba cualkier intento pa pidie menciona e otro leinan den ordo di importancia, el a conclui: “Riba e dos mandamentonan aki henter e Lei y e Profetanan ta basa.” (Mateo 22:37-40) Den e articulo aki, nos lo considera e mandamento di mas grandi. Dicon nos tin cu stima Dios? Con nos ta mustra cu nos ta stim’e? Y con nos por cultiva e amor ei? Ta hopi importante pa haya contesta riba e preguntanan aki pasobra pa nos agrada Jehova, nos tin cu stim’e cu henter nos curason, alma y mente.
E Importancia di Amor
4, 5. (a) Pakico e farizeo no a keda sorprendi cu loke Hesus a bis’e? (b) Kico Dios ta balora mas cu sacrificio y ofrenda?
4 Ta parce cu e farizeo no a keda molestia ni sorprendi cu e contesta cu Hesus a dun’e riba e pregunta cu el a haci. E tabata sa cu amor pa Deuteronomio 6:4-9, for di cua Hesus a cita. Segun e relato paralelo den Marco, e ora ei e farizeo a bisa Hesus: “Corecto, Maestro, bo a papia berdad, pasobra ta un Dios tin; y fuera di dje no tin ni un otro. Y pa stim’e cu henter bo curason y cu tur bo comprondemento y cu tur bo forsa, y pa stima bo prohimo manera bo mes, ta bal mas cu tur ofrenda kima y sacrificio.”—Marco 12:32, 33.
Dios tabata un aspecto esencial di adoracion berdadero, aunke hopi hende no a manifest’e. Den e sinagoganan, nan tabatin e custumber di recita e Shema (un oracion Hebreo), of di haci confesion di fe na bos halto, y esaki a inclui5 En berdad, aunke e Lei a rekeri ofrenda kima y sacrificio, loke ta conta realmente pa Dios ta ora su sirbidornan tin un curason motiva pa amor. Un mofi ofreci na Dios cu amor y devocion tabata bal mas p’e cu miles di chubat’i carne duna cu un motivacion robes. (Mikeas 6:6-8) Corda e relato di e viuda den necesidad cu Hesus a observa den e tempel na Jerusalem. Cu e dos monedanan chikito cu el a tira den e caha di ofrenda lo e no por a cumpra ni un solo mofi. Pero e contribucion ei, duna cu amor sincero pa Jehova, a nifica mas pa Jehova cu e donacionnan grandi cu hende rico a haci di nan abundancia. (Marco 12:41-44) Ta un animacion pa sa cu Jehova ta duna mas balor na loke nos tur por expresa, sin importa nos circunstancianan, esta nos amor p’e!
6. Kico Pablo a skirbi tocante e importancia di amor?
6 Enfatisando e importancia di amor den adoracion berdadero, apostel Pablo a skirbi: “Maske mi papia lenga di hende y di angel, ma mi no tin amor, mi a bira manera un gong cu ta zona of un cimbal cu ta resona. Y si mi tin don di profesia y ta compronde tur misterio y tur conocemento; y si mi tin tur fe pa kita seronan for di nan luga, ma mi no tin amor, mi no ta nada. Y si mi duna tur mi propiedad pa duna e pobernan di come, y si mi entrega mi curpa pa wordo kima, ma mi no tin amor, esei no ta sirbi mi di nada.” (1 Corintionan 13:1-3) Ta bon cla anto cu pa nos adoracion agrada Dios, nos mester tin amor. Pero con nos ta mustra nos amor pa Jehova?
Con Nos Ta Mustra Nos Amor pa Jehova
7, 8. Con nos por mustra nos amor pa Jehova?
7 Hopi hende ta kere cu amor ta un emocion riba cua nos no tin mucho control, manera ora un persona tin djis un interes romantico den un otro. Pero, berdadero amor no ta simplemente algo cu nos ta sinti. E ta ser caracterisa y defini pa accion, no pa sintimento. Bijbel ta referi na amor como “un caminda mas excelente” y como algo cu nos ta “aspira.” (1 Corintionan 12:31; 14:1) E Scritura ta anima cristiannan pa stima, no solamente “cu palabra ni cu lenga, ma cu echo y berdad.”—1 Juan 3:18.
8 Amor pa Dios ta impulsa nos pa haci loke ta agrad’e y pa defende y apoya su soberania cu palabra y accion. E ta motiva nos pa evita di stima e mundo y su camindanan malbado. (1 Juan 2:15, 16) Hende cu ta stima Dios ta odia loke ta malo. (Salmo 97:10) Amor pa Dios ta ensera tambe amor pa prohimo, locual nos lo considera den e siguiente articulo. Ademas, amor pa Dios ta rekeri obediencia. Bijbel ta bisa: “Esaki ta e amor di Dios, cu nos ta warda su mandamentonan.”—1 Juan 5:3.
9. Con Hesus a demostra su amor pa Dios?
9 Hesus a demostra perfectamente kico ta nifica stima Dios. Amor a motiv’e pa bandona su hogar celestial y biba como hende riba tera. Esei a impuls’e pa glorifica su Tata pa medio di e cosnan cu el a haci y siña hende. Amor a motiv’e pa ta “obedecido te na morto.” (Filipensenan 2:8) E obediencia ei—un expresion di su amor—a habri caminda pa hende fiel haya un posicion husto dilanti Dios. Pablo a skirbi: “Dor di desobediencia di esun hende [Adam] hopi a wordo haci pecador, asina tambe dor di obediencia di esun [Cristo Hesus] hopi lo wordo haci husto.”—Romanonan 5:19.
10. Pakico amor pa Dios ta ensera obediencia?
10 Mescos cu Hesus, nos ta mustra nos amor pa medio di nos obediencia na Dios. Juan, e apostel stima di Hesus, a skirbi: “Esaki ta amor, cu nos mester cana segun su mandamentonan.” (2 Juan 6) Esnan cu di berdad ta stima Jehova ta anhela su guia. Nan ta reconoce cu nan no por dirigi nan mes pasonan cu exito, p’esei nan ta confia den e sabiduria di Dios y ta somete nan na su guia amoroso. (Jeremias 10:23) Nan ta manera e hendenan di mente noble di Berea di antiguedad cu a acepta e mensahe di Dios cu “anhelo mental”, pues cu tabatin un deseo profundo di haci e boluntad di Dios. (Echonan 17:11, NW) Nan a analisa e Scritura cuidadosamente pa compronde e boluntad di Dios mas plenamente, locual a yuda nan expresa amor den mas actonan di obediencia.
11. Kico kiermen stima Dios cu henter nos curason, mente, alma y forsa?
11 Manera Hesus a bisa, amor pa Dios ta ensera henter nos curason, mente, alma y forsa. (Marco 12:30) E amor ei ta sali di curason—e ta ensera nos sintimento-, deseo- y pensamentonan mas profundo—y nos tin e deseo ferviente pa agrada Jehova. Nos ta stima tambe cu nos mente. Nos devocion no ta algo ciego; nos a siña conoce Jehova, su cualidadnan, normanan y proposito. Nos ta uza nos alma, henter nos ser y e bida cu nos tin, pa sirbie y alab’e. Y nos ta uza nos forsa cu e meta ei tambe.
Dicon Nos Tin Cu Stima Jehova
12. Pakico Dios ta rekeri pa nos stim’e?
12 Un motibo dicon nos tin cu stima Jehova ta pasobra e ta rekeri pa nos refleha su cualidadnan. Dios ta e fuente y tambe e ehempel supremo di amor. Apostel Juan a skirbi bou di inspiracion: “Dios ta amor.” (1 Juan 4:8) Hende a ser crea den imagen di Dios; nos a ser traha pa stima. De echo, e soberania di Jehova ta basa riba amor. E kier como subdito hende cu ta sirbie pa motibo cu nan ta stim’e y cu ta anhela su forma husto di goberna. Realmente, amor ta esencial pa e pas y harmonia di henter creacion.
13. (a) Pakico Hesus a bisa e Hudiunan: ‘Stima Jehova bo Dios’? (b) Pakico ta rasonabel cu Jehova ta spera cu nos ta stim’e?
13 Un otro motibo pakico nos ta stima Jehova ta pasobra nos ta gradicido pa loke el a haci pa nos. Corda cu Hesus a bisa e Hudiunan: ‘Stima Jehova bo Dios.’ E no a manda nan stima un ser divino cu tabata leu y desconoci. Nan mester a stima e Persona cu a revela su amor na nan. Jehova tabata nan Dios. E tabata Esun cu a saca nan for di Egipto pa drenta e Tera Priminti, Esun cu a proteha nan, sostene nan y stima nan, Esun cu a disciplina nan den amor. Te awe, Jehova ta nos Dios, esun cu a duna su Yiu como rescate pa nos por haya bida eterno. Pues, ta masha rasonabel cu Jehova ta spera cu nos tambe ta stim’e! Nos amor ta un reaccion riba su amor; e ta spera cu nos ta stima e Dios cu ta stima nos. Nos amor ta pa Esun cu “a stima nos prome.”—1 Juan 4:19.
14. Den ki manera e amor di Jehova ta manera esun di un mayor amoroso?
14 E amor cu Jehova tin pa humanidad ta manera esun cu un mayor amoroso tin pa su yiunan. Aunke mayornan amoroso ta imperfecto, pa añanan largo nan ta lucha pa cria nan yiunan, haciendo entre otro hopi sacrificio material. Mayornan ta instrui, anima, sostene y disciplina nan yiunan pasobra nan kier pa nan ta felis y pa bai bon cu nan. Kico mayornan ta desea a cambio? Nan kier pa nan yiunan stima nan y tuma na pecho loke nan a siña nan pa nan mes bon. Awor, no ta rasonabel cu nos Tata celestial perfecto ta spera pa nos mustra aprecio amoroso pa tur loke el a haci pa nos?
Cultiva Amor pa Dios
15. Kico ta e prome cos cu nos tin cu haci pa cultiva amor pa Dios?
15 Aunke nunca nos no a mira Dios ni tende su stem, e ta invita nos pa drenta den un relacion cu ne basa riba amor. (Juan 1:18; Santiago 4:8) Con nos por haci esei? E prome cos cu nos tin cu haci pa nos por stima un persona ta conoc’e; ta dificil pa stima un persona cu nos no sa nada di dje. Jehova a percura su Palabra, Bijbel, pa nos por siña tocante dje. P’esei Jehova, mediante su organisacion, ta anima nos pa lesa Bijbel regularmente. Ta Bijbel ta siña nos tocante Dios, su cualidadnan, su personalidad, y tambe di su trato cu hende durante miles di aña. Segun cu nos ta medita riba e relatonan ei, nos aprecio y amor p’e lo crece.—Romanonan 15:4.
16. Ora nos reflexiona riba e ministerio di Hesus, con esei ta aumenta nos amor pa Dios?
Juan 14:9) E compasion cu Hesus a demostra ora el a resusita e unico yiu di un viuda no ta conmove bo? (Lucas 7:11-15) E echo cu e Yiu di Dios—e homber di mas grandi cu a yega di biba—humildemente a laba pia di su discipelnan no ta atrae bo? (Juan 13:3-5) Aunke e tabata mas grandi y mas sabi cu cualkier otro hende, el a haci su mes acercabel pa tur hende, incluso pa mucha; esei no ta impresiona bo? (Marco 10:13, 14) Ora nos medita cu aprecio riba e cosnan aki, nos ta bira manera e cristiannan di kende Pedro a skirbi: “Maske boso no a mir’e [esta, Hesus], boso ta stim’e.” (1 Pedro 1:8) Segun cu nos amor pa Hesus ta crece, nos amor pa Jehova tambe ta crece.
16 Algo importante cu por yuda nos amor pa Jehova crece ta ora nos ta reflexiona riba e bida y ministerio di Hesus. Al fin y al cabo, Hesus a imita su Tata asina perfectamente cu e por a bisa: “Esun cu a mira mi a mira e Tata.” (17, 18. Meditacion riba ki provisionnan amoroso di Jehova por aumenta nos amor p’e?
17 Otro cos cu por yuda nos amor pa Dios crece ta ora nos medita riba e abundancia di su provisionnan amoroso cu ta permiti nos disfruta di bida—e bunitesa di creacion, e variedad sin fin di cosnan delicioso pa come, e compañerismo caluroso di bon amigo y tambe hopi otro deleite cu ta duna nos placer y satisfaccion. (Echonan 14:17) Mas nos siña tocante nos Dios, mas motibo nos tin pa gradicie pa su bondad y generosidad sin limite. Pensa riba tur e cosnan cu Jehova a haci pa bo personalmente. Bo no ta haya cu e merece bo amor?
18 Un di e tantisimo donnan cu Dios a duna hende ta e oportunidad cu nos tin di acerc’e den oracion na cualkier momento, sabiendo cu e “Scuchador di oracion” ta tende nos. (Salmo 65:2, BPK) Jehova a delega na su Yiu stima e autoridad di goberna y husga. Ma pa loke ta trata tende oracion, esei si e no a delega na ni un otro persona, ni na su Yiu. E mes personalmente ta scucha nos oracionnan. E interes personal amoroso cu Jehova ta mustra asina ei ta hala nos cerca dje.
19. Ki promesanan di Jehova ta atrae nos na dje?
19 Algo mas cu ta atrae nos na Jehova ta ora nos pensa riba loke e tin prepara pa humanidad den futuro. El a priminti di pone fin na enfermedad, tristesa y morto. (Revelacion 21:3, 4) Unabes humanidad alcansa perfeccion, ni un hende mas lo no sufri di depresion, desanimacion of tragedia. Lo no tin hamber, pobresa ni guera mas. (Salmo 46:9; 72:16) Tera lo ser transforma den un paradijs. (Lucas 23:43) Jehova lo trece e bendicionnan aki, no pa motibo cu e ta obliga di hacie, sino pa motibo cu e ta stima nos.
20. Kico Moises a bisa tocante e beneficionan di stima Jehova?
20 Pues anto, nos tin motibonan combencente pa stima nos Dios y pa laga e amor ei crece. Abo lo sigui fortalece bo amor pa Dios y permitie dirigi bo pasonan? Esei ta keda na abo. Moises a reconoce e beneficionan di cultiva y mantene amor pa Jehova. Moises a bisa e Israelitanan di hopi tempo pasa: “Scohe bida pa bo biba, abo y bo desendientenan, dor di stima SEÑOR bo Dios, dor di obedece su bos y dor di tene duro na dje; pasobra esaki ta bo bida y e largura di bo dianan.”—Deuteronomio 30:19, 20.
Bo Ta Corda?
• Pakico ta esencial pa nos stima Jehova?
• Con nos por mustra amor pa Dios?
• Ki motibo nos tin pa stima Jehova?
• Con nos por cultiva amor pa Dios?
[Preguntanan di Estudio]
[Plachi na pagina 20]
Jehova ta duna hopi balor na loke nos tur por expresa, esta nos amor p’e
[Plachi na pagina 23]
“Esun cu a mira mi a mira e Tata.” —Juan 14:9