Ta Bale la Pena pa Ta Honesto

FALTA di honestidad ta existi for di tempo di hofi di Eden. Sinembargo, te ainda mayoria cultura y sociedad ta duna balor na honestidad y ta considera gañamento y engaño como algo indeseabel y censurabel. Nos por ta orguyoso ora hende ta considera nos digno di confiansa. Pero mas y mas hende ta haya cu pa sobrevivi den e mundo moderno djawe nan mester ta deshonesto. Kico abo ta pensa di esei? Ta bale la pena pa ta honesto? A base di ki normanan bo ta dicidi cua comportacion ta honesto y cua no?

Pa agrada Dios, nos mester ta honesto den tur loke nos ta papia y haci. Apostel Pablo a conseha su rumannan cristian: “Cada un di boso papia berdad cu su prohimo.” (Efesionan 4:25) Pablo a skirbi tambe: “Nos ta desea na comporta nos mes honradamente den tur cos.” (Hebreonan 13:18, NW) E motibo pakico nos ta honesto no ta pa haya elogio cerca otro hende. Nos ta honesto pasobra nos ta respeta nos Creador y kier agrad’e.

No Sconde Ken Bo Ta

Den hopi pais, hende ta duna informacion falso tocante nan mes pa saca cierto beneficio den bida. Nan ta obtene documento, diploma y papel di identidad falso pa drenta un pais ilegalmente of pa haya un trabou of un puesto pa cua nan no ta cualifica. Tin mayor ta falsifica papel di nacemento di nan yiunan pa nan por keda mas largo na scol.

Sinembargo, pa agrada Dios nos no mag gaña. Bijbel ta bisa cu Jehova ta e “Dios di berdad” y cu e ta spera di esnan cu tin amistad intimo cu ne cu nan ta honesto. (Salmo 31:5, BPK) Si nos kier mantene un bon relacion cu Jehova, nos no por imita “hombernan gañado”, cu ta ‘hipocrita’, scondiendo ken nan ta.—Salmo 26:4.

Ta comun tambe pa hende sconde e berdad ora nan mira cu probablemente nan lo ser disciplina pa malecho. Asta den e congregacion cristian un persona lo por ta inclina pa haci esei. Por ehempel, den un congregacion un yoncuman a admiti na e ancianonan cu el a comete cierto picanan. Sinembargo, e no a admiti cu el a horta tambe, maske tabatin prueba contra dje. Cu tempo esei a sali na cla toch y mester a expuls’e for di e congregacion. Lo no tabata mas sabi di su parti pa ta completamente honesto y asina haya yudansa pa restaura su relacion precioso cu Jehova? De echo, Bijbel ta bisa: “No menosprecia e disciplina di SEÑOR, ni desmaya ora  cu e reprende bo; pasobra esnan cu SEÑOR ta stima, e ta disciplina.”—Hebreonan 12:5, 6.

Tin biaha, un ruman homber cu ta desea di haya responsabilidad den congregacion kisas ta purba sconde problemanan personal of mal conducta di pasado. Por ehempel, ora e ta yena un solicitud pa un privilegio special di sirbishi, kisas e no ta duna contestanan completo riba preguntanan relaciona cu salud y moralidad, pensando cu si e skirbi e berdad esei lo por descualific’e. Podise e ta rasona: ‘Mi no a echt gaña.’ Pero e tabata realmente franco y honesto? Wak e punto cu Proverbionan 3:32 ta trece dilanti: “E hende perverso [“tramposo”, NW] ta un abominacion pa SEÑOR, ma e tin comunion intimo cu e hende recto.”

Ser honesto ta nifica, na prome luga, ser honesto cu nos mes. Hopi biaha nos ta kere loke nos kier kere en bes di loke ta corecto of berdad. Ta masha facil pa nos tira falta riba otro hende! Por ehempel, Rei Saul a purba hustifica su desobediencia tirando falta riba otro hende. Consecuentemente, Jehova a rechas’e como Rei. (1 Samuel 15:20-23) Ki un contraste grandi cu Rei David, kende a bisa Jehova den oracion: “Mi a admiti mi pica na bo, y mi inikidad mi no a sconde; mi a bisa: ‘Lo mi confesa mi transgresionnan na SEÑOR’; y bo a pordona e culpa di mi pica.”—Salmo 32:5.

 Honestidad Ta Trece Bendicion

Honestidad, of falta di honestidad, ta influencia e manera cu otro hende ta mira bo. Si hende haya sa cu bo a gaña nan maske ta un biaha so, lo bo perde nan confiansa, y bo no ta haya esei bek facilmente. Di otro banda, si semper bo ta papia e berdad y ta honesto, lo bo crea e reputacion di ta un persona integro, digno di confiansa. Testigonan di Jehova a gana tal reputacion. Considera algun ehempel.

Un director di un compania a realisa cu hopi di su empleadonan tabata horta e compania, p’esei el a pidi intervencion di polis. Ora el a tende cu entre esnan cu polis a aresta tabatin un empleado cu ta Testigo di Jehova, el a bai polis pa nan a saca e Testigo liber inmediatamente. Dicon? Pasobra e director tabata sa cu e persona aki ta un trahado honesto y cu e ta inocente. E Testigo a keda cu su trabou, mientras cu e otro empleadonan a haya nan retiro. E Testigo su rumannan di congregacion a alegra, sabiendo cu su conducta a trece honor pa e nomber di Jehova.

Hende ta tuma nota di conducta excelente. Den un comunidad Africano, mester a drecha un brug cu tabata pasa riba un labado grandi pasobra ladron a bai cu algun di su tablanan. E habitantenan local a dicidi di colecta placa pa remplasa e tablanan, pero ta ken nan por a confia pa maneha e fondonan? Tur hende tabata di acuerdo cu mester ta un di e Testigonan di Jehova.

Ora cu disturbionan politico y etnico a surgi na un pais Africano, un Testigo cu tabata traha como accountant pa un compania internacional a keda transferi pa su empresa, ya cu su bida tabata na peliger. E compania a haci areglo pa e traha pa hopi luna den un otro pais riba nan gastonan te ora cu e situacion a calma. Dicon? Pasobra anteriormente el a nenga di colabora cu personanan cu tabata traha un complot pa estafa e compania. Gerente di e compania tabata na haltura di su reputacion di honestidad impecabel. Nan lo tabata dispuesto pa yuda e empleado aki si e tabata conoci pa practicanan dudoso?

Proverbionan 20:7 ta declara: “Un hende husto ... ta cana den su integridad.” Un persona honesto ta un persona di integridad. Nunca e no ta estafa ni gaña su prohimo. No ta asina bo ta desea pa hende trata bo? Honestidad ta un parti esencial di adoracion berdadero. E ta un expresion di nos amor pa Dios y pa prohimo. Ora nos ta honesto, nos ta demostra nos deseo di sigui e principio di conducta cu Hesus a expresa: “Tur loke boso kier pa hende haci pa boso, haci mescos pa nan.”—Mateo 7:12; 22:36-39.

Claro cu no ta tur ora ta cumbini nos pa ta honesto, pero e consenshi limpi cu esei ta produci ta bal hopi mas cu cualkier resultado desagradabel. Riba termino largo, ser honesto y recto ta duna mayor beneficio. Echo ta cu un bon relacion cu Jehova ta algo preciosisimo. Pakico daña esei dor di recori na algo deshonesto afin di scapa cara of pa haya un of otro bentaha ilegal? Sea cual sea e dificultad cu kisas nos ta enfrenta, nos por tin confiansa den e palabranan di e salmista: “Bendiciona ta e hende cu ta pone su confiansa den [Jehova], y cu no ta mira riba e orguyosonan, ni riba esnan cu ta desvia bai tras di mentira.”—Salmo 40:4.

[Plachi na pagina 18]

Cristiannan berdadero no ta cumpra ni uza documentonan falsifica