Bo Ta Corda?

Bo a disfruta di e edicionnan recien di E Toren di Vigilancia? Wel, wak si bo por contesta e siguiente preguntanan:

• Kico por yuda bo si un ser keri di bo bandona Jehova?

Fortalece bo mes y otro miembronan fiel di bo famia. Keda completamente ocupa cu actividadnan spiritual. Haci bo mes disponibel pa yuda otro hende. Nunca perde e speransa cu e ser keri por bini bek. No culpa bo mes. Respeta Dios su areglo pa disciplina y papia cu bo amigonan di bo sintimentonan.—1/9, pagina 18-21.

• Den ki dos manera e Scritura ta yuda identifica “e ultimo dianan”?

Bijbel ta papia di sucesonan cu lo tuma luga durante “e conclusion di e sistema di cosnan.” (Mateo 24:3, 7, 8, NW; Lucas 21:11) Tambe e ta describi cambio den actitud y accion di hende cu ta biba durante “e ultimo dianan.” (2 Timoteo 3:1-5) Ta bon pa nota cu e bon nobo mester wordo predica durante e tempo aki.—15/9, pagina 4-6.

• Ki responsabilidad e congregacion tin si un cristian cu ta stuur un auto haya su mes den un accidente cu ta causa morto di otro hende?

Ora e ancianonan ta investiga e asunto kisas nan ta haya cu e chauffeur no tin culpa di sanger pasobra e tabatin masha poco of ningun control riba e circunstancianan cu a resulta den e accidente fatal. Pero si e ruman cristian tin culpa di sanger y e ta arepenti, lo e ricibi reprendemento basa riba e Scritura y lo perde privilegio den e congregacion.—15/9, pagina 30.

• Pakico bida eterno no ta depende di avancenan cientifico?

Tin varios esfuerso cientifico pa alarga bida di hende, manera e intentonan pa extende e cantidad di biaha cu celnan ta renova nan mes of haci clonacion terapeutico pa por duna pashentnan organonan nobo y compatibel. Pero Bijbel ta mustra cu e unico medio via cua hende por haya bida eterno ta e rescate di Hesus.—1/10, pagina 3-5.

• Bañamento ritual di Hudiu tabata predecesor di bautismo cristian?

No. E Hudiunan tabata efectua ritonan di purificacion riba nan mes curpa, locual e bautismo di Juan no a exigi. E purificacion cu e Lei di Moises a rekeri mester a ser ripiti, pero bautismo cristian ta ser efectua un biaha so.—15/10, pagina 12-13.

• Kico ta e Scol di Entrenamento Ministerial?

Esei ta un curso di ocho siman pa anciano y sirbidor ministerial di congregacion cu ta soltero y cu ta den un posicion pa bai sirbi caminda tin mas necesidad. Esei por ta cu e congregacion for di cua nan a bini, otro caminda den e mesun pais of den un otro pais.—15/11, pagina 10-11.

• Kico of ken ta e anticristo menciona na 1 Juan 2:18; 4:3?

Den un sentido amplio, “anticristo” ta referi na tur persona cu ta opone of cu ta pretende di ta Cristo of su representantenan. Tanto e palabranan di Hesus como di Juan ta indica cu e anticristo ta un grupo cu ta consisti di hopi anticristo individual cu ta plama engaño religioso y cu ta rechasa e Reino di Dios.—1/12, pagina 4-6.