E Ambiente di Pasco Por Reina Henter Aña?

“Gloria den haltura na Dios, y riba tera pas entre hende di bon boluntad.”—Lucas 2:14, NW.

MIYONES di hende ta conoci cu e palabranan aki di e angelnan di Dios cu a anuncia e nacemento di Hesus na e wardadonan di carne cu tabata cuida nan bestianan anochi. Rond di e fecha cu iglesianan ta pretende cu Hesus a nace, hopi hende cu ta cristian pa nomber ta haci un esfuerso special pa comporta nan mes mihor. Durante e temporada ei hende ta masha interesa den goso, pas y bon boluntad—cualidadnan menciona den e proclamacion angelical—y esaki ta loke hopi biaha nan ta referi na dje como e ambiente di Pasco.

E sintimentonan positivo ei ta atrae asta hende cu no ta celebra Pasco como un fiesta religioso. Nan tambe ta gusta e calor humano cu e celebracion ei aparentemente ta promove. Na paisnan caminda e temporada di Pasco ta nifica dia liber di scol of di trabou, e dianan di fiesta ta duna hende un oportunidad pa relaha, pa pasa tempo hunto cu nan famia y amigonan, of simplemente pa pasa bon. Claro cu hopi hende sincero ta considera Pasco principalmente como un tempo pa honra Hesucristo.

Sea cual sea e nificacion cu hende ta duna na Pasco, mayoria di nan ta cla pa admiti cu hopi biaha e sintimentonan positivo cu e dianan di fiesta ta produci ta di corto duracion. Rapidamente hende ta bai bek na nan comportacion normal. Un carta titula “E Ambiente di Pasco”, publica pa Royal Bank di Canada, a declara: “Hopi hende cu ta yama nan mes ‘cristian’ ta purba biba segun e nomber ei pa solamente un par di siman tur aña, mustrando masha bon boluntad na nan prohimo te cu Aña Nobo, despues di cua nan ta reanuda nan bida egoista estilo cacho ta come cacho y nan actitud di no tin cu nes cu e bienestar di otro sernan humano.” E carta ei a sigui bisa cu loke ta “basicamente robes” cu e ambiente di Pasco ta cu hende no ta bib’e “henter aña.”

Sea cu bo ta di acuerdo cu e analisis ei of no, e ta lanta preguntanan importante. Lo yega un dia cu hende lo por manifesta generosidad y comprension na otro riba un base permanente? Tin un speransa realistico cu e proclamacion angelical cu a tuma luga e anochi cu Hesus a nace lo cumpli? Of e speransa pa berdadero pas ta nada mas cu un soño?