‘E Gran Dia di Jehova Ta Cerca’

‘E gran dia di Jehova ta cerca; e ta cerca y e ta bin masha lihe mes.’ —SOFONIAS 1:14.

1, 2. (a) Ki dia special cristiannan ta spera? (b) Ki preguntanan nos tin cu haci, y pakico?

UN MUCHA muher cu cara radiante ta spera ansiosamente riba e dia di su casamento. Un mama na estado ta anhela pa su baby nace. Un obrero cansa ta desea masha pa su vakantie tan spera cuminsa pa caba. Kico e personanan aki tin en comun? Nan tur ta warda riba un dia special; un dia cu lo causa un impacto den nan bida. Nan ta sumamente emociona, pero cada un tin sintimentonan diferente. Dado momento, e dia cu nan ta anticipa lo yega y ora ta asina leu, nan ta spera di ta prepara p’e.

² Awe, cristiannan berdadero tambe ta spera ansiosamente riba yegada di un dia special. Ta trata aki di e gran ‘dia di Jehova.’ (Isaias 13:9; Joel 2:1; 2 Pedro 3:12) Kico e benidero ‘dia di Jehova’ aki ta, y ki consecuencia lo e tin pa humanidad ora e yega? Es mas, con nos por haci sigur cu nos ta prepara pa ora e yega? Ta masha importante pa nos busca contesta riba e preguntanan aki awor pasobra tur cos ta indica cu e siguiente palabranan di Bijbel lo cumpli sigur: ‘E gran dia di Jehova ta cerca; e ta cerca y e ta bin masha lihe mes.’—Sofonias 1:14.

‘E Gran Dia di Jehova’

3. Kico ta ‘e gran dia di Jehova’?

³ Kico ta ‘e gran dia di Jehova’? Den e Scritura e expresion ‘e dia di Jehova’ ta referi na temponan special ora cu Jehova a ehecuta huicio contra su enemigonan y a glorifica su gran nomber. Tanto e hendenan infiel di Juda y Jerusalem como e habitantenan opresivo di Babilonia y Egipto a enfrenta un ‘dia di Jehova’ ora nan a sufri e huicionan di Jehova. (Isaias 2:1, 10-12; 13:1-6; Jeremias 46:7-10) Sinembargo, ‘e dia di Jehova’ di mas grandi ta den futuro ainda. Ta e “dia” cu Jehova lo ehecuta su huicio contra tur esnan cu a difama su nomber. Lo e cuminsa cu e destruccion di ‘Babilonia e Grandi’, e imperio mundial di religion falso, y culmina den destruccion di e resto di e sistema di cosnan malbado den e guera di Armagedon.—Revelacion 16:14, 16; 17:5, 15-17; 19:11-21.

4. Pakico mayoria di hende lo mester tin miedo di e dia di Jehova cu ta acercando rapidamente?

⁴ Sea cu hende ta realisa esei of no, mayoria di nan lo mester tin miedo di e dia aki cu ta acercando rapidamente. Pakico? Pasobra Jehova ta contesta pa medio di profeta Sofonias: “E dia ei ta un dia di furia, un dia di problema y angustia, un dia di destruccion y desolacion, un dia di scuridad y tiniebla, un dia di nubia y scuridad profundo.” En berdad un dia spantoso! Ademas, e profeta a bisa: “Lo mi trece angustia riba hende . . . pasobra nan a peca contra SEÑOR.”—Sofonias 1:15, 17.

5. Ki punto di bista positivo miyones di hende tin relaciona cu e dia di Jehova, y pakico?

⁵ Sinembargo, tin miyones di hende cu si ta anhela pa e dia di Jehova yega. Pakico? Nan sa cu esei ta un tempo di salbacion y liberacion pa e hustonan, un dia riba cua  Jehova mes lo ser engrandece y su nomber glorioso santifica. (Joel 3:16, 17; Sofonias 3:12-17) Ta depende principalmente di loke hende ta haciendo awor cu nan bida si e dia ei lo resulta di ta un dia pa tene miedo di dje of pa anhela ansiosamente. Con abo ta mira binimento di e dia ei? Bo ta prepara p’e? E echo cu e dia di Jehova ta na horizonte ta influencia bo bida di tur dia for di awor?

“Bofonadonan Lo Bin cu Nan Bofon”

6. Con mayoria di hende ta mira e ‘dia di Jehova’, y pakico esaki no ta un sorpresa pa cristiannan berdadero?

⁶ A pesar di e urgencia di e situacion, mayoria di habitante di Tera no ta precupa mes cu yegada di e ‘dia di Jehova.’ Nan ta haci cherche y bofon di esnan cu ta spierta nan cu e ta bin pronto. Pero esaki no ta un sorpresa pa cristiannan berdadero. Nan ta corda e spiertamento cu apostel Pedro a duna: “Sabi esaki prome cu tur cos, cu den e ultimo dianan bofonadonan lo bin cu nan bofon, siguiendo nan mes pasionnan, y bisando: ‘Unda e promesa di su binida ta? Pasobra desde cu e tatanan a muri, tur cos ta keda mescos cu nan tabata for di principio di creacion.’”—2 Pedro 3:3, 4.

7. Kico lo yuda nos mantene un sentido di urgencia?

⁷ Kico lo yuda nos resisti e punto di bista skeptico of negativo ei y asina mantene un sentido di urgencia? Pedro ta bisa nos: “Mi ta anima boso mente sincero [“stimula boso facultadnan di pensa cla”, NW] pa medio di spiertamento, pa boso keda corda e palabranan cu a wordo papia antes pa medio di e profetanan santo y e mandamento di e Señor y Salbador, papia pa medio di boso apostelnan.” (2 Pedro 3:1, 2) Si nos presta atencion na spiertamento profetico, esei lo yuda nos ‘stimula nos facultadnan di pensa cla.’ Podise nos a tende e recordatorionan aki varios biaha, pero ta masha importante pa awor mas cu nunca nos sigui presta atencion na e spiertamentonan aki.—Isaias 34:1-4; Lucas 21:34-36.

8. Pakico hopi hende no ta haci caso di e recordatorionan di Bijbel?

⁸ Pakico algun hende ta ignora e recordatorionan aki? Pedro a continua: “Di nan mes boluntad [“nan deseo”, NW] nan no kier acepta e echo aki, cu pa medio di e palabra di Dios e shelonan a existi di hopi tempo pasa y e Tera a wordo forma for di awa y pa medio di awa, dor di cua e mundo di e tempo ei a wordo destrui, siendo inunda cu awa.” (2 Pedro 3:5, 6) Si, tin hende cu no kier pa e dia di Jehova yega. Nan no kier pa nada stroba nan di hiba un ‘bida normal.’ Nan no kier duna cuenta na Jehova pa nan estilo di bida egoista! Manera Pedro a bisa, nan ta biba “siguiendo nan mes pasionnan.”

9. Ki actitud e hendenan den e dianan di Noe y di Lot a manifesta?

⁹ Pa motibo di “nan deseo”, e bofonadonan aki ta prefera di sera wowo pa e echo cu Jehova a interveni den asuntonan humano den pasado. Tanto Hesucristo como apostel Pedro a referi na dos di e sucesonan ei, esta, “e dianan di Noe” y “e dianan di Lot.” (Lucas  17:26-30; 2 Pedro 2:5-9) Prome cu Diluvio, e hendenan no a haci caso di e spiertamento cu Noe a duna. Asina tambe, prome cu e destruccion di Sodoma y Gomora, den bista di Lot su yernonan “tabata parce cu ta chansa [Lot] tabata chansa.”—Genesis 19:14.

10. Ki medida Jehova lo tuma contra esnan cu no ta haci caso?

¹⁰ Awe ta mescos. Pero, wak ki medida Jehova lo tuma contra esnan cu no ta haci caso: “Lo mi castiga e hombernan cu ta stagna den spirito, cu ta bisa den nan curason: ‘SEÑOR lo no haci ni bon ni malo!’ Ademas, nan rikesa lo bira botin, y nan casnan lo keda desola; si, nan lo traha cas, ma nan lo no biba den nan, y nan lo planta cunucunan di wendruif, ma nan lo no bebe nan biña.” (Sofonias 1:12, 13) Talbes hende ta sigui cu nan actividadnan ‘normal’ di tur dia, pero nan lo no saca ningun probecho permanente for di nan trabou duro. Pakico no? Pasobra e dia di Jehova lo yega diripiente, y cualkier rikesa material cu nan por a acumula lo no salba nan.—Sofonias 1:18.

“Sper’e”

11. Ki spiertamento nos mester tene na mente?

¹¹ Distinto for di e mundo malbado rond di nos, nos mester tene na mente e spiertamento di profeta Habacuk: “E vision lo ta pa e tempo stipula; e ta pura yega na e fin, y e lo no faya. Maske e ta tarda, sper’e; pasobra e lo bin sigur, e lo no tarda.” (Habacuk 2:3) Asta si e dia ei por parce di tarda for di nos punto di bista imperfecto, nos mester corda cu Jehova no ta slow. Su dia lo bini na e ora exacto, na un momento cu hende no ta spera.—Marco 13:33; 2 Pedro 3:9, 10.

12. Ki advertencia Hesus a duna, y con esaki ta na contraste cu e accionnan di su fiel siguidonan?

¹² Ora Hesus a enfatisa e importancia di spera riba e dia di Jehova, el a adverti cu asta algun di su siguidonan lo perde nan sentido di urgencia. El a profetisa tocante nan: “Si e esclabo malbado ei bisa den su curason: ‘Mi shon lo no bin pa awor’, y e cuminsa bati su compañeronan-esclabo y come y bebe hunto cu burachenan, e shon di e esclabo ei lo bin riba un dia cu e no ta sper’e y na un ora cu e no sa, y lo cort’e na pida-pida.” (Mateo 24:48-51) Na contraste, e esclabo fiel y prudente si ta mantene su sentido di urgencia lealmente. E esclabo fiel a sigui vigila y a demostra cu e tabata prepara. Hesus a encarg’e cu “tur su propiedadnan” aki riba Tera.—Mateo 24:42-47.

E Necesidad di Urgencia

13. Con Hesus a enfatisa e necesidad di tin un sentido di urgencia?

¹³ Tabata crucial pa e cristiannan di prome siglo mantene nan sentido di urgencia. Nan mester a tuma accion inmediato pa hui for di Jerusalem ora nan a mira e stad ei “rondona dor di ehersitonan.” (Lucas 21:20, 21) Esei a sosode na aña 66 di nos era. Ripara con Hesus a enfatisa cu ki urgencia e cristiannan di e tempo ei mester a actua: “No laga esun cu ta riba dak baha pa saca e cosnan cu ta den su cas bai cu ne; y no laga esun cu ta den cunucu bai bek pa cohe su  mantel.” (Mateo 24:17, 18) En bista di e echo cu historia ta mustra cu Jerusalem a sobrevivi cuater aña mas, pakico e cristiannan mester a haci caso di Hesus su palabranan cu asina tanto urgencia na aña 66?

14, 15. Pakico tabata crucial pa e cristiannan di prome siglo actua sin tarda ora nan a mira Jerusalem rondona pa ehersito?

¹⁴ Aunke ta te na aña 70 numa e ehersito Romano a destrui Jerusalem, e cuater añanan prome cu esei no a transcuri sin problema. Al contrario! Tabatin hopi violencia y dramamento di sanger durante e añanan ei. Segun un historiado, tabatin e tempo ei “un guera civil sangriento y spantoso, compaña pa actonan horibel di crueldad” den e stad di Jerusalem. Tabata recluta hombernan hoben pa reforsa luganan fortifica, pa carga arma y pa sirbi como militar. Tur dia nan mester a haci ehercicio militar. Esnan cu no a apoya e medidanan extremo a ser mira como traidor. Si e cristiannan a keda mas tanto tempo den e stad, nan lo a haya nan mes den un situacion sumamente peligroso.—Mateo 26:52; Marco 12:17.

¹⁵ Ripara cu Hesus a bisa cu “esnan cu [tabata] na Judea”—pues no na Jerusalem so—mester a cuminsa hui. Esaki tabata importante pasobra despues di un par di luna cu e tropanan Romano a retira for di Jerusalem, nan a bolbe drenta accion. Prome, nan a domina Galilea na aña 67, y despues nan a conkista Judea sistematicamente e siguiente aña. Esaki a resulta den gran miseria pafo di Jerusalem. Ademas, a bira mas y mas dificil pa cualkier Hudiu hui for di Jerusalem mes. Tabatin vigilancia na e portanan di e stad, y ken cu a purba hui a ser mira como desertor cu a tuma parti pa e Romanonan.

16. Ki actitud e cristiannan di prome siglo mester tabatin pa por a sobrevivi e tempo di angustia ei?

¹⁶ Cu tur e factornan aki na mente, nos por compronde pakico Hesus a enfatisa e urgencia di e situacion. E cristiannan mester tabata dispuesto pa haci sacrificio, y pa no laga nan pocesionnan material distrae nan. Nan mester tabata dispuesto pa ‘renuncia tur loke nan tabatin’ pa por a obedece e spiertamento di Hesus. (Lucas 14:33) Esnan cu a obedece mesora y hui bai na e otro banda di Jordan a scapa.

Con pa Mantene Nos Sentido di Urgencia

17. Pakico nos tin cu fortalece nos sentido di urgencia?

¹⁷ Profesianan di Bijbel ta revela bon cla cu nos ta casi na final di e tempo di fin. Awor mas cu nunca nos tin cu fortalece nos  sentido di urgencia. Den tempo di pas un solda no ta sinti e tension y peliger di bataya. Pero si debi na esei e no mira e necesidad urgente pa keda alerta y e wordo yama inesperadamente pa drenta accion, probablemente lo e no ta prepara, y esei lo por tin su consecuencianan fatal. Mescos ta conta pa loke ta nos guera spiritual. Si nos laga nos sentido di urgencia mengua, nos lo no ta prepara pa defende nos mes contra e atakenan cu ta bini riba nos, y ora cu finalmente e dia di Jehova yega lo e cohe nos di sorpresa. (Lucas 21:36; 1 Tesalonicensenan 5:4) Si tin hende cu ‘a stop di sigui Jehova’, awor ta e tempo pa busc’e bek.—Sofonias 1:3-6; 2 Tesalonicensenan 1:8, 9.

18, 19. Kico lo yuda nos tene na mente “e presencia di e dia di Jehova”?

¹⁸ Nada straño cu apostel Pedro a spierta nos pa tene bon na mente “e presencia di e dia di Jehova”! Con nos por haci esaki? Entre otro, dor di practica “actonan santo” y “echonan di devocion na Dios.” (2 Pedro 3:11, 12, NW) Ora nos ta ocupa den tal actividadnan, esei lo yuda nos keda den gran expectativa di “e dia di Jehova.” E palabra Griego traduci como ‘tene bon na mente’ ta nifica literalmente “pura.” No cu nos por pura of acelera e tempo cu a resta pa e dia di Jehova bini. Pero, segun cu nos ta spera riba e dia ei, e tempo lo parce di pasa mucho mas rapido si nos ta ocupa den e sirbishi di Dios.—1 Corintionan 15:58.

¹⁹ Otro cos cu tambe ta permiti nos “haci lo posibel pa e [dia ei] yega pronto”, si, pa keda den “expectativa constante” di dje, ta di medita riba e Palabra di Dios y reflexiona riba e recordatorionan cu nos ta haya den dje. (2 Pedro 3:12, BPK; The New Testament, di William Barclay) E recordatorionan aki ta ensera e tantisimo profesianan cu ta papia no solamente di e yegada di e dia di Jehova sino tambe di e numeroso bendicionnan cu lo ser drama riba esnan cu ta ‘spera riba Jehova.’—Sofonias 3:8.

20. Ki spiertamento nos mester tuma na pecho?

²⁰ Awor ta realmente e tempo pa nos tur tuma na pecho e spiertamento cu profeta Sofonias a duna: ‘Prome cu e rabia ardiente di Jehova bin riba boso, prome cu e dia di e rabia di Jehova bin riba boso, busca Jehova, boso tur humildenan di Tera cu a cumpli cu su ordenansanan; busca husticia; busca humildad. Kisas boso lo wordo scondi riba e dia di e rabia di Jehova.’—Sofonias 2:2, 3.

21. Ki determinacion e pueblo di Dios lo tin pa aña 2007?

²¹ P’esei e texto di aña cu a scohe pa aña 2007 ta na su luga: ‘E gran dia di Jehova ta cerca.’ E pueblo di Dios ta combenci cu “e ta cerca y [cu] e ta bin masha lihe mes.” (Sofonias 1:14) “E lo no tarda.” (Habacuk 2:3) Pues segun cu nos ta spera riba e dia ei, laga nos ta semper alerta pa loke ta e tempo den cua nos ta biba, realisando cu e cumplimento final di e profesianan aki ta dilanti porta!

Bo Por Contesta?

• Kico ta ‘e gran dia di Jehova’?

• Pakico hopi hende no ta haci caso di e urgencia di nos tempo?

• Pakico e cristiannan di prome siglo mester a actua cu un sentido di urgencia?

• Con nos por aumenta nos sentido di urgencia?

[Preguntanan di Estudio]

[Plachi na pagina 19]

E texto di aña pa 2007 lo ta: ‘E gran dia di Jehova ta cerca.’—Sofonias 1:14.

[Plachi na pagina 17]

Ora Jehova tuma accion, mescos cu den tempo di Noe, lo e cohe hende cu ta haci bofon di sorpresa

[Plachi na pagina 18]

Ora e cristiannan a mira Jerusalem “rondona dor di ehersitonan”, nan mester a actua sin tarda