Jehova Lo “Haci Husticia”

“Dios lo no haci husticia na su scohinan cu ta sclama na dje di dia y anochi?”—LUCAS 18:7.

1. Ken ta un fuente di animacion pa bo, y dicon?

ROND mundo Testigonan di Jehova ta disfruta di e compania di homber- y muhernan cristian cu a sirbi Jehova fielmente pa hopi aña. Bo conoce algun di e rumannan stima aki personalmente? Kisas bo ta pensa riba un ruman muher di edad, uno cu tin hopi aña batisa y cu masha poco ta falta reunion na Salon di Reino. Of podise bo ta pensa riba un ruman homber di edad cu fielmente ta apoya e actividadnan di sirbishi di veld di e congregacion siman aden siman afo y cu ta haci esei ya pa varios decada. Si, hopi di e rumannan fiel ei a pensa un tempo cu pa aworaki Armagedon lo mester a yega dia bieu. Pero, e echo cu e mundo inhusto aki ta existi te ainda no a debilita nan confiansa den e promesanan di Jehova, ni e no a suak nan determinacion pa “persevera te na fin.” (Mateo 24:13) E gran fe cu e sirbidornan leal aki di Jehova a demostra ta un berdadero fuente di animacion pa henter e congregacion.—Salmo 147:11.

2. Ki situacion ta haci nos tristo?

² Pero tin biaha nos ta nota net lo contrario. Algun Testigo cu tabata activo pa hopi aña den e ministerio cu tempo a perde nan fe den Jehova y a stop di asocia cu e congregacion cristian. Ta tristo pa mira con algun di nos compañeronan di antes a bandona Jehova, y nos tin e deseo sincero di sigui yuda cada “carne perdi” bolbe na e tou. (Salmo 119:176; Romanonan 15:1) Sinembargo, e dos desaroyonan distinto aki—algun cristian ta keda fiel mientras otronan ta perde fe—ta lanta cierto pregunta. Kico ta permiti hopi Testigo mantene nan fe den e promesanan di Jehova mientras otronan ta perd’e? Kico cada un di nos por haci pa garantisa cu nos ta keda cu e firme conviccion cu e ‘gran dia di Jehova’ ta acercando? (Sofonias 1:14) Laga nos analisa un ilustracion of parabola cu nos ta haya den e Evangelio di Lucas.

Un Spiertamento pa Hende Cu Ta na Bida “Ora e Yiu di Hende Bin”

3. Ken specialmente por beneficia di e ilustracion di e viuda y e hues, y dicon?

³ Den Lucas capitulo 18, nos ta haya e ilustracion di Hesus tocante un viuda y un hues. E parce e ilustracion tocante e anfitrion persistente cu nos a analisa den e articulo anterior. (Lucas 11:5-13) Sinembargo, e contexto di e parti di Bijbel cu ta contene e ilustracion di e viuda y e hues ta mustra cu esaki ta aplica specialmente na hende cu ta na bida “ora cu e Yiu di hende bin” den poder di Reino, un periodo cu a cuminsa na 1914.—Lucas 18:8. *

4. Kico Hesus a declara prome cu el a conta e ilustracion cu nos ta haya den Lucas capitulo 18?

⁴ Prome cu Hesus a duna e ilustracion, el a declara cu e prueba di su presencia den poder di Reino lo ta mes ampliamente visibel cu lamper, cu “ta corta for di un parti di  shelo [y] lusa te na e otro parti di shelo.” (Lucas 17:24; 21:10, 29-33) No obstante, mayoria di hende cu ta biba den “e tempo di e fin” lo no presta atencion na e evidencia bisto ei. (Daniel 12:4) Pakico no? Pa e mesun motibo cu e hendenan den tempo di Noe y di Lot no a haci caso di e spiertamentonan di Jehova. Den e temponan ei, hende ‘tabata come, bebe, cumpra, bende, planta y traha cas te dia cu nan a ser destrui.’ (Lucas 17:26-29) Nan a perde nan bida pasobra nan tabata asina ocupa cu e actividadnan comun ei cu nan no a presta atencion na e boluntad di Dios. (Mateo 24:39, NW) Awe tambe hende por lo general ta asina ocupa cu nan asuntonan di tur dia cu nan no ta mira e evidencia cu fin di e mundo malbado aki ta cerca.—Lucas 17:30.

5. (a) Na ken Hesus a dirigi un spiertamento, y pakico? (b) Kico a pone algun di su siguidonan perde nan fe?

⁵ Ta bisto anto cu Hesus tabata precupa pa su siguidonan tambe no laga e mundo di Satanas distrae nan, te na e punto cu nan ta “bai bek pa wak loke a keda atras.” (Lucas 17:22, 31, BPK) Y esaki, en berdad, ta loke a sosode cu algun cristian. Pa hopi aña nan a anhela pa e dia yega cu Jehova lo pone fin na e mundo malbado aki. Sinembargo, ora Armagedon no a bini na e tempo cu nan a spera, nan a keda desilusiona. Pocopoco nan conviccion cu e dia di huicio di Jehova ta cerca a caba na nada. Nan a baha man den e ministerio y pocopoco pero sigur a bira asina envolvi den e cosnan di bida di tur dia cu no a sobra mucho tempo pa cosnan spiritual. (Lucas 8:11, 13, 14) Cu tempo, nan a “bai bek pa wak loke a keda atras.” Hopi tristo!

Nos Mester “Haci Oracion Tur Ora Bai”

6-8. (a) Conta e ilustracion di e viuda y e hues. (b) Con Hesus a aplica e ilustracion aki?

⁶ Kico por yuda nos haci sigur cu nos confiansa den e cumplimento di Jehova su promesanan no ta bira debil? (Hebreonan 3:14) Hesus a trata e pregunta ei un poco despues cu el a spierta su discipelnan pa no bai bek na e mundo malbado di Satanas.

⁷ Lucas ta informa cu Hesus a “conta nan un parabola pa mustra nan cu nan mester haci oracion tur ora bai y no desmaya.” Hesus a bisa: “Den un cierto stad tabatin un hues cu no tabatin temor pa Dios, ni respet pa hende. Y tabatin un viuda den e stad ei cu tur ora bai tabata bin cerca dje, bisando: ‘Haci husticia pa mi contra mi adversario.’ Y pa un tempo e no tabata kier; ma despues el a bisa den su mes: ‘Maske mi no tin temor pa Dios, ni respet pa hende, toch, pasobra e viuda aki ta molestia mi, lo mi haci husticia p’e, pa e no cansa mi dor di bin cada bes asina.’”

⁸ Despues cu Hesus a conta e comparacion aki, el a haci e siguiente aplicacion:  “Tende loke e hues inhusto a bisa; awor Dios lo no haci husticia na su scohinan cu ta sclama na dje di dia y anochi, y lo e tarda pa contesta nan? Mi ta bisa boso cu e lo haci husticia pronto pa nan. Sinembargo, ora cu e Yiu di hende bin, lo e haya fe riba mundo?”—Lucas 18:1-8.

“Haci Husticia pa Mi”

9. Ki tema ta resalta den e ilustracion di e viuda y e hues?

⁹ E tema central di e ilustracion bibo aki ta resalta bon cla. E dos personahenan den e ilustracion y Hesus mes tambe ta mencion’e. E viuda a roga e hues: “Haci husticia pa mi.” E hues a bisa: “Lo mi haci husticia p’e.” Hesus a puntra: “Dios lo no haci husticia”? Y Hesus a bisa di Jehova: “E lo haci husticia pronto pa nan.” (Lucas 18:3, 5, 7, 8) Na ki tempo en particular Dios “lo haci husticia”?

10. (a) Na ki tempo Dios a haci husticia den e prome siglo? (b) Na ki tempo y con Dios lo haci husticia pa su sirbidornan djawe?

¹⁰ Den e prome siglo, e tempo pa haci husticia, of “dianan di vengansa”, a yega na aña 70 di nos era tempo cu Jerusalem y su tempel a ser destrui. (Lucas 21:22) Pa e pueblo di Dios awe, e tempo pa haci husticia lo ta riba ‘e gran dia di Jehova.’ (Sofonias 1:14; Mateo 24:21) E tempo ei, Jehova lo “paga cu afliccion esnan cu ta aflihi” su pueblo ora cu “[Hesucristo] duna pago mereci na esnan cu no conoce Dios y na esnan cu no ta obedece e evangelio di nos Señor Hesus.”—2 Tesalonicensenan 1:6-8; Romanonan 12:19.

11. Den ki manera Jehova lo haci husticia “pronto”?

¹¹ Pero con nos mester compronde e siguransa di Hesus cu Jehova lo haci husticia “pronto”? E Palabra di Dios ta mustra cu “aunke [Jehova] tin gran pasenshi”, lo e ehecuta huicio rapidamente ora e tempo ta hecho. (Lucas 18:7, 8, NW; 2 Pedro 3:9, 10) Den tempo di Noe, ora e Diluvio a yega, Jehova no a tarda pa destrui e malbadonan. Mescos tambe, den tempo di Lot, ora candela a yobe for di shelo, e malbadonan a perece. Hesus a bisa: “Lo ta mescos riba e dia cu e Yiu di hende wordo revela.” (Lucas 17:27-30) Un biaha mas, ‘perdicion lo bin diripiente’ riba e malbadonan. (1 Tesalonicensenan 5:2, 3) De echo, nos por tin e pleno confiansa cu Jehova lo no permiti e mundo di Satanas existi ni un dia mas cu husticia ta rekeri.

“E Lo Haci Husticia”

12, 13. (a) Con e ilustracion di Hesus tocante e viuda y e hues ta siña nos un les? (b) Pakico nos por ta sigur cu Jehova lo tende nos oracionnan y haci husticia pa nos?

¹² E ilustracion di Hesus tocante e viuda y e hues ta enfatisa mas berdadnan importante. Ora di mustra e aplicacion di e ilustracion, Hesus a bisa: “Tende loke e hues inhusto a bisa; awor Dios lo no haci husticia na su scohinan”? Claro cu Hesus no tabata comparando Jehova cu e hues, como si fuera Dios lo trata creyentenan den e mesun manera. Mas bien, Hesus a siña su siguidonan un les tocante Jehova dor di resalta un contraste entre e hues ei y Dios. Kico tabata algun di e diferencianan entre nan dos?

¹³ E hues di Hesus su ilustracion tabata “inhusto”, mientras cu “Dios ta un Hues husto.” (Salmo 7:11; 33:5) E hues no tabata ni un tiki interesa den e viuda, pero Jehova si ta interesa den cada hende individual. (2 Cronicanan 6:29, 30) E hues no tabata dispuesto pa yuda e viuda, pero Jehova si ta dispuesto—asta ansioso—pa yuda hende cu ta sirbie. (Isaias 30:18, 19) Ki les nos por siña for di esaki? Si e hues inhusto a scucha e peticionnan di e viuda y a percura pa husticia tuma luga, cuanto mas Jehova lo tende e oracionnan di su pueblo y sin duda haci husticia pa nan!—Proverbionan 15:29.

14. Pakico nos no mester perde fe den e benidero dia di huicio di Dios?

 ¹⁴ P’esei, esnan cu ta perde fe den e benidero dia di huicio di Dios ta comete un kibocacion serio. Pakico? Pasobra dor cu nan no ta kere firmemente mas cu ‘e gran dia di Jehova’ ta cerca, ta como si fuera nan ta duda cu Jehova ta confiabel y cu e por cumpli fielmente cu su promesanan. Pero ni un hende no por tin base pa duda den e fieldad di Dios. (Job 9:12) Un bon pregunta cu nos tin cu haci nos mes ta: Nos personalmente lo keda fiel? Y esei ta netamente e punto cu Hesus a presenta na final di e ilustracion tocante e viuda y e hues.

“Realmente Lo E Haya e Fe Aki Riba Tera?”

15. (a) Ki pregunta Hesus a haci, y pakico? (b) Kico nos tin cu puntra nos mes?

¹⁵ Hesus a presenta e siguiente pregunta interesante: “Ora e Yiu di hende yega, realmente lo e haya e fe aki riba tera?” (Lucas 18:8, NW, nota na pia di pagina) E expresion “e fe aki” ta indica cu Hesus a referi, no na fe den un sentido general, sino na un clase di fe en particular, fe manera di e viuda. Hesus no a contesta su pregunta. El a haci e pregunta pa su discipelnan por a pensa riba e calidad di nan fe. Acaso nan fe tabata debilitando gradualmente, poniendo nan den peliger di bai bek na e cosnan cu nan a laga atras? Of nan tabatin e clase di fe manera esun cu e viuda a demostra? Awe, nos tambe tin cu puntra nos mes: ‘Ki clase di fe “e Yiu di hende” ta haya den mi curason?’

16. Ki clase di fe e viuda tabatin?

¹⁶ Pa nos por ta entre e hendenan cu lo haya e husticia di Jehova, nos tin cu imita e viuda. Ki clase di fe e tabatin? El a demostra su fe dor di acudi “tur ora bai . . . cerca [e hues], bisando: ‘Haci husticia pa mi.’” E viuda ei a persisti pa haya husticia for di un homber inhusto. Mescos tambe, sirbidornan di Dios djawe por tin e confiansa cu nan lo haya e husticia di Jehova, asta si esei ta tuma mas tempo cu nan a spera. Ademas, nan ta mustra nan confiansa den e promesanan di Dios dor di persisti den oracion, si, dor di ‘sclama na Jehova di dia y anochi.’ (Lucas 18:7) En realidad, si un cristian stop di pidi den oracion pa husticia wordo haci, e ta mustra cu el a perde confiansa cu Jehova ta bai actua na fabor di su sirbidornan.

17. Pa ki motibo nos tin cu persevera den oracion y mantene nos fe cu Jehova su dia di huicio lo bini sigur?

¹⁷ E circunstancianan particular di e viuda ei ta mustra nos cu nos tin motibonan adicional pa persevera den oracion. Considera algun di e diferencianan entre su situacion y esun di nos. E viuda a sigui bai cerca e hues aunke ni un hende no a anim’e p’e haci esei, pero e Palabra di Dios si ta duna nos hopi animacion pa “persevera den oracion.” (Romanonan 12:12, NW) E viuda no tabatin sigur cu e hues lo a cumpli cu su peticionnan, pero Jehova si ta sigura nos cu lo e haci husticia. Jehova a declara pa medio di su profeta: “Maske e ta tarda, sper’e; pasobra e lo bin sigur, e lo no tarda.” (Habacuk 2:3; Salmo 97:10) E viuda no tabatin un ayudante cu por a boga p’e y asina duna mas forsa  na su peticion. Pero nos si tin un ayudante poderoso, Hesus, “kende ta na man drechi di Dios, kende tambe ta intercede pa nos.” (Romanonan 8:34; Hebreonan 7:25) P’esei, si e viuda, a pesar di su situacion dificil, a sigui roga e hues cu e speransa cu lo e haya husticia, cuanto mas nos mester mantene nos fe den Jehova su dia di huicio cu lo bini sigur!

18. Con oracion lo fortalece nos fe y yuda nos haya husticia?

¹⁸ E ilustracion di e viuda ta siña nos cu tin un relacion estrecho entre oracion y fe, y cu nos oracionnan persistente por contraresta e influencianan cu por debilita nos fe. Claro cu esaki no ta nifica cu hacimento di oracion djis pa bista di hende ta un proteccion contra perdemento di fe. (Mateo 6:7, 8) Ora nos ta sinti nos conmovi pa haci oracion pasobra nos ta realisa cu nos ta depende completamente di Dios, e ora ei oracion ta hala nos cerca Dios y ta fortalece nos fe. Y siendo cu nos mester tin fe pa wordo salba, ta di compronde cu Hesus a haya ta necesario pa anima su discipelnan pa “haci oracion tur ora bai y no desmaya”! (Lucas 18:1; 2 Tesalonicensenan 3:13) Ta berdad cu e binimento di ‘e gran dia di Jehova’ no ta depende di nos oracionnan; sea nos pidi p’e of no, lo e bini. Pero loke ta determina si nos personalmente lo haya husticia y sobrevivi e guera di Dios ta realmente e fe cu nos tin y e caminda husto cu nos ta cana hunto cu oracion.

19. Con nos ta demostra cu nos ta kere firmemente cu Dios ‘lo haci husticia’?

¹⁹ Manera nos ta corda, Hesus a puntra: “Ora e Yiu di hende yega, realmente lo e haya e fe aki riba tera?” Kico ta e contesta riba e pregunta interesante aki? Nos ta hopi contento cu awe miyones di fiel sirbidor di Jehova rond mundo ta demostra mediante nan oracionnan, pasenshi y perseverancia cu nan tin e fe aki! Pues, Hesus su pregunta por ser contesta den forma afirmativo. Si, a pesar di e inhusticianan cu e mundo di Satanas ta causa nos actualmente, nos ta kere firmemente cu Dios ‘lo haci husticia na su scohinan.’

[Nota]

Bo Ta Corda?

• Kico a pone algun cristian perde fe?

• Pakico nos por tin un fe firme den Jehova su benidero dia di huicio?

• Pa ki motibo nos tin cu persevera den oracion?

• Con oracion persistente lo yuda nos evita di perde nos fe?

[Preguntanan di Estudio]

[Plachi na pagina 26]

Kico e ilustracion di e viuda y e hues ta resalta?

[Plachi na pagina 29]

Awe, miyones di hende ta kere firmemente cu Dios lo “haci husticia”