Jehova Ta Duna “Spirito Santo na Esnan Cu Pidie”

“Si boso anto, siendo malbado, sa di duna cosnan bon na boso yiunan, cuanto mas boso Tata celestial lo duna e spirito santo na esnan cu pidie!”—LUCAS 11:13.

1. Den ki momentonan specialmente nos tin mester di yudansa di spirito santo?

‘MI SO no por hiba e lucha aki. Ta cu yudansa di spirito santo so lo mi por wanta e prueba aki!’ Abo a yega di expresa e sintimentonan profundo ei? Pa mayoria di cristian e contesta ta si. Talbes abo a yega di expresa bo mes asina despues cu bo a haya sa cu bo tin un malesa grave. Of kisas esei tabata na momento cu bo casa a fayece despues cu boso a comparti bida pa hopi aña. Of por tabata tempo cu bo a cai den un depresion profundo, siendo cu anteriormente bo tabata un persona alegre. Den momentonan di dolor, kisas bo a sinti cu bo a sobrevivi unicamente pasobra e spirito santo di Jehova a duna bo “e poder mas aya di loke ta normal.”—2 Corintionan 4:7-9, NW; Salmo 40:1, 2.

2. (a) Ki desafio cristiannan berdadero ta enfrenta? (b) Ki preguntanan nos lo considera den e articulo aki?

² Cristiannan berdadero ta haya nan cu mas y mas presion y oposicion di parti di e mundo malbado djawe. (1 Juan 5:19) Ademas, siguidonan di Cristo ta bou di atake di Satanas e Diabel mes, kende ta hibando un guera feros contra esnan cu ta “warda e mandamentonan di Dios y [ta duna] testimonio di Hesucristo.” (Revelacion 12:12, 17) Pues, ta di compronde cu awor mas cu nunca nos mester di e apoyo di Dios su spirito. Kico nos por haci pa garantisa cu nos ta sigui ricibi e spirito santo di Dios na abundancia? Y pakico nos por ta sigur cu Jehova ta mas cu dispuesto pa duna nos e forsa necesario den tempo di prueba? Nos ta haya contesta riba e preguntanan aki den dos ilustracion di Hesus.

Persisti den Oracion

3, 4. Ki ilustracion Hesus a conta, y con el a aplic’e na oracion?

³ Un di Hesus su discipelnan a yega di pidie: “Señor, siña nos haci oracion.” (Lucas 11:1) Hesus a contesta su discipelnan pa medio di dos ilustracion cu tabatin algun punto en comun. E prome ta tocante un homber cu a haya bishita, y e di dos ta tocante un tata cu ta scucha su yiu. Laga nos considera e dos ilustracionnan aki.

⁴ Hesus a bisa: “Supone cu un di boso tin un amigo, y meianochi bo ta bai cerca dje, y ta bis’e: ‘Amigo, fia mi tres pan, pasobra un amigo di mi a yega for di un biahe cerca mi, y mi no tin nada pa pone su dilanti.’ Y for di paden e lo contesta y bisa: ‘No molestia mi; ya porta ta sera caba y mi yiunan y ami ta riba cama; mi no por lanta pa duna bo nada.’ Mi ta bisa boso, maske e no lanta dun’e nada pasobra e ta su amigo, toch, pa motibo di su impertinencia [of, “persistencia tribi”, NW] e lo lanta y dun’e tur loke e tin mester.” Anto Hesus a splica con e ilustracion aki ta aplica na oracion. E di: “Mi ta bisa boso, pidi, y lo wordo duna na boso; busca, y boso lo haya; bati, y lo wordo habri pa boso. Pasobra ken cu pidi, ta ricibi; y esun cu busca, ta haya; y pa esun cu bati, lo wordo habri.”—Lucas 11:5-10.

5. Segun e ilustracion tocante e homber persistente, cu ki actitud nos tin cu haci oracion?

 ⁵ E ilustracion bibo aki tocante un homber persistente ta mustra cu ki actitud nos mester haci oracion. Ripara cu Hesus a bisa cu e homber ta logra haya loke e tin mester “pa motibo di su impertinencia.” (Lucas 11:8) E expresion “impertinencia” ta aparece un biaha so den Bijbel, y ta ser traduci for di un palabra Griego cu ta nifica literalmente “simberguenseria.” E palabra simberguensa tin hopi bes un conotacion negativo. Sinembargo, ora un persona ta simberguensa of persistente pa un bon causa, e por ta un cualidad positivo. Esei ta e caso cu e anfitrion den e ilustracion. E no a sinti ni un tiki berguensa pa pidi cu persistencia loke e tin mester. Siendo cu Hesus ta presenta e anfitrion aki como un ehempel pa nos, nos oracionnan mester ta mesun persistente. Jehova kier pa nos sigui pidi, sigui busca y sigui bati. Como contesta, lo e duna “spirito santo na esnan cu pidie.”

6. Den tempo di Hesus, con hende a mira e custumber di mustra hospitalidad?

⁶ Hesus a mustra nos no solamente con nos mester haci oracion—cu persistencia tribi—sino tambe pakico nos mester haci oracion. Pa compronde e les ei bon cla, pensa riba con esnan cu a scucha Hesus su ilustracion tocante e anfitrion persistente a mira e custumber di brinda hospitalidad. Varios parti den e Scritura ta mustra cu den tempo di Bijbel, hende, specialmente sirbidornan di Dios, tabata tuma e custumber di percura pa bishitante masha na serio. (Genesis 18:2-5; Hebreonan 13:2) Tabata un berguensa pa no mustra hospitalidad. (Lucas 7:36-38, 44-46) Cu esei na mente, laga nos bolbe wak e relato di Hesus.

7. Pakico e anfitrion den Hesus su ilustracion no tin berguensa di lanta su amigo for di soño?

⁷ E anfitrion den e ilustracion ta haya un bishitante meianochi. E anfitrion ta sinti su mes obliga pa sirbi cuminda na su huespet pero e “no tin nada pa pone su dilanti.” Den su bista, esaki ta un situacion di emergencia! E tin cu busca un par di pan, maske cuanto esei lo bai cost’e. Pues e ta bai cerca un amigo y sin sinti berguensa e ta lant’e for di soño. “Amigo, fia mi tres pan”, e anfitrion ta bisa. E ta persisti cu su peticion te ora e haya loke e tin mester. E ora ei numa, cu e pannan den su poder, e por ta un bon anfitrion.

Mas Grandi Nos Necesidad Ta, Mas Nos Mester Pidi

8. Kico lo motiva nos pa persisti den oracion pa nos haya spirito santo?

⁸ Kico e ilustracion aki ta mustra tocante e motibo pakico nos ta persisti den oracion? E homber a sigui pidi pan pasobra el a haya cu pa e por a cumpli cu su deber como anfitrion tabata sumamente necesario pa e tabatin e pannan ei den su poder. (Isaias 58:5-7) Sin pan, lo e no tabata un bon anfitrion. Di  igual manera, nos ta realisa cu pa nos cumpli cu nos ministerio como cristiannan berdadero, ta sumamente necesario pa nos tin e spirito di Dios. P’esei nos ta sigui resa na Dios y pidie pa su spirito. (Zacarias 4:6) Sin e spirito ei nos lo fracasa. (Mateo 26:41) Bo ta mira ki conclusion importante nos por saca for di e ilustracion aki? Si nos mira e spirito di Dios como algo cu nos tin mester urgentemente, ta mas probabel cu nos lo pidie cu persistencia.

9, 10. (a) Ilustra pakico nos mester pidi Dios cu persistencia pa haya su spirito. (b) Ki pregunta nos tin cu haci nos mes, y pakico?

⁹ Pa aplica e les aki den nos bida djawe, imagina bo cu un di bo miembronan di famia bira malo meianochi. Lo bo lanta un docter for di soño pa pidie yudansa? No si e pashent ta sinti su mes djis un poco malo. Ma si el a haya un atake di curason, lo bo no tin berguensa di yama un docter. Pakico no? Pasobra bo ta den un situacion di emergencia. Bo ta realisa cu yudansa profesional ta sumamente necesario. Si bo no busca yudansa, e consecuencianan por ta fatal. Di igual manera, cristiannan berdadero ta na moda di papia den un situacion continuo di emergencia. Al fin y al cabo, Satanas ta cana rond manera “un leon cu ta gruña”, buscando un manera pa devora nos. (1 Pedro 5:8) Pa nos keda na bida spiritualmente, e yudansa di e spirito di Dios ta sumamente necesario. Si nos no pidi e yudansa di Dios, e consecuencianan por ta fatal. P’esei, cu persistencia nos ta pidi Dios pa haya su spirito santo. (Efesionan 3:14-16) Ta ora nos ta haci esei so nos lo mantene e fortalesa necesario pa “persevera te na fin.”—Mateo 10:22; 24:13.

¹⁰ P’esei ta masha importante pa de bes en cuando nos para keto un rato y puntra nos mes: ‘Francamente, con persistente mi oracionnan ta?’ Corda, ta ora nos realisa plenamente cu nos tin mester di e yudansa di Dios, nos oracionnan pa haya spirito santo lo bira mas persistente.

Kico Ta Motiva Nos pa Haci Oracion cu Confiansa?

11. Con Hesus a aplica e ilustracion di un tata cu su yiu na oracion?

¹¹ Hesus su ilustracion di e anfitrion persistente ta enfatisa e actitud cu esun cu ta haci oracion, esta, e creyente, mester tin. E siguiente ilustracion ta resalta e actitud cu esun cu ta tende oracion, esta, Jehova Dios, tin. Hesus a puntra: “Supone cu un tata entre boso, si su yiu pidie un pisca, lo e dun’e un colebra? Of si e pidie un webo, lo e dun’e un scorpion?” Anto, Hesus a haci e aplicacion, bisando: “Si boso anto, siendo malbado, sa di duna cosnan bon na boso yiunan, cuanto mas boso Tata celestial lo duna e spirito santo na esnan cu pidie!”—Lucas 11:11-13.

12. Con e ilustracion di e tata cu ta tende e peticion di su yiu ta demostra claramente cu Jehova ta dispuesto pa contesta nos oracionnan?

¹² Cu e ehempel aki di un tata cu ta reacciona riba e peticionnan di su yiu, Hesus a revela kico Jehova ta pensa di esnan cu ta acerc’e den oracion. (Lucas 10:22) Na prome luga, tuma nota di e contraste. Distinto for di e  homber den e prome ilustracion cu no tabatin gana di cumpli cu e peticion pa yudansa, Jehova ta manera un mayor humano amoroso cu ta ansioso pa cumpli cu un peticion di su yiu. (Salmo 50:15) Hesus a revela mas aleu con dispuesto Jehova ta pa yuda nos ora e ta compara un tata riba Tera cu esun celestial. El a bisa cu si un tata humano—aunke e ta “malbado” pa motibo di pica hereda—ta duna su yiu un bon regalo, cu cuanto mas rason nos por spera pa nos bondadoso Tata celestial duna spirito santo na su famia di adoradonan!—Santiago 1:17.

13. Ki siguransa nos por tin ora nos ta acerca Jehova den oracion?

¹³ Ki les nos por siña? Nos por tin e siguransa cu ora nos pidi nos Tata celestial pa spirito santo, e ta mas cu dispuesto pa cumpli cu nos peticion. (1 Juan 5:14) Ora nos acerc’e bes tras bes den oracion, Jehova lo no bisa nos nunca, na moda di papia: “No molestia mi; ya porta ta sera caba.” (Lucas 11:7) Al contrario, Hesus a declara: “Sigui pidi, y lo e ser duna na boso; sigui busca y boso lo haya; sigui bati, y lo ser habri pa boso.” (Lucas 11:9, 10, NW) Si, Jehova ta “scucha nos dia nos [yam’e].”—Salmo 20:9, BPK; 145:18.

14. (a) Ki pensamento eroneo ta molestia algun persona cu ta pasando den prueba? (b) Ora nos ta pasa den prueba, pakico nos por acerca Jehova cu confiansa den oracion?

¹⁴ Hesus su ilustracion di e tata amoroso ta enfatisa tambe cu Jehova su bondad ta mucho mas grandi cu e bondad cu cualkier mayor humano por demostra. P’esei, ningun di nos no mester sinti nunca cu e pruebanan cu kisas nos ta pasando aden ta pasobra Dios ta desgusta cu nos. Ta Satanas, nos enemigo principal, kier pa nos pensa asina. (Job 4:1, 7, 8; Juan 8:44) No tin base biblico pa nos condena nos mes cu e pensamentonan ei. Jehova no ta tenta nos of pone nos na prueba cu “maldad.” (Santiago 1:13) Mescos cu un tata amoroso lo no duna su yiu nada cu lo por perhudic’e, asina tambe Jehova lo no somete nos na pruebanan perhudicial. Nos tata celestial ta duna “loke ta bon na esnan cu pidie.” (Mateo 7:11; Lucas 11:13) En berdad, mas nos compronde e bondad di Jehova y su disponibilidad pa yuda nos, mas nos lo sinti nos conmovi pa acerc’e den oracion cu confiansa. Segun cu nos ta haci esei, nos tambe lo por expresa e sintimentonan manera esnan di e salmista cu a skirbi: “Di berdad, Dios a tende; el a paga atencion na e bos di mi oracion.”—Salmo 10:17; 66:19.

Con Spirito Santo Ta Yuda Nos

15. (a) Kico Hesus a priminti relaciona cu spirito santo? (b) Menciona un manera cu spirito santo ta yuda nos.

¹⁵ Un poco prome cu Hesus su morto, el a ripiti e siguransa cu el a duna den su ilustracionnan. Papiando di spirito santo, el a bisa su apostelnan: “Lo mi pidi e Tata, y e lo  duna boso un otro consolador [“ayudante”, NW], pa e keda cerca boso pa semper.” (Juan 14:16) Asina Hesus a priminti cu e ayudante, esta, spirito santo, lo tabata despues cu su siguidonan, te den nos tempo. Den ki manera significativo nos ta experencia e apoyo ei awe? Spirito santo ta yuda nos wanta varios prueba. Con asina? Apostel Pablo, kende tambe a pasa den prueba, a describi den un carta pa e cristiannan na Corinto con e spirito di Dios a yud’e. Laga nos considera brevemente kico el a skirbi.

16. Con nos situacion por ta mescos cu esun di Pablo?

¹⁶ Na prome luga, Pablo a bisa su rumannan den fe francamente cu e tabata luchando cu un “sumpiña den carni”, esta, un ke otro prueba. Anto el a agrega: “Mi a roga Señor [Jehova] tres biaha pa esaki por kita for di mi.” (2 Corintionan 12:7, 8) Maske Pablo a suplica Dios pa kita su dificultad, el a keda cu e problema. Podise abo ta den un situacion similar awe. Mescos cu Pablo, kisas bo a haci oracion cu persistencia y cu confiansa, pidiendo Jehova pa kita un prueba. Sinembargo, a pesar di bo frecuente peticionnan, e problema t’ei keto bai. Acaso esei ta nifica cu Jehova no a contesta bo oracionnan y cu su spirito no ta yudando bo? Di ningun manera! (Salmo 10:1, 17) Wak kico apostel Pablo a bisa siguientemente.

17. Con Jehova a contesta e oracionnan di Pablo?

¹⁷ Como contesta riba e oracionnan di Pablo, Dios a bis’e: “Mi gracia ta basta pa bo, pasobra mi poder ta wordo haci perfecto den debilidad.” Pablo a bisa: “P’esei, gustosamente lo mi prefera di gaba den mi debilidadnan, pa e poder di Cristo por biba den mi [“keda riba mi manera un tent”, NW].” (2 Corintionan 12:9; Salmo 147:5) Cu otro palabra, Pablo a mira con mediante Cristo e proteccion poderoso di Dios a ser gespan manera un tent riba dje. Awe, Jehova ta contesta nos oracionnan den un manera paresido. E ta span su proteccion manera un dak riba su sirbidornan.

18. Pakico nos por wanta prueba?

¹⁸ Naturalmente, un tent no ta stop awa di yobe of biento di supla, pero e ta duna algun proteccion contra nan si. Mescos tambe, e proteccion cu “e poder di Cristo” ta percura no ta stop prueba of dificultad di bini riba nos. Pero si e ta duna nos proteccion spiritual contra e elementonan dañino di e mundo aki y e atakenan di su gobernante, Satanas. (Revelacion 7:9, 15, 16) P’esei, asta si bo ta tratando cu un prueba cu no ta ‘kita for di bo’, bo por tin sigur cu Jehova ta conciente di bo lucha y cu e ta contesta “e zonido di bo yoramento.” (Isaias 30:19; 2 Corintionan 1:3, 4) Pablo a skirbi: “Dios ta fiel, kende lo no permiti pa boso wordo tenta mas cu boso por soporta, ma hunto cu e tentacion e lo provee salida tambe, pa boso por soporta.”—1 Corintionan 10:13; Filipensenan 4:6, 7.

19. Kico bo ta determina pa haci, y pakico?

¹⁹ Ta berdad cu e “ultimo dianan” di e mundo malbado aki ta caracterisa pa “temponan trabahoso.” (2 Timoteo 3:1) Pero pa sirbidornan di Dios no ta imposibel pa trata cu nan. Pakico no? Pasobra nan tin e apoyo y proteccion di e spirito santo di Dios, cu Jehova ta duna di buena gana y abundantemente na tur esnan cu pidie cu persistencia y confiansa. P’esei, laga nos ta determina pa sigui pidi tur dia pa spirito santo.—Salmo 34:6; 1 Juan 5:14, 15.

Con Lo Bo Contesta?

• Kico nos tin cu haci pa ricibi spirito santo di Dios?

• Pakico nos por tin e siguransa cu Jehova lo contesta nos oracionnan pa haya spirito santo?

• Con spirito santo ta yuda nos wanta prueba?

[Preguntanan di Estudio]

[Plachi na pagina 21]

Kico nos por siña for di Hesus su ilustracion tocante e anfitrion persistente?

[Plachi na pagina 22]

Abo ta pidi Jehova pa su spirito santo cu persistencia?

[Plachi na pagina 23]

Kico e ilustracion di un tata amoroso ta siña nos tocante Jehova?