Pasco den Ki Direccion e Ta Bayendo?

DIES aña pasa den e mesun luna aki, e revista U.S.News & World Report tabatin como articulo di portada e tema “En Busca di Pasco.” El a enfoca riba e punto cu si Pasco tabata birando “mas puro y menos comercial.” Cosnan ta bayendo den e direccion ei?

E articulo a splica pakico nos no mester spera cu esei ta bai tuma luga. El a declara: “No tin ningun registro cu hende a celebra oficialmente e nacemento di Cristo sino te den siglo cuater, tempo cu Constantino . . . tabata emperador di Roma.” Esei ta mustra “por lo menos parcialmente cu ningun hende no tabata sa sigur ki dia Hesus a nace.” E articulo a admiti cu “e evangelionan no ta bisa nada di e aña, pa no papia mes di e luna of dia exacto.” Segun un historiado di e Universidad di Texas, “e prome prome cristiannan simplemente no tabata interesa den celebra e Nacemento di Hesus.”

Bou di e subtitulo “Asunto di Speculacion”, e articulo a splica “con iglesia a yega na 25 di december.” El a reconoce: “E punto di bista cu a haya mas aceptacion ta cu e fiesta tabata un ‘cristianisacion’ intencional di Saturnalia y otro fiestanan pagano.” “Dor di pone Pasco te den cabamento di december, ora hende tabatin e custumber caba di festeha, lidernan di iglesia a haci sigur cu mas tanto hende posibel por a celebra e nacemento di e Salbador.”Meimei di siglo 19, hende a cuminsa pone mas enfasis riba cumpra y duna regalo. “E tradicion nobo di dunamento di regalo di Pasco a crea un oportunidad directo pa gana hopi placa den comercio, y comerciantenan y empresanan di publicidad a cuminsa promove e temporada mesora.”

Pues no tin motibo pa spera cu Pasco ta bai den direccion di cristianismo puro. Aunke tin hopi “comercialismo extravagante” den e Pasco moderno, echo ta cu nunca cristiannan berdadero a spera di celebra Hesus su nacemento. Mas bien, Bijbel ta pone enfasis riba e rescate cu Cristo a percura pa medio di su morto y resureccion pa bai shelo. (Mateo 20:28) Pa semper esei lo keda di importancia primordial.