Bo Por Mustra Mas Amor?

E CADENA di anker di un barco mester por wanta e presion inmenso cu tin riba dje pa asina evita cu e barco ta drif bai. Sinembargo, esaki ta posibel solamente si e wowonan di e cadena ta fuerte y bon sera. Si no ta asina, e cadena ta kibra.

Nos por bisa mescos di e congregacion cristian. Pa un congregacion ta fuerte y saludabel, e miembronan individual mester ta uni cu otro. Kico ta uni nan? Amor. Esei ta e forsa di mas fuerte pa union. P’esei no ta straño cu Hesucristo a bisa su discipelnan: “Un mandamento nobo mi ta duna boso, pa boso stima otro, y mescos cu ami a stima boso, pa boso tambe stima otro. Na esaki tur hende lo sa cu boso ta mi discipel, si boso tin amor un pa otro.” Si, cristiannan berdadero tin e tipo di amor pa otro cu ta bai mas leu cu simpel amistad y respet mutuo. Nan ta desaroya amor abnega, es decir, amor di sacrificio propio.​—Juan 13:34, 35.

Aprecia Nos Rumannan den Fe

Hopi congregacion ta consisti di hende di diferente edad, rasa, nacionalidad, cultura, idioma y antecedente social. Cada miembro tin su cosnan cu e ta gusta y no ta gusta, su speransa- y temornan, y cada un por lo general tin un peso personal cu e ta carga, podise problema cu salud of insiguridad financiero. E variedad aki lo por ta un reto pa union cristian. Kico anto por yuda nos mustra mas amor y keda uni a pesar cu esei ta un reto? Berdadero aprecio pa tur hende den congregacion lo yuda nos profundisa nos amor pa otro.

Con nos por aprecia otro hende? Si nos ta aprecia nos rumannan den fe, nos ta cla pa reacciona riba nan necesidadnan, nos tin gran respet y admiracion pa nan, nos ta reconoce nan cualidadnan excelente y nos ta gradicido cu nan ta adora e mesun Dios hunto cu nos. Como resultado, nos ta siña stima nan masha hopi. Un consideracion cortico di loke apostel Pablo a skirbi den prome siglo na e cristiannan na Corinto lo yuda nos mira con nos por demostra amor cristian na e grado mas completo posibel.

Corintionan Tabata “Preta y sin Espacio”

Pablo a skirbi su prome carta na e Corintionan na aña 55 di nos era y su di dos carta menos cu un aña despues. Su comentarionan ta indica cu algun hende den e congregacion di Corinto tabata falta aprecio pa nan rumannan den fe. Pablo a describi e situacion den e siguiente palabranan: “Nos boca a habri pa boso, Corintionan, nos curason a hancha su mes. Boso no ta preta y sin espacio den nos, pero si boso ta preta y sin espacio den boso propio tierno cariño.” (2 Corintionan 6:11, 12, NW) Kico Pablo tabata kiermen ora el a bisa nan cu nan ta “preta y sin espacio”?

E tabata kiermen cu nan no tabatin un curason generoso, nan curason tabata limita. Segun un analista di Bijbel, e amor cu e Corintionan tabatin pa Pablo tabata “blokia pa motibo di situacionnan dificil cu a surgi debi na desconfiansa sin base . . . y e sintimento di a ser ofendi.”

 Tuma nota di e conseho cu Pablo a ofrece: “Awor di e mesun manera​—mi ta papia manera cu mucha​—habri boso curason hancho pa nos tambe.” (2 Corintionan 6:13) Pablo a anima e Corintionan pa habri nan curason hancho y mustra mas amor na rumannan den fe. Esaki lo a nifica cu nan mester a ser motiva pa un actitud positivo y un curason generoso, no pa desconfiansa y ofensanan chikito.

Con pa Mustra Mas Amor Awe

Ta alentador pa mira con berdadero adoradonan di Dios awe ta haci gran esfuerso pa mustra mas amor na otro. Ta berdad cu pa mustra mas amor nos tin cu haci esfuerso. E no ta simplemente un asunto di teoria, di sa kico pa haci. E ta exigi di nos pa nos comporta nos mes otro for di hende cu no ta biba segun e normanan di Bijbel. Personanan asina hopi biaha tin tiki aprecio pa otro hende. Nan tin un actitud di no tin cu nes, sin e debido respet y ta sarcastico. P’esei nunca permiti nos mes ser influencia pa e actitudnan ei. Lo ta masha tristo si nos amor, mescos cu den caso di e Corintionan, wordo stroba di crece debi na sintimentonan di desconfiansa. Esaki lo por sosode si nos ta cla pa mira e faltanan di un ruman cristian pero slow pa reconoce su bon cualidadnan. Lo e por sosode tambe si den nos curason no tin espacio pa mustra cariño na un persona pasobra e ta di un otro cultura.

Na contraste, un sirbidor di Dios cu ta mustra mas amor tin berdadero aprecio pa su rumannan den fe. E tin gran respet y admiracion pa nan, ta respeta nan dignidad y ta cla pa reacciona riba nan necesidadnan. Asta ora tin motibo valido pa keha, e ta ansioso pa pordona y ta nenga di carga rencor. Na luga di esei e ta  confia cu su rumannan den fe no ta haci cos cu mal intencion. Un curason generoso ta yud’e mustra e tipo di amor cu Hesus tabatin na mente ora el a profetisa: “Na esaki tur hende lo sa cu boso ta mi discipel, si boso tin amor un pa otro.”​—Juan 13:35.

Haci Esfuerso y Sera Amistadnan Nobo

Amor sincero lo yuda nos haci esfuerso pa bai mas aya di nos circulo di amigo y busca compañerismo di e rumannan den congregacion cu normalmente nos no tin contacto estrecho cu ne. Ken esakinan lo por ta? Algun di nos rumannan cristian ta timido of, pa un motibo of otro, nan tin tiki amigo. Na prome instante nos lo por sinti cu fuera di ta uni den adoracion, nos no tin masha en comun cu nan. Pero no ta asina cu den Bijbel algun di e amistadnan di mas pega tabata entre hende cu na prome bista a parce di tin masha tiki en comun?

Por ehempel, Ruth cu Noemi no tabata di mesun edad, nan tabata di diferente nacionalidad y cultura y asta nan lenga materno tabata distinto for di otro. Toch nan amistad no a wordo afecta pa e diferencianan ei. Jonatan a lanta como prins, y David como wardado di carne. E diferencia di edad entre nan dos tabata basta grandi, sinembargo nan amistad ta un di esnan mas pega menciona den e Santo Scritura. Tur e dos amistadnan aki tabata un fuente di placer y sosten spiritual pa esnan envolvi.​—Ruth 1:16; 4:15; 1 Samuel 18:3; 2 Samuel 1:26.

Asta awe amistadnan pega ta desaroya entre cristiannan berdadero cu no ta di e mesun generacion of kende nan situacion den bida ta completamente distinto for di otro. Por ehempel, Regina ta un mama soltero cu dos yiu teenager. * E ta un hende hopi ocupa y tin tiki tempo pa socialisa. Harald cu Ute ta un pareha casa pensiona cu no tin yiu. Superficialmente, e dos famianan aki por parce di tin poco en comun. Pero Harald cu Ute a aplica e conseho biblico pa habri nan curason y mustra mas amor. Nan a haci esfuerso pa inclui Regina cu su muchanan den hopi actividad, y nan ta pasa tempo hunto cu nan den e ministerio publico y den recreo.

Nos tambe lo por bai mas aya di nos circulo regular di amigo? Pakico no busca contacto mas estrecho cu rumannan den fe di otro nacionalidad, cultura of edad, sea mas jong of mas bieu?

Sea Cla pa Reacciona Riba e Necesidadnan di Otro Hende

Un curason generoso lo motiva nos pa presta atencion na e necesidadnan di otro hende. Ki sorto di necesidad? Wel, observa e miembronan di e congregacion cristian. Hobennan tin mester di guia, rumannan di edad tin mester di animacion, rumannan den sirbishi di tempo completo tin mester di elogio y sosten, y rumannan deprimi tin mester di un hende pa scucha nan. Tur hende tin necesidad. Nos lo kier yuda cu e necesidadnan aki te caminda rasonablemente nos por.

Haci esfuerso pa mustra mas amor ta nifica tambe cu nos lo mustra comprension na e rumannan cu tin necesidadnan special. Bo conoce un ruman cu tin un enfermedad cronico of cu ta confronta cualkier otro prueba den bida? Si bo habri bo curason hancho pa mustra amor y cultiva un curason generoso, esei lo yuda bo mustra comprension y duna sosten na personanan den necesidad.

Ora cu profesianan biblico di futuro cercano cuminsa cumpli, lasonan fuerte di union den e congregacion lo ta di hopi mas balor cu pocesion material, habilidad of logronan. (1 Pedro 4:7, 8) Cada un di nos personalmente por yuda fortalece e lasonan di union den nos propio congregacion haciendo esfuerso pa mustra mas amor na nos rumannan den fe. Nos por tin sigur cu Jehova lo bendiciona nos ricamente pasobra nos ta actua na harmonia cu e palabranan di su Yiu, Hesucristo, kende a bisa: “Esaki ta mi mandamento, cu boso stima otro mescos cu ami a stima boso.”​—Juan 15:12.

[Nota]

[Comentario na pagina 10]

Aprecio pa nos rumannan ta nifica cu nos tin gran respet y admiracion pa nan, ta respeta nan dignidad y ta cla pa reacciona riba nan necesidadnan