Bo Por Wanta e Tempestad

DEN e temponan trabahoso aki, tin hopi hende ta wanta contratiemponan turbulento cu ta manera tempestad. Sinembargo pa cristiannan, amor pa Dios y lealtad na su principionan ta yuda nan trata cu e situacion. Con asina? Nos por haya e contesta den un ilustracion cu Hesucristo a conta. El a compara su discipelnan obediente cu “un homber sabi cu a traha su cas riba baranca.” Hesus a bisa: “Awasero a cai, diluvionan a bin, y bientonan a supla, y a suta duro contra e cas ei; y toch e no a cai, pasobra e tabata funda riba baranca.”​—Mateo 7:24, 25.

Tuma nota cu maske e homber den e ilustracion ta sabi, toch e ta hay’e cu contratiempo, representa pa e awasero, diluvio y bientonan destructivo. Pues anto, Hesus no a indica cu su discipelnan lo ta liber di tur dificultad y gosa semper di un bida di pas y trankilidad. (Salmo 34:19; Santiago 4:13-15) Pero el a bisa si cu fiel sirbidornan di Dios por prepara pa e contratiempo- y crisisnan turbulento ei y enfrenta nan cu exito.

Hesus a cuminsa e ilustracion cu e palabranan: “Ken cu tende e palabranan aki di mi, y haci nan, lo wordo compara cu un homber sabi cu a traha su cas riba baranca.” Claro cu Hesus no tabata papia di trahamento di cas literal, sino tocante edifica bida cristian, esta, desaroya motivacion y echonan cristian. Hende cu ta haci caso di e palabranan di Cristo ta uza discernimento y ta demostra sano huicio. Nan ta edifica nan motivacion- y echonan riba e baranca solido di e siñansanan di Cristo dor di pone na practica loke nan a ser siña. Un punto interesante ta cu nos no ta haya e baranca figurativo aki na superficie. E homber den e ilustracion mester a “coba hundo” pa yeg’e. (Lucas 6:48) Asina tambe discipelnan di Hesus ta sigui traha duro pa cultiva cualidadnan duradero cu ta hala nan mas cerca di Dios.​—Mateo 5:5-7; 6:33.

Kico ta pasa ora cu dificultadnan turbulento ta test e firmesa di e fundeshi cristian di e siguidonan di Hesus? Nan fuentenan di fortalesa durante tal dificultadnan ta e echo cu nan ta obedece e siñansanan di Cristo di buena gana y cu nan tin cualidadnan cristian. Mas importante ainda, esei lo fortalece nan durante e benidero tempestad di Armagedon. (Mateo 5:10-12; Revelacion 16:15, 16) Si, hopi hende ta wanta dificultadnan turbulento cu exito como cu nan ta sigui e siñansanan di Cristo. Abo tambe por haci mescos.​—1 Pedro 2:21-23.