Con Bo Por Tin Exito
Con Bo Por Tin Exito
MESCOS cu mayornan ta interesa den nan yiunan y kier pa nan logra exito, asina tambe nos Tata celestial ta interesa den nos y kier pa nos logra exito. Pa demostra su tierno cariño, e ta duna nos hopi informacion tocante exito y fracaso. De echo, cu confiansa Bijbel ta declara tocante un persona cu ta presta atencion na loke Dios ta bisa: “Tur loke cu e haci ta prospera.”—Salmo 1:3.
Si esei ta e caso, dicon anto hopi hende no ta logra un bida exitoso y felis cu ta duna nan satisfaccion? Si nos analisa e salmo aki mas a fondo, nos lo haya e contesta y nos lo mira con nos tambe por tin exito.
“E Conseho di Malbadonan”
E salmista ta spierta nos pa e peliger di cana den “e conseho di malbadonan.” (Salmo 1:1) “E malbado” principal ta Satanas e Diabel. (Mateo 6:13) E Scritura ta bisa nos cu e ta “e prins di e mundo aki” y cu “henter mundo ta bou di control di e malbado.” (Juan 16:11; 1 Juan 5:19) Pues, no ta nada straño cu gran parti di e conseho cu bo ta haya den mundo ta refleha e manera di pensa di e malbado ei.
Ki clase di conseho malbadonan ta ofrece? En general, hende malbado no ta respeta Dios. (Salmo 10:13) Nan conseho, cu ta ignora of mustra falta di respet pa Dios, ta tur caminda rond di nos. Sociedad moderno ta promove “e deseo di carni y e deseo di wowo y e orguyo di bida [of, pa “cana pronk cu loke bo tin”, BPK].” (1 Juan 2:16) Medionan di comunicacion ta bombardia nos cu un filosofia materialista di “saca maximo probecho di bida.” Rond mundo companianan ta gasta mas cu 900 mil miyon florin pa aña na propaganda pa combence hende pa cumpra nan productonan; sea cu consumidonan tin mester di nan of no. Anto e propagandanan aki no solamente a influencia loke hende ta cumpra, sino tambe a troce mundo su punto di bista di exito.
Como resultado, hende tin un sed insaciabel pa mas cos material a pesar cu nan ta doño di cosnan cu un tempo nan por a soña so cu ne. Nan ta haya cu si bo no tin e cosnan aki, bo no por ta felis ni exitoso. E pensamento aki no ta cuadra cu berdad y “no ta bin di e Tata, sino di e mundo.”—1 Juan 2:16.
Nos Creador sa kico ta haci nos realmente exitoso. Su conseho ta diferente for di “e conseho di malbadonan.” P’esei, un hende cu ta purba gana Dios su fabor y a la bes ta cana den mundo su caminda pa logra exito ta mescos cu un hende cu ta purba cana den dos caminda pareu. Esei simplemente no ta posibel. Nada straño anto cu Bijbel ta duna e spiertamento: “No laga e manera di pensa di e mundo aki forma boso.”—Romanonan 12:2, BPK.
No Laga Mundo Forma Bo
E mundo bou di influencia di Satanas ta purba duna e impresion cu e ta interesa den nos bienestar. Sinembargo nos mester ta cauteloso. Corda cu Satanas egoistamente a engaña e prome hende muher, Eva, pa sirbi Satanas su propio interes. Despues el a uza Eva pa pone Adam peca. Awe tambe Satanas ta uza hende pa haci propaganda malicioso p’e.
Por ehempel David, menciona den e articulo anterior, lo mester a traha overtime y bai afo cu frecuencia pa negoshi. David a bisa: “Mi tabata biaha dialuna mainta tempran y bin bek diahuebs anochi.” Amigo-, famia,- y coleganan di trabou sincero tabata sa cu e tipo di sacrificionan ei ta necesario pa logra exito den mundo, p’esei nan tabata urgi David: “Hacie pa bo famia.” Nan tabata rasona cu lo e tin cu mantene e rutina ei pa un par di aña so te ora e ta bon estableci. David a splica: “Nan tabata hustifica esei bisando cu esaki ta mihor pa mi famia pa motibo cu lo mi trece mas placa cas, pues, lo mi por ta mas exitoso. Maske mi no tabata hunto cu mi famia, mi amigonan a combence mi cu en realidad asina lo mi ta dunando mas na mi famia.” Mescos cu David, tin hopi hende ta traha duro pa duna nan famia tur loke nan ta kere cu nan sernan keri tin mester. Pero siguiendo e tipo di conseho aki ta hiba na exito? Kico un famia realmente tin mester?
David a descubri esei mientras e tabata afo riba un biahe di negoshi. El a conta: “Mi tabata papia na telefon cu mi yiu muher Angelica, y el a puntra: ‘Papi, pakico bo no kier keda cas cerca nos?’ E palabranan ei a traumatisa mi.” Loke su yiu muher a bisa a hacie mas determina pa entrega su retiro. David a dicidi di duna su famia locual nan realmente tabatin mester: e mes.
Aplicacion di Dios Su Conseho Ta Resulta den Exito
Con bo por logra resisti propaganda negativo cu tin asina tanto influencia riba e mundo aki? E salmista ta bisa nos cu hende exitoso y felis ta esnan cu nan ‘delicia ta den e lei di Jehova, y den su lei nan ta medita di dia y anochi.’—Salmo 1:2.
Ora Dios a nombra Josue como lider di e nacion di Israel, el a bisa Josue: “Bo mester medita den [e Palabra di Dios] di dia y anochi.” Si, tabata masha importante pa lesa y medita riba e Palabra di Dios, pero tambe Josue mester a “percura di haci conforme tur loke [tabatin] para skirbi den dje.” Claro cu lesamento di Bijbel riba su mes lo no haci bo automaticamente un persona exitoso. Bo mester aplica loke bo ta lesa. Dios a bisa Josue: “Pasobra e ora ei lo bo haci bo caminda prospera, y e ora ei lo bo tin exito.”—Josue 1:8.
Imagina bo un mucha sinta contento di dje riba scochi di un mayor amoroso segun cu nan ta lesa un cuenta preferi hunto. Sin importa cuanto biaha nan a yega di les’e, nan no ta lubida e momentonan inolvidabel ei. Asina tambe, un hende cu ta stima Dios ta haya lesamento diario di Bijbel un experencia agradabel, un dushi momento cu e ta pasa hunto cu su Tata celestial. Un hende cu ta sigui Jehova su conseho y guia ta bira “manera un palo, planta canto di coridanan di awa, cu ta duna su fruta na su tempo, y su blachi no ta marchita; y tur loke cu e haci ta prospera.”—Salmo 1:3.
E palo cu e salmista a describi no ta crece pa casualidad. E cunukero ta plant’e cuidadosamente canto di un fuente di awa y e ta cuid’e. Di un manera similar, nos Tata celestial ta ahusta y corigi nos manera di pensa mediante e conseho cu tin den e Scritura. Como resultado, nos ta bona y ta produci fruta of cualidadnan cu ta na harmonia cu Dios su guia.
Sinembargo, “no t’asina cu e malbadonan.” Ta berdad cu pa un tempo por parce cu nan ta prospera, pero finalmente cos lo bai malo cu nan. Nan ‘lo no keda para durante huicio.’ Mas bien, “e caminda di e malbadonan lo perece.”—Salmo 1:4-6.
P’esei no laga mundo forma bo metanan ni bo norma- y balornan. Por ta masha bon cu bo tin hopi talento y e potencial pa logra exito den e mundo aki, pero tene cuidou con bo ta uza bo talento of con bo ta laga mundo uz’e. Metanan materialista inutil por pone un hende “marchita.” Di otro banda, un bon relacion cu Dios si ta resulta den exito y felicidad.
Con Bo Por Tin Exito
Dicon ora un hende ta sigui Dios su conseho, tur loke cu e haci lo prospera? E salmista no tabata papia tocante exito den e mundo aki. Pa un hende devoto por tin exito e tin cu haci e boluntad di Dios, anto e boluntad di Dios semper tin exito. Laga nos wak con aplicacion di principio biblico por yuda bo logra exito.
Famia: E Scritura ta instrui esposonan pa “stima nan esposa manera nan mes curpa”, y na esposa cristian e ta bisa “pa e respeta su esposo.” (Efesionan 5:28, 33) Mayornan ta wordo anima pa pasa tempo hunto cu nan yiunan, pa hari cu nan, y siña nan tocante e cosnan importante den bida. (Deuteronomio 6:6, 7; Eclesiastes 3:4) Ademas, e Palabra di Dios ta conseha mayornan: “No provoca boso yiunan na rabia.” Ora nan ta aplica e conseho aki, ta hopi mas facil pa yiunan “obedece [nan] mayornan” y pa nan “honra [nan] tata y [nan] mama.” (Efesionan 6:1-4) Famianan cu sigui e conseho divino aki por logra exito den nan bida di famia.
Amigonan: Mayoria di hende kier tin amigo. Nos tin e capasidad mental y emocional pa stima y ser stima. Hesus a bisa su siguidonan cu nan mester “stima otro.” (Juan 13:34, 35) Entre e siguidonan di Hesus nos ta haya amigonan cu nos por stima y confia asta cu nos sintimento- y pensamentonan di mas profundo. (Proverbionan 18:24) Anto loke ta mas importante ainda ta cu ora nos ta aplica principionan biblico, nos por “hala cerca Dios” y asta ser yama ‘amigo di Jehova’, mescos cu Abraham.—Santiago 2:23; 4:8.
Proposito den Bida: En bes di djis biba pa biba, esnan cu ta berdaderamente exitoso ta haya un proposito den bida. Nan bida no ta basa riba e condicionnan instabil di e sistema di cosnan aki. Nan metanan ta hiba na satisfaccion berdadero y duradero ya cu nan ta enfoca riba e berdadero proposito di bida. Kico ta duna un hende proposito den bida? “Teme Dios y warda su mandamentonan, pasobra esaki ta aplicabel na cada persona.”—Eclesiastes 12:13.
Speransa: Ora nos tin Dios como nos amigo, esei ta duna nos un speransa pa futuro tambe. Apostel Pablo a urgi cristiannan “pa nan no fiha nan speransa riba e insiguridad di rikesa, ma riba Dios.” Di e manera ei, nan lo “montona pa nan mes e tesoro di un bon fundeshi pa futuro, pa nan gara loke ta bida berdadero.” (1 Timoteo 6:17-19) E bida berdadero aki pronto lo bira un realidad ora e Reino celestial di Dios restaura Paradijs aki riba tera.—Lucas 23:43.
Si bo aplica principionan biblico, lo bo no ta liber di problema, pero lo bo evita si hopi pena y dolor cu e malbadonan ta causa nan mes. David, menciona anteriormente, y miyones di persona mescos cu ne a siña e balor di aplica principio biblico den nan bida. Despues cu David a haya un trabou cu un orario mas mihor, el a bisa: “Mi ta aprecia e relacion cu mi tin cu mi casa y cu mi yiunan y tambe e privilegio di por sirbi Jehova Dios como un anciano di congregacion.” Nada straño cu e salmo ta bisa tocante un hende cu ta presta atencion na e conseho di Dios: “Tur loke cu e haci ta prospera”!
[Tabel na pagina 6]
CINCO PASO PA LOGRA EXITO
1 No laga e norma- y balornan di e mundo aki forma bo.
2 Lesa y medita riba e Palabra di Dios tur dia.
3 Aplica conseho biblico den bo bida.
Josue 1:7-9
4 Laga Dios bira bo amigo.
5 Teme e Dios berdadero, y warda su mandamentonan.
[Plachi na pagina 7]
Abo ta siguiendo e pasonan pa logra exito?