Con Bo Ta Midi Exito?

TIN hende ta considera Jesse Livermore como e persona di mas exitoso den historia di bolsa di balor di Wall Street. E tabata conoci pa e echo cu e tabata tuma bon decision den asuntonan di negoshi. Como resultado el a acumula un gran cantidad di rikesa. E tabata bisti e bachinan di mihor calidad, cosi na man. El a biba den un mansion di 29 camber y a core den un Rolls-Royce preto cu su chauffeur.

David * tabata riba e mesun rumbo ei. Como vicepresidente y gerente general di un compania grandi di arte grafico, e tabata den fila pa bira presidente di un division di e compania. Rikesa y prestigio tabata atra’e. Sinembargo, David a dicidi di entrega su retiro. El a bisa: “Mi sa cu nunca mas lo mi sigui un carera lucrativo como ehecutivo.” Bo ta kere cu David a tuma un mal decision?

Hopi hende ta kere cu exito ta nifica alcansa rikesa, popularidad y prominencia. Pero, hende cu tin hopi cos material toch por sinti cu nan ta bashi y sin proposito den bida. Esei tabata bisto den caso di Jesse Livermore. A pesar di su rikesa, su bida tabata yen di sufrimento, tragedia y tristesa. El a sufri di depresion, a pasa den varios divorcio y no tabatin un bon relacion cu su yiu hombernan. Finalmente, despues cu el a perde gran parti di su fortuna, Jesse Livermore a sinta un dia den un bar di  un hotel luhoso y lamenta su desgracianan. El a pidi un drinks, a saca su buki di nota di cuero y a skirbi un nota di despedida pa su esposa. Ora el a caba di dal su drinks, el a bai den un cuarto un poco scur caminda hende ta colga bachi y otro articulonan y lamentablemente a pone fin na su bida.

Ta berdad cu e motibonan pakico hende ta comete suicidio ta hopi complica, pero e experencia aki ta mustra cu e siguiente declaracion biblico ta berdad: “Esnan cu kier bira rico . . . a traspasa nan mes cu hopi dolor.”​—1 Timoteo 6:9, 10.

Ta posibel cu esnan cu ta midi exito a base di rikesa, posicion y prominencia ta uzando un criterio robes? Bo ta considera bo mes un hende exitoso? Dicon? Ki criterio bo ta uza pa determina esei? Kico ta forma bo punto di bista pa loke ta trata exito? E siguiente articulo ta trata conseho confiabel cu a yuda miyones di hende logra exito. Laga nos mira con abo tambe por tin exito.

[Nota]