Storia di Bida

Decisionnan Bon A Hiba na Bendicion pa Bida Largo

Segun e relato di Paul Kushnir

NA AÑA 1897 mi welo cu mi wela a emigra for di Ucrania pa Canada y a establece nan mes na Yorkton, Saskatchewan. Nan a yega einan cu cuater yiu, tres homber y un muher. Na 1923 nan yiu muher, Marinka, a haya ami; mi tabata su di shete yiu. E tempo ei bida tabata simpel pero trankil. Nos tabatin bon cuminda y paña pa friu, y gobierno tabata percura e servicionan basico. Bisiñanan amabel tabata cla pa yuda otro cu trabounan grandi. Durante e winter di 1925, un di e Studiantenan di Bijbel, manera Testigonan di Jehova tabata conoci e tempo ei, a bishita nos. E bishita ei a motiva nos pa tuma decisionnan pa cua te awe mi ta gradicido.

Berdad Biblico Ta Drenta Nos Hogar

Mi mama a acepta algun foyeto chikito for di e Studiante di Bijbel y poco despues el a reconoce cu esaki ta e berdad. El a haci progreso spiritual masha lihe y a batisa na 1926. Ora mi mama a bira un Studiante di Bijbel, nos famia a haya completamente un otro punto di bista di bida. Nos cas a bira un luga di mustra hospitalidad. Superintendentenan biahero, yama peregrino, y otro Studiantenan di Bijbel, tabata keda hopi biaha cerca nos. Na 1928 un superintendente biahero a mustra nos e “Drama Eureka”, un version simplifica di e “Foto-Drama di Creacion.” Cerca nos cu tabata mucha el a fia un dori di co’i hunga cu tabata saca un zonido di click. Ora e dori a click, tabata momento pa cambia e slide. Nos a sinti nos orguyoso cu e por a uza nos dori di co’i hunga den e drama ei.

Un superintendente biahero cu yama Emil Zarysky a bishita nos hopi bes cu su cas riba wiel. Tabatin biaha cu su yiu homber adulto a compañ’e, y e yiu tabata anima nos como mucha pa pensa pa bira pionero, esta, predicado di tempo completo. Hopi pionero tambe a keda na nos cas. Un biaha, Mama a fia un pionero un camisa pa e bisti tanten cu Mama a drecha su  camisa. E ruman, cabes yen, a bai cu e camisa. Hopi tempo despues el a mand’e bek y a pidi masha despensa pasobra el a tarda pa mand’e. El a skirbi: “Mi no tabatin moda di paga e dies cen di stampia.” Pa nos, mihor el a keda cu e camisa! Mi a spera cu un dia lo mi por a imita e pioneronan ei cu a demostra asina un actitud di sacrificio propio. Mi ta masha gradicido na mi mama pa su spirito hospitalario cu a enrikece nos bida y a aumenta nos amor pa e hermandad.​—1 Pedro 4:8, 9.

Mi tata no a bira un Studiante di Bijbel, pero tampoco el a opone nos. Na 1930 el a asta permiti e rumannan uza su keet grandi pa un asamblea di un dia. Aunke mi tabatin apenas shete aña, e goso y dignidad di e ocasion ei a impresiona mi. Mi tata a muri na 1933. Mi mama, cu a bira e ora ei un viuda cu ocho yiu, no a desvia ni un tiki for di su determinacion pa tene nos riba e caminda di adoracion berdadero. E tabata percura pa mi asisti na reunion hunto cu ne. E tempo ei e reunionnan tabata parce masha largo mes, y ami tabata yen di gana di por a bai cerca e otro muchanan, cu si tabatin mag di hunga pafo. Sinembargo, pa respet pa Mama mi a keda paden. Ora Mama tabata cushna, hopi biaha el a cita un texto biblico anto a puntra mi unda e texto ei ta den Bijbel. Na 1933 nos a haya un bon cosecha, anto Mama a uza e entrada extra pa cumpra un auto. Tabatin bisiña cu a critic’e pasobra nan a haya cu e ta malgasta placa, pero el a spera cu e auto lo a yuda nos den nos actividadnan teocratico. Anto asina a resulta.

Otro Rumannan A Yuda Mi Tuma Decisionnan Corecto

Ta yega un momento den bida cu un hoben tin cu scohe un rumbo, tuma decisionnan, cu lo tin efecto riba su futuro. Ora cu e momento ei a yega pa Helen cu Kay, mi ruman muhernan mas grandi, nan a cuminsa traha pionero. Un pionero cu a disfruta di hospitalidad na nos cas tabata John Jazewsky, un bon yoncuman. Mama a pidi John pa keda un tempo pa yuda cu e boerderij. Despues, John a casa cu Kay, y nan a bai traha pionero no mucho leu for di nos cas. Ora mi tabatin 12 aña, nan a invita mi bin compaña nan den sirbishi di veld durante vakantie di scol. Esei a duna mi e chens di purba e bida di pionero.

Cu tempo, ami cu mi ruman homber John por a tuma gran parti di e maneho di e boerderij. Esei a duna Mama chens pa uza e lunanan di zomer pa sirbi como pionero ausiliar, manera nos ta yam’e awe. E tabata uza un kitoki cu un cabai bieu a lastra. Tata a yama e cabai terco Saul, pero pa Mama e tabata un bestia manso cu e por a maneha. Ami cu John tabata gusta e boerderij masha hopi, pero cada biaha cu Mama bin cas for di sirbishi di veld y a conta su experencianan, nos amor pa e sirbishi di pionero a cuminsa bira mas tanto y nos amor pa e boerderij a cuminsa mengua. Na 1938 mi a aumenta mi actividad den sirbishi di veld, y dia 9 di februari 1940 mi a batisa.

Poco tempo despues mi a keda nombra como sirbidor den e congregacion. Mi tabata mantene e registronan di congregacion y a alegra ki ora cu tabatin un aumento. Mi tabatin un teritorio personal pa predica den un pueblo cu a keda un 16 kilometer for di cas. Den winter, mi tabata cana bai einan tur siman y a keda drumi un of dos anochi den e zolder di un famia cu a mustra interes den Bijbel. Despues di un combersacion cu e pastor luterano​—durante cua mi no a demostra masha tacto​—el a menasa di manda polis pa mi si mi no laga su tou na pas. Esei a haci mi asta mas determina pa sigui padilanti.

Na 1942 mi ruman muher Kay cu su casa, John, a traha plan pa asisti na un congreso na Cleveland, Ohio, na Merca. Mi a keda  masha contento cu nan a invita mi pa bai cu nan. E congreso ei tabata un di e mihor cosnan cu a pasa cu mi. El a yuda mi plannan pa futuro bira mas concreto. Ora Ruman Nathan Knorr, kende e tempo ei tabata hiba delantera den e trabou mundial, a haci un yamada motivador pa haya 10.000 pionero, mi a dicidi mesora pa ta un di nan!

Na januari 1943, Henry, un predicado biahero, a bishita nos congregacion. El a duna un discurso stimulante cu a yena nos cu entusiasmo. E dia despues di su discurso e temperatura tabata 40 grado Celsius bou di cero, y un biento fuerte for di noordwest tabata laga bo sinti asta mas friu ainda. Normalmente nos lo a keda paden durante un ola di friu asina, pero Henry tabata ansioso pa sali den sirbishi. E cu e otro rumannan a bai un pueblito cu a keda un 11 kilometer leu, den un slee tapa, cu cabai a lastra y ekipa cu un tipo di confo di carbon. Mi so a bai bishita un famia cu tabatin cinco yiu homber. Nan a acepta mi oferta pa studia Bijbel cu nan, y cu tempo nan a acepta e berdad.

Predicando bou di Prohibicion

Durante Segundo Guera Mundial, autoridadnan a prohibi e obra di Reino na Canada. Nos mester a sconde nos literatura biblico, y nos boerderij tabatin cantidad di luga di sconde cos. Polis tabata pasa cu frecuencia cerca nos pero nunca nan no a haya nada. Ora di bai predica, nos tabata uza Bijbel so. Nos tabata reuni den grupo chikito, y e rumannan a scohe ami cu mi ruman John pa fungi como mensahero secreto.

Durante e guera, nos congregacion a participa den un distribucion nacional di e foyeto chikito Fin di Nazismo. Nos a sali meianochi pa bai parti nan. Mi tabata hopi nervioso ora nos tabata acerca cada cas cuchicuchi y laga un foyeto dilanti di porta. Esei tabata e cos di mas spantoso cu mi a yega di haci. Ki un alivio ora nos a laga e ultimo ehemplar di e foyeto ei! E ora ei nos a pura bai bek na auto, haci sigur cu tur hende tabat’ei y a disparce den scuridad di anochi.

Sirbishi di Pionero, Prizon y Asamblea

Dia 1 di mei 1943, mi a yama mi mama ayo. Cu 20 dollar den mi cartera y un maleta chikito, mi a sali rumbo pa mi prome asignacion di pionero. Ruman Tom Troop cu su famia amoroso na Quill Lake, Saskatchewan, a duna mi posada hospitalariamente. E siguiente aña, mi a bai un teritorio aisla na Weyburn, Saskatchewan. Predicando riba caya dia 24 di december 1944, polis a aresta mi. Despues di a pasa algun dia den e prizon local, nan a hiba mi na un campamento na Jasper, Alberta. Ami hunto cu otro Testigonan tabata einan rondona pa e grandesa di Jehova su creacion, esta, e Rocky Mountains Canades. Na cuminsamento di aña 1945, oficialnan di e campamento a permiti nos asisti na un reunion na Edmonton, Alberta. Ruman Knorr a duna un informe excitante tocante e progreso di e obra mundial. Nos tabata anhela e dia cu nos lo a sali for di prizon pa nos por a participa plenamente atrobe den e ministerio.

Ora mi a sali liber, mi a reanuda e sirbishi di pionero. Poco despues, a keda anuncia cu lo tene e Asamblea “Expansion di Tur Nacion” na Los Angeles, California. Un ruman homber den mi asignacion nobo di pionero a pone banki den su truck di manera cu 20 pasahero por a sinta. Dia 1 di augustus 1947, nos a cuminsa cu un biahe memorabel di 7.200 kilometer cu a hiba nos atrabes di sabana, desierto y paisahenan mahestuoso, incluso e parkenan nacional Yellowstone y Yosemite. Henter e biahe a dura 27 dia, ki un experencia maraviyoso!

E congreso mes tabata un bendicion inolvidabel. Pa beneficia plenamente di e ocasion mi a sirbi den dia como usher y anochi como vigilante. Mi a yena un solicitud pa sirbishi di misionero despues di a asisti na un reunion pa esnan interesa den esei, pero mi no a carga masha speransa di haya un invitacion. Mientrastanto, na 1948, mi a reacciona riba e yamada pa pioneronan bai sirbi na e provincia Canades di Quebec.​—Isaias 6:8.

 Galaad y Despues

Na 1949 mi a keda hopi contento di haya un invitacion pa asisti na e di 14 klas di e Scol Biblico di Galaad di Watchtower. E entrenamento ei a fortalece mi fe y a hala mi mas cerca di Jehova. John cu Kay a gradua mas prome for di e di 11 klas y tabata sirbi como misionero na Noord Rodesia (awor Zambia). Mi ruman homber John a gradua di Galaad na 1956. Hunto cu su casa Frieda, el a sirbi na Brazil pa 32 aña te na su morto.

Dia di mi graduacion na februari 1950, mi a haya hopi animacion for di dos telegram, un di mi mama y e otro di famia Troop di Quill Lake. E telegram di famia Troop, cu e encabesamento “Conseho na un Graduado”, a bisa: “Esaki ta un dia grandi pa bo. Un dia cu semper lo bo atesora; y ohala cu exito y felicidad tambe lo bo realisa.”

Mi a haya e asignacion pa sirbi den e stad di Quebec, pero pa un tempo mi a keda na e Hacienda di Reino na Estado di New York, caminda Scol di Galaad tabata situa. Un dia, Ruman Knorr a puntra mi si lo mi ta dispuesto pa bai Belgica. Sinembargo, un par di dia despues, el a puntra mi si lo mi ta di acuerdo pa haya un asignacion na Hulanda. Mi a haya e carta di asignacion, y den dje tabatin para cu mi mester a “asumi e trabou di sirbidor di sucursal.” Esei tabata abrumador.

Dia 24 di augustus 1950, mi a sali riba barco pa un biahe di 11 dia rumbo pa Hulanda. Mi tabatin suficiente tempo pa lesa henter e Traduccion di Mundo Nobo di e Scritura Griego Cristian cu a caba di sali nobo. Mi a yega Rotterdam dia 5 di september 1950, y a haya un caluroso bonbini di e famia di Betel. A pesar di e destruccion cu Segundo Guera Mundial a causa, e rumannan a haci bon trabou pa reanuda e actividadnan cristian. Segun cu mi tabata scucha nan conta con nan a mantene integridad bou di persecucion severo, mi tabata pensa cu lo por ta duro pa e rumannan ei cu awor nan lo tin cu bai sirbi bou di e guia di un sirbidor di sucursal hoben y sin experencia. Sinembargo, poco despues a bira bisto cu mi no tabatin nodi precupa.

Claro cu algun asunto tabatin mester di atencion. Mi a yega net prome cu un congreso y a keda impresiona ora mi a mira cu miles di delegado tabata hospeda na e sitio di congreso. Pa e siguiente congreso, mi a sugeri pa nos busca acomodacion den casnan priva. E rumannan a haya esei un bon idea, pero no pa nan pais. Despues di a rasona riba e asunto, nos a yega na un compromiso: mitar di e delegadonan lo a hospeda na e sitio di congreso y e otro mitar den casnan di hende cu no ta Testigo den e stad di congreso. Como cu mi a keda basta contento cu e resultado, mi a menciona esei na Ruman Knorr ora cu el a asisti na e congreso. Sinembargo, cualkier sintimento di logro cu mi tabatin a disparce di biaha ora cu mi a lesa despues un informe tocante nos congreso den E Toren di Vigilancia. E informe a bisa: “Nos tin  sigur cu e siguiente biaha e rumannan lo demostra fe y haci esfuerso pa hospeda e delegadonan di congreso den e manera cu ta mas efectivo pa duna testimonio, esta, den cas di hende.” Esei ta precies loke nos a haci e “siguiente biaha”!

Na juli 1961, dos representante di nos sucursal a haya invitacion pa asisti na un reunion na London cu representantenan di otro sucursal. Ruman Knorr a anuncia cu lo bai haci e Traduccion di Mundo Nobo di e Santo Scritura disponibel na mas idioma, incluso na Hulandes. Esta un noticia excitante! Afortunadamente, nos no por a imagina e magnitud di e proyecto. Dos aña despues, na 1963, mi tabatin e placer di participa den un programa na un congreso na New York caminda a anuncia publicacion di e Traduccion di Mundo Nobo di e Scritura Griego Cristian na Hulandes.

Decisionnan y Asignacion Nobo

Na augustus 1961, mi a casa cu Leida Wamelink. Henter su famia a acepta e berdad na 1942 durante e tempo di persecucion Nazi. Leida a cuminsa traha pionero na 1950 y a bin Betel na 1953. E manera cu e tabata traha na Betel y den congregacion a laga mi mira cu lo e ta un compañera leal den mi ministerio.

Un poco mas cu un aña despues cu nos a casa, mi a haya invitacion pa bai Brooklyn pa un curso di entrenamento adicional di dies luna. No tabatin areglo pa esposa compaña nan esposo. Aunke Leida su salud no tabata bon, amorosamente el a bai di acuerdo pa mi acepta e invitacion. Mas despues, Leida su problemanan di salud a empeora. Nos a purba sigui cu nos trabou na Betel, pero cu tempo nos a dicidi cu lo ta mas practico pa sigui cu nos sirbishi di tempo completo den veld. Pues nos a cuminsa sirbi den e sirbishi biahero. Poco despues mi casa mester a haci un operacion grandi. Cu e sosten amoroso di e rumannan, nos a logra trata cu e situacion, y un aña despues nos por a asta acepta e asignacion pa sirbi den e trabou di districto.

Nos a disfruta di shete aña di sirbishi stimulante den e trabou biahero. Anto nos mester a bolbe tuma un decision pisa ora cu mi a haya e invitacion pa ta instructor di e Scol di Ministerio di Reino na Betel. Nos a bai di acuerdo pa hacie, aunke esei tabata un cambio dificil, pasobra nos tabata stima e sirbishi biahero. E 47 klasnan di e scol​—cada un a dura dos siman​—a duna mi un excelente oportunidad pa comparti bendicionnan spiritual cu e ancianonan di congregacion.

Durante e tempo ei mi tabata haciendo preparacion pa bishita mi mama na 1978. Pero diripiente, dia 29 di april 1977, mi a haya un telegram cu a informa mi cu mi mama a fayece. Mi a keda hopi tristo ora mi a realisa cu lo mi no por a tende su dushi stem mas ni bis’e un biaha mas con gradicido mi ta pa tur loke el a haci pa mi.

Na conclusion di e curso di Scol di Ministerio di Reino, e rumannan a pidi nos pa bira miembro di e famia di Betel. Durante e añanan cu a sigui, mi a sirbi pa dies aña como coordinado di e Comite di Sucursal. Cu tempo, Cuerpo Gobernante a nombra un coordinado nobo, kende tabata mihor capasita pa maneha e responsabilidad. Mi ta masha gradicido pa esei.

Sirbiendo Segun Edad Ta Permiti

Ami cu Leida tur dos tin 83 aña awor. Mi a disfruta di mas cu 60 aña den sirbishi di tempo completo, e ultimo 45 añanan hunto cu mi fiel esposa. Semper el a considera e sosten cu e tabata duna mi den tur nos asignacionnan como parti di su sirbishi dedica na Jehova. Actualmente, nos ta haci loke nos por na Betel y den congregacion.​—Isaias 46:4.

De bes en cuando, nos ta gusta sinta recorda algun di e ocasionnan sobresaliente den nos bida. No ta duel nos ni un tiki tur loke nos a haci den e sirbishi di Jehova, y nos ta combenci cu e decisionnan cu nos a tuma for di tempran den bida tabata esnan di mas mihor. Nos ta determina pa sigui sirbi y honra Jehova cu tur nos forsa.

[Plachi na pagina 13]

Ami cu mi ruman homber mas grandi, Bill, y Saul, nos cabai

[Plachi na pagina 15]

Dia nos a casa, augustus 1961

[Plachi na pagina 15]

Ami cu Leida awe