“E Prome Resureccion” Ta Tumando Luga Actualmente!

“E mortonan den Cristo lo lanta prome.”​—1 TESALONICENSENAN 4:16.

1, 2. (a) Ki speransa tin pa hende cu a muri? (b) A base di kico bo ta kere den e resureccion? (Mira nota na pia di pagina.)

“E BIBONAN sa cu nan lo muri.” Esei tabata e caso for di dia cu Adam a peca. Atrabes di historia, tur hende cu a nace tabata sa cu un dia nan lo a muri, y hopi di nan a puntra nan mes: ‘Kico ta bini despues? Den ki condicion e mortonan ta?’ Bijbel ta contesta: “E mortonan no sa nada.”​—Eclesiastes 9:5.

² Tin un speransa anto pa hende cu a muri? Si. De echo, pa Dios su proposito original pa humanidad cumpli lo mester tin un speransa pa e mortonan. Den transcurso di siglonan, sirbidornan leal di Dios a eherce fe den e promesa di Jehova tocante un Simiña cu lo destrui Satanas y deshaci di tur e daño cu el a causa. (Genesis 3:15) Mayoria di e personanan aki a muri. Pa nan por mira tanto e promesa ei como otronan cu Jehova a haci  cumpli, nan mester ser lanta for di morto. (Hebreonan 11:13) Esei ta posibel? Si, definitivamente. Apostel Pablo a bisa: “Lo tin un resureccion di tanto e hustonan como e malbadonan.” (Echonan 24:15) Un biaha Pablo a resusita un hoben cu tabata yama Eutico, kende a cai for di un bentana na di tres piso y a ser ‘lanta morto for djabou.’ Esaki ta e ultimo di nuebe caso di resureccion registra den Bijbel.​—Echonan 20:7-12. *

3. Ki consuelo abo personalmente a haya for di Hesus su palabranan registra na Juan 5:28 y 29, y dicon?

³ E nuebe resureccionnan ei ta pone base pa fe den e declaracion di Pablo. Nan ta fortalece nos confiansa den Hesus su siguransa: “E ora lo yega den cua tur cu ta den graf lo tende [Hesus] su bos, y lo sali.” (Juan 5:28, 29) Esta alentador e palabranan ei ta! Nan ta un gran consuelo pa e miyones di hendenan cu a perde nan sernan keri den morto.

4, 5. Ki resureccion Bijbel ta menciona, y cua di nan e articulo aki lo trata?

⁴ Mayoria di hende cu lo haya resureccion lo bin bek riba un Tera pacifico bou di e Reino di Dios. (Salmo 37:10, 11, 29; Isaias 11:6-9; 35:5, 6; 65:21-23) Sinembargo, prome cu yega asina leu, otro resureccionnan lo mester a tuma luga. Na prome luga, Hesucristo mester a ser resusita pa presenta e balor di su sacrificio na Dios na fabor di nos. Hesus a muri y a ser resusita na aña 33 di nos era.

⁵ Siguientemente, miembronan ungi di “e Israel di Dios” mester join Señor Hesucristo den gloria celestial, caminda nan lo ta pa “semper cu Señor.” (Galationan 6:16; 1 Tesalonicensenan 4:17) E suceso ei ta ser yama “e resureccion mas tempran” of “e prome resureccion.” (Filipensenan 3:10, 11, NW; Revelacion 20:6) Ora e resureccion ei ser completa, lo ta tempo pa miyones di hende resusita bek na Tera cu e speransa di haya bida eterno den  Paradijs. P’esei, sea nos speransa ta celestial of terenal, nos ta masha interesa den “e prome resureccion.” Ki sorto di resureccion esei ta? Na ki tempo e ta tuma luga?

“Cu Ki Sorto di Curpa”?

6, 7. (a) Prome cu cristiannan ungi por bai shelo, kico mester tuma luga? (b) Cu ki clase di curpa nan lo resusita?

⁶ Den Pablo su prome carta na e Corintionan, e ta haci un pregunta tocante e prome resureccion: “Con e mortonan ta wordo lanta? Y cu ki sorto di curpa nan ta bin?” Anto e ta contesta e pregunta: “Loke bo sembra no ta haya bida si e no muri . . . Ma Dios ta dun’e un curpa manera el a desea . . . E gloria di esnan celestial ta un, y e gloria di esnan terenal ta otro.”​—1 Corintionan 15:35-40.

⁷ E palabranan di Pablo ta mustra cu cristiannan ungi cu spirito santo mester muri prome cu nan ricibi nan recompensa celestial. Ora nan muri, nan curpa terenal ta bolbe na stof. (Genesis 3:19) Na Dios su tempo señala, nan ta ser resusita cu un clase di curpa cu ta apropia pa bida den shelo. (1 Juan 3:2) Dios ta duna nan inmortalidad tambe. Esei no ta algo cu nan ta nace cu ne, como si fuera Dios a supla e rosea di un asina yama alma inmortal den nan. Pablo a bisa: “Loke ta mortal aki mester wordo bisti cu loke ta inmortal.” Inmortalidad ta un don di Dios cu esnan cu ta participa den e prome resureccion ta ‘bisti.’​—1 Corintionan 15:50, 53; Genesis 2:7; 2 Corintionan 5:1, 2, 8.

8. Con nos por sa cu Dios no ta selecta e 144.000 personanan for di miembro di diferente religion?

⁸ Solamente 144.000 persona ta haya e prome resureccion. Jehova a cuminsa scohe nan riba dia di Pentecoste di aña 33 di nos era, un poco despues cu el a resusita Hesus. Nan tur tin “[Hesus] su nomber y e nomber di su Tata skirbi na nan frenta.” (Revelacion 14:1, 3) P’esei, nan no ta ser selecta for di diferente religion. Tur ta cristian, y tur ta carga e nomber di e Tata, Jehova, cu honor. Ora nan resusita, nan ta ricibi un asignacion di trabou den shelo. E perspectiva di por sirbi Dios den un forma directo asina ta simplemente algo emocionante pa nan.

E Ta Tumando Luga Actualmente?

9. Con Revelacion 12:7 y 17:14 ta yuda nos calcula e tempo cu e prome resureccion ta cuminsa?

⁹ Na ki tempo e prome resureccion ta tuma luga? Tin evidencia fuerte cu esei ta tumando luga actualmente. Por ehempel, compara dos capitulo di Revelacion. Wak prome Revelacion capitulo 12. Ei nos ta lesa cu Hesucristo recien entronisa, hunto cu su angelnan santo, ta hiba un guera contra Satanas y su demoñonan. (Revelacion 12:7-9) Manera e revista aki a mustra hopi bes, e bataya ei a cuminsa na 1914. * Pero ripara cu e capitulo aki no ta bisa cu Cristo su siguidonan ungi ta hunto cu ne den e guera celestial ei. Awor wak Revelacion capitulo 17. Ei nos ta lesa cu despues di e destruccion di ‘Babilonia e Grandi’, e Lamchi lo vence e nacionnan. Anto e ta agrega: “Y esnan cu ta hunto cu ne ta e yamanan y scohinan y fielnan.” (Revelacion 17:5, 14) Pa e “yamanan y scohinan y fielnan” por ta hunto cu Hesus pa e derota final di e mundo di Satanas, nan lo mester a resusita caba. Ta rasonabel anto pa asumi cu e unginan cu muri prome cu Armagedon ta ser resusita entre 1914 y Armagedon.

10, 11. (a) Ken ta e 24 ancianonan, y kico un di nan ta revela na Juan? (b) Kico nos por deduci for di esaki?

¹⁰ Nos por bisa mas precies na ki tempo e prome resureccion ta cuminsa? Nos ta haya un clave interesante na Revelacion 7:9-15, caminda apostel Juan ta describi su vision di “un multitud grandi cu ningun hende no por a conta.” Esun cu ta revela e identidad di e multitud grandi ei na Juan ta un di e 24 ancianonan, y e ancianonan aki ta representa e  144.000 coherederonan cu Cristo den nan gloria celestial. * (Lucas 22:28-30; Revelacion 4:4) Juan mes tabatin un speransa celestial; pero siendo cu ainda e tabata como hende riba Tera ora e anciano a papia cu ne, den e vision Juan mester ta representa e unginan riba Tera cu ainda no a ricibi nan recompensa celestial.

¹¹ P’esei, kico nos por deduci for di e echo cu un di e 24 ancianonan ta identifica e multitud grandi na Juan? Aparentemente personanan resusita cu ta forma parti di e grupo di 24 anciano lo por ta envolvi awe den comunica berdadnan divino. Dicon esei ta importante? Pasobra e identidad corecto di e multitud grandi a ser revela na e sirbidornan ungi di Dios riba Tera na 1935. Si un di e 24 ancianonan a ser uza pa transmiti e berdad importante ei, lo e mester a resusita pa bai shelo pa mas tarda na 1935. Esei lo indica cu e prome resureccion a cuminsa entre 1914 y 1935. Pero nos por ta mas exacto ainda?

12. Splica pakico nos por mira e lente di 1918 como e posibel tempo cu e prome resureccion a cuminsa tuma luga.

¹² Algo cu por yuda nos riba e punto aki ta un consideracion di loke nos por yama un paralelo di Bijbel. Hesucristo a ser ungi como e futuro Rei di e Reino di Dios den e herfst di aña 29 di nos era. Tres aña y mei despues, den e lente di aña 33, el a ser resusita como un persona spiritual poderoso. Nos por rasona anto cu siendo cu Hesus a ser entronisa den e herfst di 1914, e resureccion di su fiel siguidonan ungi a cuminsa tres aña y mei despues, den e lente di 1918? Esei ta un posibilidad interesante. Aunke nos no por confirma esaki directamente den Bijbel, no ta inconsistente cu otro partinan di Bijbel pa indica cu e prome resureccion a cuminsa tuma luga un poco despues cu e presencia di Cristo a cuminsa.

13. Con 1 Tesalonicensenan 4:15-17 ta indica cu e prome resureccion a cuminsa tempran durante e presencia di Cristo?

¹³ Por ehempel, Pablo a skirbi: “Nos, e bibonan cu ta sobrevivi te na e presencia di Señor [no te na fin di su presencia] di ningun manera lo ta prome cu esnan cu a bai drumi den morto; pasobra Señor mes lo baha for di shelo cu un yamada imperativo, cu bos di arcangel y cu e trompet di Dios, y esnan cu ta morto den union cu Cristo lo lanta prome. Despues, nos, e bibonan cu ta sobrevivi, hunto cu nan, lo ser hiba den nubia pa contra cu Señor den laira; y asina nos lo ta semper cu Señor.” (1 Tesalonicensenan 4:15-17, NW) P’esei, e cristiannan ungi cu a muri prome cu e presencia di Cristo a ser lanta pa bida den shelo prome cu esnan cu ta na bida ainda durante e presencia di Cristo. Esaki ta nifica cu e prome resureccion lo mester a cuminsa tempran den Cristo su presencia, y ta sigui “durante su presencia.” (1 Corintionan 15:23, NW) Claro cu no ta tur a resusita na mes momento; e prome resureccion ta tuma luga durante un periodo di tempo.

‘A Duna Cada Un di Nan un Bisti Blanco’

14. (a) Na ki tempo e visionnan registra den Revelacion capitulo 6 ta cumpli? (b) Kico Revelacion 6:9 ta describi?

¹⁴ Considera tambe e evidencia cu Revelacion capitulo 6 ta contene. Ei nos ta mira Hesus coriendo riba cabai como un Rei vencedor. (Revelacion 6:2) E nacionnan ta envolvi den guera na gran escala. (Revelacion 6:4) Ta reina scarsedad di cuminda. (Revelacion 6:5, 6) Plaganan mortifero ta asota humanidad. (Revelacion 6:8) Tur e sucesonan profetisa aki ta cuadra bon cla cu e situacion di mundo desde 1914. Pero tin algo mas ta sosode. Bijbel ta hala nos atencion na un altar di sacrificio. Na pia di e altar tin “e almanan di esnan cu a  wordo mata pa motibo di e palabra di Dios, y pa motibo di e testimonio cu nan [“a duna”, NW]. (Revelacion 6:9) Siendo cu e alma of “bida di e carni ta den e sanger”, loke tin na pia di e altar ta representa realmente e sanger di fiel sirbidor di Hesus cu a ser mata pa motibo di e curashi y celo cu nan a demostra den e trabou di duna testimonio.​—Levitico 17:11.

15, 16. Splica dicon e palabranan di Revelacion 6:10 y 11 ta referi na e prome resureccion.

¹⁵ Mescos cu e sanger di e homber husto Abel, e sanger di e martirnan cristian aki ta sclamando pa husticia. (Genesis 4:10) “Nan a sclama na bos halto, bisando: ‘Cuanto tempo mas, o Señor, santo y berdadero, lo bo keda sin husga y sin venga nos sanger riba esnan cu ta biba riba tera?’” Kico ta sosode despues? “A wordo duna na cada un di nan un bisti blanco; y a wordo bisa na nan cu nan mester sosega un poco tempo mas, te ora cu e cantidad di nan cosirbidornan y nan rumannan cu mester a wordo mata ainda mescos cu nan, lo a keda completa tambe.”​—Revelacion 6:10, 11.

¹⁶ Ta na plasnan di sanger na pia di un altar a duna e bistinan blanco aki? Claro cu no! E bistinan blanco a ser duna na personanan di kende nan sanger a ser drama, na moda di papia, riba e altar. Nan a sacrifica nan bida den nomber di Hesus y awor a ser resusita como sernan spiritual. Con nos por sa esei? Mas prome den e buki di Revelacion, nos ta lesa: “Esun cu vence lo wordo bisti na paña blanco; y lo mi no kita su nomber for di e buki di bida.” Corda tambe cu e 24 ancianonan tabata “bisti na paña blanco y cu corona di oro riba nan cabes.” (Revelacion 3:5; 4:4) Pues, despues cu guera, hamber y pest a cuminsa asota Tera, miembronan di e 144.000 unginan cu tabata morto, representa pa e sanger na pia di e altar, a ser lanta pa bida celestial y bisti simbolicamente na blanco.

17. Den ki sentido esnan cu ta ricibi bisti blanco mester ‘sosega’?

¹⁷ E personanan recien resusita ei mester ‘sosega’, esta, nan mester warda cu pasenshi riba e dia di vengansa di Dios. Nan “cosirbidornan”, cristiannan ungi cu ta riba Tera ainda, lo mester demostra nan integridad bou di prueba. Ora e tempo pa huicio divino yega, e ‘sosiego’ ei lo termina. (Revelacion 7:3) Na e tempo ei, personanan resusita lo join Señor Hesucristo den destruccion di e malbadonan, incluso esnan cu a drama sanger di cristiannan inocente.​—2 Tesalonicensenan 1:7-10.

 Kico Esaki Ta Nifica pa Nos?

18, 19. (a) Pa ki motibo bo por conclui cu e prome resureccion ta tumando luga actualmente? (b) Con bo comprondemento di e prome resureccion ta pone bo sinti?

¹⁸ E Palabra di Dios no ta revela un fecha exacto pa e prome resureccion, pero si e ta revela cu esaki ta tuma luga den un periodo di tempo, durante e presencia di Cristo. E promenan cu ta haya resureccion ta cristiannan ungi cu a muri prome cu Cristo su presencia a cuminsa. Segun cu e presencia di Cristo ta transcuri, cristiannan ungi cu ta termina nan bida riba Tera fielmente ta ser cambia “den un frega di wowo” den criaturanan spiritual poderoso. (1 Corintionan 15:52) Tur e unginan lo ricibi nan recompensa celestial prome cu e guera di Armagedon? Nos no sa. Loke si nos sa ta cu na e debido tempo di Dios, henter e grupo di 144.000 lo ta para riba e Sero di Sion celestial.

¹⁹ Nos sa tambe cu mayoria di e miembronan di e 144.000 a uni caba cu Cristo. A resta relativamente poco di nan riba Tera. Esei ta un indicacion fuerte cu e tempo pa e ehecucion di e huicio di Dios ta acercando rapidamente! Pronto, henter e mundo di Satanas lo ser destrui. Satanas mes lo ser tira den abismo. E ora ei, e resureccion general por cuminsa y a base di e sacrificio di rescate di Hesus, hende fiel lo por ser eleva na e perfeccion cu Adam a perde. E profesia di Jehova registra na Genesis 3:15 lo cumpli na un manera maraviyoso. Esta un gran privilegio pa biba den e tempo aki!

[Nota]

Bo Por Splica?

Con e siguiente textonan biblico ta yuda nos saca afo na ki tempo “e prome resureccion” ta tuma luga?

• Revelacion 12:7; 17:14

• Revelacion 7:13, 14

• 1 Corintionan 15:23; 1 Tesalonicensenan 4:15-17

• Revelacion 6:2, 9-11

[Preguntanan di Estudio]

[Plachi na pagina 26]

Ki resureccion ta tuma luga prome cu humanidad en general ser lanta for di morto?

[Plachi na pagina 29]

Den ki sentido a duna cierto personanan cu tabata drumi den morto un bisti blanco?