Graduadonan di Galaad Ta Haya Instruccion Cu Ta Conmove Nan Curason

DIA 9 di september 2006, tabatin e graduacion di e di 121 klas di e Scol Biblico di Galaad di Watchtower. Tabata un programa alentador cu a tuma luga na e Centro Educativo di Watchtower na Patterson, New York.

Geoffrey Jackson, miembro di Cuerpo Gobernante di Testigonan di Jehova, a habri e programa dunando bonbini na e 56 graduadonan y e auditorio internacional di 6.366 persona. El a considera Salmo 86:11, cu ta bisa: “Siña mi bo caminda, o [Jehova]; lo mi cana den bo berdad; uni mi curason pa teme bo nomber.” Ruman Jackson a señala tres cos cu e versiculo aki ta enfatisa. El a bisa: “Den e prome parti di e versiculo, esei ta instruccion; den e di dos parti, aplicacion; y den e di tres, motivacion. E tres cosnan aki ta specialmente importante pa boso como misionero awor cu boso ta bai na boso asignacion.” Despues di esei el a introduci un serie di discurso y entrevista cu a enfatisa tur e tres puntonan aki.

Palabranan Alentador di Instruccion

William Malenfant, un miembro di e personal di e sede mundial, a considera e tema “E Mihor Bida Cu Por Tin.” El a hala atencion na e ehempel di Maria, ruman muher di Marta. Na un ocasion cu Hesus a bishita nan cas, Maria a scohe pa sinta na pia di Hesus pa por a scuch’e, el a haci esei su prioridad. Hesus a bisa Marta: “Maria a scohe e parti bon cu lo no wordo kita for di dje.” (Lucas 10:38-42) E orador di: “Pensa riba esei un rato. Pa eternidad Maria lo corda cu el a sinta na pia di Hesus y personalmente a scucha berdadnan spiritual maraviyoso; tur esei pasobra el a scohe bon.” Despues di a elogia e graduadonan pa e bon decisionnan spiritual cu nan a tuma, el a bisa: “Loke boso a scohe p’e a hiba boso na e mihor bida cu tin.”

Siguientemente Anthony Morris, un miembro di Cuerpo Gobernante, a desaroya e tema basa riba Romanonan 13:14, “Bisti Boso cu Señor Hesucristo.” Con nos por haci esaki? ‘Bisti e Señor Hesucristo’ ta ensera imita e maneranan di e Señor. E ta nifica imita e ehempel y caracter di Hesus. E orador a bisa: “Hesus a laga hende sinti nan mes comodo cerca dje pasobra e tabata sinceramente interesa den nan, y nan por a sinti esei.” Anto e orador a mustra cu e studiantenan a haya hopi conocemento for di e lesnan di Galaad pa nan ‘por compronde e hanchura y largura y haltura y profundidad’ di e berdad, manera Efesionan 3:18 ta bisa. Pero el a recorda nan loke versiculo 19 ta bisa: “Pa conoce e amor di Cristo cu ta surpasa conocemento.” Ruman Morris a urgi e studiantenan: “Segun cu boso ta sigui haci boso estudio personal, reflexiona riba con boso por imita e  compasion amoroso di Cristo y realmente ‘bisti boso cu Señor Hesucristo.’”

Conseho di Despedida di e Instructornan di Galaad

E siguiente discurso tabata na encargo di e instructor di Galaad, Wallace Liverance. Su tema tabata basa riba Proverbionan 4:7. El a bisa cu aunke sabiduria divino ta sumamente importante, nos mester “adkiri comprondemento” tambe, ya cu esei ta ensera combina echonan isola y mira con nan ta conecta cu otro pa asina capta e nificacion di un asunto. E orador a mustra cu adkiri conocemento ta duna goso. Por ehempel, den tempo di Nehemias, e Levitanan tabata “splica e lei” y yuda e pueblo “compronde loke tabata wordo lesa.” Despues, e pueblo a “celebra un gran fiesta, pasobra nan a compronde e palabranan cu a wordo splica na nan.” (Nehemias 8:7, 8, 12) Ruman Liverance a conclui: “Un resultado secundario cu nos ta haya despues di a compronde  e Palabra di Dios inspira pa spirito santo ta goso.”

“Ken Realmente Ta Bo Enemigo?” tabata e tema cu Mark Noumair, un otro instructor di Galaad, a trata. Den guera, basta solda ta muri a consecuencia di ‘tiro di amigo’, es decir, nan ta ser ataca pa nan propio tropanan. E orador a puntra: “Kico di e guera spiritual cu nos ta aden?” El a bisa: “Si nos no tene cuidou, nos por bruha lubida ta ken ta e berdadero enemigo y herida nos propio tropanan.” Kisas envidia ta pone cu pa algun ruman ta dificil pa mira ta ken ta e enemigo. Envidia a pone cu Rei Saul a purba mata David, su compañero di adoracion, siendo cu en realidad ta e Filisteonan tabata e enemigo. (1 Samuel 18:7-9; 23:27, 28) Anto e orador a sigui bisa: “Kico si bo ta sirbi cu un misionero cu ta sobresali den hopi manera? Lo bo herida bo compañero solda cu comentarionan critico, of lo bo conforma bo cu e echo cu otro hende lo surpasa bo den varios manera? Si nos ta enfoca riba e imperfeccionnan di otro hende, esei solamente lo por confundi nos tocante ken ta e berdadero enemigo. Bringa contra e berdadero enemigo, Satanas.”

Experencianan Agradabel y Entrevistanan Informativo

E siguiente parti, “Haci e Trabou di un Predicado di Evangelio”, tabata na encargo di e instructor di Galaad, Lawrence Bowen, y a consisti di entrevista y experencia. E trabou principal di un misionero entrena na Galaad ta pa plama e bon nobo, y e klas aki a hacie na unda cu nan por a haya hende. Anto e rumannan a tene demostracion di algun experencia masha agradabel.

Despues tabatin riba programa dos parti presenta respectivamente pa Michael Burnett y Scott Shoffner, kende ambos ta miembro di e famia di Betel. Nan a entrevista miembronan di Comite di Sucursal di Australia, Barbados, Corea y Uganda. E comentarionan di e miembronan di comite a revela cuanto esfuerso e rumannan ta haci pa atende e necesidadnan di e misioneronan, incluso ta percura pa nan tin acomodacion y cuido medico adecua. E miembronan di comite a enfatisa cu misioneronan exitoso ta esnan cu ta dispuesto pa adapta nan mes na circunstancianan local.

Un Conclusion Stimulante y Conmovedor

E discurso principal di e programa tabatin como tema “Teme Dios y Dun’e Gloria”, presenta pa John E. Barr, kende tin hopi aña como miembro di Cuerpo Gobernante. El a considera Revelacion 14:6 y 7, cu ta bisa: “Mi a mira un otro angel ta bula meimei di shelo, kende tabatin un evangelio eterno pa predica na esnan cu ta biba riba tera, y na tur nacion y tribu y lenga y pueblo; y el a bisa na bos halto: ‘Teme Dios y dun’e gloria, pasobra e ora di su huicio a yega.’”

Ruman Barr a urgi e studiantenan pa keda corda tres cos relaciona cu e angel ei. Di prome, e tabatin cu declara e evangelio of bon nobo eterno cu Cristo ta gobernando awor cu pleno autoridad di Reino. E orador a bisa: “Nos ta plenamente combenci cu su entronisacion a tuma luga na aña 1914. Pues nos tin cu proclama e noticia gososo aki rond mundo.” Di dos, e angel a declara: “Teme Dios.” E orador a splica cu e graduadonan tin cu yuda nan studiantenan di Bijbel cultiva respet profundo pa Dios di manera cu nan lo no haci nada cu ta desagrad’e. Di tres, e angel a manda: ‘Duna gloria na Dios.’ E studiantenan a haya e animacion: “No lubida nunca cu nos ta sirbi pa e gloria di Dios, no pa nos mes gloria.” Anto durante Ruman Barr su splicacion di ‘e ora di huicio’, el a declara: “Tempo ta cabando y nos ta acercando e momento cu lo declara e huicio final. Hopi hende den nos teritorionan ainda tin cu tende e mensahe di e bon nobo prome cu ta lat.”

Cu e palabranan aki resonando den nan horea, e 56 graduadonan a ricibi nan diploma y asignacion pa bai na e finnan di tera. Curason di e graduadonan y di tur hende presente a keda profundamente conmovi pa e conseho motivador cu nan a haya riba e dushi dia ei.

[Cuadro na pagina 17]

ESTADISTICANAN DI E KLAS

Cantidad di pais representa: 6

Cantidad di pais na cua a asigna nan: 25

Cantidad di studiante: 56

Promedio di edad: 35,1

Promedio di aña den e berdad: 18,3

Promedio di aña den sirbishi di tempo completo: 13,9

[Plachi na pagina 18]

E di 121 Klas di Graduado di e Scol Biblico di Galaad di Watchtower

Den e lista akibou, e reinan ta numera di dilanti bai patras, y e nombernan ta bai di robes pa drechi den cada rei.

(1) Fox, Y.; Kunicki, D.; Wilkinson, S.; Kawamoto, S.; Consolandi, G.; Mayen, C. (2) Santiago, N.; Clancy, R.; Fischer, M.; de Abreu, L.; Davis, E. (3) Hwang, J.; Hoffman, D.; Wridgway, L.; Ibrahim, J.; Dabelstein, A.; Bakabak, M. (4) Peters, M.; Jones, C.; Ford, S.; Parra, S.; Rothrock, D.; Tatlot, M.; Perez, E. (5) de Abreu, F.; Kawamoto, S.; Ives, S.; Burdo, J.; Hwang, J.; Wilkinson, D. (6) Fox, A.; Bakabak, J.; Cichowski, P.; Forier, C.; Mayen, S.; Consolandi, E.; Wridgway, W. (7) Parra, B.; Perez, B.; Tatlot, P.; Santiago, M.; Ibrahim, Y.; Kunicki, C. (8) Burdo, C.; Cichowski, B.; Ives, K.; Ford, A.; Rothrock, J.; Hoffman, D.; Davis, M. (9) Peters, C.; Dabelstein, C.; Jones, K.; Clancy, S.; Fischer, J.; Forier, S.