“Lo Bo Ta Berdaderamente Yen di Goso”

“Celebra . . . un fiesta na SEÑOR bo Dios . . . , asina cu lo bo ta berdaderamente yen di goso.”​—DEUTERONOMIO 16:15.

1. (a) Ki cuestionnan Satanas a lanta? (b) Kico Jehova a profetisa despues di e rebelion di Adam cu Eva?

DIA Satanas a pone Adam cu Eva rebela contra nan Creador, el a lanta dos cuestion di vital importancia. Na prome luga, el a insinua cu Jehova no ta papia e berdad y cu su manera di goberna no ta bon. Na di dos luga, Satanas a duna di compronde cu hende ta sirbi Dios puramente pa motibonan egoista. El a menciona e di dos cuestion aki abiertamente den e tempo di Job. (Genesis 3:1-6; Job 1:9, 10; 2:4, 5) Pero Jehova a actua mesora pa corigi e situacion. Mientras Adam cu Eva tabata den e hofi di Eden ainda, Jehova a profetisa con lo El a resolve e cuestionnan ei. El a papia di e binida di un “simiña”, kende Satanas lo a herida su hilchi di pia, pero cu despues e simiña aki lo a herida cabes di Satanas mortalmente.​—Genesis 3:15.

2. Con Jehova a duna mas informacion encuanto e manera cu lo e cumpli cu e profesia cu ta para skirbi na Genesis 3:15?

² Den transcurso di tempo Jehova a duna mas y mas informacion encuanto e profesia ei, y asina a demostra cu lo e cumpli sigur den futuro. Por ehempel, Dios a bisa Abraham cu e “simiña” lo a aparece entre su descendientenan. (Genesis 22:15-18) Abraham su nieto Jacob a bira tata di e 12 tribunan di Israel. Na aña 1513 prome cu nos era, ora e tribunan ei a bira un nacion, Jehova a duna nan un codigo di lei cu a inclui varios fiesta anual. Apostel Pablo a bisa cu e fiestanan ei tabata un “sombra di loke mester [a] bin.” (Colosensenan 2:16, 17; Hebreonan 10:1) Nan a duna un bista adelanta di con e proposito di Jehova pa e Simiña lo a cumpli. Celebracion di e fiestanan ei a trece hopi goso den Israel. Un consideracion breve di nan lo fortalece nos fe den Jehova su promesanan y laga nos mira con confiabel esakinan ta.

E Simiña Ta Aparece

3. Ken tabata e Simiña priminti, y con su hilchi di pia a ser herida?

³ Mas cu 4.000 aña despues cu Jehova a duna e prome profesia, e Simiña priminti a aparece. Esei a resulta di ta Hesus. (Galationan 3:16) Como un homber perfecto, Hesus a mantene su integridad te na morto y asina a demostra cu e acusacionnan di Satanas tabata falso. Ademas, siendo cu Hesus no tabatin pica, su morto tabata un sacrificio di gran balor. Pa medio di dje, Hesus a percura liberacion for di pica y morto pa e descendientenan fiel di Adam cu Eva. E morto di Hesus riba un staca di tormento tabata e “herida” cu e Simiña priminti a haya na su “hilchi di pia.”​—Hebreonan 9:11-14.

4. Kico a prefigura e sacrificio di Hesus?

⁴ Hesus a muri dia 14 di nisan di aña 33 di nos era. * Den Israel, 14 di nisan tabata e dia gososo di celebracion di e Pasco Hudiu. Cada aña riba e fecha ei famianan tabata come hunto un cuminda cu a inclui un lamchi jong y sano. Di e manera aki, nan a recorda e papel cu sanger di un lamchi a hunga den liberacion di e primogenitonan Israelita ora e angel di morto a mata e primogenitonan di e Egipcionan riba 14 di nisan di aña 1513 prome cu nos era. (Exodo 12:1-14) E lamchi di Pasco Hudiu a  prefigura Hesus, di kende apostel Pablo a bisa: “Cristo, nos Pasco . . . a wordo sacrifica.” (1 Corintionan 5:7) Mescos cu e sanger di e lamchi di Pasco Hudiu, e sanger drama di Hesus ta percura salbacion pa hopi hende.​—Juan 3:16, 36.

“E Prome Fruta di Esnan Cu A Muri”

5, 6. (a) Na ki tempo Hesus a ser resusita, y kico den e Lei a prefigura e suceso ei? (b) Con e resureccion di Hesus a haci posibel pa Genesis 3:15 cumpli?

⁵ Riba e di tres dia, Hesus a ser resusita pa por a presenta e balor di su sacrificio na su Tata. (Hebreonan 9:24) Un otro fiesta a prefigura su resureccion. E dia despues di 14 di nisan tabata e cuminsamento di e Fiesta di Pan sin Zuurdeeg. Riba e siguiente dia, 16 di nisan, e Israelitanan tabata trece un bohi (troshi) di e prome frutanan di e cosecha di sebada, e prome cosecha na Israel, pa e sacerdote zoya dilanti Jehova. (Levitico 23:6-14) Tabata masha apropia cu na aña 33 di nos era, net riba e dia ei, Jehova a frustra e intentonan malicioso di Satanas pa silencia pa semper su “testigo fiel y berdadero”! Dia 16 di nisan di aña 33, Jehova a resusita Hesus for di morto pa un bida spiritual inmortal.​—Revelacion 3:14; 1 Pedro 3:18.

⁶ Hesus a bira “e prome fruta di esnan cu a muri.” (1 Corintionan 15:20) Distinto for di e personanan cu a resusita mas prome, Hesus no a bolbe muri. Mas bien, el a subi na shelo y a sinta na man drechi di Jehova, caminda el a warda te ora el a wordo instala como Rei di e Reino celestial di Jehova. (Salmo 110:1; Echonan 2:32, 33; Hebreonan 10:12, 13) For di momento cu Hesus a ser instala como Rei, e ta den un posicion awor pa herida of machica cabes di e gran enemigo, Satanas, permanentemente y destrui su simiña.​—Revelacion 11:15, 18; 20:1-3, 10.

Mas Miembro di e Simiña di Abraham

7. Kico tabata e Fiesta di Simannan?

⁷ Hesus tabata e Simiña priminti den Eden y esun pa medio di ken Jehova lo “destrui e obranan di Diabel.” (1 Juan 3:8) Ma ora Jehova a papia cu Abraham, El a indica cu e “simiña” di Abraham lo a consisti di mas cu un persona so. Lo el a bira “manera e streyanan di e shelonan y manera e santo cu tin canto di lama.” (Genesis 22:17) Un otro fiesta gososo a prefigura e aparicion di otro miembronan di e “simiña” of descendientenan. Cincuenta dia contando for di 16 di nisan, Israel tabata celebra e Fiesta di Simannan. E Lei tocante esaki a declara: “Conta cincuenta dia te na e dia despues di e di shete sabat, y e ora ei presenta un ofrenda di maishi fresco na SEÑOR. Trece for di boso luganan di biba dos pan traha di dos decimo parti di un efa como un ofrenda di zoyamento; nan mester ta di hariña fini, horna cu zuurdeeg como prome frutanan pa SEÑOR.” *​—Levitico 23:16, 17, 20.

8. Ki suceso sobresaliente a tuma luga riba dia di Pentecoste di aña 33 di nos era?

⁸ Tempo cu Hesus tabata riba tera, e Fiesta di Simannan tabata conoci como Pentecoste (for di un palabra Griego cu ta nifica e  “di cincuenta”). Riba dia di Pentecoste di aña 33 di nos era, e Sumo Sacerdote di mas grandi, Hesucristo resusita, a drama spirito santo riba e grupo chikito di 120 discipel cu a reuni na Jerusalem. Asina e discipelnan ei a bira yiunan ungi di Dios y rumannan di Hesucristo. (Romanonan 8:15-17) Nan a bira un nacion nobo, “e Israel di Dios.” (Galationan 6:16) For di un cuminsamento chikito, e nacion ei lo a bin conta finalmente cu 144.000 miembro.​—Revelacion 7:1-4.

9, 10. Con e congregacion di cristian ungi a ser prefigura durante Pentecoste?

⁹ E dos pannan cu zuurdeeg cu a ser zoya dilanti Jehova tur aña riba dia di Pentecoste a prefigura e congregacion di cristian ungi. E echo cu e pannan tabatin zuurdeeg a indica cu ainda cristiannan ungi lo tabatin e zuurdeeg di pica hereda. No obstante, nan por a acerca Jehova a base di e sacrificio di rescate di Hesus. (Romanonan 5:1, 2) Pakico dos pan? Esei lo por tabata un indicacion cu e yiunan ungi di Dios cu tempo lo a bin for di dos grupo​—prome, for di e Hudiunan natural y despues for di e gentilnan.​—Galationan 3:26-29; Efesionan 2:13-18.

¹⁰ E dos pannan cu a ser ofreci riba dia di Pentecoste a bini for di e prome frutanan di e cosecha di trigo. Asina tambe, e cristiannan engendra pa spirito santo ta ser yama “e prome frutanan entre su criaturanan.” (Santiago 1:18) Nan ta e prome personanan cu ta haya pordon di nan picanan a base di Hesus su sanger drama, y esei ta haci posibel pa nan ricibi bida inmortal den shelo, caminda nan ta goberna cu Hesus den su Reino. (1 Corintionan 15:53; Filipensenan 3:20, 21; Revelacion 20:6) Den e posicion ei, pronto nan lo “goberna [e nacionnan] cu bara di hero” y mira con ‘Satanas lo ser plecha bou di nan pia.’ (Revelacion 2:26, 27; Romanonan 16:20) Apostel Juan a bisa: “Esakinan ta esnan cu ta sigui e Lamchi unda cu e bai. Esakinan a wordo cumpra for di entre hende como e prome frutanan pa Dios y pa e Lamchi.”​—Revelacion 14:4.

Un Dia Cu Ta Enfatisa Liberacion

11, 12. (a) Kico a sosode riba e Dia di Expiacion? (b) Ki beneficionan Israel a ricibi for di e ofrendanan di e toro y e cabritonan?

¹¹ Riba e di dies dia di etanim (yama despues  tishri), * Israel tabata celebra un fiesta cu a prefigura con humanidad lo beneficia di e sacrificio di rescate di Hesus. Riba e dia ei henter e nacion tabata bini hunto pa e Dia di Expiacion pa laga haci sacrificio pa nan pa cubri nan picanan.​—Levitico 16:29, 30.

¹² Riba e Dia di Expiacion, e sumo sacerdote tabata mata un toro jong y spat poco di su sanger den e Santisimo shete biaha dilanti di e tapa di e Arca, ofreciendo asina e sanger den un forma simbolico dilanti Jehova. E ofrenda ei tabata pa e picanan di tanto e sumo sacerdote como “pa e hendenan di su cas”, pa e subsacerdotenan y e Levitanan. Despues e sumo sacerdote tabata tuma dos cabrito. Un di nan e tabata mata como un ofrenda pa pica “pa e pueblo.” E tabata spat poco di e sanger di esaki tambe dilanti di e tapa di e Arca den e Santisimo. Despues di esei, e sumo sacerdote tabata pone su mannan riba cabes di e di dos cabrito y confesa e picanan di e yiunan di Israel. Despues e tabata manda e cabrito bai den desierto pa asina den un forma simbolico hiba e picanan di e nacion.​—Levitico 16:3-16, 21, 22.

13. Con e sucesonan riba e Dia di Expiacion a prefigura e papel cu Hesus ta hunga?

¹³ E actonan ei a prefigura con e gran Sumo Sacerdote, Hesus, ta uza e balor di su mes sanger pa pordona pica. Na prome luga, e balor di su sanger ta ser aplica na e “cas spiritual” di 144.000 cristian ungi, y dor di esei nan por wordo declara husto y disfruta di un posicion limpi dilanti Jehova. (1 Pedro 2:5; 1 Corintionan 6:11) Esaki ta loke e sacrificio di e toro a prefigura, locual ta habri caminda pa e unginan ricibi nan herencia celestial. Na di dos luga, e balor di Hesus su sanger ta ser aplica na fabor di miyones di otro hende cu ta eherce fe den Cristo, manera e sacrificio di e cabrito ta demostra. Esakinan lo ser bendiciona cu bida eterno aki riba tera, e herencia cu Adam cu Eva a perde. (Salmo 37:10, 11) A base di Hesus su sanger drama, e ta hiba e picanan di humanidad, mescos cu e cabrito bibo den un forma simbolico a hiba e picanan di Israel den desierto.​—Isaias 53:4, 5.

Alegra Dilanti Jehova

14, 15. Kico a sosode durante e Fiesta di Tabernakel, y di kico esaki a recorda e Israelitanan?

¹⁴ Despues di e Dia di Expiacion, e Israelitanan tabata celebra e Fiesta di Tabernakel, e  fiesta di mas gososo di e aña Hudiu. (Levitico 23:34-43) E fiesta ei a tuma luga for di dia 15 te dia 21 di etanim y a caba cu un asamblea solem riba dia 22 di e luna. Esei a marca e fin di e recohemento di e cosecha y tabata un tempo di gradicimento pa e bondad abundante di Dios. Pa e motibo ei, Jehova a ordena esnan cu a celebr’e: “SEÑOR bo Dios lo bendiciona bo den henter bo cosecha y den tur e trabou di bo mannan, asina cu lo bo [“mester”, NW] ta berdaderamente yen di goso.” (Deuteronomio 16:15) Esta un tempo gososo esei lo mester tabata!

¹⁵ Durante e fiesta ei, e Israelitanan tabata biba den tabernakel of cabaña pa shete dia. Esei a sirbi pa recorda nan cu un tempo nan tabata biba den cabaña den desierto. E fiesta a duna nan oportunidad amplio pa medita riba e cuido paternal di Jehova. (Deuteronomio 8:15, 16) Y ya cu nan tur, sea rico of pober, a biba den cabañanan similar, esei a recorda e Israelitanan cu en conexion cu e fiesta, nan tur tabata igual.​—Nehemias 8:14-16.

16. Kico e Fiesta di Tabernakel a prefigura?

¹⁶ E Fiesta di Tabernakel tabata un fiesta di cosecha, un celebracion gososo di recohemento, y el a prefigura e recohemento gososo di personanan cu ta eherce fe den Hesucristo. E recohemento a cuminsa riba dia di Pentecoste di aña 33, dia cu e 120 discipelnan di Hesus a ser ungi pa bira parti di “un sacerdocio santo.” Mescos cu e Israelitanan a biba den cabaña pa un par di dia, asina cristiannan ungi sa cu nan ta simplemente “stranheronan” den e mundo malbado aki. Nan speransa ta uno celestial. (1 Pedro 2:5, 11) E recohemento ei di cristiannan ungi ta alcansa su culminacion durante e “ultimo dianan” aki, ora cu e delaster miembronan di e 144.000 ta ser recohi.​—2 Timoteo 3:1.

17, 18. (a) Kico ta indica cu otro personanan ademas di cristiannan ungi ta beneficia di Hesus su sacrificio? (b) Ken awe ta beneficiando di loke e Fiesta di Tabernakel a prefigura, y na ki tempo e fiesta gososo ei lo alcansa su culminacion?

¹⁷ Ta interesante pa nota cu durante e fiesta  di antiguedad aki, e Israelitanan a sacrifica 70 toro. (Numbernan 29:12-34) E cifra 70 ta representa 7 biaha 10, cifranan cu den Bijbel ta representa perfeccion celestial y terenal. P’esei e sacrificio di Hesus lo beneficia personanan fiel di tur e 70 famianan di humanidad cu a bini for di Noe. (Genesis 10:1-29) Na harmonia cu esei, den nos tempo e recohemento a extende pa inclui personanan di tur nacion cu ta eherce fe den Hesus y cu tin e speransa di biba den un paradijs riba tera.

¹⁸ Apostel Juan a mira e recohemento aki di tempo moderno den un vision. Prome el a tende e anuncio di e seyamento di e ultimo miembronan di e 144.000. Despues el a mira “un multitud grandi cu ningun hende no por a conta”, para dilanti Jehova y Hesus, cu “rama di palma den nan man.” Esakinan ta “sali for di e gran tribulacion” pa drenta e mundo nobo. Actualmente nan tambe ta simplemente residentenan temporal den e mundo bieu aki, y cu confiansa nan ta anhela pa e tempo yega pa “e Lamchi . . . guia nan hiba na fuentenan di e awa di bida.” E tempo ei, “Dios lo seca tur lagrima for di nan wowo.” (Revelacion 7:1-10, 14-17) Loke e Fiesta di Tabernakel a prefigura lo alcansa su culminacion despues di e fin di e Reinado di Mil Aña di Cristo ora e multitud grandi, hunto cu e personanan fiel resusita, haya bida eterno.​—Revelacion 20:5.

19. Con un consideracion di e fiestanan cu a ser celebra den Israel ta beneficia nos?

¹⁹ Ora nos medita riba e nificacion di e fiestanan Hudiu di antiguedad, nos tambe por ta “berdaderamente yen di goso.” E fiestanan aki ta duna nos un bista adelanta di con e profesia cu Jehova a duna aya den Eden lo cumpli, y esei ta yena nos cu emocion. Ta excitante tambe pa mira con e profesia ei ta cumpliendo den e tempo aki. Awe, nos sa cu e Simiña a aparece y cu el a ser herida na su hilchi di pia. Awor e ta un Rei celestial. Ademas, mayoria di e 144.000 miembronan a duna prueba caba di nan fieldad te na morto. Kico mas mester tuma luga? Cuanto tempo mas falta pa e profesia cumpli completamente? Nos lo considera esaki den e siguiente articulo.

[Nota]

Bo Por Splica?

• Kico e lamchi di Pasco Hudiu a prefigura?

• Ki recohemento e Fiesta di Pentecoste a prefigura?

• Ki rasgonan di e Dia di Expiacion a indica con e sacrificio di rescate di Hesus ta ser aplica?

• Den ki manera e Fiesta di Tabernakel a prefigura e recohemento di cristiannan?

[Preguntanan di Estudio]

[Tabel na pagina 22, 23]

(Pa e texto den su formato completo , wak e publicacion)

Pasco Hudiu

14 di nisan

Evenemento:

A mata e lamchi di Pasco Hudiu

A Prefigura:

Sacrificio di Hesus

Fiesta di Pan sin Zuurdeeg (15-21 di nisan)

15 di nisan

Evenemento:

Sabat

16 di nisan

Evenemento:

Ofrenda di sebada

A Prefigura:

Resureccion di Hesus

50 dia

Fiesta di Simannan (Pentecoste)

6 di sivan

Evenemento:

Ofrenda di dos pan

A Prefigura:

Hesus a presenta su rumannan ungi na Jehova

Dia di Expiacion

10 di tishri

Evenemento:

Ofrenda di un toro y dos cabrito

A Prefigura:

Hesus a ofrece e balor di su sanger na fabor di henter humanidad

Fiesta di Tabernakel (Recohemento Cabaña)

15-21 di tishri

Evenemento:

E Israelitanan a biba gososamente dencabaña y a alegra den e cosecha; nan a sacrifica 70 toro

A Prefigura:

Recohemento di e unginan y un “multitud grandi”

[Plachi na pagina 21]

Mescos cu e sanger di e lamchi di Pasco Hudiu, Hesus su sanger drama ta percura salbacion pa hopi hende

[Plachi na pagina 22]

E prome frutanan di e cosecha di sebada ofreci dia 16 di nisan a prefigura e resureccion di Hesus

[Plachi na pagina 23]

E dos pannan cu a ser ofreci riba dia di Pentecoste a prefigura e congregacion di cristian ungi

[Plachi na pagina 24]

E Fiesta di Tabernakel a prefigura e recohemento gososo di cristian ungi y “un multitud grandi” di hende di tur nacion