Pregunta di Lector

Kico ta e seyamento cu Revelacion 7:3 ta referi na dje?

Revelacion 7:1-3 ta declara: “Mi a mira cuater angel para na e cuater skinanan di Tera, wantando e cuater bientonan di Tera, pa biento no supla ni riba Tera ni riba lama ni riba ningun palo. Y mi a mira un otro angel ta subi for di caminda solo ta sali, y e tabatin e seyo di e Dios bibo; y el a grita na bos halto na e cuater angelnan, na kendenan a wordo permiti pa haci daño na e Tera y na e lama, bisando: ‘No haci daño na e Tera ni na e lama ni na e palonan, te ora cu nos caba di seya e sirbidornan di nos Dios na nan frenta.’”

Ora e angelnan laga “e cuater bientonan” bai, e resultado lo ta “e gran tribulacion”, esta, destruccion di religion falso y di e resto di e mundo malbado aki. (Revelacion 7:14) “E sirbidornan di nos Dios” ta e rumannan ungi di Cristo aki riba tera. (1 Pedro 2:9, 16) Pues, e profesia aki ta indica cu e seyamento di e rumannan di Cristo lo a ser completa ora e gran tribulacion cuminsa. Sinembargo, otro versiculonan di Bijbel ta indica cu tin un prome seyamento di e unginan. P’esei tin biaha nos ta papia di un seyamento inicial y un seyamento final. Kico ta e diferencia entre nan dos?

Laga nos considera e nificacion di e palabra “seya.” Den tempo antiguo, un seyo tabata un instrumento cu hende a uza pa imprimi algo riba un documento. E palabra por referi tambe na e cos imprimi mes. Den e tempo ei, tabata comun pa imprimi un marca cu e seyo den wax of klei y pega esei na un documento of otro articulo pa indica cu e ta autentico of pa indica ta di ken e ta.​—1 Reinan 21:8; Job 14:17.

 Pablo a compara spirito santo cu e marca di un seyo ora cu el a declara: “Esun cu ta garantisa cu boso y cu nos ta pertenece na Cristo y cu esun cu a ungi nos ta Dios. Tambe el a pone su seyo riba nos y a duna nos e garantia di loke tin cu bini, esta, e spirito, den nos curason.” (2 Corintionan 1:21, 22, NW) Pues, Jehova ta ungi e cristiannan aki cu su spirito santo pa indica cu nan ta pertenece na dje.

Sinembargo, tin dos fase den e seyamento di e unginan. E prome seyamento ta otro for di e seyamento final (1) pa loke ta proposito y (2) tempo. E seyamento inicial ta sirbi pa scohe un miembro nobo cu ta ser agrega na e cantidad di cristiannan ungi. E seyamento final ta sirbi pa confirma cu e persona scohi y seya aki a demostra su lealtad plenamente. Ta te na e seyamento final numa lo pone e seyo permanentemente ‘na frenta’ di e persona ungi, y asina identific’e definitivamente como un ‘sirbidor fiel y proba di nos Dios.’ E seyamento menciona na Revelacion capitulo 7 ta referi na e fase final di e seyamento aki.​—Revelacion 7:3.

Relaciona cu e tempo di e seyamento inicial, apostel Pablo a skirbi cristiannan ungi: “Den dje boso a confia tambe, despues di a tende e mensahe di berdad, e evangelio di boso salbacion; den kende tambe, despues di a kere, boso a wordo seya cu e spirito santo di promesa.” (Efesionan 1:13, 14) Den hopi caso, e registro biblico ta mustra cu en berdad cristiannan di prome siglo tabata ser seya un poco despues cu nan a tende e bon nobo y a bira creyente den Cristo. (Echonan 8:15-17; 10:44) E seyamento ei a demostra cu Dios a aproba nan. Sinembargo, esei no a indica Dios su aprobacion final. Dicon no?

Pablo a declara cu cristiannan ungi tabata “seya pa e dia di redencion” of dia di liberacion. (Efesionan 4:30) Esaki ta indica cu un periodo di tempo, por lo general hopi aña, lo a pasa despues di e seyamento inicial ei. E unginan tin cu keda fiel for di dia cu nan ser seya cu spirito santo te ‘e dia cu nan ser libra’ di nan curpa carnal, es decir, te na nan morto. (Romanonan 8:23; Filipensenan 1:23, NW; 2 Pedro 1:10) P’esei ta te na final di su bida numa Pablo por a bisa: “Mi a termina e careda, mi a warda e fe; den futuro ta warda pa mi e corona di husticia.” (2 Timoteo 4:6-8) Ademas, Hesus a bisa un congregacion di cristian ungi: “Sea fiel te na morto y lo mi duna bo e corona di bida.”​—Revelacion 2:10; 17:14.

E palabra “corona” ta duna mas prueba cu tin un periodo di tempo entre e seyamento inicial y esun final. Dicon? Den tempo antiguo, tabata e custumber pa duna un corona na e coredo cu gana un careda. Pa haya e corona, e tabatin cu haci mas cu djis participa den e careda. E tabatin cu core henter e ruta te na final. Asina tambe, ta solamente si cristiannan ungi persevera henter e ruta te na final di nan careda​—for di e seyamento inicial te na esun final​—nan lo ser corona cu bida inmortal den shelo.​—Mateo 10:22; Santiago 1:12.

Ki tempo e resto di cristiannan ungi cu a haya nan seyamento inicial lo ricibi nan seyamento final? Tur cu ta na bida riba Tera ainda lo ser seya “na nan frenta” prome cu comienso di e gran tribulacion. Pues, ora cu e angelnan laga e cuater bientonan di tribulacion los, henter Israel spiritual lo a haya nan seyamento final caba, a pesar cu algun lo ta na bida ainda den carni y tin cu termina nan bida riba tera.