Un Homber Cu A Stima Bida y Hende

DANIEL SYDLIK, kende pa hopi tempo tabata un miembro di Cuerpo Gobernante di Testigo di Jehova, a termina su carera terenal riba diamars, 18 di april 2006. E tabatin 87 aña di edad y a sirbi como un miembro di e famia di Betel na Brooklyn, New York, pa casi 60 aña.

Ruman Dan (esei tabata su nomber di cariño) a bin Betel na aña 1946. Prome cu esei, el a sirbi como pionero special na California y tambe el a pasa un periodo den prizon durante Segundo Guera Mundial pa motibo di su neutralidad cristian. Su experencianan durante e tempo ei a ser describi na un manera bibo den su storia di bida cu a sali den E Toren di Vigilancia di 1 di juni 1985 na Spaño, bou di e tema “Esta Precioso Bo Amistad Ta, O Dios!”

Ruman Sydlik tabata conoci pa e echo cu e tabata un persona acercabel y humilde. Ora e tabata conduci e programa di adoracion di mainta pa e famia di Betel, su actitud positivo y amor pa bida hopi bes a keda refleha den su palabranan di apertura: “Ta dushi pa ta na bida pa sirbi e Dios bibo y berdadero.” Como un discursante publico e tabata anima otro hende pa nan tambe tin e punto di bista aki. P’esei su discursonan tabatin temanan manera “Felis Ta e Pueblo Kende Su Dios Ta Jehova”, “Reflehando e Goso di Jehova”, “Mantene e Candela di Dios Su Spirito Bibo” y “Lo Mihor Tin Cu Bin Ainda.”

Na aña 1970, Ruman Sydlik a casa cu Marina Hodson di Inglatera. El a describi Marina como “un apoyo cu Dios a manda p’e.” Nan a sirbi Jehova hunto pa mas cu 35 aña.

Durante su añanan na Betel, Ruman Sydlik a sirbi den varios departamento. El a traha den e imprenta y e Departamento di Redaccion. Tambe el a traha na e emisora di radio WBBR. Anto na november 1974, el a keda nombra como un miembro di Cuerpo Gobernante y cu tempo el a traha den e Comite di Personal y di Redaccion.

Ruman Sydlik a traha pa mas cu 30 aña den e Comite di Personal, y durante e tempo ei e tabata un bon ehempel den desplega amor intenso pa hende. E tabata anima hopi hende cu su bos potente, semper halando atencion na e privilegio precioso cu nos tin di sirbi Jehova. Tur ora bai e tabata enfatisa cu berdadero felicidad ta depende no di factornan externo sino di nos relacion cu Jehova y di e manera cu nos ta mira bida.

E famia di Betel ta sinti hopi falta di Ruman Sydlik, pero su ehempel di un persona cu realmente a stima bida y hende lo sigui beneficia e famia. Nos tin sigur cu e ta entre esnan cu Revelacion 14:13 ta papia di dje, bisando: “‘Bendiciona ta e mortonan cu di awor padilanti ta muri den Señor!’ ‘Si’, e spirito ta bisa, ‘cu nan sosega di nan trabounan, pasobra nan obranan ta sigui hunto cu nan.’”