Amos​​—Pikido of Skerfdo di Figo?

DEN siglo 9 prome cu nos era Amasias, un sacerdote malbado adorado di bishe, a prohibi profeta Amos di predica den Israel. Amos no a haci caso di dje y a bisa: “Mi tabata cuidado di bestia y skerfdo di figo di palo di sicamor. Y Jehova a kita mi for di sigui tras di e tou, y Jehova a bisa mi: ‘Bai profetisa na mi pueblo Israel.’” (Amos 7:14, 15, NW) Si, ta Jehova a manda Amos bai sirbi como profeta; no ta riba su mes el a bai. Pero kico Amos tabata kiermen ora el a bisa cu e tabata un “skerfdo” di figo di palo di sicamor?

Esaki ta e unico caminda cu e expresion Hebreo traduci como tal ta aparece den e Traduccion di Mundo Nobo. Otro Bijbelnan a traduci e expresion como “pikido”, “plantado” of ‘cultivado’ en bes di “skerfdo” di figo di sicamor. Sinembargo, e revista Economic Botany ta bisa cu un traduccion apropia di e expresion lo ta “perforado”, pasobra e palabra aki ta indica algo special cu hende cu ta cultiva figo di sicamor ta haci.

E custumber di skerf of perfora, esta, traha corta chikito den figo di sicamor, tabata bon conoci na Egipto y Chipre for di hopi tempo pasa. Awendia no ta skerf figo mas na Israel pasobra awor nan ta planta otro tipo di figo den e pais ei. Ma den e tempo di Amos si e Israelitanan tabatin e custumber di skerf figo, ya cu e palonan di sicamor cu tabata crece na Israel e tempo ei a bini for di e diferente sortonan cu tabata ser cultiva na Egipto.

Aparentemente, ora skerf figo e ta absorba awa y haya mas juice. Tambe esei ta aumenta e formacion di ethylene, un gas cu ta pone e fruta hecha mas lihe, locual ta resulta den fruta mas grandi y mas zoet. Ademas, maribomba parasit no ta haya chens di daña e fruta pasobra e ta hecha rapidamente.

A pesar di Amos su background humilde como wardado di bestia y skerfdo di figo, e no a laga su enemigonan intimid’e. Mas bien, cu curashi el a declara Jehova su mensahe di huicio contra Israel. Esta un bon ehempel pa sirbidornan di Dios awe, kendenan tambe mester declara un mensahe impopular!​—Mateo 5:11, 12; 10:22.