Storia di Bida

Dicon Mi Tin Goso den e Trabou di Haci Discipel

Segun e relato di Pamela Moseley

Inglatera tabata den pleno guera na 1941 ora mi mama a bai cu mi Leicester na un congreso di Testigo di Jehova. Nos a scucha Joseph Rutherford su discurso special tocante mucha. Ora ami cu mi mama a batisa na e congreso ei, mi a ripara cu e rumannan cu a yuda nos progresa spiritualmente tabata sumamente felis. E tempo ei mi no a realisa ainda cuanto goso e trabou di haci discipel di Hesucristo ta trece cu ne.

NOS progreso pa bira discipel a cuminsa e aña anterior. Ainda mi ta corda e dia teribel ei den september 1939 ora Guera Mundial II a dal aden. Mi a mira lagrima core na cara di mi mama cada biaha cu e tabata puntra su mes: “Pakico no por tin pas na mundo?” Mi mayornan a sirbi como militar den Guera Mundial I y a experencia e horornan di guera. Mi mama a bai haci e pastor anglicano na Bristol e pregunta. E pastor a djis bis’e: “Semper tabatin guera y semper lo tin guera.”

Sinembargo, poco tempo despues di esei un señora di edad a bishita nos cas. E tabata un Testigo di Jehova y mi mama a hacie e mesun pregunta: “Pakico no por tin pas na mundo?” E Testigo a splic’e cu guera ta parti di e señal cu nos ta bibando den e tempo di fin di e mundo violento aki. (Mateo 24:3-14) Un poco despues su yiu muher a cuminsa studia Bijbel cu nos. Nan dos tabata entre e personanan felis cu a presencia nos bautismo. Cu tempo mi a bin haya sa dicon e trabou di haci discipel ta haci hende asina felis. Laga mi conta bo algun di e cosnan cu mi a siña durante e mas cu 65 añanan cu mi tin den e trabou di haci discipel.

 Mi A Descubri e Goso di Siña Hende

Mi a cuminsa participa den e trabou di predica e Reino na Bristol tempo mi tabatin 11 aña. Un ruman a duna mi un tocadisco y un carchi di testimonio y a bisa mi: “Awor bai na tur e casnan na e banda ei di caya.” Asina mi so a cuminsa predica. Claro cu mi tabata hopi nervioso. Mi tabata pasa un discurso biblico graba y despues mustra e doño di cas e carchi di testimonio cu a invita hende pa acepta literatura di Bijbel.

Den e decada di 1950 a cuminsa pone mas enfasis riba lesa for di Bijbel durante nos bishitanan di cas pa cas. Na principio, dor cu mi tabata timido, no tabata facil pa combersa cu hende straño y splica nan texto di Bijbel. Pero cu tempo mi a bin haya confiansa. E ora ei mi a echt cuminsa disfruta di e ministerio. Algun hende tabata mira nos como simpel bendedo di buki, pero ora nos tabata lesa y splica nan textonan di Bijbel, nan a reconoce nos como siñado di e Palabra di Dios. Mi a gusta haci e trabou aki asina tanto cu mi kier a participa mas den dje. Pues na september 1955 mi a drenta e sirbishi di tempo completo como pionero.

Perseverancia Ta Duna Resultado

Un di e prome lesnan cu mi a siña tabata cu perseverancia amoroso por duna resultado. Na un ocasion, mi a laga un Toren di Vigilancia cerca un señora, Violet Morice. Dia mi a bai bek cerca dje, el a habri porta hancho pa mi, crusa su brasanan y scucha cu atencion segun cu mi tabata splic’e e textonan. Cada biaha cu mi a bai bek cerca dje, e tabata mustra hopi interes. Sinembargo, ora mi a ofrece un estudio regular di Bijbel, el a bisa: “No. Dia e muchanan ta grandi, lo mi cuminsa.” Mi a keda hopi desapunta. Bijbel ta papia di “un tempo pa busca y un tempo pa stop di busca.” (Eclesiastes 3:6) Mi a dicidi di no entrega.

Un luna despues, mi a bai bek cerca Violet y a considera algun texto di Bijbel mas cu ne. No a tarda mucho cu el a cuminsa studia Bijbel tur siman riba stupi di su cas. Porfin un dia el a bisa mi: “Mi ta kere ta mihor bo drenta, bo no ta haya?” Esta un dushi ruman den fe y bon amiga pa ami Violet a bira! Si, Violet a batisa como Testigo di Jehova.

Un dia Violet a haya e sorpresa di su bida ora el a haya sa cu su casa a bende nan cas sin bis’e nada anto bai lag’e. Afortunadamente, cu yudansa di un amigo Testigo el a haya un otro cas e mesun atardi ei. Como muestra di su gratitud na Jehova, el a dicidi di dedica e resto di su bida na e trabou di pionero. Ora mi a mira cuanto celo pa adoracion berdadero Jehova su spirito a dun’e, mi a realisa pakico e trabou di haci discipel ta duna hende asina tanto goso. Si, esaki lo a bira mi carera!

Na 1957, nan a asigna ami cu Mary Robinson pa traha como pionero den e area industrial di Rutherglen na Glasgow, Escocia. Nos tabata predica den neblina, biento, awasero y sneu, pero tabata bale la pena. Un dia mi a topa Jessie. Mi tabata gusta studia Bijbel cu ne. Su esposo, Wally, tabata un comunista, y na prome instante el a evita mi. Ora Wally a studia Bijbel y a realisa cu ta e Reino di Dios so por percura pa condicionnan ideal entre hende, el a keda hopi encanta. Cu tempo, tur dos a bira hacido di discipel.

E Prome Reaccion Por Gaña Bo

Despues nos a ricibi un otro asignacion pa bai e stad di Paisley, Escocia. Un dia cu mi tabata predica ayanan,  un señora a dal porta sera den mi cara. Pero un poco despues el a bin busca mi pa pidi mi despensa. Ora mi a bai bek e siguiente siman, el a bisa mi: “Mi a sinti como si fuera ta den cara di Dios mi a dal e porta sera. Mi no por a keda sin bai busca bo.” E tabata yama Pearl. El a bisa mi cu e tabata asina desilusiona cu su amigo- y famianan cu el a pidi Dios den oracion pa e haya un berdadero amiga. E di: “Anto abo a presenta na porta. Awor mi ta realisa cu ta abo mester ta e berdadero amiga ei.”

No tabata facil pa mi bira amiga di Pearl. E tabata biba te ariba di un sero steil, y mi tabatin cu subie na pia. Dia mi a bai busc’e na cas pa e asisti na su prome reunion, biento y awasero casi a tumba mi. Mi paraplu a habri for di otro y mi a tir’e afo. Apenas seis luna despues cu Pearl a dal porta sera den mi cara, el a simbolisa su dedicacion na Dios mediante bautismo bou di awa.

Un poco despues, su esposo a dicidi di studia Bijbel, y den poco tempo el a compaña mi den e sirbishi di cas pa cas. Awa tabata yobe manera custumber. E di: “No worry. Ta den e tipo di weer aki mi sa para oranan largo wak futbol. Pues mi mester por para den awasero pa Jehova.” Semper mi a admira e determinacion di e Escocesnan.

Ora mi a bai bek despues di varios decada y mira cu mayoria di e personanan cu mi a studia cu ne ta perseverando ainda den fe, mi a haya un gran satisfaccion! Esei ta e goso di haci discipel. (1 Tesalonicensenan 2:17-20) Na 1966, despues cu mi a traha como pionero mas cu ocho aña na Escocia, mi a haya invitacion pa bai e Scol Biblico di Galaad di Watchtower pa haya entrenamento como misionero.

Den un Campo Stranhero

Mi a wordo asigna na Bolivia, na e stad tropical Santa Cruz, caminda tabatin un congregacion di mas o menos 50 publicador. E stad a pone mi corda riba e Wild West cu bo ta mira den peliculanan di Hollywood. Mirando bek, mi ta kere cu mi tabata un misionero basta gewoon. Nunca mi a yega di haya mi cu crocodil cu ta ataca ni cu grupo di hende violento. Tampoco mi a yega di perde den desierto of naufraga riba lama grandi. Pero, pa mi, e trabou di haci discipel tabata e cos di mas excitante.

Un di e prome hende muhernan cu mi a studia Bijbel cu ne na Santa Cruz tabata Antonia. No tabata facil pa siña hende Bijbel na Spaño. Un biaha, e yiu homber chikito di Antonia a puntra: “Mami, ta pa malo e ta haci fout pa pone nos hari?” Cu tempo tanto Antonia como su yiu muher Yolanda a bira discipel di Hesus. Yolanda tabatin un amigo, un studiante di lei, cariñosamente yama Dito, cu tambe a cuminsa studia Bijbel y asisti na nos reunionnan. Den mi esfuersonan pa yud’e, mi a haya sa algo mas den e trabou di siña hende e berdad di Bijbel: Tin biaha hende tin mester di un push suave.

Ora Dito a cuminsa falta su estudionan, mi a bis’e: “Dito, Jehova no ta obliga bo apoya su Reino. Bo tin cu scohe pa haci esei.” Ora el a contesta cu e kier a sirbi Dios, mi a bis’e: “Bo tin potret di un lider revolucionario aki den. Bo ta kere cu un bishitante cu mira nan ta saca afo cu bo a scohe pa apoya e Reino di Dios?” Esei tabata e push suave cu e tabatin mester.

Dos siman despues a cuminsa un revolucion y a start un tiroteo entre studiantenan di universidad y polis. “Ban djaki!” Dito a grita su amigo. “No! Esaki ta e gran dia cu nos tabata spera”, su compañero a contesta, mientras cu el a cohe su rifle y core subi riba dak di e universidad. E tabata un di e ocho amigonan di Dito cu a muri riba e dia ei. Bo por imagina bo ki felis mi ta di por mira e homber aki, Dito, kende tambe por a perde su bida si e no a dicidi di bira un cristian berdadero?

Mi A Mira Jehova Su Spirito den Accion

Un dia mi tabata pasando un cas voorbij, pensando cu nos a yama na e cas ei caba, anto e señora di e cas a yama mi. Su nomber ta Ignacia. E tabata sa di Testigonan di Jehova, pero oposicion severo di parti di su casa​—un oficial di polis curpa grandi cu yama Adalberto​—a  strob’e di progresa spiritualmente. Hopi siñansa basico di Bijbel tabatin Ignacia confundi, p’esei mi a cuminsa studia Bijbel cu ne. Aunke Adalberto tabata determina pa para e estudio di Bijbel aki, mi a logra papia cu ne pa basta tempo tocante otro topiconan. Esei a habri caminda pa nos bira amigo.

Imagina e goso cu mi a sinti di por a mira Ignacia bira un miembro stima di e congregacion, yudando hopi ruman den sentido spiritual y fisico cu tabatin mester di consuelo. Cu tempo, su esposo y tres di su yiunan tambe a bira Testigo. De echo, ora Adalberto a compronde finalmente e nificacion di e bon nobo, el a bai bek na e warda di polis y a papia cu asina tanto entusiasmo cu el a logra sera 200 abonament riba E Toren di Vigilancia y Spierta! cu e polisnan.

Jehova Ta Pon’e Crece

Despues cu mi a sirbi seis aña na Santa Cruz, mi a ser asigna na La Paz, capital di Bolivia, caminda mi a traha e siguiente 25 añanan. Na cuminsamento di e decada di 1970 e sucursal di Testigonan di Jehova na La Paz tabatin apenas 12 miembro. En bista cu e trabou di predica a expande, locual a rekeri facilidadnan mas grandi, a construi un edificio nobo pa e sucursal den e stad Santa Cruz cu tabata creciendo rapidamente. Na 1998 a bolbe traslada e sucursal aya, y mi a haya e invitacion pa bira miembro di personal di e sucursal, cu awor tabata consisti di mas cu 50 miembro.

E solo congregacion cu tabatin na Santa Cruz na 1966 a bira mas cu 50 congregacion. E 640 Testigonan cu tabatin den henter Bolivia e tempo ei a bira casi 18.000 awe.

Mi ta masha felis cu mi asignacion na Bolivia tabata productivo. Pero e fieldad di mi rumannan cristian rond mundo semper a anima mi. Nos tur ta contento di por mira Jehova su bendicion riba e actividad di predica e Reino. Sin duda ta un goso di por contribui na e trabou di haci discipel.​—Mateo 28:19, 20.

[Plachi na pagina 13]

Como pionero na Escocia

[Plachi na pagina 15]

Sirbiendo na e sucursal di Bolivia; (potret chikito) na e graduacion di e di 42 klas di Galaad