Facil pa Lesa, Pero E Ta Exacto?

NA SEPTEMBER 2005, Iglesia Anglicano a duna su respaldo completo na publicacion di The 100-Minute Bible. E version nobo aki, diseña pa lesa den 100 minuut, ta resumi e Scritura Hebreo den 17 seccion di un solo pagina y e Scritura Griego den 33 seccion di un solo pagina, lagando afo, manera un analista ta bisa, tur e “partinan laf.” E ta facil pa lesa, pero e ta exacto?

Studiantenan serio di Bijbel lo nota cu e ta omiti e nomber divino, Jehova. (Salmo 83:18) Ademas, nan lo ripara un cantidad di otro discrepancia. Por ehempel, seccion 1 ta bisa cu Dios a “crea shelo y Tera den un periodo di seis dia.” Sinembargo, Genesis 1:1 ta bisa simplemente: “Na principio Dios a crea e shelonan y Tera.” Despues di esei, e relato original ta describi mas actonan di creacion cu tabatin di aber cu Tera y cu a dura seis “dia” of periodo di tempo. Anto Genesis 2:4 ta resumi henter e periodo di creacion, yamand’e “e dia cu SEÑOR Dios a traha Tera y shelo.”

Segun The 100-Minute Bible, e persona cu a ataca Job, un homber di integridad, tabata “un sirbidor di [Dios], Satanas, . . . kende su responsabilidad tabata pa fungi como acusado di humanidad.” Bo ta mira e discrepancia aki? E palabra “Satanas” ta nifica “Resistido.” Satanas no ta un sirbidor di Dios; mas bien, e ta e enemigo principal di Dios y esun cu di su mes boluntad a scohe pa acusa humanidad.​—Revelacion 12:7-10.

Kico di e Scritura Griego Cristian di The 100-Minute Bible? Den e comparacion di carne cu cabrito, e version nobo ta bisa cu Hesus ta faborece esnan cu a yuda “cualkier hende, pa insignificante cu e por ta”, mientras cu Hesus realmente a bisa cu e ta bendiciona esnan cu ta haci bon na su siguidonan​—su “rumannan.” (Mateo 25:40) E resumen di Revelacion ta bisa cu “Roma, esta, e gran Babilonia, lo ser destrui completamente.” Pero studiantenan di Bijbel sa cu e scritura original no ta duna ningun indicacion cu “e Gran Babilonia” ta referi na Roma.​—Revelacion 17:15–18:24.

Pues, pa esnan cu kier conoce nos Creador y compronde su proposito, no tin nada cu por substitui Bijbel completo. Ta berdad cu lo tuma nan mas cu 100 minuut pa lesa Bijbel, pero esei ta trece bendicionnan rico. (Juan 17:3) Acepta e reto aki y lo bo haya gran recompensa.​—2 Timoteo 3:16, 17.