Jehova Ta un Dios Apreciativo

“Dios no ta inhusto pa lubida boso trabou y e amor cu boso a mustra pa su nomber.”​—HEBREONAN 6:10.

1. Con Jehova a mustra su aprecio pa e Moabita Ruth?

JEHOVA tin masha aprecio pa e esfuersonan di hende cu sinceramente ta busca pa haci su boluntad, y e ta recompensa nan ricamente. (Hebreonan 11:6) E homber fiel Boaz tabata conoce e bunita faseta aki di e personalidad di Dios, pasobra el a bisa e Moabita Ruth, kende amorosamente tabata cuida su suegra viuda: ‘Cu Jehova recompensa bo obra, y cu bo pago sea completo for di Jehova.’ (Ruth 2:12) Dios a bendiciona Ruth? Definitivamente! Ruth su relato ta asta den Bijbel! Es mas, Ruth a casa cu Boaz y a bira antepasado di Rei David y di Hesucristo. (Ruth 4:13, 17; Mateo 1:5, 6, 16) Esei ta un di e tantisimo ehempelnan den Bijbel cu ta demostra e aprecio cu Jehova tin pa su sirbidornan.

2, 3. (a) Kico ta haci Jehova su expresionnan di aprecio remarcabel? (b) Dicon Jehova por expresa berdadero aprecio? Ilustra esei.

² Jehova lo considera su mes inhusto si e no mustra aprecio. Hebreonan 6:10 ta bisa: “Dios no ta inhusto pa lubida boso trabou y e amor cu boso a mustra pa su nomber, dor cu boso a sirbi y ainda ta sirbi e santonan.” Loke ta haci e declaracion aki remarcabel ta cu Dios ta mustra aprecio pa hende devoto a pesar cu nan ta pecador y no ta alcansa su gloria.​—Romanonan 3:23.

³ Debi na nos imperfeccion, nos lo por sinti cu nos echonan di devocion na Dios ta insignificante y no ta merece su bendicion. Sinembargo, Jehova ta compronde nos motivacion y circunstancianan plenamente, y di berdad e ta balora e sirbishi cu nos ta rindi di henter nos alma. (Mateo 22:37) Laga nos ilustra esei: Un mama ta haya un regalo riba mesa, ta un cadena barata. Lo e por mira e regalo como un cos cu no tin masha balor y bent’e un banda. Sinembargo, e carchi cu tin hunto cu e regalo ta bis’e cu e regalo ta di su yiu muher chikito, cu a uza tur su cen cu el a spar pa cumpra e cadena. Awor e mama ta mira e regalo otro. Podise cu awa na wowo, e ta brasa su yiu y expresa su aprecio sincero.

4, 5. Con Hesus a imita Jehova den mustra aprecio?

⁴ Siendo cu Jehova ta plenamente conciente di nos motivacion y limitacionnan, e ta aprecia ora nos ta dun’e lo mihor di nos, sea cu esei ta tiki of hopi. Den esaki Hesus a refleha su Tata perfectamente. Corda riba e relato biblico di e viuda cu a tira dos placa. Segun Bijbel, “[Hesus] a hisa cara y a mira e riconan ta tira nan ofrendanan den e caha di ofrenda. Y el a  mira un viuda pober ta tira dos placa di koper aden. Y el a bisa: ‘Di berdad mi ta bisa boso, e viuda pober aki a tira mas tanto aden cu nan tur; pasobra nan tur a tira pa e ofrenda for di nan abundancia, ma el a tir’aden for di su pobresa tur loke cu e tabatin pa biba di dje.’”​—Lucas 21:1-4.

⁵ Si, como cu Hesus tabata sa di e circunstancianan di e señora​—cu e tabata viuda y pober​—el a compronde e berdadero balor di su ofrenda, y el a aprecia esei masha. Mescos ta e caso cu Jehova. (Juan 14:9) No ta un animacion pa sa cu sea cual sea bo circunstancia, bo por haya e aprobacion di nos Dios apreciativo y di su Yiu?

Jehova Ta Recompensa un Etiope Cu Tabatin Temor di Dios

6, 7. Dicon y den ki manera Jehova a demostra su aprecio na Ebed-melek?

⁶ Bes tras bes Bijbel ta trece dilanti cu Jehova ta demostra su aprecio pa hende cu ta haci su boluntad. Considera por ehempel con el a trata cu Ebed-melek, un Etiope temeroso di Dios cu a biba den tempo di Jeremias y cu tabata un sirbidor den e cas di e Rei infiel Sedekias di Juda. Ebed-melek a haya sa cu e prinsnan di Juda a acusa profeta Jeremias inhustamente di ta agita e pueblo contra e Rei y nan a bent’e den un rembak pa lag’e muri di hamber ei den. (Jeremias 38:1-7) Aunke Ebed-melek tabata sa cu nan a odia Jeremias intensamente debi na e mensahe cu e tabata predica, toch Ebed-melek a risca su bida y a bai haci un apelacion cerca Rei. Cu curashi e Etiope a bisa: “Señor mi Rei, e hendenan aki a actua cu malicia den tur loke nan a haci cu profeta Jeremias. Nan a tir’e den rembak; y e lo muri di hamber eiden.” Riba ordo di Rei, Ebed-melek a bai cu 30 homber y a rescata e profeta di Dios.​—Jeremias 38:8-13.

⁷ Jehova a mira cu Ebed-melek a actua cu fe, y cu ta esei a yud’e supera cualkier miedo  cu lo e por tabatin. P’esei Jehova a mustra su aprecio y mediante Jeremias el a bisa Ebed-melek: “Mira, mi ta cla pa cumpli cu mi palabranan riba e stad aki, pa desaster y no pa prosperidad . . . Ma lo mi libra bo riba e dia ei, . . . y lo bo no wordo entrega den man di e hombernan di kendenan bo tin miedo. Pasobra lo mi rescata bo sigur, . . . lo bo tin bo mes bida como botin, pasobra bo a confia den mi.” (Jeremias 39:16-18) Si, Jehova a libra Ebed-melek, y tambe Jeremias, for di e prinsnan malbado di Juda y despues for di e Babilonionan cu a destrui Jerusalem. Salmo 97:10 ta bisa: “[Jehova] ta preserva alma di su santonan; e ta libra nan for di man di e malbado.”

“Bo Tata, Cu Ta Mira den Scondi, Lo Recompensa Bo”

8, 9. Manera Hesus a demostra, ki clase di oracion Jehova ta aprecia?

⁸ Un otro evidencia cu ta mustra cu Jehova ta aprecia y duna balor na nos expresionnan di devocion na dje nos por mira den loke Bijbel ta bisa tocante oracion. E homber sabi a remarca: “Oracion di e rectonan ta [Dios] su delicia.” (Proverbionan 15:8) Den tempo di Hesus, hopi lider religioso tabata haci oracion publicamente, no debi na berdadero devocion, sino pasobra nan kier a impresiona hende. Hesus di: “Ya nan tin nan pago caba.” Anto el a instrui su siguidonan: “Ma abo, ora bo ta haci oracion, bai den bo camber di mas paden, y ora bo a sera bo porta, haci oracion na bo Tata cu ta den scondi; y bo Tata, cu ta mira den scondi, lo recompensa bo.”​—Mateo 6:5, 6.

⁹ Claro cu aki Hesus no a condena oracion publico, pasobra e mes a haci oracion publicamente na cierto ocasionnan. (Lucas 9:16) Loke Jehova ta aprecia profundamente ta ora nos ta haci oracion na dje cu un curason sincero, sin intencion di impresiona otro hende. De echo, nos oracionnan priva ta un bon indicacion di e profundidad di nos amor pa Dios y di nos confiansa den dje. P’esei no ta un sorpresa cu hopi biaha Hesus a busca luganan priva pa haci oracion. El a yega di haci esaki “mainta tempran, ora tabata scur ainda.” Un otro biaha, “e so a subi bai riba sero pa haci oracion.” Anto prome cu el a scohe su 12 apostelnan, el a pasa henter anochi su so den oracion na Dios.​—Marco 1:35; Mateo 14:23; Lucas 6:12, 13.

10. Di kico nos por tin sigur ora nos oracionnan ta refleha e deseo sincero di agrada Dios?

¹⁰ Nos por imagina cu Jehova lo a scucha masha atentamente na e expresionnan sincero di su Yiu! De echo tabatin biaha cu Hesus a haci oracion “cu gran sclamacion y lagrima . . . y el a wordo tendi pa motibo di su piedad.” (Hebreonan 5:7; Lucas 22:41-44) Ora cu nos oracionnan ta refleha e mesun deseo sincero ei di agrada Dios, nos por tin sigur cu nos Tata celestial ta scucha atentamente y cu aprecio. Si, Jehova ta “cerca di tur esnan cu ta sclama na dje den berdad.”​—Salmo 145:18.

11. Kico Jehova ta pensa di loke nos ta haci den priva?

¹¹ Si Jehova ta aprecia ora nos ta haci oracion na dje den secreto, cuanto mas lo e ta aprecia ora nos ta obedec’e den secreto! Si, Jehova sa kico nos ta haci den priva. (1 Pedro 3:12) De echo, si nos ta fiel y obedecido ora nos ta nos so, esei ta un bon indicacion cu nos ta sirbi Jehova ‘cu henter nos curason’, un curason cu tin motivacion puro y cu ta firme pa loke ta bon. (1 Cronicanan 28:9) Tal comportacion ta haci Jehova su curason hopi contento!​—Proverbionan 27:11; 1 Juan 3:22.

12, 13. Con nos por proteha nos mente y curason y ser manera e discipel fiel Natanael?

¹² Pues anto, cristiannan fiel ta vigila pa nan no comete picanan secreto cu ta corumpi e mente y curason, cosnan manera wakmento di pornografia y violencia. Aunke tin  pica cu nos por sconde pa hende, nos ta realisa cu “tur cos ta habri y bisto dilanti di wowo di Esun cu nos tin di aber cu ne.” (Hebreonan 4:13; Lucas 8:17) Ora nos ta haci esfuerso pa evita e cosnan cu ta desagrada Jehova, nos ta mantene un consenshi limpi y ta keda contento di sa cu nos tin e aprobacion di Dios. Si, no tin duda cu Jehova realmente ta aprecia e persona “cu ta cana den rectitud y ta haci husticia, y ta papia berdad den su curason.”​—Salmo 15:1, 2.

¹³ Pero con nos por proteha nos mente y curason den un mundo satura cu maldad? (Proverbionan 4:23; Efesionan 2:2) Fuera di probecha plenamente di tur provision spiritual, esta, tur loke Jehova ta duna nos pa fortalece nos fe, nos tin cu haci tur nos esfuerso pa rechasa loke ta malo y haci loke ta bon. Anto nos tin cu actua lihe, pa mal deseonan no concebi y duna lus na pica. (Santiago 1:14, 15) Imagina bo con felis lo bo ta si Hesus bisa di bo loke el a bisa di Natanael: “Ata un [hende] den kende no tin mentira!” (Juan 1:47) Natanael, yama tambe Bartolome, despues tabatin e privilegio di bira un di e 12 apostelnan di Hesus.​—Marco 3:16-19.

“Un Sumo Sacerdote Misericordioso y Fiel”

14. Compara cu otro hende, con Hesus a reacciona riba e gesto di Maria?

¹⁴ Siendo cu Hesus ta “e imagen di e Dios invisibel”, Jehova, semper el a imita su Tata perfectamente den mustra aprecio na hende cu ta sirbi Dios motiva pa un curason limpi. (Colosensenan 1:15) Por ehempel, cinco dia prome cu Hesus a entrega su bida, e cu algun di su discipelnan tabata huespet na cas di Simon di Betania. Durante e anochi, Maria, ruman muher di Lazaro cu Marta, “a cohe un liber di perfume di nardo puro di hopi balor” (el a bal mas o menos e salario di un aña di trabou), y a bash’e riba Hesus su cabes y pia. (Juan 12:3) Algun discipel a bisa: “Pakico e dispidimento aki?” Sinembargo, Hesus tabatin completamente un otro opinion di e gesto di Maria. El a consider’e un acto di gran generosidad y nificacion en bista di su morto y entiero inminente. P’esei, en bes di critica Maria, Hesus a honr’e. E di: “Unda cu e evangelio aki wordo predica den henter mundo, loke cu e muher aki a haci tambe lo wordo conta na su recuerdo.”​—Mateo 26:6-13.

15, 16. Con nos ta beneficia di e echo cu Hesus a biba y sirbi Dios riba Tera como hende?

¹⁵ Esta privilegia nos ta cu nos tin un persona asina apreciativo manera Hesus como nos Lider! De echo, Hesus su bida como hende a prepar’e pa e trabou cu Jehova tabatin p’e haci, esta, di sirbi como Sumo Sacerdote y Rei, na prome instante di e congregacion di e unginan y despues di mundo.​—Colosensenan 1:13; Hebreonan 7:26; Revelacion 11:15.

¹⁶ Prome cu Hesus a bin na Tera e tabatin un interes profundo y un cariño special caba pa humanidad. (Proverbionan 8:31) Despues cu el a biba como hende, el a bin compronde mas plenamente ainda e pruebanan cu nos ta experencia den nos sirbishi na Dios. Apostel Pablo a skirbi: “[Hesus] mester a wordo haci igual cu su rumannan den tur cos, pa e por a bira un sumo sacerdote misericordioso y fiel . . . Pasobra como cu e mes a wordo tenta den loke el a sufri, e por bin na yudansa di esnan cu ta wordo tenta.” Hesus “por compadece di nos debilidadnan”, pasobra el “a wordo tenta den tur cos mescos cu nos, ma toch sin pica.”​—Hebreonan 2:17, 18; 4:15, 16.

17, 18. (a) Kico e cartanan na e shete congregacionnan di Asia Menor ta revela tocante e profundidad di Hesus su aprecio? (b) E cristiannan ungi ei a ser prepara pa cumpli cu ki papel?

¹⁷ Despues cu Hesus a resusita a bira bisto cu awor e tabata compronde mas mihor ainda e pruebanan cu su siguidonan tabata pasa aden. Considera su cartanan na e shete congregacionnan  na Asia Menor cu apostel Juan a skirbi. Na e congregacion na Smirna, Hesus a bisa: “Mi conoce bo tribulacion y bo pobresa.” En realidad, Hesus tabata bisando akinan: ‘Mi ta compronde boso problemanan bon bon; mi sa kico boso ta pasando aden.’ Anto como cu e mes tambe a sufri te na morto, e por a bisa cu compasion y cu siguransa: “Sea fiel te na morto y lo mi duna bo e corona di bida.”​—Revelacion 2:8-10.

¹⁸ E cartanan na e shete congregacionnan ta yen di expresion cu ta indica cu Hesus tabata bon na haltura di e dificultadnan di su discipelnan y cu e tabatin berdadero aprecio pa nan bida di integridad. (Revelacion 2:1–3:22) Corda cu e personanan ei cu Hesus a papia cu ne tabata cristiannan ungi cu tabatin e speransa di goberna hunto cu ne den shelo. Mescos cu nan Señor, nan tabata ser prepara pa e papel eleva di yuda extende​—cu gran compasion​—e beneficionan di Cristo su sacrificio di rescate na humanidad cu ta sufriendo.​—Revelacion 5:9, 10; 22:1-5.

19, 20. Con esnan cu ta forma e “multitud grandi” ta demostra nan aprecio na Jehova y su Yiu?

¹⁹ Claro cu Hesus su amor pa su siguidonan ungi ta ser extendi tambe na su “otro carnenan” fiel, di cua miyones ta forma awor e “multitud grandi . . . di tur nacion” cu lo sobrevivi e benidero “gran tribulacion.” (Juan 10:16; Revelacion 7:9, 14) E hendenan aki ta basha bin na e banda di Hesus pasobra nan ta aprecia su sacrificio di rescate y debi na nan speransa di bida eterno. Con nan ta demostra nan aprecio? Nan ta haci esei dor di “sirbi [Dios] di dia y anochi.”​—Revelacion 7:15-17.

²⁰ E raport mundial di e aña di sirbishi 2006, presenta na pagina 27 pa 30, ta mustra bon cla cu e ministernan fiel aki di berdad ta rindiendo Jehova ‘sirbishi sagrado di dia y anochi.’ De echo, durante e aña ei nan hunto cu e cuerpo relativamente chikito di e resto di cristiannan ungi a dedica un total di 1.333.966.199 ora na e ministerio publico. Esei ta ekivalente na hopi mas cu 150.000 aña!

Sigui Demostra Aprecio!

21, 22. (a) Dicon cristiannan mester tene hopi cuidou awe den e asunto di demostra aprecio? (b) Kico nos lo considera den e siguiente articulo?

²¹ Jehova cu su Yiu a demostra den nan trato cu hende imperfecto un aprecio profundo cu ta realmente abrumador. Pero lamentablemente, mayoria di hende no ta pensa masha riba Dios, y ta enfoca mas bien riba nan propio interesnan. Ora Pablo tabata duna un descripcion di e hendenan bibando den “e ultimo dianan”, el a skirbi: “Hende lo stima nan mes mas cu tur cos. Nan lo ta golos pa placa . . . y nan lo ta malagradecido.” (2 Timoteo 3:1-5, BPK) Ki un contraste e hendenan ei ta cu cristiannan berdadero, kende pa medio di oracion sincero, obediencia di buena gana y sirbishi di henter nan alma ta demostra nan aprecio pa tur loke Dios a haci pa nan!​—Salmo 62:8; Marco 12:30; 1 Juan 5:3.

²² Den e siguiente articulo, nos lo repasa algun di e tantisimo provisionnan spiritual cu Jehova amorosamente a extende na nos. Segun cu nos ta reflexiona riba e ‘bon regalonan’ aki, laga nos aprecio sigui crece mas ainda.​—Santiago 1:17.

Con Lo Bo Contesta?

• Con Jehova a demostra cu e ta un Dios apreciativo?

• Con nos por haci Jehova su curason contento ora nos ta nos so?

• Den ki maneranan Hesus a demostra aprecio?

• Con e echo cu Hesus a biba como hende a yud’e ser un gobernante compasivo y apreciativo?

[Preguntanan di Estudio]

[Plachi na pagina 17]

Mescos cu un mayor ta aprecia masha e expresion simpel di su yiu, Jehova tambe ta aprecia masha ora nos ta dun’e lo mihor