No Laga Bo Aprecio Stop di Crece Nunca
No Laga Bo Aprecio Stop di Crece Nunca
“Ki precioso bo pensamentonan ta pa mi, o Dios! Ki grandi nan cantidad ta!”—SALMO 139:17.
1, 2. Dicon nos lo mester aprecia e Palabra di Dios, y con e salmista a expresa su aprecio?
TABATA un hayasgo sensacional! Durante e trabounan di reparacion riba e tempel di Jehova na Jerusalem, sumo sacerdote Hilkias a haya ‘e buki di lei di Jehova, duna pa medio di Moises.’ Sin duda esei tabata e copia original skirbi un 800 aña prome! Bo por imagina con Rei Josias, un homber temeroso di Dios, a sinti ora nan a pone e buki su dilanti? Si, el a aprecia e buki masha y mesora el a laga Safan, e secretario of escriba, cuminsa les’e na bos halto.—2 Cronicanan 34:14-18.
2 Awe miles di miyones di hende por lesa e Palabra di Dios, sea completo of en parte. Pero esei acaso ta haci e Scritura menos valioso, menos importante? Claro cu no! Echo ta cu e ta contene e pensamentonan di e Todopoderoso, skirbi pa nos beneficio. (2 Timoteo 3:16) Salmista David a expresa su sintimentonan relaciona cu e Palabra di Dios skirbiendo: “Ki precioso bo pensamentonan ta pa mi, o Dios! Ki grandi nan cantidad ta!”—Salmo 139:17.
3. Kico ta mustra cu David tabata un homber cu un comprondemento profundo di su relacion cu Dios?
3 David su aprecio pa Jehova y pa Jehova su Palabra y areglonan di adoracion berdadero nunca a mengua. E tantisimo salmonan bunita cu David a compone a expresa con el a sinti. Por ehempel, na Salmo 27:4 el a skirbi: ‘Un cos mi a desea di Jehova, esei lo mi busca: cu mi por keda den e cas di Jehova tur e dianan di mi bida, pa contempla e bunitesa di Jehova, y pa medita den su tempel.’ Na e idioma Hebreo original e expresion “medita” ta nifica keda contempla, scudriña, wak cu placer, mira cu aprecio, delicia, admiracion. Ta bisto cu David tabata un homber cu un comprondemento profundo di su relacion cu Dios, kende realmente a aprecia tur loke Jehova a percura pa fortalece su fe y a saboria delaster un hap di berdad spiritual cu Dios a revela. Su ehempel di aprecio ta bale la pena pa imita.—Salmo 19:7-11.
Aprecia e Privilegio di Conoce e Berdad di Bijbel
4. Kico a pone Hesus “regociha grandemente den spirito santo”?
4 Pa hende haya comprondemento penetrante di e Palabra di Dios no ta depende di nan inteligencia ni di educacion mundano, cosnan cu tin e tendencia di fomenta orguyo. Esei ta depende mas bien di Jehova su bondad inmereci, cu e ta duna na hende humilde y di curason honrado cu ta conciente di nan necesidad spiritual. (Mateo 5:3, NW; 1 Juan 5:20) Ora Hesus a reflexiona riba e echo cu algun hende imperfecto a logra pa nan nomber wordo skirbi den shelo, el a “regociha grandemente den spirito santo, y a bisa: ‘Mi ta alaba bo, o Tata, Señor di shelo y Tera, cu bo a sconde e cosnan aki pa sabinan y inteligentenan y a revela nan na mucha chikito.’”—Lucas 10:17-21.
5. Dicon e discipelnan di Hesus no mester a mira e berdadnan di Reino revela na nan como cos di poco balor?
5 Despues di a expresa e oracion sincero ei, Hesus a bira bisa su discipelnan: “Bendiciona ta e wowonan cu ta mira e cosnan cu boso ta mira, pasobra mi ta bisa boso, cu hopi profeta y rei tabata desea di mira e cosnan cu boso ta mira, ma no a mira nan, y di tende e cosnan cu boso ta tende, ma no a tende nan.” Si, Hesus a anima su siguidonan fiel pa nan no mira e berdadnan precioso tocante e Reino cu tabata ser revela na nan como cos di poco balor. E berdadnan aki no a ser revela na e generacionnan anterior di sirbidornan di Dios, y sigur nan no a ser revela na e “sabinan y inteligentenan” den tempo di Hesus!—Lucas 10:23, 24.
6, 7. (a) Ki motibonan nos tin pa aprecia berdad divino? (b) Ki contraste nos ta mira awe entre religion berdadero y religion falso?
6 Den nos tempo, nos tin asta mas motibo pa aprecia berdad divino, pasobra mediante “e esclabo fiel y prudente”, Jehova a duna su pueblo asta mas comprondemento penetrante den su Palabra. (Mateo 24:45; Daniel 12:10) Profeta Daniel a skirbi tocante e tempo di fin: “Hopi hende lo core pariba pabou, y conocemento lo aumenta.” (Daniel 12:4) Bo no ta di acuerdo cu den nos tempo e conocemento di Dios a “aumenta” y cu e sirbidornan di Jehova ta bon alimenta den sentido spiritual?
7 Nos ta mira un contraste grandi entre e abundancia di conocemento cu e pueblo di Dios tin tocante Jehova y su proposito y e confusion religioso cu ta reina den Babilonia e Grandi! Como resultado, hopi hende cu ta decepciona of desgusta cu religion falso ta acudiendo na adoracion berdadero. Nan ta hende semehante di carne cu ‘no kier participa den e picanan di Babilonia e Grandi’ ni “ricibi di su plaganan.” Jehova y su sirbidornan ta invita tur e hendenan ei pa bin den e berdadero congregacion cristian.—Revelacion 18:2-4; 22:17.
Hende Apreciativo Ta Basha Bin Cerca Dios
8, 9. Con e palabranan di Hageo 2:7 ta cumpliendo awe?
8 Jehova a profetisa tocante su cas spiritual di adoracion: “Lo mi sacudi tur e nacionnan, y e cosnan deseabel di tur e nacionnan tin cu drenta paden; y lo mi yena e cas aki cu gloria.” (Hageo 2:7, NW) E profesia asombroso aki tabatin un cumplimento den e tempo di Hageo ora cu un resto di e pueblo di Dios cu a regresa nan pais a reconstrui e tempel na Jerusalem. Awe, e palabranan di Hageo tin un cumplimento adicional relaciona cu Jehova su gran tempel spiritual.
9 Miyones di hende a basha bai caba na e tempel figurativo pa adora Dios cu “spirito y berdad”, y tur aña mas cu 200.000 hende, describi como “e cosnan deseabel di tur e nacionnan” ta sigui drenta. (Juan 4:23, 24) Por ehempel, e raport mundial di e aña di sirbishi 2006 ta mustra cu 248.327 persona a batisa como simbolo di nan dedicacion na Jehova. Esei ta representa un promedio di 680 hende nobo pa dia! Nan amor pa e berdad y nan deseo di sirbi Jehova como proclamado di Reino ta duna prueba cu di berdad ta Dios a hala nan.—Juan 6:44, 65.
10, 11. Conta un experencia cu ta mustra con hende a haya aprecio pa e berdad di Bijbel.
10 Loke a atrae hopi di e hendenan di curason honrado aki na e berdad ta cu nan por a ‘distingui entre e husto y e malbado, entre un cu ta sirbi Dios y un cu no ta sirbie.’ (Malakias 3:18) Considera e experencia di Wayne cu Virginia, un pareha casa cu tabata miembro di un religion protestant pero cu tabatin hopi pregunta tocante religion pa cua nan no a haya contesta satisfactorio. Nan a odia guera y a keda confundi y hopi molestia ora nan a mira pastornan ta bendiciona solda y arma. Segun cu e pareha su edad a subi, nan a sinti cu e otro miembronan di iglesia a neglisha nan, a pesar cu pa varios aña Virginia a duna les na zondagsschool. Nan a bisa: “Ningun hende no tabata busca nos drechi ni mustra interes den nos bienestar spiritual. Unico cos cu e iglesia tabata kier ta nos placa. Nos a sinti nos desilusiona.” Nan a sinti nan asta mas desilusiona ainda ora cu nan iglesia a tuma un posicion permisivo den e asunto di homosexualidad.
11 Mientrastanto, e nieta di Wayne cu Virginia y despues nan yiu muher a bira Testigo di Jehova. Aunke cu Wayne cu Virginia na prome instante no tabata contento cu esei, nan a cambia di opinion despues y a acepta un estudio di Bijbel. Wayne a conta: “Den apenas tres luna, nos a siña mas tocante Bijbel compara cu loke nos a siña e 70 añanan prome! Nunca nos no tabata sa cu e nomber di Dios ta Jehova, y nos no tabata sa nada tocante e Reino y e Paradijs riba Tera.” Poco despues, e pareha sincero aki a cuminsa asisti na reunionnan cristian y participa den e ministerio. Virginia a bisa: “Nos kier conta tur hende tocante e berdad.” Ambos tin 80 y pico aña, y nan a batisa na 2005. Nan a bisa: “Nos a haya un grupo di cristian berdadero caminda nos ta sinti nos na cas.”
Aprecia Cu “Nos Ta Ekipa pa Tur Bon Obra”
12. Kico Jehova semper ta percura pa su sirbidornan, y kico nos tin cu haci pa beneficia di esei?
12 Jehova semper a yuda su sirbidornan haci su boluntad. Noe, por ehempel, a haya instruccionnan bon cla y specifico pa traha e arca, un proyecto cu mester a sali bon den un solo biaha! Anto asina a sosode. Con bin? Pasobra Noe a haci “conforme tur loke Dios a orden’e.” (Genesis 6:14-22) Awe tambe Jehova ta ekipa su sirbidornan completamente pa haci su boluntad. Claro cu nos trabou principal ta di predica e bon nobo di e Reino di Dios estableci y yuda hende merecedor bira discipel di Hesucristo. Anto mescos cu den e caso di Noe, nos exito ta depende di obediencia. Obedientemente nos mester sigui e guia cu Jehova ta percura mediante su Palabra y su organisacion.—Mateo 24:14; 28:19, 20.
13. Mediante kico Jehova ta entrena nos?
13 Pa nos por cumpli cu e trabou ei, nos mester siña maneha nos herment principal—e Palabra di Dios—“na un manera corecto.” E Scritura ta “util pa siñansa, pa reprendemento, pa coreccion, pa educa den husticia, pa e hende di Dios por ta perfecto [“plenamente competente”, NW], ekipa pa tur bon obra.” (2 Timoteo 2:15; 3:16, 17) Mescos cu den prome siglo, Jehova ta duna nos entrenamento valioso mediante e congregacion cristian. Awe, den e 99.770 congregacionnan cu tin rond mundo ta tene tur siman e Scol di Ministerio Teocratico y e Reunion di Sirbishi pa yuda nos den e ministerio. Bo ta demostra bo aprecio pa e reunionnan importante aki dor di asisti na nan cu regularidad y aplica e cosnan cu bo ta siña?—Hebreonan 10:24, 25.
14. Con e sirbidornan di Jehova ta demostra nan aprecio pa e privilegio di sirbi Dios? (Inclui comentario basa riba e raport na pagina 27-30.)
14 Rond mundo, miyones di hende di e pueblo di Dios ta demostra nan aprecio pa e entrenamento cu nan ta haya dor di traha duro den e ministerio. Por ehempel, durante e aña di sirbishi 2006, un total di 6.741.444 publicador di Reino a dedica 1.333.966.199 ora den tur rasgo di e trabou, locual a inclui cu nan a conduci 6.286.618 estudio di Bijbel na cas. Esakinan ta apenas algun di e detayenan animador cu ta bin dilanti den e raport mundial. Nos ta invita bo pa analisa e raport aki y saca animacion for di dje, mescos cu sin duda nos rumannan di prome siglo a saca hopi animacion for di informenan tocante e expansion di e trabou di predica den nan tempo.—Echonan 1:15; 2:5-11, 41, 47; 4:4; 6:7.
15. Dicon ningun cristian no mester sinti su mes desanima cu e sirbishi di henter alma cu e ta rindi na Jehova?
15 E tremendo grito di alabansa cu tur aña ta subi na Dios, ta refleha e aprecio profundo cu e sirbidornan di Jehova tin pa e privilegio di por conoce Jehova y duna testimonio di dje. (Isaias 43:10) Ta berdad cu e sacrificio di alabansa cu algun di nos rumannan di edad of enfermo ta ofrece por ser compara cu e dos placa di e viuda. Pero laga nos no lubida cu Jehova cu su Yiu realmente ta aprecia tur hende cu ta sirbi Dios di henter alma, segun cu nan ta haci tur loke cu nan por.—Lucas 21:1-4; Galationan 6:4.
16. Cua ta algun herment cu Dios a percura ultimo tempo pa siña hende?
16 Fuera di entrena nos pa e ministerio, Jehova ta ekipa nos, mediante su organisacion, cu hermentnan excelente pa siña hende. Den decadanan recien, e hermentnan aki a inclui e bukinan E berdad cu ta hiba na bida eterna, Bo por biba pa semper den Paradijs riba tera, Conocimentu cu Ta Hiba na Bida Eterno y actualmente, Kico Bijbel Ta Siña Realmente? E rumannan cu realmente ta aprecia e provisionnan aki ta haci bon uzo di nan den e ministerio.
Haci Bon Uzo di e Buki Bijbel Ta Siña
17, 18. (a) Ki partinan di e buki Bijbel Ta Siña bo ta gusta trece dilanti den bo ministerio? (b) Kico un superintendente di circuito a comenta tocante e buki Bijbel Ta Siña?
17 E buki Kico Bijbel Ta Siña Realmente? ta resultando un bendicion den e ministerio cu su 19 capitulonan, su apendix detaya y su lenguahe simpel y cla. Por ehempel, capitulo 12 ta trata e topico “Biba na un Manera Cu Ta Agrada Dios.” E informacion aki ta splica e studiante con e por bira un amigo di Dios, algo cu hopi hende nunca no a ni pensa ariba, corda pa nan kere cu ta posibel. (Santiago 2:23) Con hende ta reaccionando riba e buki aki pa studia Bijbel?
18 Un superintendente di circuito na Australia ta informa cu e buki Bijbel Ta Siña tin un “atraccion instantaneo cu masha lihe ta hinca doñonan di cas den un combersacion.” El a agrega cu e buki ta asina facil pa uza cu el a “duna hopi publicador di Reino confiansa y goso atrobe den e ministerio. Nada straño cu tin di nan ta yama e buki e Clompi di Oro!”
19-21. Conta algun experencia cu ta enfatisa e balor di e buki Bijbel Ta Siña.
19 Na Guyana, un señora a bisa e pionero cu a bin na su porta: “Dios mester a manda bo.” E señora su compañero di bida poco tempo prome a bai laga e y nan dos yiunan chikito. E pionero a habri e buki Bijbel Ta Siña na capitulo 1 y na bos halto a lesa paragraf 11, bou di e subtema “Kico Dios Ta Pensa di e Inhusticianan Cu Nos Ta Confronta?” E pionero a conta: “E puntonan a conmove e señora profundamente. De echo, e mester a lanta bai patras den su tienda pa e por a dal un bon yora.” E señora aki a acepta e oferta di un estudio di Bijbel regular cu un ruman muher local y ta sigui haci progreso.
20 José, kende ta biba na Spaña, a perde su casa den un accidente di trafico. El a busca consuelo den droga, y tambe el a obtene yudansa profesional. Sinembargo, e psicologonan no por a contesta e pregunta cu mas a molestia José: “Dicon Dios a laga mi casa muri?” Un dia José a topa Francesc, kende ta traha pa e mesun compania cu ne. Francesc a sugeri pa nan considera capitulo 11 di e buki Bijbel Ta Siña, titula “Dicon Dios Ta Permiti Sufrimento?” E splicacion biblico y e ilustracion di un maestro y un alumno a impresiona José profundamente. El a cuminsa studia seriamente y a asisti na un asamblea di circuito. Awor e ta asisti na e reunionnan na e Salon di Reino local.
21 Roman, un comerciante di 40 aña na Polonia, semper tabatin respet pa e Palabra di Dios. Pero como cu e tabata hopi ocupa cu su trabou, el a progresa te na cierto grado den su estudio di Bijbel. Sinembargo, el a asisti na un congreso di districto y a haya un ehemplar di e buki Bijbel Ta Siña. Despues di esei, el a progresa considerablemente. El a bisa: “Cu e buki aki, tabata manera cos cu tur e siñansanan basico di Bijbel a bini hunto y forma un cuadro completo, manera un puzzel.” Awor Roman ta studia Bijbel cu regularidad y ta haciendo bon progreso.
Sigui Crece den Aprecio
22, 23. Con nos por sigui demostra aprecio pa e speransa cu tin poni nos dilanti?
22 Manera a keda splica na e Congresonan di Districto emocionante, “Liberacion Ta Cerca!”, cristiannan berdadero ta anhela e liberacion of “redencion eterno” cu Dios a priminti y cu e sanger drama di Hesucristo a haci posibel. E mihor manera pa demostra nos aprecio sincero pa e speransa precioso aki ta dor di sigui purifica nos mes di “obranan morto pa sirbi e Dios bibo.”—Hebreonan 9:12, 14.
23 Si, ta realmente un milager cu mas cu seis miyon proclamado di Reino ta persevera fielmente den e sirbishi di Dios den un tempo cu e presion pa sirbi bo mes ta mas fuerte cu nunca. Esei ta prueba tambe cu e sirbidornan di Jehova ta aprecia profundamente e honor di por sirbi Dios, sabiendo cu nan “trabou no ta en vano den Señor.” No laga e aprecio ei stop di crece nunca!—1 Corintionan 15:58; Salmo 110:3.
Con Lo Bo Contesta?
• Kico e salmista ta siña nos tocante aprecio pa Dios y pa su provisionnan spiritual?
• Con e palabranan na Hageo 2:7 ta cumpliendo awe?
• Con Jehova a ekipa su sirbidornan pa sirbie mas efectivamente?
• Kico bo por haci pa demostra aprecio pa Jehova su bondad?
[Preguntanan di Estudio]
[Tabel na pagina 27-30]
RAPORT DI AÑA DI SIRBISHI 2006 DI TESTIGONAN DI JEHOVA MUNDIALMENTE
(Wak volumen)
[Plachi na pagina 25]
Jehova ta ekipa nos completamente pa haci su boluntad