Pakico Papia Berdad?

TEMPO cu Manfred tabatin 18 aña, e tabata haya entrenamento den trabounan di oficina. * E compania caminda e tabata traha a haci areglo pa e y varios otro empleado cu tabata den training bai un scol di preparacion pa un profesion dos dia pa siman. Un dia nan a laga e klas bai mas tempran cu tabata programa. Segun e reglanan di e compania, e empleadonan mester a bai traha bek e resto di dia. Pero en bes di esei, nan tur a tuma liber pa recrea. Ta Manfred so a bai trabou bek. Pa casualidad e supervisor encarga cu e trahadonan den training a pasa. Ora el a mira Manfred, el a puntr’e: “Dicon bo no a bai scol awe? Y unda e otronan ta?” Kico Manfred mester a contesta?

Manfred a hay’e den un situacion dificil cu hopi bes sa surgi. E mester papia berdad, of e mester tapa cos pa su compañeronan di klas? Si e bisa berdad, esei lo trece problema pa e otronan y e ta bira impopular. Ta corecto pa gaña bou di e circunstancianan ei? Kico abo lo a haci? Nos lo bini bek riba e caso di Manfred. Pero laga nos considera prome ki factornan nos tin cu tene cuenta cu ne ora nos tin cu dicidi si nos ta papia berdad of no.

Berdad y Mentira​—Un Rivalidad Fundamental

Na comienso di historia humano, tur cos tabata basa riba berdad. No tabatin trocemento di echonan, ni manipulacion of falsificacion di loke ta berdad. Jehova, e Creador, ta e “Dios di berdad.” Su palabra ta e berdad; e no por gaña, y ta condena gañamento y esnan cu ta saca mentira.​—Salmo 31:5, BPK; Juan 17:17; Tito 1:2.

Siendo cu esei ta asina, con mentira a cuminsa? Hesucristo a duna e contesta confiabel ora el a bisa su opositornan religioso cu tabata busc’e pa mata: “Boso ta di boso tata e Diabel, y boso kier haci e deseonan di boso tata. E tabata un matado for di principio, y no ta para den e berdad, pasobra no tin berdad den dje. Ki ora cu e papia un mentira, e ta papia for di su mes naturalesa, pasobra e ta un gañado y e tata di mentira.” (Juan 8:44) Ta bisto  cu Hesus tabata referiendo na e suceso cu a tuma luga den e hardin di Eden ora Satanas a persuadi e prome pareha humano pa nan desobedece Dios y asina bira victima di pica y morto.​—Genesis 3:1-5; Romanonan 5:12.

Hesus su palabranan ta identifica Satanas claramente como “e tata di mentira”, e fuente di gañamento y mentira. Te awe Satanas ta e promotor principal di mentira y, de echo, e ta “gaña henter mundo.” E ta e culpabel principal pa e daño cu e practica di gañamento​—cu ta plama tur caminda​—a causa hende awe.​—Revelacion 12:9.

Ta Satanas e Diabel a cuminsa cu e rivalidad fundamental entre berdad y mentira cu ta reina te awe. E ta penetra den tur nivel di sociedad humano y e ta afecta tur hende. E manera cu un hende ta biba ta indica na cua banda e ta para. Esnan cu ta na e banda di Dios ta biba segun e berdad di Bijbel, e Palabra di Dios. Ken cu no ta sigui e caminda di e berdad ta cai, conciente- of inconcientemente, den man di Satanas pasobra “henter mundo ta bou di control di e malbado.”​—1 Juan 5:19; Mateo 7:13, 14.

Dicon Hende Tin Tendencia di Gaña?

E echo cu “henter mundo” ta bou di control di Satanas ta yuda nos compronde dicon asina tanto hende ta gaña. Pero kisas bo ta puntra: Dicon Satanas, “e tata di mentira”, a gaña? Satanas tabata sa cu Jehova ta e Soberano legitimo di tur loke El a crea, incluso e prome pareha humano. Pero Satanas a desea e posicion eleva y unico aki, algo cu e no tabatin derecho riba dje. Golosidad y ambicion egoista a pon’e bin cu e plan malicioso pa kita Jehova su puesto. Pa logra esaki, Satanas a recori na mentira y engaño.​—1 Timoteo 3:6.

Kico di awe? Bo no ta di acuerdo cu loke ta impulsa hende pa gaña ta net e golosidad y ambicion egoista aki? Comerciantenan golos, politiconan corupto y religion falso ta pesta cu engaño, mentira, manipulacion y fraude. Dicon? No ta asina cu hopi bes ta golosidad y ambicion ta motiva hende pa bai dilanti of obtene rikesa, poder of un posicion cu nan no tin derecho riba dje? Un gobernante sabi, Rei Salomon di Israel di pasado, a spierta: “Esun cu ta pura pa bira rico lo no keda sin castigo.” (Proverbionan 28:20) Y apostel Pablo a skirbi: “Amor pa placa ta raiz di tur sorto di maldad.” (1 Timoteo 6:10) Cu tur siguransa nos por bisa mescos di e deseo irasonabel pa poder of posicion.

Un otro factor tras di gañamento ta miedo​—miedo di e consecuencianan of di loke otro hende kisas lo pensa si bo papia berdad. Ta masha normal cu hende ta desea pa otronan gusta nan of acepta nan. Sinembargo, e deseo aki por motiva nan pa troce loke ta berdad, aunke ta djis un tiki, pa nan por tapa fayo, sconde detayenan desfaborabel of simplemente pa duna un bon impresion. Corectamente, Salomon a skirbi: “Temor pa hende ta pone un trampa, ma esun cu confia den SEÑOR lo ta halsa.”​—Proverbionan 29:25.

Lealtad na e Dios di Berdad

Kico Manfred a bisa ora e ehecutivo di e compania a pidie un splicacion? Manfred a papia berdad. El a bisa: “E maestro a laga nos bai mas tempran awe, p’esei mi a bin traha. Pa loke ta e otronan, mi no por papia pa nan. Kisas Meneer por puntra nan personalmente.”

Manfred por a duna un contesta sabi y engañoso y asina bira popular cerca e otro personanan den training. Pero e tabatin bon motibo pa pega lealmente na loke ta berdad. Manfred ta Testigo di Jehova. Su honestidad a lag’e keda cu un consenshi limpi. Esaki a  pone tambe cu el a gana e confiansa di su doño di trabou. Como parti di Manfred su training nan a mand’e bai traha den e departamento di hoya caminda normalmente nan no sa permiti personanan den training traha. Mas o menos 15 aña despues ora Manfred a ser promovi na un puesto di responsabilidad den e compania, e mesun ehecutivo aki a bel Manfred pa felicit’e y a cord’e con el a papia berdad durante e incidente aki.

Jehova ta e Dios di berdad, pues ken cu kier tin un relacion estrecho cu ne mester ‘pone mentira un banda’ y “papia berdad.” Un sirbidor di Dios mester stima berdad. E homber sabi a skirbi: “Un testigo fiel no ta gaña.” Pero kico ta un mentira?​—Efesionan 4:25; Proverbionan 14:5.

Kico Ta un Mentira?

Ki ora cu bo gaña bo no a papia berdad, pero no ta tur biaha cu bo no papia berdad bo a gaña. Dicon no? Un diccionario ta defini mentira como un declaracion cu un persona ta haci pa gaña un otro hende, aunke e sa of ta kere cu loke e ta bisa no ta berdad. Si, sacamento di mentira ta bai acompaña cu e intencion di gaña un persona. P’esei, bisa algo cu no ta berdad inconcientemente​—manera por ehempel, duna un persona datonan of cifranan incorecto sin cu esei tabata e intencion​—no ta mescos cu saca mentira.

Ademas, nos tin cu wak tambe si e persona cu ta pidi informacion tin derecho di ricibi un contesta completo. Por ehempel, supone cu ta un ehecutivo di un otro compania a haci Manfred e mesun preguntanan. Manfred lo tabatin e obligacion di cont’e tur cos? En realidad, no. Siendo cu e ehecutivo no tabatin derecho di haya e informacion ei, Manfred lo no tabatin e obligacion di dun’e tampoco. Claro cu asta den e caso aki lo no tabata bon pa e gaña.

Ki ehempel Hesucristo a pone den e aspecto aki? Na un ocasion Hesus tabata papia cu algun persona cu no tabata su discipel pero cu a mustra interes den su plannan di biahe. Nan a conseh’e: “Sali for di akinan y bai Judea.” Kico Hesus a contesta? “Boso bai e fiesta [na Jerusalem] numa; Ami no ta bai e fiesta aki ainda, pasobra mi tempo no ta cumpli ainda.” Un poco despues, Hesus a biaha bai Jerusalem pa e fiesta. Dicon el a contesta nan asina? Nan no tabatin derecho di sa detayenan exacto di su paradero. Pues aunke Hesus no a gaña, e no a duna nan un contesta completo. Asina el a limita e posibel daño cu nan por a causa su discipelnan. Esaki no tabata un mentira pasobra apostel Pedro a skirbi relaciona cu Cristo: “[E] no a comete pica, ni mentira no a wordo haya den su boca.”​—Juan 7:1-13; 1 Pedro 2:22.

Kico di Pedro mes? No ta gaña el a gaña ora cu tres biaha el a nenga cu e tabata conoce  Hesus, e anochi cu nan a aresta Hesus? Si, Pedro a sucumbi na miedo di hende y a gaña. Pero mesora el “a yora amargamente”, el a arepenti y a haya pordon. Ademas, el a siña di su eror. Algun dia despues, el a papia publicamente tocante Hesus y el a nenga redondamente di stop ora autoridadnan Hudiu na Jerusalem a menas’e. Sin duda, Pedro su caida y recuperacion rapido mester ta un animacion pa nos tur, cu facilmente por haya nos den un momento di debilidad y asina trompica cu palabra of echo.​—Mateo 26:69-75; Echonan 4:18-20; 5:27-32; Santiago 3:2.

Berdad Lo Ta Estableci pa Semper

Proverbionan 12:19 ta splica: “Lipnan cu ta papia berdad lo ta estableci pa semper, ma un lenga mentiroso ta pa un momento so.” Si, palabra berdadero ta keda pa semper. Relacionnan entre hende ta bira mas stabil y ta duna satisfaccion ora hende ta determina pa papia berdad y actua na harmonia cu ne. Definitivamente, ora un persona ta papia berdad e ta haya recompensa mesora. Esakinan ta entre otro un consenshi limpi, un bon reputacion, relacion fuerte den matrimonio, den famia, entre amigonan y asta den negoshi.

Di otro banda, mentira no ta keda scondi, cu tempo e ta sali na cla. Un lenga cu ta saca mentira por gaña hende pa un rato, pero su mentira no ta keda scondi pa hopi tempo. Fuera di esei, Jehova, e Dios di berdad, a fiha un limite di tempo cu e ta tolera mentira y esnan cu ta promove mentira. Bijbel ta priminti cu Jehova lo elimina e influencia di Satanas e Diabel, e tata di mentira, kende ta gañando henter e Tera habita. Pronto Jehova lo caba cu tur mentira y gañado.​—Revelacion 21:8.

Lo ta ki un alivio ora cu porfin e “lipnan cu ta papia berdad” keda estableci pa semper!

[Nota]

[Comentario na pagina 5]

Golosidad y ambicion egoista ta loke ta motiva hopi hende pa gaña

[Comentario na pagina 6]

Ki ora cu bo gaña bo no a papia berdad, pero no ta tur biaha cu bo no papia berdad bo a gaña

[Plachi na pagina 6]

Kico nos ta siña di e echo cu Pedro a nenga Cristo?

[Plachi na pagina 7]

Papiamento di berdad ta resulta den relacionnan stabil y ta duna satisfaccion