Pregunta di Lector

Kico ta “e guera di . . . Dios Todopoderoso” na Armagedon, y kico lo ta su resultado?​—Revelacion 16:14, 16.

Cu poco palabra, e guera di Armagedon ta e futuro bataya mundial den cua e Rei nombra di Jehova, Hesucristo, lo destrui e enemigonan di Dios. Bijbel ta splica cu e enemigonan aki, “e reinan di henter mundo”, ta ser mobilisa dor di “spiritonan [of “expresionnan inspira”, NW] di demoñonan” y ta ser reuni “pa e guera di e gran dia di Dios Todopoderoso . . . na e luga cu na lenga Hebreo yama Armagedon.”​—Revelacion 16:14, 16.

E luga caminda e partidonan den guera lo reuni no ta uno literal. E nomber Armagedon ta nifica “Sero di Meguido.” (Revelacion 16:16) Nunca tabatin un sero cu e nomber ei. Ademas, “e reinan di Tera y nan ehersitonan” no por reuni literalmente na un solo luga. (Revelacion 19:19) Mas bien, “e luga” ta referi na e condicion of situacion den cua e gobernantenan politico di Tera y nan apoyadonan ta ser guia, esta, un situacion di oposicion contra Jehova y “e ehersitonan cu ta den shelo” bou di e comando militar di e “Rei di reinan y Señor di señornan”, Hesucristo.​—Revelacion 19:14, 16.

Ta interesante pa nota cu e expresion “Armagedon” tin conexion cu Meguido, un stad di Israel di antiguedad. Meguido tabata situa strategicamente oost di Sero di Carmelo y tabata domina e principal rutanan comercial y militar di e tempo ei. E tabata tambe e sitio di batayanan decisivo. Por ehempel, ta “banda di e awanan di Meguido” hues Barak di Israel a derota un poderoso ehersito Cananeo bou di mando di general Sisara. (Huesnan 4:12-24; 5:19, 20) Den e mesun bisindario ei hues Gideon a caba cu e Madianitanan. (Huesnan 7:1-22) Dor di conecta Meguido cu e guera benidero, Bijbel ta sigura nos cu Dios, pa medio di su Yiu, lo derota tur ehersito opositor completamente.

Kico lo ta e resultado? E guera di Armagedon lo elimina tur corupcion y maldad for di riba Tera. Lo e habri caminda pa e era di mas glorioso den henter historia humano. (Revelacion 21:1-4) Bou di supervision amoroso di e Reino di Dios, Tera lo ser transforma den un paradijs den cua husticia lo biba pa semper.​—Salmo 37:29.