Ta Otro Hende So Mester Papia Berdad?

“MI TA odia mentira, y mi ta haya masha rabia ora hende gaña mi!” un mucha muher di 16 aña a declara. Mayoria di nos ta sinti mescos. Nos kier sinti cu e informacion cu otronan ta duna nos​—sea verbalmente of por escrito​—ta veridico. Pero nos mes ta papia berdad ora nos ta duna otro hende informacion?

Den un encuesta cu nan a haci na Alemania, e gran mayoria di e personanan cu a reacciona tabata pensa cu “mentiranan chikito pa proteha bo mes of pa proteha otro hende ta aceptabel, si, asta necesario pa bo por keda bon cu otro hende.” Y un periodista a skirbi: “E meta pa semper papia solamente berdad ta uno noble, pero laf.”

Acaso nos ta gusta pa otro hende papia berdad, mientras cu nos mes ta haya cu de bes en cuando nos si tin motibo valido pa no papia berdad? Ta importa si nos ta papia berdad of no? Kico ta e consecuencianan si un persona no ta papia berdad?

Daño Cu Mentira Ta Causa

Pensa riba e daño cu mentira por haci. Mentira ta lanta desconfiansa entre parehanan casa y entre miembronan di famia. Redo sin base por daña un persona su reputacion. Ladronicia cu empleadonan ta comete ta aumenta gastonan di un empresa y ta pone cu e productonan ta bira mas caro. Datonan fraudulento riba formularionan di belasting ta stroba gobierno di haya entradanan cu ta necesario pa percura servicio publico. Investigadonan cu ta troce e berdad ta ruina nan careranan prometedor y ta daña reputacion di institutonan respeta. Proyectonan deshonesto pa bira rico lihe ta ranca placa cu inversionistanan inocente a spar henter nan bida of ta haci piyo cu esei. Pues, no ta nada straño cu Bijbel ta bisa nos cu entre e cosnan cu Jehova Dios ta odia tin “un lenga mentiroso” y “un testigo falso cu ta papia mentira”!​—Proverbionan 6:16-19.

Gañamento na gran escala por perhudica tanto hende individual como un comunidad completo. Casi tur hende ta di acuerdo cu esei. Pero, siendo cu esei ta asina, dicon hende ta gaña deliberadamente? Y ta tur loke no ta berdad ta mentira? E siguiente articulo lo contesta e preguntanan aki y tambe otronan.

[Plachi na pagina 3]

Mentira ta lanta desconfiansa entre parehanan casa