Edificacion Spiritual na e “Cas di Piedra”

E nomber di e pais Africano aki ta nifica “Cas di Piedra.” E ta un pais cu ta bon conoci pa e Waterval di Victoria y pa e variedad di bida cu e tin den naturalesa. Sinembargo, e tin e edificionan di piedra di mas grandi y mas bieu cu hende a traha zuid di Sahara. Tin un plateau di granit ta crusa net meimei di e pais. E clima ni mucho friu ni mucho cayente cu tin riba e plateau ei ta produci un paisahe fertil y berde. E pais aki ta Zimbabwe, e hogar di 12 miyon hende.

DICON e tin e nomber Cas di Piedra? Na aña 1867 e explorado y yagdo, Adam Renders, a topa structuranan grandi di piedra plama riba un area di 720 hectar. Renders tabata biahando tur rond den e sabananan Africano, caminda casnan por lo general tabata traha di lodo cu bara y dak di yerba. Anto diripiente el a topa e ruinanan di piedra di un stad inmenso, cu awor tin e nomber di Gran Zimbabwe.

E ruinanan aki ta situa djis zuid di e area conoci awe como Masvingo. Algun di e murayanan ta mas cu nuebe meter halto, y ta di piedra di granit poni riba otro sin cement. Paden di e ruinanan tin un toren straño, forma di cone, cu un haltura di 11 meter, traha riba un base cu tin un diameter di seis meter. Te ainda nan no sa ta kico tabata e proposito exacto di e toren aki. E ruinanan ta data for di siglo 8 di nos era, pero tin evidencia cu e sitio tabata habita pa cientos di aña prome cu esei.

 Na aña 1980, e pais aki conoci e tempo ei como Rodesia a bira independiente di Gran Bretania y a cambia su nomber pa Zimbabwe. Su habitantenan ta consisti di dos grupo etnico principal, un ta Shona, cu ta forma e parti mas grandi di e poblacion, y e otro ta Ndebele. E hendenan ta hospitalario, locual Testigonan di Jehova a ripara hopi bes den nan trabou di predica e bon nobo di cas pa cas. Tin biaha ora un bishitante bati na porta e ta tende mesora e invitacion pa “Pasa paden” y “Por fabor, cai sinta”, asta prome cu e doñonan di cas sa ta ken e bishitante ta. Mayoria di hende di Zimbabwe tin un respet profundo pa Bijbel y hopi biaha nan ta insisti pa nan yiunan cai sinta y scucha combersacionnan biblico.

Ofreciendo un Mensahe Edificante di Consuelo

Ora medionan di comunicacion ta papia di Zimbabwe, cu frecuencia e palabranan “AIDS” y “secura” ta bin dilanti. E grado cu AIDS a plama tabatin un efecto serio riba poblacion y economia di paisnan Africano cu ta keda zuid di Sahara. Akinan, hopi biaha e motibo pakico hende ta keda interna den hospital ta debi na HIV. E malesa ei a caba cu e bida di famia di hopi hende.

Pa yuda hende na Zimbabwe, Testigonan di Jehova ta druk bezig ta proclama cu e mihor estilo di bida ta esun guia pa e normanan di Dios describi den Bijbel. Por ehempel, e Palabra di Dios ta siña nos cu ta solamente hende casa cu otro tin mag di disfruta di e regalo divino di intimidad sexual, cu homosexualidad ta inaceptabel pa Dios y cu e lei di Jehova ta prohibi transfusion di sanger y uzo di droga. (Echonan 15:28, 29; Romanonan 1:24-27; 1 Corintionan 7:2-5; 2 Corintionan 7:1) Ademas, e Testigonan ta publicando un mensahe di speransa bon funda, enfatisando cu den futuro cercano e Reino di Dios lo elimina tur malesa.​—Isaias 33:24.

Percurando Yudansa di Ausilio

Secura tabatin un efecto devastador riba Zimbabwe durante e ultimo decada. Bestianan salbahe a muri di hamber y sed. Cientos di miles di baca a muri. Candela a destrui masha hopi hectar di selva di palo pa uza den construccion. Hopi mucha y hende di edad a muri di desnutricion. Asta e awanan di e poderoso Riu Zambezi a baha na nivelnan cu a menasa e funcionamento di plantanan di coriente hidroelectrico.

Pa por trata cu tal devastacion, Testigonan di Jehova a establece ocho comite di ausilio den varios parti di e pais. Superintendentenan biahero a bishita e congregacionnan pa evalua nan necesidad y a pasa e informacion aki pa e comite apropia di ausilio. Un superintendente biahero a informa: “Durante e ultimo cinco añanan, nos a distribui mas di mil tonelada di maishi, dies tonelada di pisca seco y e mesun cantidad di bonchi. Nos rumannan spiritual a procesa dos tonelada di mufushwa [berdura seco]. Nos a distribui tambe cantidadnan grandi di paña cu a ser duna y tambe fondonan necesario.” Un otro superintendente biahero a remarca: “Ora mi reflexiona riba e dificultadnan cu nos a confronta pa obtene e permitnan cu Zimbabwe y Sur Africa ta rekeri pa por drenta cu e suministronan aki y e scarsedad di combustibel cu semper tin pa transporta e articulonan aki di alivio tan necesario, mi por conclui unicamente cu nos exito ta comproba un biaha mas e garantia cu Hesus a duna cu nos Tata celestial sa cu nos tin mester di tur e cosnan aki.”​—Mateo 6:32.

 Con superintendentenan biahero mes ta haci ora cu nan ta traha den areanan asota pa secura? Tin di nan ta biaha cu cuminda pa nan mes y pa e famianan caminda nan ta keda. Un di nan a conta con algun ruman muher cristian un biaha tabata debati si nan lo mester a stop di predica pa e dia ei pa nan bai para den fila pa haya e yudansa gubernamental cu nan a anticipa. Nan a dicidi di confia den Jehova dor di enfoca riba e actividad di predica y wak con cos lo bai. E dia ei ningun yudansa gubernamental no a yega.

E siguiente dia tabatin un reunion cristian programa, y e ruman muhernan aki atrobe tabatin cu tuma un decision. Kico nan lo haci? Bai reunion of bai para warda yegada di e yudansa gubernamental? Poniendo e cos corecto na prome luga, nan a asisti na e reunion na Salon di Reino. (Mateo 6:33) Mientras cu nan tabata canta e cantica final, nan a tende un truck core yega. Yudansa a core yega ei na porta di salon mediante nan rumannan spiritual di e comite di ausilio! E goso y gratitud di e Testigonan fiel presente na e reunion ei tabata abrumador.

Amor Ta Edifica

Actonan di bondad demostra na hende pafo di e congregacion cristian a habri varios caminda pa duna un bon testimonio. Un superintendente biahero den e area di Masvingo, hunto cu algun Testigo local, tabata predicando e bon nobo. El a mira un mucha muher drumi abou canto di caminda. E Testigonan a realisa cu e mucha tabata hopi malo, ya cu e no por a papia bon y su stem tabata tembla. E mucha muher su nomber tabata Hamunyari, cu na idioma Shona ta nifica “Bo No Tin Berguensa?” E rumannan a bin compronde cu ta e miembronan di su iglesia cu tabata rumbo pa un sirbishi religioso den sero, a bai lag’e canto di caminda. E Testigonan amorosamente a yud’e y a hib’e na un pueblito den bisindario.

Den e pueblito ei tabatin algun hende cu conoce Hamunyari, y nan a pidi su famia pa bin busc’e. E habitantenan di e pueblito a bisa di e Testigonan: “Esaki ta e religion berdadero. Esaki ta e amor cu cristiannan mester mustra.” (Juan 13:35) Prome cu e rumannan a bai, nan a duna Hamunyari e tratado Lo Bo Kier Sa Mas Tocante Bijbel? *

E siguiente siman e superintendente biahero a sirbi e congregacion den e area caminda Hamunyari tabata biba. E ruman a bai informa si e mucha a yega cas bon. Henter e famia tabata masha contento di mira e y e rumannan local. E mayornan di e mucha a bisa: “Boso ta practica e religion berdadero. Boso a salba bida di nos yiu muher cu nan a laga canto di caminda pa e muri.” E mayornan a puntra e miembronan di e mucha su iglesia: “Boso no a corda kico Hamunyari su nomber ta nifica? Boso no tabatin berguensa di bai lag’e canto di caminda pa e muri?” E Testigonan tabatin un combersacion biblico cu e famia di Hamunyari y a laga literatura biblico cu nan. E famia a invita e rumannan pa bin bek y conduci un estudio di Bijbel cu nan. Algun miembro di famia cu tabata contra Testigonan di Jehova a cambia nan punto di bista. Un di nan, e sua di Hamunyari, tabata lider di un iglesia den e area. E tambe a acepta un estudio di Bijbel.

Edificando Casnan di Adoracion

Un poeta inspira a skirbi hopi tempo pasa: “O Dios ... mi alma tin sed di bo . . . den un  tera seco y yen di sed, caminda no tin awa.” (Salmo 63:1) Esaki ta e caso tambe cu hopi hende di Zimbabwe! Fisicamente nan ta soporta secura, pero spiritualmente nan tin sed di Dios y di su bondad. Bo por mira esaki na e resultadonan di e ministerio cristian di Testigonan di Jehova. Na aña 1980, ora cu Zimbabwe a bira independiente, tabatin rond di 10.000 Testigo ta sirbi den 476 congregacion. Awor, un 27 aña despues, e cantidad di Testigo activo a bira tripel y e cantidad di congregacion ta casi dobel.

Masha poco di e congregacionnan aki tabatin nan mes luga di adoracion. Na januari 2001, apenas 98 di e mas cu 800 congregacionnan na Zimbabwe tabatin un cas di adoracion​—un Salon di Reino​—pa reuni aden. Hopi di e congregacionnan tabata tene nan reunionnan bou di palo of den hutnan modesto traha di bara, cu muraya di lodo y dak di yerba.

Gracias na donacionnan generoso y trabou voluntario diligente di e hermandad mundial cristian, e Testigonan na Zimbabwe a cuminsa cu un programa cu ta haci posibel pa mas congregacion haya un Salon di Reino modesto pero digno. Hopi Testigo djafo cu tin experencia den trabou di construccion a regla nan asuntonan di tal manera cu nan por a bin Zimbabwe y traha hunto cu e voluntarionan local. Un di e Testigonan local a skirbi: “Sinceramente nos kier gradici tur e rumannan di asina tanto pais cu a bin Zimbabwe pa yuda traha Salonnan di Reino bunita. Y nos kier gradici boso tur demas pa boso contribucion na e Fondo di Salon di Reino cu ta haci e trabou aki posibel.”

Den e parti oost di e pais, e rumannan a reuni durante 50 aña bou di un palo di baobab masha grandi. Ora a bisa e ancianonan cristian cu ta bai traha un berdadero cas di adoracion, por lo menos un di nan no por a contene su lagrimanan. Den un congregacion bisiña, un anciano di 91 aña a bisa: “Ta masha hopi tempo mi tin ta sclama na Jehova pa algo manera esaki sosode!”

Hopi hende ta comenta riba e rapides cu cua ta construi e edificionan bunita aki. Un observado a comenta: “Boso ta construi den dia, pero Dios mester ta construi anochi!” E union y felicidad di e trahadonan tambe ta ser observa. Te cu awe, a completa mas cu 350 Salon di Reino nobo den henter e pais. Esaki ta permiti 534 congregacion reuni den Salonnan di Reino solido, traha di bloki.

Edificacion spiritual sumamente importante ta sigui tuma luga na Zimbabwe. Segun cu nos ta reflexiona riba loke a ser logra, nos ta sinti nos conmovi pa duna tur credito na Jehova, e Fuente di tal bendicion. En berdad, ‘si Jehova no traha e cas, ta en vano esnan cu ta trah’e ta traha cansa curpa.’​—Salmo 127:1.

[Nota]

[Mapa na pagina 9]

(Pa e texto den su formato completo , wak e publicacion)

ZIMBABWE

HARARE

Masvingo

Gran Zimbabwe

[Plachi na pagina 9]

Toren forma di cone

[Plachi na pagina 12]

Salon di Reino nobo, Congregacion Concession

[Plachi na pagina 12]

Miembronan di Congregacion Lyndale para pafo di nan Salon di Reino nobo

[Reconocemento pa Potret na pagina 9]

Ruinanan cu trapi: ©Chris van der Merwe/AAI Fotostock/age fotostock; potret chikito di toren: ©Ingrid van den Berg/AAI Fotostock/age fotostock