Esposanan, Respeta Boso Esposo Profundamente

“Esposanan, sea sumiso na boso mes esposo.”​—EFESIONAN 5:22.

1. Pakico hopi bes ta dificil pa esposa respeta esposo?

DEN hopi pais, ora un pareha casa, e bruid ta haci un voto den cua e ta priminti cu lo e respeta su esposo profundamente. Sinembargo, e manera cu hopi esposo ta trata nan esposa ta yuda determina si ta dificil of no pa e esposa cumpli cu e voto ei. Pero matrimonio tabatin un cuminsamento maraviyoso. Dios a saca un repchi for di Adam, e prome homber, y a crea e muher. Emociona, Adam a bisa: “Esaki ta awor weso di mi wesonan, y carni di mi carni.”​—Genesis 2:19-23.

2. Ki desaroyo tabatin relaciona cu hende muher y matrimonio den tempo recien?

² A pesar di e bon cuminsamento ei, un movemento cu yama emancipacion di hende muher​—un intento di hende muher pa libra nan mes for di e dominio di hende homber​—a cuminsa den principio di añanan ’60 di siglo pasa na Merca. E tempo ei pa cada 1 esposa cu a bandona su famia, 300 esposo a haci mescos. Pero na cabamento di añanan ’60 e proporcion a cambia di 1 esposa pa 100 esposo. Aworaki, aparentemente hende muher ta papia palabra malo, ta bebe, huma y comporta nan mes inmoral cu hende homber. Pero hende muher ta mas felis awor? No. Den algun pais, rond di mitar di e hendenan cu ta casa cu tempo ta divorcia. E esfuerso cu algun hende muher ta haci pa mehora e situacion di nan matrimonio a pone cosnan bira mihor of piyo?​—2 Timoteo 3:1-5.

3. Kico ta e problema basico cu ta afecta matrimonio?

³ Kico ta e problema basico? Te na cierto grado, esei ta e problema cu a existi for di dia cu e angel rebelde, “e colebra di antiguedad, kende ta wordo yama Diabel y Satanas”, a seduci Eva. (Revelacion 12:9; 1 Timoteo 2:13, 14) Satanas ta troce loke Dios ta siña hende. Por ehempel, relaciona cu matrimonio, Diabel a crea e impresion cu e ta algo mucho stricto y desagradabel. E mensahe cu e ta plama via medionan di comunicacion di e mundo aki​—di cua e ta e gobernante​—ta diseña pa laga e instruccionnan di Dios parce inhusto y anticua. (2 Corintionan 4:3, 4) Pero si nos analisa cu un mente habri loke Dios ta bisa relaciona cu e papel di hende muher den matrimonio, nos lo mira con sabi y practico e Palabra di Dios ta.

Un Palabra di Cautela pa Esnan Cu Ta Bai Casa

4, 5. (a) Pakico ta consehabel pa un hende muher cu ta pensa di casa ta cauteloso? (b) Kico un hende muher mester haci prome cu e acepta un proposicion pa casa?

⁴ Bijbel ta duna un palabra di cautela. E ta bisa cu den e mundo aki goberna pa Diabel, asta e personanan cu tin un matrimonio exitoso lo tin “tribulacion.” Pues aunke matrimonio ta un areglo divino, Bijbel ta duna spiertamento na hende cu ta casa. Relaciona cu un hende muher kende su esposo a fayece y cu p’esei ta liber pa bolbe casa, un escritor di Bijbel a bisa bou di inspiracion: “E ta mas felis si e keda manera e ta.” Hesus tambe a recomenda “esun cu por acepta esaki” pa keda soltero. Sinembargo, ken cu ta dicidi di casa mester haci esei “den Señor”, esta, cu un adorado  di Dios cu ta dedica y batisa.​—1 Corintionan 7:28, 36-40; Mateo 19:10-12.

⁵ E motibo pakico specialmente un hende muher mester paga tino cu ken e ta casa ta pasobra Bijbel ta bisa: “E muher casa, segun lei, ta mara na su esposo.” Ta solamente si e homber muri of comete inmoralidad y e pareha divorcia pa e motibo ei, e ta “liber di [su] lei.” (Romanonan 7:2, 3) Talbes e sintimento di amor a primera vista ta suficiente pa un romance placentero, pero esei no ta un bon fundeshi pa un matrimonio felis. P’esei, un hende muher soltero mester puntra su mes: ‘Mi ta dispuesto pa drenta den un areglo den cua mi ta cai bou di e lei di e homber aki?’ E tempo pa considera e pregunta aki ta prome cu casa, y no despues.

6. Ki decision mayoria di hende muher por tuma awe, y pakico esei ta asina importante?

⁶ Awe, den hopi pais, un hende muher por scohe pa sea acepta of rechasa un proposicion pa casa. Pero kisas e cos di mas dificil pa un hende muher ta pa e tuma un decision sabi den e asunto aki, ya cu su deseo di tin un relacion intimo y di amor cu ta posibel den matrimonio por ta hopi fuerte. Un escritor a remarca: “Mas deseo nos tin pa haci algo​—sea ta casa of subi un sero en particular​—mas chens nos tin di asumi cierto cosnan sin haci sigur di nan, y di presta atencion solamente na e detayenan cu ta bisa nos loke nos tin gana di tende.” Un decision iracional di un hende cu ta subi sero por cost’e su bida; un escohencia imprudente di un partner matrimonial por ta mes desastroso.

7. Ki conseho sabi un consehero a duna tocante buscamento di un futuro casa?

⁷ Un hende muher mester pensa seriamente riba loke biba bou di e lei di un homber cu ta propon’e pa casa cu ne por ta ensera. Hopi aña pasa, un mucha muher di India a reconoce cu modestia: “Nos mayornan ta mas grandi y mas sabi cu nos, y nan no ta ser engaña mes facil cu nos ... Ta masha facil pa ami si haci un fout.” E yudansa cu mayornan y otro personanan por duna ta importante. Pa hopi aña caba un consehero sabi a conseha hobennan pa siña conoce e mayornan di nan futuro casa y tambe pa observa con e ta trata su mayornan y otro miembronan di su famia.

Con Hesus A Mustra Sumision

8, 9. (a) Con Hesus a considera su sumision na Dios? (b) Ki beneficio sumision por trece cu ne?

⁸ A pesar cu sumision por ta un reto, hende muher por mir’e como un honor, mescos cu Hesus a mira esei. Aunke sumision na Dios a ensera sufrimento, incluso morto riba un staca di tormento, el a haya goso kedando sumiso na Dios. (Lucas 22:41-44; Hebreonan 5:7, 8; 12:3) Hende muher por wak riba Hesus como nan ehempel, pasobra Bijbel ta bisa: “Homber ta e cabes di e muher, y Dios ta e  cabes di Cristo.” (1 Corintionan 11:3) Ta bon pa nota si cu no ta solamente ora hende muher casa, homber ta bira nan cabes.

⁹ Bijbel ta splica cu hende muher, sea casa of soltero, mester somete nan na e hefatura di hombernan spiritualmente competente cu ta supervisa e congregacion cristian. (1 Timoteo 2:12, 13; Hebreonan 13:17) Ora hende muher sigui e instruccion di Dios pa haci esei, nan ta pone un ehempel pa e angelnan den e organisacion di Dios. (1 Corintionan 11:8-10) Ademas, hende muher casa di mas edad, pa medio di nan bon ehempel y sugerencianan practico, ta siña muhernan mas hoben pa keda “sumiso na nan mes esposo.”​—Tito 2:3-5.

10. Con Hesus a pone un ehempel den mustra sumision?

¹⁰ Hesus tabata conciente di e balor di sumision apropia. Na un ocasion, el a manda apostel Pedro paga belasting na autoridadnan humano pa nan dos. Asta el a duna Pedro e placa di belasting pa haci esei. Pedro a skirbi despues: “Somete boso mes pa causa di Señor na tur institucion humano.” (1 Pedro 2:13; Mateo 17:24-27) Relaciona cu Hesus su ehempel sublime di sumision, Bijbel ta bisa: “[El] a bandona su mes gloria, tumando forma di un sirbidor, siendo traha den e semehansa di hende. Y hayando su mes den condicion di hende, el a humilia su mes dor di bira obedecido te na morto.”​—Filipensenan 2:5-8.

11. Dicon Pedro a anima esposanan pa ta sumiso asta na esposonan cu ta incredulo?

¹¹ Ora Pedro a anima cristiannan pa ta sumiso asta na e autoridadnan cruel y inhusto di e mundo aki, el a splica: “Boso a wordo yama pa e proposito aki, como cu Cristo tambe a sufri pa boso, lagando un ehempel pa boso, pa boso sigui den su pasonan.” (1 Pedro 2:21) Despues cu Pedro a describi cuanto Hesus a sufri y con el a persevera den un forma sumiso, el a anima e esposanan cu tin esposo incredulo: “Na mes manera, boso, esposanan, sea sumiso na boso mes esposonan, pa si algun di nan ta desobedecido na e palabra, nan por wordo gana sin palabra pa medio di e conducta di nan esposanan, ora nan observa boso conducta puro y respetuoso.”​—1 Pedro 3:1, 2.

12. Ki beneficionan e sumision di Hesus a trece cu ne?

¹² Kisas hende ta mira sumision a pesar di bofon y insulto como señal di debilidad. Pero Hesus si no a mir’e asina. Pedro a skirbi di dje: “Ora cu el a wordo zundra, e no a zundra bek; ora cu el a sufri, e no a menasa.” (1 Pedro 2:23) Algun persona cu a mira Hesus sufri a bira creyente, por lo menos te na cierto grado, incluso un ladron cu tabata colga na un staca banda di dje y e oficial di ehersito cu a mira e ehecucion. (Mateo 27:38-44, 54; Marco 15:39; Lucas 23:39-43) Asina tambe, Pedro a indica cu algun esposo incredulo​—asta esnan cu ta trata nan casa malo​—por bira cristian despues cu nan observa e conducta sumiso di nan esposa. Y nos tin evidencia cu esei ta sosode awe.

Con Esposanan Por ‘Gana’ Nan Esposo

13, 14. Con sumision na esposonan cu no tabata Testigo a resulta beneficioso?

¹³ Esposanan cu a bira creyente a gana nan esposo pa medio di nan conducta cristian. Na un congreso di districto recien di Testigonan di Jehova, un esposo a bisa di su esposa cristian: “Mi ta supone cu mi a trat’e na un manera bruto. Toch e tabatin hopi respet pa mi. Nunca el a brongosa mi. E no a purba forsa mi pa acepta su creencianan. E tabata cuida mi cu amor. Ora e tabata bai un asamblea, e tabata traha duro pa prepara mi cuminda for di tempran y pa caba cu su trabounan di cas. Su actitud a cuminsa lanta mi interes den Bijbel. Y awor, ata mi aki!” Si, den un sentido, e conducta di su esposa a ‘gan’e sin palabra.’

 ¹⁴ Manera Pedro a enfatisa, loke ta duna resultado positivo hopi bes no ta loke un esposa ta bisa sino loke e ta haci. Esaki tabata bisto den e caso di un esposa cu a siña e berdadnan di Bijbel y cu tabata dicidido pa asisti na e reunionnan cristian. Su esposo a grit’e: “Agnes, si bo sali di e porta ei, bo no ta drenta bek!” En berdad e no a sali di “e porta ei”, pero si di un otro porta. E siguiente anochi cu Agnes mester a bai reunion e esposo a bolbe menas’e: “Ora bo bin bek, bo no ta haya mi na cas.” Wel, en berdad e no tabata t’ei​—el a bai pa tres dia. Ora e homber a regresa cas, su esposa a puntr’e cariñosamente: “Bo kier come algo?” Agnes no a desvia ni un tiki for di su devocion na Jehova. Cu tempo su esposo a acepta un estudio di Bijbel, a dedica su bida na Dios, y despues a sirbi como un superintendente cu hopi responsabilidad.

15. Ki ‘adorno’ Bijbel ta recomenda pa esposanan cristian?

¹⁵ Apostel Pedro a recomenda algo cu e esposanan menciona ariba a demostra, esta, ‘adorno’, pero no dor di duna atencion exagera na “vlechtmento di cabei” ni “bistimento di paña luhoso.” Mas bien, Pedro a bisa: “Laga [boso adorno] ta e persona scondi di e curason, cu e calidad incoruptibel di un spirito suave y keto, locual ta precioso den bista di Dios.” E spirito aki ta ser refleha den un tono di bos y un manera di trata cu ta atractivo y no desafiante of exigente. Asina un esposa cristian ta mustra su respet profundo pa su casa.​—1 Pedro 3:3, 4.

Ehempelnan pa Siña for di Dje

16. Den ki sentido Sara ta un bon ehempel pa esposanan cristian?

¹⁶ Pedro a skirbi: “Prome aya e muhernan santo tambe, kendenan tabata spera den Dios, tabata dorna nan mes, siendo sumiso na nan mes esposo.” (1 Pedro 3:5) E personanan ei a realisa cu si nan a agrada Dios dor di obedece su conseho, esei lo a resulta finalmente den felicidad den famia y e recompensa di bida eterno. Pedro ta menciona Sara, e bunita esposa di Abraham, bisando cu el a “obedece Abraham y a yam’e señor.” Sara a apoya su esposo temeroso di Dios, kende Dios a manda bai sirbi den un pais lehano. Sara a sacrifica un bida comodo y asta a pone su bida na peliger. (Genesis 12:1, 10-13) Pedro a recomenda esposanan pa sigui Sara su ehempel di curashi, bisando: “Boso a bira su yiunan, si boso haci loke ta corecto sin tene miedo di nada.”​—1 Pedro 3:6.

17. Pakico Pedro lo tabatin Abigail na mente como un ehempel pa esposanan cristian?

¹⁷ Abigail tabata un otro muher balente cu a “spera den Dios”, y kisas Pedro tabatin e  tambe na mente. E tabata ‘masha discreto’ [NW], pero su esposo Nabal si tabata “bruto y di mala fe.” Ora Nabal a nenga di yuda David y su hombernan, esakinan a prepara pa elimina Nabal y henter su famia. Pero Abigail a tuma accion y a scapa su famia. El a pone suministro di cuminda riba burico y a bai topa David y su hombernan arma na caminda. Ora Abigail a mira David, el a baha for di su burico, a cai na su pia, y a rog’e pa e no actua na un manera descabeya. David a keda profundamente conmovi. El a bisa: ‘Bendiciona sea Jehova e Dios di Israel, kende a manda bo e dia aki pa contra cu mi, y bendiciona sea bo discernimento.’​—1 Samuel 25:2-33.

18. Si e atencion romantico di un otro homber ta un tentacion pa un esposa, riba ken su ehempel e por medita y pakico?

¹⁸ Un otro bunita ehempel pa esposanan ta esun di un mucha muher Sulamita cu a keda fiel na e humilde wardado di bestia cu ken e tabata comprometi pa casa. Su amor p’e a keda fuerte a pesar di e atencion romantico di un gobernante rico. Conmovi pa expresa su sintimentonan pa e wardado hoben, el a bisa: “Pone mi manera un seyo riba bo curason, manera un seyo riba bo brasa. Pasobra amor ta mes fuerte cu morto ... Hopi awanan no por paga amor, ni riunan lo no pasa over di dje.” (Cantica di Salomon 8:6, 7) Ohala tur hende muher cu ta acepta un proposicion pa casa ta mes dicidido pa keda fiel na nan esposo y respeta esaki profundamente.

Mas Conseho di Dios

19, 20. (a) Pa ki motibo esposanan mester ta sumiso na nan esposo? (b) Ki bunita ehempel esposanan ta haya den Bijbel?

¹⁹ Finalmente, wak e contexto di nos texto principal: “Esposanan, sea sumiso na boso mes esposo.” (Efesionan 5:22) Pakico e sumision ei ta necesario? “Pasobra”, manera e siguiente versiculo ta bisa, “e esposo ta cabes di e esposa, mescos cu Cristo tambe ta cabes di e iglesia”, of congregacion. P’esei, Bijbel ta urgi esposanan: “Mescos cu e iglesia ta sumiso na Cristo, asina tambe e esposanan mester ta sumiso na nan esposo den tur cos.”​—Efesionan 5:23, 24, 33.

²⁰ Pa esposanan obedece e mandamento aki, nan tin cu studia anto imita e ehempel di Cristo su congregacion di siguidonan ungi. Por fabor, lesa 2 Corintionan 11:23-28 y ripara kico apostel Pablo, miembro di e congregacion, a pasa aden kedando fiel na su Cabes, Hesucristo. Mescos cu Pablo, esposanan y tambe e resto di e congregacion tin cu keda lealmente sumiso na Hesus. Esposanan ta demostra esaki mediante nan sumision na nan esposo.

21. Kico por sirbi como estimulo pa esposanan keda sumiso na nan esposo?

²¹ Aunke hopi esposa awe no ta gusta at all e idea di sumision, un hende muher sabi lo considera e bentahanan di esaki. Por ehempel, den e caso di un esposo cu no ta Testigo, sumision na dje como cabes den tur cos​—cu no ta viola Dios su lei- y principionan​—por wel resulta den e recompensa maraviyoso di por ‘salba su esposo.’ (1 Corintionan 7:13, 16) Ademas, e esposa por haya e satisfaccion di sa cu Jehova Dios ta aproba su conducta y lo bendicion’e ricamente pa e esfuerso cu e ta haci pa imita e ehempel di su Yiu stima.

Bo Ta Corda?

• Dicon por ta dificil pa un esposa respeta su esposo?

• Pakico e asunto di acepta un proposicion pa casa ta asina serio?

• Con Hesus a sirbi como un ehempel pa esposanan, y siguimento di su ehempel por trece ki beneficio?

[Preguntanan di Estudio]

[Plachi na pagina 19]

Pakico e asunto di dicidi pa acepta un proposicion pa casa ta asina serio?

[Plachi na pagina 21]

Kico esposanan por siña for di e ehempel di personahenan biblico manera Abigail?