Un Regalo Eterno for di e Creador

BO NO ta haya cu ta asombroso cu e factornan cu cientificonan ta kere ta esencial pa bida riba cualkier planeta ta ser menciona directamente of indirectamente den e prome capitulo di Bijbel? Ki factornan esakinan ta?

Pa bida rende y prospera mester tin un cantidad grandi di awa, manera Genesis 1:2 ta menciona. E temperatura mester ta net na e nivel corecto pa awa riba e planeta keda den forma likido. Esaki ta rekeri pa e planeta ta na e distancia corecto for di su solo. E relato di Genesis bes tras bes ta hala atencion na solo y su efecto riba Tera.

Pa hende por biba riba un planeta, e planeta mester tin un atmosfer cu un combinacion special di gas. E aspecto masha importante aki ta ser menciona na Genesis 1:6-8. E crecemento di vegetacion, describi na Genesis 1:11 y 12, ta contribui na e suministro grandi di oxigeno cu tin. Un planeta riba cua un variedad grandi di bida animal por rende y prospera ta rekeri continentenan di tereno seco y productivo, manera Genesis 1:9-12 a describi. Finalmente, pa por tin un clima modera, un planeta mester ta den un posicion scuin segun cu e ta drei rond di su as y mantene e posicion ei; den e caso di Tera, ta e forsa di gravedad di nos luna pa un parti ta logra esei. Genesis 1:14 y 16 ta menciona e existencia di luna y algun di su beneficionan.

Con e escritor di antiguedad, Moises, por a hala atencion na e factornan menciona ariba sin yudansa di ciencia moderno? Acaso Moises simplemente tabatin un capasidad inusual pa compronde nan importancia mientras cu su contemporaneonan si no tabatin e? E splicacion ta cu Moises tabata inspira pa e Creador di shelo y Tera. Ta bale la pena pa tuma nota di esaki en bista di e exactitud cientifico di e relato di Genesis.

Bijbel ta confirma cu tin un proposito tras di e maraviyanan cu nos ta observa den e universo rond di nos. Salmo 115:16 ta declara: ‘Shelonan ta e shelonan di Jehova, ma Tera el a duna na e yiunan di hende.’ Un otro salmo ta declara: “El a establece Tera riba su fundeshinan, pa asina esei no kita for di su luga nunca mas.” (Salmo 104:5) Si ta un Creador a diseña y produci e universo y nos bunita planeta, ta logico pa kere e ora ei cu e tin tambe e capasidad pa sostene nan. Esaki ta nifica cu nos por anticipa cu confiansa e cumplimento di e promesa maraviyoso: “E hustonan lo hereda e Tera, y lo biba den dje pa semper.” (Salmo 37:29) Un cos ta sigur, Dios “no a crea [e Tera] pa e keda bashi, ma el a form’e pa e wordo habita” pa semper pa hende gradicido cu ta reconoce su obranan.​—Isaias 45:18.

Segun e Scritura, Hesus a bin na Tera pa siña nos tocante Dios y Su proposito di duna bida eterno na humanidad obediente. (Juan 3:16) Bijbel ta sigura nos cu pronto Dios lo “destrui esnan cu ta destrui e Tera”, mientras cu for di tur nacion hende amante di pas cu ta acepta su provision pa salbacion lo sobrevivi. (Revelacion 7:9, 14; 11:18) Esta maraviyoso bida lo ta segun cu hende ta sigui descubri y disfruta di e maraviyanan di Dios su creacion pa semper!​—Eclesiastes 3:11; Romanonan 8:21.

[Reconocemento pa Potret na pagina 8]

NASA photo