“Yiunan, Obedece Boso Mayornan”

“Yiunan, obedece boso mayornan den Señor, pasobra esaki ta husto.” ​—EFESIONAN 6:1.

1. Con obediencia por ta un proteccion pa bo?

KISAS nos ta na bida aworaki pasobra nos a obedece, mientras cu otronan no ta na bida pasobra nan no a obedece. Obedece kico? Por ehempel, e spiertamentonan cu nos curpa ‘traha na un manera maraviyoso’ ta duna nos. (Salmo 139:14) Talbes nos wowonan ta cuminsa mira nubia scur, y nos horeanan ta tende zonido di strena. Nos ta sinti con biento ta cuminsa supla mas fuerte. Pa hende cu a siña tocante posibel situacionnan di peliger, esakinan ta señalnan di advertencia pa bai busca un luga di sconde pa e tormenta acompaña pa lamper y hagel cu ta acercando y cu por pone nan bida na peliger.

2. Pakico yiu tin mester di spiertamento, y pakico nan mester obedece nan mayornan?

² Boso, hobennan, tin mester di spiertamento tocante posibel situacionnan di peliger, y boso mayornan tin e responsabilidad pa duna boso esakinan. Talbes bo ta corda con nan a bisa bo: “No mishi cu e stoof. E ta cayente.” “No bai caminda lama ta hundo. E ta peligroso.” “Wak den tur dos direccion prome cu bo crusa caya.” Lamentablemente, tin mucha cu no a obedece y a sufri lesion of asta perde nan bida. “Ta husto”, apropia y corecto pa obedece bo mayornan. Esei ta sabi tambe. (Proverbionan 8:33) Un otro texto di Bijbel ta bisa cu esei ta ‘agrada’ nos Señor Hesucristo. En berdad, Dios ta manda bo obedece bo mayornan.​—Colosensenan 3:20; 1 Corintionan 8:6.

Obediencia Ta Trece Recompensa Duradero

3. Kico ta ‘e berdadero bida’ pa mayoria di nos, y con yiunan por spera di hay’e?

³ Obediencia na bo mayornan ta proteha bo “bida presente” of actual, pero obediencia lo habri caminda tambe pa bo disfruta di e bida ‘cu tin cu bin’, ‘e berdadero bida.’ (1 Timoteo 4:8; 6:19) Pa mayoria di nos, e berdadero bida ta bida sin fin riba Tera den Dios su mundo nobo cu e ta priminti na hende cu ta cumpli fielmente cu su mandamentonan. Un di e mandamentonan aki cu ta di sumo importancia ta bisa: “Honra bo tata y bo mama (cu ta e prome mandamento cu un promesa), pa bai bo bon y pa bo tin bida largo riba Tera.” Pues si bo obedece bo mayornan, lo bo ta felis. Bo futuro lo ta sigur, y lo bo por haya bida eterno den un paradijs riba Tera!​—Efesionan 6:2, 3.

4. Con yiunan por honra Dios y beneficia di esaki?

⁴ Ora bo ta honra bo mayornan dor di obedece nan, bo ta honra Dios tambe pasobra e ta esun cu ta manda bo obedece nan. Na mes momento, esei ta beneficia bo. Bijbel ta bisa: “Ami ta SEÑOR bo Dios, kende ta siña bo, pa bo prospera.” (Isaias 48:17; 1 Juan 5:3) Con bo obediencia ta beneficia bo? E ta haci bo mama cu bo tata contento, y na nan turno, nan sigur lo mustra nan goso den maneranan cu lo haci bo bida mas felis. (Proverbionan 23:22-25) Pero mas importante ainda, bo obediencia ta haci bo Tata celestial contento, y lo e bendiciona bo na maneranan maraviyoso! Laga nos mira con Jehova a  bendiciona y proteha Hesus, kende a bisa tocante su mes: “Semper mi ta haci e cosnan cu ta agrad’e.”​—Juan 8:29.

Hesus​—Un Bon Trahado

5. Ki motibo nos tin pa kere cu Hesus tabata un bon trahado?

⁵ Hesus tabata e prome yiu di su mama, Maria. Su tata di criansa, Jose, tabata un carpinte. Hesus tambe a bira un carpinte; aparentemente el a siña e ofishi di Jose. (Mateo 13:55; Marco 6:3; Lucas 1:26-31) Ki tipo di carpinte bo ta kere Hesus tabata? Wel, prome cu su mama birgen a concebie pa via di un milager, e tabata den shelo. Como si fuera ta sabiduria tabata na palabra, el a splica: “Mi tabata na [Dios] su lado, manera un trahado experto, y dia tras dia mi tabata su delicia.” Dios tabata masha contento cu Hesus, kende den shelo tabata un bon trahado. Bo no ta kere cu tempo e tabata un hoben riba Tera tambe el a haci un gran esfuerso pa ta un bon trahado, un bon carpinte?​—Proverbionan 8:30; Colosensenan 1:15, 16.

6. (a) Pakico bo ta kere cu Hesus lo mester a haci trabou di cas tempo cu e tabata mucha? (b) Den ki manera yiunan por imita Hesus?

⁶ Sin duda, tempo cu Hesus tabata chikito, e tabata hunga cu otro mucha, manera Bijbel ta bisa cu mucha tabata haci den e tempo ei. (Zacarias 8:5; Mateo 11:16, 17) Pero, bo por ta sigur cu como yiu mayo den un famia grandi di poco recurso, ademas di e preparacion cu el a ricibi for di Jose pa bira un carpinte, e tabatin trabou di cas tambe pa haci. Despues, Hesus a bira un predicado y a dedica su mes asina tanto na su ministerio te cu el a sacrifica comodidadnan personal. (Lucas 9:58; Juan 5:17) Bo por mira maneranan den cua bo por imita Hesus? Bo mayornan sa pidi bo limpia bo camber of haci otro trabounan di cas? Nan ta anima bo pa adora Dios dor di asisti na reunionnan cristian y papia tocante bo creencianan cu otro hende? Con bo ta kere cu e hoben Hesus lo a reacciona riba e tipo di peticionnan ei?

Un Bon Studiante y Maestro di Bijbel

7. (a) Cu ken Hesus lo a biaha pa bai celebra e Pasco Hudiu? (b) Unda Hesus tabata ora e otro hendenan a cohe caminda pa cas, y kico e tabata haci einan?

⁷ Tur miembro masculino di un famia Israelita mester a subi bai rindi adoracion na Jehova na e tempel durante e tres fiestanan Hudiu. (Deuteronomio 16:16) Tempo Hesus tabatin 12 aña, henter su famia lo a biaha bai Jerusalem pa celebra e Pasco Hudiu. Esei probablemente a inclui su mitar ruman homber- y muhernan. Pero den e personanan cu a  biaha cu e famia di Hesus lo tabatin Salome tambe, kende posiblemente tabata ruman muher di Maria, hunto cu su esposo Zebedeo y nan yiunan Santiago y Juan, kendenan despues a bira apostel. * (Mateo 4:20, 21; 13:54-56; 27:56; Marco 15:40; Juan 19:25) Riba nan biahe di regreso, Jose cu Maria lo a asumi cu Hesus tabata hunto cu nan famianan, pues na prome instante nan no a ripara cu e no tabata den e grupo. Tres dia despues, ora Maria cu Jose finalmente a haya Hesus, e tabata den tempel, “sinta meimei di e siñadonan, ta scucha nan y ta haci nan pregunta.”​—Lucas 2:44-46.

8. Kico Hesus a haci den e tempel, y pakico e hendenan a keda asombra?

⁸ Ki tipo di “pregunta” Hesus a haci e siñadonan? E preguntanan cu el a haci lo no tabata djis pa satisface su curiosidad of simplemente pa haya informacion. E palabra Griego cu Bijbel ta uza aki por a referi na e tipo di preguntanan cu sa ser haci den un caso hudicial. Pues e por a ensera preguntanan di interogacion. Si, for di mucha Hesus a desaroya bira un studiante di Bijbel cu a asombra maestronan religioso bon educa! Bijbel ta bisa cu “tur esnan cu a tend’e a keda straña di su comprondemento y su contestanan.”​—Lucas 2:47.

9. Con bo por sigui Hesus su ehempel den studiamento di Bijbel?

⁹ Con bin Hesus na un edad jong asina por a asombra asta e maestronan versa cu su conocemento di Bijbel? Sin duda e tabata bendiciona cu mayornan temeroso di Dios cu a dun’e instruccion divino for di infancia. (Exodo 12:24-27; Deuteronomio 6:6-9; Mateo 1:18-20) Siguramente Jose a bai sinagoga cu e hoben Hesus pa e tende e maestronan lesa y papia tocante e Scritura. Abo tambe ta bendiciona cu mayornan cu ta studia Bijbel cu bo y ta bai reunionnan cristian cu bo? Bo ta balora nan esfuersonan, mescos cu Hesus a aprecia esnan di su mayornan? Bo ta comparti cu otro hende loke bo ta siña, mescos cu Hesus a haci?

Hesus Tabata Sumiso

10. (a) Pakico Hesus su mayornan lo mester tabata sa unda nan por a hay’e? (b) Ki bon ehempel Hesus a laga pa yiunan?

¹⁰ Con bo ta kere Maria cu Jose a sinti nan ora cu finalmente despues di tres dia nan a haya Hesus den e tempel? Sin duda, nan a sinti un gran alivio. Ma Hesus a keda sorprendi cu su mayornan no tabata sa na unda e tabata. Tur dos tabata sa cu Hesus a bin na mundo via di un milager. Ademas, aunke nan no tabata na haltura di tur e detayenan, nan lo tabata sa algo tocante su futuro papel como Salbador y como Gobernante di e Reino di Dios. (Mateo 1:21; Lucas 1:32-35; 2:11) P’esei, Hesus a puntra nan: “Pakico boso tabata busca mi? Boso no tabata sa cu mi mester tabata den e cas di mi Tata?” Sinembargo, obedientemente Hesus a bai cu su mayornan y a regresa cas na Nazaret. Bijbel ta bisa: “El a keda someti na nan.” Ademas, “su mama tabata warda tur e palabranan aki den su curason.”​—Lucas 2:48-51.

11. Ki les tocante obediencia bo por siña for di Hesus?

¹¹ Bo ta haya ta facil pa imita Hesus dor di semper obedece bo mayornan? Of bo ta kere cu hopi bes nan no ta compronde e mundo djawe y cu bo ta mas sabi cu nan? Ta berdad cu kisas bo sa mas cu nan tocante cierto cosnan​—talbes tocante uzo di telefon cellular, computer of otro aparato moderno. Pero pensa riba Hesus, kende a asombra maestronan versa cu “su comprondemento y su contestanan.” Probablemente bo ta di acuerdo cu compara cu ne, bo sa masha poco. Toch, Hesus tabata sumiso na su mayornan. Esei no necesariamente ta  nifica cu semper e tabata di acuerdo cu nan decisionnan. No obstante, “el a keda someti na nan” te dia el a bira grandi. Ki les bo ta kere bo por siña for di su ehempel?​—Deuteronomio 5:16, 29.

Obediencia Ta un Reto

12. Con obediencia por scapa bo bida?

¹² No ta semper facil pa ta obediente. Esei a keda ilustra un par di aña pasa ora dos mucha muher tabata bai core crusa un autopista di seis liña en bes di pasa na halto riba e brug pa hende na pia. “Ban John”, nan tabata grita un colega di scol ora esaki tabata cana bai den direccion di e brug. “Bo’n ta ban cu nos?” Ora John a duda, un di e mucha muhernan a tent’e: “Cobarde!” Aunke no ta miedo John tabatin, el a bisa nan: “Mi tin cu obedece mi mama.” Un rato despues, ora e tabata riba e brug, el a tende zonido di auto cu ta break y a wak abou net ora un auto a dal e mucha muhernan. Un di nan a muri, y e otro a keda asina seriamente herida cu mester a amputa su pia. Mama di e mucha muhernan, kende a bisa nan pa uza e brug ariba, despues a bisa mama di John: “Mare nan tabata mes obediente cu bo yiu.”​—Efesionan 6:1.

13. (a) Pakico bo mester obedece bo mayornan? (b) Ki ora lo ta corecto pa un yiu no haci loke un mayor ta mand’e haci?

¹³ Pakico Dios ta bisa: “Yiunan, obedece boso mayornan”? Dor di obedece bo mayornan, bo ta obedece Dios. Ademas, bo mayornan tin mas experencia cu bo. Por ehempel, apenas cinco aña prome cu e accidente menciona ariba a tuma luga, John su mama tabatin un amiga kende su yiu homber a perde su bida ora el a purba crusa e mesun autopista ei! Kisas berdad no ta semper facil pa obedece bo mayornan, pero ta Dios ta manda bo hacie. Di otro banda, si bo mayornan​—of otro hende​—manda bo gaña, horta of haci cualkier cos cu Dios ta desaproba, bo tin cu “obedece Dios mas cu hende.” P’esei despues cu Bijbel ta bisa “obedece boso mayornan”, e ta agrega e palabranan “den Señor.” Esei ta nifica obedece bo mayornan den tur cos cu ta na harmonia cu Dios su leinan.​—Echonan 5:29.

14. Pakico ta mas facil pa un hende perfecto ta obediente, pero pakico e tin cu siña toch tocante esaki?

¹⁴ Bo ta kere cu si bo ta perfecto​—esta, “sin mancha, separa for di pecadornan” manera Hesus tabata​—lo ta semper mas facil pa bo obedece bo mayornan? (Hebreonan 7:26) Si bo ta perfecto, lo bo no ta inclina pa haci loke ta malo, manera bo ta awor. (Genesis 8:21; Salmo 51:5) Sinembargo, asta Hesus tabatin cu siña lesnan tocante obediencia. Bijbel ta bisa: “Aunke cu [Hesus] tabata Yiu, el a siña obediencia dor di e cosnan cu el a sufri.” (Hebreonan 5:8) Con sufrimento a yuda Hesus siña obediencia, un les cu nunca e tabatin cu siña den shelo?

15, 16. Con Hesus a siña obediencia?

 ¹⁵ Bou di direccion di Jehova, Jose cu Maria a proteha Hesus contra daño tempo cu e tabata mucha. (Mateo 2:7-23) Pero na un dado momento Dios a kita proteccion sobrenatural for di Hesus. E sufrimento mental y fisico cu Hesus a pasa aden despues tabata asina grandi cu Bijbel ta bisa cu el a “ofrece oracion y suplica cu gran sclamacion y lagrima.” (Hebreonan 5:7) Na ki tempo esaki a sosode?

¹⁶ Esei a sosode particularmente durante e ultimo oranan di Hesus su bida riba Tera ora Satanas a haci un esfuerso cabal pa kibra Su integridad. E idea di cu su morto como un supuesto malechor lo a duna su Tata un mal nomber aparentemente a tormenta Hesus asina tanto cu segun cu “e tabata haci oracion [den e hofi di Getsemane] su sodo a bira manera gotanan di sanger cu tabata cai abou na suela.” Un par di ora despues, e forma cu el a muri riba un staca di tormento tabata asina doloroso cu Hesus a dal grito di “sclamacion [hunto cu] lagrima.” (Lucas 22:42-44; Marco 15:34) Di e manera ei el a “siña obediencia dor di e cosnan cu el a sufri” y asina a alegra e curason di su Tata. Awor den shelo, Hesus ta sinti nos dolor segun cu nos ta lucha pa ta obediente.​—Proverbionan 27:11; Hebreonan 2:18; 4:15.

Siña e Les di Obediencia

17. Cu ki actitud nos tin cu acepta disciplina?

¹⁷ Ora bo tata y bo mama disciplina bo, esei ta mustra cu nan kier lo mihor pa bo, cu nan ta stima bo. Bijbel ta puntra: “Cua yiu no ta ricibi disciplina cerca su tata?” Lo no ta tristo si bo mayornan no ta stima bo suficiente pa saca tempo y haci esfuerso pa corigi bo? Mescos tambe, Jehova ta corigi bo pasobra e ta stima bo. “Na e momento mes ningun disciplina no ta parce di ta causa di goso, sino di dolor; ma pa esnan cu a wordo entrena dor di dje, despues e ta duna e fruta pacifico di husticia.”​—Hebreonan 12:7-11.

18. (a) Disciplina amoroso ta evidencia di kico? (b) Di loke bo mes a mira, ki efecto positivo tal disciplina tabatin riba hende?

¹⁸ Un rei den Israel di antiguedad, kende Hesus a menciona pa su gran sabiduria, a bisa cu mucha tin mester di coreccion amoroso di nan mayornan. Salomon a skirbi: “Esun cu laga di uza bara ta odia su yiu, ma esun cu ta stim’e ta disciplin’e for di tempran.” Salomon a bisa asta cu un persona cu ta ricibi coreccion amoroso lo por libra su alma for di morto. (Proverbionan 13:24; 23:13, 14; Mateo 12:42) Un ruman muher cristian ta corda cu tempo e tabata mucha y a comporta su mes malo na reunionnan cristian, su tata tabata bis’e cu ora nan yega cas lo el a haya straf. Aworaki e tin grato recuerdo di su tata pa e disciplina amoroso cu el a ricibi di dje, locual a moldea su bida na un manera excelente.

19. Pa ki motibo special bo tin cu obedece bo mayornan?

¹⁹ Si bo tin mayornan cu ta stima bo suficiente pa saca tempo y haci esfuerso pa disciplina bo na un manera amoroso, sea gradicido. Obedece nan, mescos cu nos Señor Hesucristo a obedece su mayornan, Jose cu Maria. Pero obedece nan specialmente pasobra bo Tata celestial, Jehova Dios, ta bisa bo pa haci esei. Asina lo bo beneficia bo mes, lo “bai bo bon y [lo] bo tin bida largo riba Tera.”​—Efesionan 6:2, 3.

[Nota]

Con Lo Bo Contesta?

• Ki beneficionan yiunan por ricibi ora nan obedece nan mayornan?

• Como mucha, con Hesus a pone un ehempel den obedece su mayornan?

• Con Hesus a siña obediencia?

[Preguntanan di Estudio]

[Plachi na pagina 24]

Cu diesdos aña di edad Hesus tabata versa den e Scritura

[Plachi na pagina 26]

Con Hesus a siña obediencia for di e cosnan cu el a sufri?