Asambleanan Ta un Motibo pa Ta “Semper Regocihando”

AFRICA, e continente habita pa un decimo parti di e poblacion di mundo, ta manera un inmenso paña borda cu hopi color. Bo ta haya e santo blanco di e Costa Mediteraneo, e color di oro di Sahara, e selvanan berde, y e scuma di olanan agita pa biento cu ta suta costa di Kaap Goede Hoop. Atrabes di Africa ta core hopi riu mescos cu hilo fini, manera por ehempel Nilo, Niger, Congo y Zambezi. Anto den e profundidad di su “plooinan” tin reservanan inmenso di oro, koper y piedra precioso.

Zambia ta situa caminda e selva tropical di e Comchi di Congo ta subi pa encontra e sabananan ondula cu ta forma e plateau di Africa central.

Asambleanan

Fiestanan precristian di e nacion di Israel y tambe nan ‘convocacionnan santo’, esta reunionnan special, tabata ocasionnan alegre cu a yuda esnan presente enfoca riba asuntonan spiritual. (Levitico 23:21; Deuteronomio 16:13-15) Mescos ta e caso cu e asambleanan cu e pueblo di Dios ta organisa den nos tempo. Na Zambia, e rumannan no ta tene asamblea- of congresonan den complehonan deportivo moderno y masha bunita. Nan ta traha loke nan ta yama un pueblito di congreso, cu ta inclui cabañanan chikito pa drumi aden.

Atrabes di añanan, nan a traha structuranan mas permanente na e luganan ei. Sinembargo, e prome añanan tabata un periodo yen di reto y innovacion. Un misionero cu yama Peter Palliser a conta: “Na un congreso e rumannan a dicidi cu nan lo tin gana di un plataforma un poco na halto. Un di nan tabata bon den uzamento di explosivo. El a prepara e area y a bula e parti ariba di un neishi di comehein bandona di seis meter halto. Esei a laga nos cu un serito caminda nos por a traha un plataforma.”

Esfuersonan pa Asisti

Casi tur e congresonan tabata tuma luga leu for di camindanan principal y na sitionan cu ta dificil pa yega. Robinson Shamuluma ta corda un congreso cu el a asisti na dje na aña 1959. El a conta: “Mas o menos 15 di nos a bai Kabwe na e Provincia Central riba bais. Nos a bai cu hariña di funchi y pisca seco pa come. Tur anochi nos tabata drumi den mondi. Na Kabwe nos a subi un trein, y finalmente a yega e sitio di congreso despues di casi cuater dia riba caminda.”

Lamp Chisenga ta corda un ruman homber cu a biaha un 130 kilometer na pia y riba bais hunto cu su seis yiunan pa asisti na un congreso. El a conta: “Pa e biahe, nan a prepara cuminda, esta, yuca gerooster, pinda y pindakaas. Hopi biaha nan mester a campa den mondi sin ningun proteccion.”

Miedo di Publico!

Dramanan biblico den trahe y escenario antiguo ta keda un di e rasgonan mas popular di congreso. Tur participante ta tuma masha na serio nan responsabilidad pa transmiti e emocionnan di nan personahe, y masha poco hende di Zambia tin e reputacion di no ta expresivo. Frank Lewis, un exmisionero y kende awor ta miembro di e famia di Betel di Merca, ta corda: “Na principio nos no tabata  haya e dramanan riba tape. Kiermen cu e rumannan tabatin cu siña nan rol completamente for di cabes. Mi ta corda e prome drama cu nos tabatin. El a trata tocante Jose y nos tabatin e na un asamblea den e Provincia Noord. Wel, como cu post tabata poco slow y e rumannan no a haya e manuscrito, nos tabatin cu traha te lat anochi pa purba yuda nan siña for di cabes loke nan tabatin cu bisa. Durante presentacion di e drama, nos a yega na e escena caminda e esposa di Potifar na grito ta conta su casa cu Jose a purba viol’e. Na e momento ei e ruman cu tabata hunga pa Potifar a bira nervioso dilanti di publico y a baha for di escenario. Ami tabata patras di plataforma ta duna instruccion na e rumannan y mi a mir’e baha for di escenario. Rapidamente mi a bis’e e prome frasenan cu e tabatin cu bisa y a push’e bek riba escenario. Anto na un manera masha bon mes el a expresa su palabranan di desprecio pa e homber aki acusa di kier a viola su casa! Aunke esaki a hera di bira un desaster pa nos asamblea, semper cu mi lesa e relato biblico ei mi ta pensa: ‘Podise ta asina mes a sosode. Podise Potifar den su rabia a sali for di e camber, a domina su mes y despues a bin bek pa condena Jose!’”

Na aña 1978, despues di cuater aña di restriccion riba e tamaño di e asamblea- y congresonan, e situacion a bira mas flexibel. E aña ei e Congreso “Fe Victorioso” tabata un reto. Un exsuperintendente biahero ta splica dicon: “Na e congreso ei nos a presenta tur e dramanan cu nos no a haya e añanan anterior ora cu nos tabata obliga na reuni den Salon di Reino. E congreso a dura cinco dia, y nos tabatin cinco drama, un pa cada dia . . . Esei tabata hopi dushi, pero pa e representante di Betel cu mester a supervisa tur e dramanan ei si e tabata hopi trabou!”

Un miembro di e Comite di Sucursal a bisa: “Di berdad mi por bisa cu nunca mi no a asisti na congresonan mas dushi. Mainta e famianan ta sali for di nan cabañanan chikito, tur hende nechi y limpi. Nan ta presenta nan mes dilanti Jehova, luciendo lo mihor posibel. Por lo general nan ta sinta den solo, ya cu no tin luga den sombra. Asina mes, nan ta keda henter dia y ta presta bon atencion. Esei ta algo bunita pa mira.” Testigonan di Jehova ta considera nan reunionnan un parti esencial di nan adoracion. (Hebreonan 10:24, 25) Sea cu nan ta “tristo” of no debi na problemanan personal of debi na oposicion religioso, e pueblo di Jehova sa cu nan asistencia na asamblea ta un motibo pa nan ta “semper regocihando.”​—2 Corintionan 6:10.