Con pa Identifica Adoracion Berdadero

MAYORIA di religion ta pretende cu loke nan ta bisa ta bin di Dios. P’esei ta bon pa nos haci caso di e palabranan di Juan, apostel di Hesus, kende a skirbi: “Stimanan, no kere tur spirito [“expresion inspira”, NW], ma pone e spiritonan na prueba pa mira si nan ta bin di Dios, pasobra hopi profeta falso a sali bai den mundo.” (1 Juan 4:1) Con nos por test algo pa wak si e ta bin di Dios?

Tur loke ta bin di Dios ta refleha su personalidad, specialmente su cualidad predominante, esta, amor. Por ehempel, nos sentido di hole, cu ta permiti nos disfruta di e aroma di specerij, di flor of di pan cayente, ta un expresion di e amor di Dios. Nos capasidad di mira un bahada di solo, un barbulet of e sonrisa di un mucha chikito ta refleha e amor cu Dios tin pa nos. Mescos ta e caso cu nos capasidad di tende bunita piesa, canto di un parha of e stem di un ser keri. Asta nos naturalesa humano, pa imperfecto cu e ta, ta refleha e amor di Dios. P’esei hopi biaha nos sa di experencia cu e palabranan di Hesus, “ta mas bendiciona pa duna cu pa ricibi”, ta berdad. (Echonan 20:35) Nos ta gusta expresa amor pasobra nos ta traha “segun e imagen di Dios.” (Genesis 1:27) Aunke Jehova tin hopi otro cualidad, amor ta e aspecto mas sobresaliente di su personalidad.

Obranan skirbi cu ta bin di Dios lo mester ta refleha su amor. E religionnan di mundo tin cantidad di obra cu a ser skirbi hopi tempo pasa. Te con leu e tipo di obranan aki ta refleha e amor di Dios?

Echo ta cu mayoria di texto religioso di antiguedad no ta duna mucho splicacion tocante con Dios ta stima nos of con nos por stima Dios. Ta p’esei miyones di hende no ta haya contesta ora nan puntra: “Dicon sufrimento y maldad ta sigui existi mientras cu nos ta mira prueba di e amor di Dios den creacion?” Di otro banda, Bijbel ta e unico obra religioso di antiguedad cu ta splica e amor di Dios plenamente. E ta splica nos tambe con nos por practica amor.

E Buki Tocante Amor

E Palabra di Dios, Bijbel, ta revela Jehova como “e Dios di amor.” (2 Corintionan 13:11) E ta describi con amor a motiva Jehova pa duna e prome hendenan un bida sin malesa y morto. Pero rebelion contra e autoridad di Dios a resulta den sufrimento pa humanidad. (Deuteronomio 32:4, 5; Romanonan 5:12) Jehova a dal paso pa restaura loke a bai perdi. E Palabra di Dios ta bisa: “Dios a stima mundo asina tanto, cu el a duna su Yiu unigenito, pa ken cu kere den dje no bai perdi, ma tin bida eterno.” (Juan 3:16) E Santo Scritura ta  revela e amor di Dios asta mas ainda ora e ta describi con Dios a percura un gobierno perfecto den man di Hesus pa restaura pas na humanidad obediente.​—Daniel 7:13, 14; 2 Pedro 3:13.

Bijbel ta resumi e obligacion di hende den e palabranan aki: “‘Stima [Jehova] bo Dios cu henter bo curason, y cu henter bo alma, y cu henter bo mente.’ Esaki ta e gran mandamento y e di prome. Y e di dos ta semehante: ‘Stima bo prohimo manera bo mes.’ Riba e dos mandamentonan aki henter e Lei . . . ta basa.” (Mateo 22:37-40) Bijbel ta afirma cu e ta inspira pa Dios. Siendo cu ta bisto cu e ta refleha e personalidad di Dios, nos por tin sigur cu e ta bin di “e Dios di amor.”​—2 Timoteo 3:16.

Ora nos aplica e norma aki, nos por identifica ki obranan skirbi di antiguedad ta bin realmente for di Dios. Amor tambe ta identifica adoradonan berdadero, pasobra nan ta imita Dios den mustra amor.

Con Nos Por Reconoce Hende Cu Ta Stima Dios

E hendenan cu realmente ta stima Dios ta sobresali, specialmente awor cu nos ta biba den loke Bijbel ta yama “e ultimo dianan.” Mas y mas, hende ta ‘stimado di nan mes, stimado di placa, stimado di placer mas bien cu stimado di Dios.’​—2 Timoteo 3:1-4.

Con bo por reconoce hende cu ta stima Dios? Bijbel ta bisa: “Esaki ta e amor di Dios, cu nos ta warda su mandamentonan.” (1 Juan 5:3) Amor pa Dios ta motiva hende pa respeta e normanan moral di Bijbel. Por ehempel, e Palabra di Dios ta contene lei relaciona cu relacion sexual y matrimonio. Relacion sexual ta ser permiti solamente den matrimonio, y matrimonio mester ta permanente. (Mateo 19:9; Hebreonan 13:4) Na Spaña, un señora cu a studia teologia a asisti na un reunion caminda Testigonan di Jehova tabata studia e leinan moral di Bijbel cu hopi interes. El a comenta: “Mi a sali for di e reunion edifica, no solamente pa e discursonan instructivo basa riba Bijbel, sino tambe pa e union cu ta reina entre e hendenan aki, nan normanan moral halto y nan conducta excelente.”

Banda di nan amor pa Dios, cristiannan berdadero ta ser identifica facilmente na e manera cu nan ta mustra amor na nan prohimo. Nan obra di mas importante ta di papia cu otro hende tocante e unico speransa pa humanidad, esta, e Reino di Dios. (Mateo 24:14) No tin nada cu por trece beneficionan mas duradero pa nan prohimo cu yuda nan adkiri conocemento di Dios. (Juan 17:3) Cristiannan berdadero ta demostra nan amor den otro maneranan tambe. Nan ta duna yudansa practico na hende cu ta sufriendo. Por ehempel, tempo cu un temblor a causa desaster na Italia, un corant local a informa cu Testigonan di Jehova ta “traha na un manera practico, sacando un man pa esnan cu ta sufri, sin precupa na ki religion nan ta pertenece.”

Ademas di stima Dios y nan prohimo, cristiannan berdadero ta stima otro. Hesus a bisa: “Un mandamento nobo mi ta duna boso, pa boso stima otro, y mescos cu ami a stima boso, pa boso tambe stima otro. Na esaki tur hende lo sa cu boso ta mi discipel, si boso tin amor un pa otro.”​—Juan 13:34, 35.

E amor cu cristiannan berdadero tin pa otro ta remarcablemente diferente? Un cria di cas cu yama Ema ta pensa cu si. E ta traha na La Paz, Bolivia, caminda diferencianan etnico hopi biaha ta separa hende rico for di hende pober. El a conta: “E prome biaha cu mi a bai un reunion di Testigo di Jehova, mi a mira un cabayero bon bisti sinta ta combersa cu un señora indjan. Nunca mi a yega di mira esei. Esei a pone mi realisa mesora cu esaki mester ta e pueblo di Dios.” Asina tambe un señora hoben di Brazil cu yama Miriam a bisa: “Mi no tabata sa con mi por ta felis, ni sikiera den mi famia. E prome biaha cu mi a mira hende demostra amor tabata entre e Testigonan di Jehova.” Na Merca, e director di noticia di un  canal di television a skirbi: “Si mas hende tabata biba e manera cu boso religion ta biba, e nacion aki lo no ta den e condicion cu e ta awor. Ami ta un periodista cu sa cu boso organisacion ta funda riba amor y un fe fuerte den e Creador.”

Busca Adoracion Berdadero

Amor ta un caracteristica cu ta distingui adoracion berdadero. Hesus a compara hayamento di e adoracion berdadero cu hayamento di e caminda corecto y scohe pa cana riba dje. Esei ta e unico caminda cu ta hiba na bida eterno. Hesus a bisa: “Drenta dor di e porta smal, pasobra hancho ta e porta y espacioso e caminda cu ta hiba na destruccion, y hopi ta esnan cu ta drenta dor di dje. Pasobra chikito ta e porta y smal e caminda cu ta hiba na bida, y poco ta esnan cu ta hay’e.” (Mateo 7:13, 14) Ta un grupo so di cristiannan berdadero ta cana unidamente cu Dios riba e caminda di adoracion berdadero. Pues, ta importa cua religion bo ta scohe. Si bo haya e caminda ei y bo scohe pa cana riba dje, bo a haya e mihor manera di biba, pasobra esei ta e caminda di amor.​—Efesionan 4:1-4.

Imagina bo e goso cu bo por tin segun cu bo ta cana riba e caminda di adoracion berdadero! Ta como si fuera bo ta cana cu Dios. Cerca Dios bo por haya sabiduria y siña kico ta amor di manera cu bo por tin bon relacion cu otro hende. Bo por siña tambe for di dje kico ta e proposito di bida, y bo por compronde e promesanan di Dios y haya un speransa pa futuro. Nunca lo duel bo di a busca e adoracion berdadero.

[Plachi na pagina 5]

Di e obranan religioso di antiguedad, ta Bijbel so ta revela e amor di Dios

[Plachi na pagina 7]

Ta facil pa reconoce cristiannan berdadero pasobra nan ta practica amor