Disfruta di Bida den e Temor di Jehova

“Teme [Jehova], boso su santonan, pasobra esnan cu ta tem’e no tin falta di nada.”​—SALMO 34:9.

1, 2. (a) Den ki dos manera contrario di otro cristiandad ta mira temor di Dios? (b) Ki preguntanan nos lo analisa awor?

PASTORNAN di cristiandad cu ta siña hende cu mester teme Dios, hopi biaha ta haci esei a base di e siñansa no biblico cu Dios ta castiga pecador eternamente den candela di fierno. E doctrina ei ta contrario na loke Bijbel ta siña tocante Jehova como un Dios di amor y husticia. (Genesis 3:19; Deuteronomio 32:4; Romanonan 6:23; 1 Juan 4:8) Otro pastornan di cristiandad ta siña net lo contrario. Nunca nan no ta bisa cu hende mester tin temor di Dios. Na luga di esei, nan ta siña hende cu Dios ta masha tolerante y ta acepta casi tur hende sin importa ki clase di bida nan ta hiba. Pero esei tampoco no ta loke Bijbel ta siña.​—Galationan 5:19-21.

² Echo ta cu Bijbel ta anima nos pa teme Dios. (Revelacion 14:7) E siñansa biblico ei ta lanta varios pregunta. Dicon un Dios amoroso kier pa nos tem’e? Ki clase di temor Dios ta rekeri? Con temor di Dios por beneficia nos? Nos lo considera e preguntanan aki segun cu nos ta sigui cu nos consideracion di Salmo 34.

Pakico Teme Dios

3. (a) Kico bo ta pensa di e mandamento pa teme Dios? (b) Dicon hende cu ta teme Jehova ta felis?

³ Como Creador y Gobernante Soberano di universo, Jehova merece nos temor. (1 Pedro 2:17) Sinembargo, e temor ei no ta un miedo extremo cu bo tin di un dios cruel. E ta un respet y admiracion profundo cu nos ta sinti pa e persona cu Jehova ta. Tambe e ta e temor di desagrad’e. Temor di Dios ta noble y edificante, no  algo spantoso y desalentador. Jehova, “e Dios felis”, kier pa su creacion humano disfruta di bida. (1 Timoteo 1:11, NW) Sinembargo, pa nos haci esei nos tin cu biba na harmonia cu e rekisitonan di Dios. Pa hopi hende esei ta nifica cu nan mester haci un cambio den nan estilo di bida. Tur esnan cu haci e cambio necesario ta experencia e berdad di e palabranan di e salmista David: “O purba y mira cu [Jehova] ta bon; bendiciona ta e hende cu ta tuma refugio den dje! O teme [Jehova], boso su santonan, pasobra esnan cu ta tem’e no tin falta di nada.” (Salmo 34:8, 9) Como cu hende cu ta teme Jehova tin un bon relacion cu ne, nan no falta nada di balor duradero.

4. Ki garantia tanto David como Hesus a duna?

⁴ Tuma nota cu como cu e texto tabata aplica den tempo di David, el a honra su hombernan dor di yama nan “santonan.” Nan tabata parti di Dios su nacion santo. Ademas, nan tabata risca nan bida pa sigui David. A pesar cu nan tabatin cu hui pa Rei Saul, David tabatin e confiansa cu Jehova lo a sigui percura pa nan necesidadnan basico. David a skirbi: “Leon chikito si tin necesidad y ta pasa hamber, ma esnan cu ta busca [Jehova] lo no tin falta di ningun cos bon.” (Salmo 34:10) Hesus a duna su siguidonan e mesun tipo di garantia.​—Mateo 6:33.

5. (a) Hopi siguido di Hesus a bin di ki clase di hende? (b) Ki conseho Hesus a duna tocante e asunto di temor?

⁵ Hopi di e hendenan cu a scucha Hesus tabata Hudiu di e clase menos privilegia y di condicion humilde. Pues, Hesus “a sinti compasion pa nan, pasobra nan tabata cansa y plama, manera carne sin wardado.” (Mateo 9:36) E personanan di condicion humilde ei lo tabatin e curashi pa sigui Hesus? Pa haci esei, nan lo mester a cultiva temor di Jehova, no di hende. Hesus a bisa: “No tene miedo di esnan cu ta mata e curpa, y cu despues di esei no por haci nada mas. Ma lo mi mustra boso ken boso mester teme. Teme Esun cu despues cu el a mata tin autoridad pa tira den [Gehena]; si, mi ta bisa boso, teme E! No t’asina cu cinco mofi ta wordo bendi pa dos placa? Y ni un di nan no ta wordo lubida dilanti di Dios. Di berdad, asta e drachinan di cabei riba boso cabes, tur ta conta. No tene miedo; boso bal mas cu un cantidad di mofi.”​—Lucas 12:4-7.

6. (a) Cua palabranan di Hesus a fortalece cristiannan? (b) Dicon Hesus ta e mihor ehempel di desplega temor di Dios?

⁶ Ora hende cu ta teme Jehova ta bou di presion di nan enemigonan pa stop di sirbi Dios, nan por corda riba e conseho aki di Hesus: “Ken cu confesa mi dilanti di hende, e Yiu di hende tambe lo confesa e hende ei dilanti di e angelnan di Dios; ma esun cu nenga mi dilanti di hende lo wordo nenga dilanti di e angelnan di Dios.” (Lucas 12:8, 9) E palabranan aki ta fortalece cristiannan, specialmente den paisnan caminda adoracion berdadero ta prohibi. E cristiannan ei ta sigui alaba Jehova discretamente na reunionnan cristian y den nan  ministerio publico. (Echonan 5:29) Hesus tabata e mihor ehempel di desplega “temor di Dios.” (Hebreonan 5:7, NW) Papiando di Hesus, e Palabra profetico a predeci: ‘E spirito di Jehova lo keda riba dje, e spirito di temor di Jehova. Y e lo tin delicia den e temor di Jehova.’ (Isaias 11:2, 3) Pues, Hesus ta sumamente cualifica pa siña nos e beneficionan di temor di Dios.

7. (a) Con cristiannan, de echo, ta acepta un invitacion similar na esun cu David a extende? (b) Con mayornan por sigui e bon ehempel di David?

⁷ Tur hende cu ta sigui e ehempel di Hesus y cu ta obedece su siñansanan, de echo ta acepta un invitacion similar na esun cu David a extende: “Bin, yiunan, scucha mi; lo mi siña boso e temor di [Jehova].” (Salmo 34:11) Tabata natural pa David yama su hombernan “yiunan”, pasobra nan a mir’e como nan lider. David di su parti a duna yudansa spiritual na su siguidonan pa nan por tabata uni y pa nan a disfruta di e aprobacion di Dios. Ki un excelente ehempel esei ta pa mayornan cristian! Jehova a duna nan autoridad relaciona cu nan yiunan pa ‘lanta nan den e disciplina y instruccion di Jehova.’ (Efesionan 6:4) Mayornan ta yuda nan yiunan disfruta di bida den e temor di Jehova ora nan ta considera asuntonan spiritual cu nan tur dia y ta conduci un estudio di Bijbel regular cu nan.​—Deuteronomio 6:6, 7.

Con pa Practica Temor di Dios den Nos Bida

8, 9. (a) Dicon un estilo di bida cu ta refleha temor di Dios ta asina atractivo? (b) Kico warda nos lenga ta ensera?

⁸ Manera a keda menciona caba, temor di Jehova no ta stroba nos di tin goso. David a puntra: “Ta ken ta e hende cu ta desea bida, y ta stima bida largo, pa e por mira bondad?” (Salmo 34:12) Ta bisto cu e temor di Jehova ta e factor importante pa disfruta di un bida largo y felis y pa mira bondad. Sinembargo, ta facil pa bisa: “Mi ta teme Dios.” Pero no ta facil pa demostra nos temor di Dios mediante nos conducta. P’esei David a splica con nos por demostra temor di Dios.

⁹ “Warda bo lenga di maldad, y bo lipnan di papia engaño.” (Salmo 34:13) Apostel Pedro a ser inspira pa cita e parti aki di Salmo 34 despues cu el a conseha cristiannan pa trata otro cu amor di ruman. (1 Pedro 3:8-12) Warda nos lenga di maldad ta nifica cu nos lo evita di plama redo perhudicial. En bes di haci esei, semper nos lo haci esfuerso pa papia cosnan edificante cu otro hende. Es mas, nos lo haci esfuerso pa demostra curashi y papia e berdad.​—Efesionan 4:25, 29, 31; Santiago 5:16.

10. (a) Splica kico kiermen aparta nos mes for di maldad. (b) Kico haci bon ta ensera?

¹⁰ “Aparta bo mes for di maldad y haci bon; busca pas y siguie.” (Salmo 34:14) Nos ta evita cosnan cu Dios ta condena, manera inmoralidad sexual, pornografia, ladronicia, spiritismo, violencia, buracheria y uzo di droga. Nos ta rechasa tambe entretenimento cu ta presenta e cosnan repugnante ei. (Efesionan 5:10-12) Mas bien, nos ta uza nos tempo pa haci bon. E bon di mas grandi cu nos por haci ta di participa cu regularidad den e trabou di predica e Reino y haci discipel, anto asina yuda otro hende gana salbacion. (Mateo 24:14; 28:19, 20) Haci bon ta ensera tambe prepara pa e reunionnan cristian y asisti na nan, duna contribucion pa e obra mundial, cuida nos Salon di Reino y mustra interes den e necesidad di cristiannan di menos recurso.

11. (a) Con David a practica loke el a predica tocante pas? (b) Kico abo por haci pa “busca pas y siguie” den e congregacion?

¹¹ David a pone un bon ehempel den busca pas y siguie. Dos biaha el a haya chens di mata Saul. Na ambos ocasion, el a evita violencia y despues a papia cu respet cu e Rei, cu e speransa di restaura pas. (1 Samuel 24:8-11; 26:17-20) Kico nos por haci awe ora un situacion ta menasa di perturba e pas di e congregacion? Nos lo mester “busca pas y siguie.”  Pues, si nos ta sinti cu e relacion entre nos y un ruman ta tenso, nos ta obedece e conseho di Hesus: “Reconcilia cu bo ruman prome.” Despues nos ta sigui cu otro aspectonan di adoracion berdadero.​—Mateo 5:23, 24; Efesionan 4:26.

Teme Dios Ta Trece Hopi Recompensa

12, 13. (a) Ki beneficionan actual hende cu ta teme Dios ta gosa di dje? (b) Ki tremendo recompensa adoradonan fiel lo disfruta di dje denter di poco?

¹² “E wowonan di [Jehova] ta riba e hustonan, y su horeanan ta atento pa scucha nan sclamacion.” (Salmo 34:15) E registro di Dios su trato cu David ta duna prueba cu e palabranan ei ta berdad. Awe, nos ta sinti un goso y pas mental profundo pasobra nos sa cu Jehova ta cuida nos. Nos tin e confiansa cu semper lo e duna nos loke nos tin mester, asta ora nos ta bou di hopi presion. Nos sa cu denter di poco tur adorado berdadero lo confronta e atake profetisa di Gog di Magog y e ‘dia temibel di Jehova.’ (Joel 2:11, 31; Ezekiel 38:14-18, 21-23) Sea cual sea e situacion cu nos lo tin cu confronta na e tempo ei, e palabranan di David lo aplica den nos caso tambe: “E hustonan ta sclama y [Jehova] ta tende, y ta libra nan for di tur nan angustianan.”​—Salmo 34:17.

¹³ Esta emocionante lo ta e tempo ei pa mira Jehova engrandece su gran nomber! Nos curason lo yena cu mas respet y admiracion cu nunca, y tur opositor lo haya un destruccion humiliante. “E cara di [Jehova] ta contra hacidonan di maldad, pa corta e recuerdo di nan kita for di riba Tera.” (Salmo 34:16) Lo ta un tremendo recompensa di por experencia e gran liberacion ei y drenta den Dios su husto mundo nobo!

Promesanan Cu Ta Yuda Nos Persevera

14. Kico lo yuda nos persevera a pesar di calamidad?

¹⁴ Mientrastanto, pa nos por sigui obedece Jehova den un mundo degrada y agresivo nos mester di perseverancia. Temor di Dios ta un gran yudansa segun cu nos ta cultiva obediencia. Debi na e tempo trabahoso cu nos ta biba aden, tin sirbidor di Jehova ta pasa dor di dificultadnan extremo cu, na moda di papia, ta kibra nan curason y laga nan cu un spirito abati. Sinembargo, nan por tin tur siguransa cu si nan acudi na Jehova, lo e yuda nan persevera. E palabranan di David ta transmiti berdadero consuelo: “[Jehova] ta cerca di e hende di curason kibra, y ta salba esnan di spirito abati.” (Salmo 34:18) Ta alentador cu David a sigui bisa: “Hopi ta e afliccionnan di e husto, ma [Jehova] ta libr’e for di nan tur.” (Salmo 34:19) Sin importa cuanto calamidad bin riba nos, Jehova ta suficiente fuerte pa libra nos.

15, 16. (a) Ki calamidad David a tende di dje poco despues cu el a compone Salmo 34? (b) Kico lo yuda nos wanta prueba?

 ¹⁵ Poco despues di a compone Salmo 34, David a tende di e calamidad cu a sosode cu e habitantenan di Nob, ora cu Saul a masacra nan y mayoria di e sacerdotenan. Esta doloroso lo mester tabata pa David ora e corda cu ta su bishita na Nob a provoca e rabia di Saul! (1 Samuel 22:13, 18-21) Sin duda David a acudi na Jehova pa yudansa, y siguramente el a haya consuelo den e speransa cu den futuro lo tin un resureccion di “e hustonan.”​—Echonan 24:15.

¹⁶ Awe, e speransa di resureccion ta fortalece nos tambe. Nos sa cu nada cu nos enemigonan haci no por causa nos daño permanentemente. (Mateo 10:28) David a expresa e mesun conviccion ei den e palabranan aki: “E ta cuida tur [e husto] su wesonan; ningun di nan no ta wordo kibra.” (Salmo 34:20) E versiculo ei tabatin un cumplimento literal den e caso di Hesus. Aunke nan a mata Hesus di un forma cruel, ni un di su wesonan no a wordo “kibra.” (Juan 19:36) Den un aplicacion mas amplio, Salmo 34:20 ta sigura nos cu sin importa ki prueba cristiannan ungi y nan compañeronan​—e “otro carnenan”​—ta confronta, nunca nan lo sufri daño permanentemente. Na moda di papia, nunca nan wesonan lo ser kibra.​—Juan 10:16.

17. Ki calamidad ta spera hende cu ta sigui odia e pueblo di Jehova?

¹⁷ Pa e malbadonan, e situacion ta otro. Pronto nan lo cosecha loke nan a sembra. “Maldad ta mata e malbado; y esnan cu ta odia e husto lo wordo condena.” (Salmo 34:21) Ken cu ta sigui opone e pueblo di Dios lo confronta e calamidad di mas piyo cu tin. Na e revelacion di Hesucristo, nan “lo paga e castigo di perdicion eterno.”​—2 Tesalonicensenan 1:9.

18. Den ki sentido e “multitud grandi” a ser libra caba, y kico nan lo experencia den futuro?

¹⁸ E salmo di David ta conclui cu e palabranan trankilisante aki: “[Jehova] ta redimi alma di su sirbidornan; y ningun di esnan cu ta tuma refugio den dje lo no wordo condena.” (Salmo 34:22) Casi na final di Rei David su reinado di 40 aña, el a bisa: “[Dios] a redimi mi bida for di tur angustia.” (1 Reinan 1:29) Mescos cu David, hende cu ta teme Jehova pronto lo por wak atras y alegra cu nan a ser redimi of libra for di cualkier condena debi na pica y rescata for di tur nan pruebanan. Ya caba mayoria di cristian ungi a ricibi nan recompensa celestial. “Un multitud grandi” for di tur nacion actualmente ta uni cu e resto di e rumannan di Hesus pa sirbi Dios, y como resultado nan ta gosa di un posicion limpi dilanti di Jehova. Esaki ta pasobra nan ta eherce fe den e poder di libra di e sanger drama di Hesus. Durante e benidero Reinado di Mil Aña di Cristo, lo aplica e pleno beneficionan di e sacrificio di rescate na nan, y asina eleva nan na perfeccion humano.​—Revelacion 7:9, 14, 17; 21:3-5.

19. Kico e miembronan di e “multitud grandi” ta determina pa haci?

¹⁹ Pakico e “multitud grandi” di adorado di Dios lo haya tur e bendicionnan aki? Pasobra nan ta determina pa sigui teme Jehova, y sirbie cu respet, admiracion y pleno obediencia. Si, e temor di Jehova ta haci bida placentero awor y ta yuda nos haya ‘gara riba loke ta e bida berdadero’, esta, bida eterno den Dios su mundo nobo.​—1 Timoteo 6:12, 18, 19; Revelacion 15:3, 4.

Bo Ta Corda?

• Dicon nos mester teme Dios, y kico teme Dios ta nifica?

• Ki efecto temor di Dios mester tin riba nos conducta?

• Ki recompensanan nos ta haya como cu nos ta teme Dios?

• Ki promesanan ta yuda nos persevera?

[Preguntanan di Estudio]

[Plachi na pagina 26]

Hende cu ta teme Jehova ta actua discretamente bou di prohibicion

[Plachi na pagina 28]

E mihor cos cu nos por haci pa nos prohimo ta di comparti e bon nobo di Reino cu nan