Felis di Por Warda Riba Jehova

BO A yega di come fruta berde? Sin duda bo no a gusta con el a smak. Fruta ta tuma tempo pa hecha, y definitivamente ta bale la pena warda pa esei sosode. Tin otro circunstancianan tambe den cua ta bale la pena pa nos warda. Bijbel ta bisa: “Ta bon pa warda den silencio riba e salbacion di SEÑOR.” (Lamentacion 3:26; Tito 2:13) Den ki maneranan cristiannan tin cu warda riba Jehova? Con nos por beneficia di warda riba dje?

Warda Riba Dios ​—Kico Esei Ta Ensera?

Como cristian, nos ta “sperando y purando e binida di e dia di Dios.” Cu anhelo nos ta spera riba e alivio cu nos lo haya ora cu Jehova causa e “destruccion di hendenan impio” of malbado. (2 Pedro 3:7, 12) Jehova mes tambe ta ansioso pa pone fin na tur maldad, pero e ta frena su mes ya asina e por salba cristiannan den un manera cu lo glorifica su nomber. Bijbel ta bisa: “Dios, aunke dispuesto pa demostra su furia y pa haci su poder conoci, a soporta cu hopi pasenshi e obhetonan di furia, prepara pa destruccion . . . Y el a haci asina pa e por haci conoci e rikesa di su gloria riba e obhetonan di misericordia.” (Romanonan 9:22, 23) Jehova sa ki ora ta e momento oportuno pa salba su pueblo awe, mescos cu el a haci den tempo di Noe. (1 Pedro 3:20) Pues, warda riba Dios ta ensera warda riba su tempo pa actua.

Segun cu nos ta warda riba e dia di Jehova, nos lo por sinti nos de bes en cuando bastante angustia ora nos mira con e normanan moral di e mundo rond di nos constantemente ta bai mas atras. Na momentonan asina ta bon pa pensa riba e palabranan di Dios su profeta Mikeas, kende a skirbi: “E persona fiel a perece for di e Tera, y no tin persona recto meimei di hende.” Anto el a agrega: “Pa loke t’ami, lo mi warda cu speransa riba SEÑOR; lo mi spera [“lo mi mustra un actitud di warda”, NW] riba e Dios di mi salbacion.” (Mikeas 7:2, 7) Kico ta e “actitud di warda” cu nos lo mester cultiva? Ora nos sa tin cu warda, esei hopi biaha ta irita nos. Pues, con nos por tin goso mientras cu nos ta warda riba Dios?

Felis Mientras Nos Ta Warda

Nos por siña e actitud corecto for di Jehova. Nunca e no a stop di ta “e Dios felis.” (1 Timoteo 1:11, NW) E ta felis mientras cu e ta warda pasobra e ta sigui traha den direccion di cumpli cu su proposito pa eleva hende cu ta stim’e na e nivel di perfeccion locual tabata su intencion for di ora cu el a traha hende. (Romanonan 5:12; 6:23) Anto Jehova ta mira e bon resultado di su trabou: miyones di hende a ser atrai na adoracion berdadero. Hesus a bisa: “Mi Tata ta traha te awor y mi tambe ta traha.” (Juan 5:17) Haci cos pa otro hende ta un factor fundamental pa ta felis. (Echonan 20:35) Asina tambe, cristiannan berdadero no ta sinta warda cu man crusa. Al contrario, nan ta sigui traha pa yuda hende siña tocante e proposito di Dios pa humanidad.

Hende fiel semper a keda satisfecho cu nan por alaba Dios mientras cu nan ta warda riba su tempo pa actua. Tuma por ehempel salmista David. David su rei a persiguie, un compañero intimo a traicion’e y su yiu a bira contra dje. Acaso David, den cada un di e  circunstancianan aki, lo por tabata felis mientras el a warda pa haya alivio na Jehova su debido tempo? Salmo 71, skirbi evidentemente pa David, ta bisa: “Pa loke t’ami, lo mi spera continuamente, y lo mi alaba bo ainda mas y mas. Mi boca lo conta di bo husticia y di bo salbacion henter dia.” (Salmo 71:14, 15) En bes di warda tur frustra, David a expresa goso pasobra el a keda ocupa alabando Jehova y fortaleciendo otronan den adoracion berdadero.​—Salmo 71:23.

Warda riba Jehova no ta algo cu ta fada nos, manera ora nos ta warda riba un bus cu ta lat. E ta mas manera ora mayornan ta warda cu goso mientras nan yiu ta desaroya den un persona adulto cu nan por ta orguyoso di dje. E añanan ei ta yena cu actividad​—entrenamento, instruccion y disciplina​—cu tin como meta pa alcansa e resultado desea. Den mesun manera, nos cu ta warda riba Jehova ta sinti nos felis di por yuda otro hende hala cerca Dios. Nos tambe kier gana Dios su aprobacion y, al final, salbacion.

No Perde Speransa

Warda riba Jehova ta ensera sigui stim’e y sirbie sin perde speransa. Esaki por ta un reto. Hopi sirbidor di Dios awe ta biba den comunidadnan caminda hende ta haci bofon di ken cu ta hiba un bida basa riba fe den e promesanan di Dios. Pero considera e ehempel di e fiel Israelitanan cu a mantene nan speransa bibo durante e exilio di 70 aña na Babilonia. Kico a yuda nan haci esei? Sin duda, lesamento di e salmonan a fortalece nan. Un salmo hopi animante cu kisas a ser skirbi rond di e tempo ei ta bisa: “Mi speransa ta den su palabra. Mi alma ta spera riba [Jehova], mas cu e guardianan ta spera dia habri; si, mas cu e guardianan ta spera dia habri. O Israel, spera riba [Jehova].”​—Salmo 130:5-7.

E Hudiunan cu a mantene nan speransa bibo dor di lesa y papia tocante e speransa ei, a haya nan recompensa ora cu Babilonia finalmente a cai den man di invasor. Miles di Hudiu fiel rapidamente a biaha pa Jerusalem. Relaciona cu e tempo ei, un salmo ta bisa: “Dia SEÑOR a haci esnan di Sion, cu tabata den cautiverio, regresa, . . . nos boca a yena cu harimento.” (Salmo 126:1, 2) E Hudiunan ei no a entrega, sino mas bien a sigui fortalece nan fe. Ademas, nunca nan no a stop di canta e alabansa di Jehova.

Den e mesun manera, cristiannan berdadero cu ta warda riba Dios durante e ‘tempo di fin’ aki ta haci esfuerso constantemente pa mantene nan fe bibo. Nan ta studia e Palabra di Dios, ta anima otro y ta sigui alaba Jehova pa medio di e predicacion di e bon nobo di su Reino.​—Mateo 24:3, 14.

Warda Riba Dios pa Beneficia di Disciplina

Dios su profeta Jeremias a skirbi: “Ta bon pa warda den silencio riba e salbacion di SEÑOR.” (Lamentacion 3:26) Jeremias tabata kiermen cu lo tabata bon pa e pueblo di Dios no keha tocante e manera cu Jehova  a disciplina nan ora cu el a permiti Jerusalem ser destrui. Mas bien, nan mester a beneficia di e experencia dor di medita riba nan desobediencia y riba e necesidad pa nan cambia nan actitud.​—Lamentacion 3:40, 42.

E manera cu disciplina di Jehova ta beneficia nos por ser compara cu e manera cu fruta ta hecha. Bijbel ta bisa tocante disciplina cu ta bin di Dios: “Pa esnan cu a wordo entrena dor di dje, despues e ta duna e fruta pacifico di husticia.” (Hebreonan 12:11) Mescos cu fruta tin mester di tempo pa hecha, asina nos tin mester di tempo pa cambia nos actitudnan a base di e entrenamento cu Dios ta percura. Por ehempel, si debi na mal comportacion nos a perde algun privilegio den congregacion, e echo cu nos ta dispuesto pa warda riba Dios lo yuda nos pa no desanima y entrega. Den tal circunstancia, e palabranan inspira di David ta masha alentador: “[Dios] su rabia ta pa un momento so, su fabor ta pa bida largo; yoramento por dura un anochi, ma un grito di alegria ta bin ora dia ta habri.” (Salmo 30:5) Si nos cultiva un actitud di warda y aplica e conseho cu nos ta haya for di Dios su Palabra y su organisacion, nos tempo pa “un grito di alegria” lo yega.

Crece na Madures Ta Tuma Tempo

Si bo ta hoben of recien batisa, kisas bo ta ansioso pa haya algun responsabilidad den e congregacion cristian. Pero ta tuma tempo pa desaroya e madures spiritual necesario pa carga tal responsabilidad. P’esei, probecha di e prome añanan pa bo crece den sentido spiritual. Por ehempel, e periodo di hubentud ta un bon tempo pa lesa e Bijbel completo, pa desaroya cualidadnan cristian y pa siña e arte di haci discipel. (Eclesiastes 12:1) Si humildemente bo desplega un actitud di warda, Jehova su tempo pa bo haya mas responsabilidad lo yega.

Pa e trabou di haci discipel tambe nos mester tin pasenshi. Mescos cu un cunukero tin cu sigui muha e simiña te ora cu Dios lag’e crece, asina ta bai cu e trabou di haci discipel. (1 Corintionan 3:7; Santiago 5:7) Pa cultiva fe y aprecio pa Jehova den curason di otro hende ta tuma varios luna of asta añanan di duna estudio di Bijbel cu pasenshi. Warda riba Jehova ta ensera persevera, asta ora cu na prome instante studiantenan no ta reacciona faborablemente riba loke nan ta siña. Si a lo menos nan ta mustra un poco aprecio, esei por ta un señal cu nan ta reaccionando bon riba e spirito di Jehova. Cu pasenshi, lo bo por tin e goso di mira con Jehova ta laga bo studiante crece bira un discipel di Cristo.​—Mateo 28:20.

Expresa Amor dor di Warda

Warda riba un persona por ta un expresion di amor y confiansa. Como un ehempel, laga nos considera e situacion di un ruman muher di edad cu ta biba den un region di desierto den e seronan di Andes, na Sur America. E ruman di edad aki hunto cu un otro ruman muher spiritual ta e unico Testigonan di Jehova den nan pueblito. Bo por imagina con ansioso nan ta warda riba bishita di nan otro rumannan cristian? Un biaha, un superintendente biahero tabata riba caminda pa bishita nan pa prome bes, pero el a dual. Pa e por a haya e caminda, e mester a bai bek na su punto di salida. Esei a tum’e varios ora. Tabata basta rato despues di meianochi ora cu finalmente el a mira e pueblito den distancia. Como cu no tabatin coriente den e area, el a keda sorprendi di mira un lus ta briya. Esta felis e tabata ora cu finalmente el a yega na entrada di e pueblito y a mira cu e lus tabata di un lampi di kerosin cu e ruman di edad tabatin teni na laira! E ruman muher tabatin sigur cu lo el a bin, pues el a keda ward’e.

Demostrando e mesun pasenshi cu e ruman muher ei, nos ta felis di por warda riba Jehova. Nos tin sigur cu lo e cumpli cu su promesanan. Anto mescos cu e superintendente biahero, nos ta aprecia esnan cu amorosamente ta warda riba nos. P’esei no ta un sorpresa cu Dios tambe ta aprecia esnan cu ta warda riba dje. Bijbel ta bisa: “[Jehova] ta hiba gusto . . . den esnan cu ta spera riba su misericordia.”​—Salmo 147:11.

[Plachi na pagina 18]

Personanan cu ta ocupa alabando Dios, ta haya goso den warda riba Jehova