Laga Nos Halsa Jehova Su Nomber Hunto

“O engrandece [Jehova] cu mi, y laga nos halsa su nomber hunto.”​—SALMO 34:3.

1. Ki excelente ehempel Hesus a pone durante su ministerio riba Tera?

DURANTE e anochi di 14 di nisan di aña 33, Hesus hunto cu su apostelnan a canta alabansa na Jehova den e sala ariba di un cas na Jerusalem. (Mateo 26:30) Tabata e ultimo biaha cu Hesus lo a haci esei hunto cu su apostelnan. Sinembargo, tabata masha apropia cu el a conclui e reunion cu e tabatin cu nan den e manera ei. Hesus a alaba su Tata for di comienso te final di su ministerio riba Tera, y cu entusiasmo el a haci e nomber di su Tata conoci. (Mateo 4:10; 6:9; 22:37, 38; Juan 12:28; 17:6) De echo, Hesus a ripiti e caluroso invitacion di e salmista: ‘O engrandece Jehova cu mi, y laga nos halsa su nomber hunto.’ (Salmo 34:3) Ki un excelente ehempel pa nos imita!

2, 3. (a) Con bin nos sa cu Salmo 34 tin nificacion profetico? (b) Kico nos lo considera den e articulo aki y esun cu ta sigui?

² Un par di ora despues di a canta alabansa hunto cu Hesus, apostel Juan tabata testigo di un suceso completamente diferente. El a mira nan mata su Shon hunto cu dos criminal riba staca di tormento. Soldanan Romano a kibra pia di e dos criminalnan pa nan a muri mas lihe. Sinembargo, Juan a informa cu nan no a kibra Hesus su pia. Ora e soldanan a yega na Hesus, e tabata morto caba. Juan a splica den su Evangelio cu esaki tabata cumplimento di un otro parti di Salmo 34: “Ni un weso di dje lo no wordo kibra.”​—Juan 19:32-36; Salmo 34:20.

³ Salmo 34 tin hopi punto mas cu ta interesa cristiannan. P’esei den e articulo aki y esun cu ta sigui, nos lo repasa bou di ki circunstancia David a skirbi e salmo y despues nos lo considera e contenido alentador di e salmo mes.

David Ta Hui for di Saul

4. (a) Dicon a ungi David como futuro rei di Israel? (b) Con bin Saul a cuminsa ‘stima David masha’?

⁴ Tempo cu David tabata jong, Saul tabata Rei di Israel. Sinembargo, Saul a bira desobedecido y a perde e aprobacion di Jehova. Pa e motibo ei profeta Samuel a bis’e: “SEÑOR a scheur e reinado di Israel kit’e for di bo, y a duna esaki na bo prohimo, kende ta mihor cu bo.” (1 Samuel 15:28) Despues Jehova a manda Samuel bai ungi David, e yiu mas chikito di Isai, pa bira e siguiente rei di Israel. Rei Saul entre tanto a cuminsa sufri di melancolia y mal beis ya cu e no tabatin e spirito di Dios mas riba dje. David tabata un bon musico, y nan a trec’e na Gabaa pa sirbi e Rei. E musica di David a duna Saul alivio, y Saul a cuminsa ‘stima David masha.’​—1 Samuel 16:11, 13, 21, 23.

5. Dicon Saul su actitud pa cu David a cambia, y kico David a hay’e obliga ta haci?

⁵ Segun cu tempo a pasa, Jehova a duna prueba cu e tabata cu David. Jehova a yud’e conkista e gigante Filisteo Goliat y a apoya David segun cu el a haya fama den Israel pa su habilidad militar. Sinembargo, Jehova su bendicion riba David a haci Saul jaloers, y el a cuminsa odia David. Dos biaha ora cu David tabata toca su harpa dilanti di Saul, e Rei a tira  su lansa riba dje. Ambos biaha David a logra scapa di e lansa. Ora Saul a haci un di tres intento pa mata David, e futuro rei di Israel a realisa cu e tabatin cu hui pa scapa su bida. Como cu Saul a persisti den su intentonan pa captur’e y mat’e, David a dicidi di bai busca refugio pafo di e teritorio di Israel.​—1 Samuel 18:11; 19:9, 10.

6. Dicon Saul a manda mata e habitantenan di Nob?

⁶ Riba caminda pa bai e frontera di Israel, David a para na e stad di Nob unda e tabernakel di Jehova tabata situa. Aparentemente tabatin un grupo di homber hoben cu a compaña David den su huida y el a bai busca cos di come pa nan y pa e mes. Despues Saul a bin haya sa cu e sumo sacerdote a duna David y su hombernan algo di come y e spada cu David a kita for di Goliat ora el a mat’e. Rabia, Saul a laga mata tur e habitantenan di e stad, incluso 85 sacerdote.​—1 Samuel 21:1, 2; 22:12, 13, 18, 19; Mateo 12:3, 4.

David Ta Bolbe Scapa for di Morto

7. Dicon Gat no tabata un bon luga di sconde pa David?

⁷ Di Nob, David a hui bai un 40 kilometer den direccion west te den teritorio Filisteo y a busca refugio cerca Rei Akis na Gat, e stad natal di Goliat. Podise David a rasona cu Gat lo ta e ultimo luga cu Saul lo a busc’e. Pero poco despues, sirbidornan di e Rei di Gat a reconoce David. Ora David a tende cu nan a reconoc’e, el “a haya masha miedo di Akis, Rei di Gat.”​—1 Samuel 21:10-12.

8. (a) Kico Salmo 56 ta conta nos di David su experencia na Gat? (b) Con David a scapa di baina for di morto?

⁸ E Filisteonan e ora ei a captura David. Podise tabata na e ocasion aki cu David a compone e salmo conmovedor den cua e ta pidi Jehova: “Pone mi lagrimanan den bo butishi.” (Salmo 56:8 y titulo di introduccion) Pues el a expresa su confiansa cu Jehova lo no a lubida su tristesa pero amorosamente lo a cuid’e y proteh’e. Pero David a pensa tambe  riba un strategia pa gaña e Rei Filisteo. El a actua como si fuera e tabata loco. Ora Rei Akis a mira esaki, el a scual su sirbidornan pasobra nan a trece un homber “loco” su dilanti. Tabata bisto cu Jehova a bendiciona David su strategia. Nan a core cu ne for di e stad y di baina el a bolbe scapa for di morto.​—1 Samuel 21:13-15.

9, 10. Pa ki motibo David a skirbi Salmo 34, y ken David lo por tabatin na mente ora el a compone e salmo?

⁹ Bijbel no ta bisa si David su hombernan a hui bai Gat hunto cu ne of si nan a keda vigila den e pueblitonan djis pega den Israel. Loke sea tabata e caso, nan lo mester tabatin un reencuentro felis ora cu David a informa nan con Jehova a bolbe scap’e. E suceso ei tabata e base pa Salmo 34, manera e titulo di introduccion di e salmo ta indica. Den e prome shete versiculonan di e salmo, David ta alaba Dios pasobra el a libr’e y ta invita su apoyadonan pa uni cu ne den halsa Jehova como e Gran Rescatador di Su pueblo.​—Salmo 34:3, 4, 7.

¹⁰ David cu su hombernan a haya proteccion den e cueba di Adulam situa den un region di Israel yen di sero, un 15 kilometer oost di Gat. Einan, Israelitanan cu tabata malcontento cu e situacion bou di e gobernacion di Rei Saul a bin y a join nan. (1 Samuel 22:1, 2) Ora David a compone e palabranan di Salmo 34:8-22, kisas e tabatin e personanan ei na mente. E recordatorionan den e versiculonan ei ta importante pa nos awe tambe, y nos siguramente lo beneficia di un consideracion detaya di e bunita salmo aki.

Bo Interes Principal Ta Mescos cu di David?

11, 12. Ki motibonan nos tin pa alaba Jehova constantemente?

¹¹ “Lo mi bendiciona [Jehova] den tur tempo; su alabansa lo ta continuamente den mi boca.” (Salmo 34:1) Bibando como fugitivo, David lo mester tabatin hopi precupacion relaciona cu su sosten material, pero manera e palabranan aki ta mustra, e no a permiti su precupacionnan diario stroba su determinacion di alaba Jehova. Ki un excelente ehempel esei ta pa nos ora cu nos ta confronta dificultad! Sea nos ta na scol, trabou of cu nos rumannan cristian of den e ministerio publico, nos deseo principal lo mester ta pa alaba Jehova. Djis pensa riba e cantidad di motibonan cu nos tin pa haci esei! Por ehempel, no tin fin na loke nos por descubri y disfruta di dje den Jehova su obranan maraviyoso di creacion. Anto pensa riba loke Jehova a logra pa medio di e parti terenal di su organisacion! Aunke hende fiel ta imperfecto, toch Jehova a uza nan na un gran manera den nos tempo. Con e obranan di Dios ta na comparacion cu e obranan di hende cu mundo ta adora como idolo? Bo no ta di acuerdo cu David, kende a skirbi tambe: “No tin ningun manera bo entre e diosnan, o Señor, tampoco no tin ningun obra manera bo obranan”?​—Salmo 86:8.

¹² Mescos cu David, nos ta sinti nos motiva pa alaba Jehova constantemente pa su obranan incomparabel. Es mas, ta masha emocionante pa nos di sa cu e Reino di Dios ta awor den man di Hesucristo, e Heredero permanente di David. (Revelacion 11:15) Esaki ta nifica cu fin di e sistema di cosnan aki ta cerca. E futuro eterno di mas cu seis mil miyon hende ta den wega. Nunca prome no tabata asina urgente pa conta otro hende tocante e Reino di Dios y loke lo e haci pronto pa humanidad, y tambe yuda nan alaba Jehova hunto cu nos. Un cos ta sigur, nos prioridad den bida lo mester ta pa uza tur oportunidad cu presenta pa anima hende pa acepta e “evangelio” of bon nobo aki prome cu ta lat.​—Mateo 24:14.

13. (a) Den ken David a broma, y ki clase di hende a reacciona? (b) Con hende manso ta ser atrai na e congregacion cristian awe?

¹³ “Mi alma lo gloria den [Jehova]; e humildenan lo tende y regociha.” (Salmo 34:2)  Aki David no a gloria, es decir broma, den ningun logro personal. Por ehempel, e no a broma di e manera cu el a engaña e rei di Gat. El a realisa cu ta Jehova a proteh’e ora cu e tabata na Gat y cu el a scapa cu Jehova su yudansa. (Proverbionan 21:1) Pues, David no a broma of gloria den su mes, sino den Jehova. Como cu David a engrandece Jehova, hende humilde of manso a ser atrai na Jehova. Hesus tambe a engrandece e nomber di Jehova, y esaki a atrae hende humilde y dispuesto pa siña na Jehova. Awe, hende manso di tur nacion ta ser atrai na e congregacion internacional di cristiannan ungi di cua Hesus ta e Cabes. (Colosensenan 1:18) Tin dos cos cu ta motiva curason di e hendenan manso ei. Di prome ta ora nan tende e nomber di Dios ser glorifica pa su sirbidornan humilde y di dos ta ora nan ta tende e mensahe di Bijbel, cu e spirito santo di Dios ta haci posibel pa nan compronde.​—Juan 6:44; Echonan 16:14.

E Reunionnan Ta Fortalece Nos Fe

14. (a) David a keda satisfecho cu alaba Jehova den priva so? (b) Ki ehempel Hesus a pone relaciona cu reunionnan pa adoracion?

¹⁴ “O engrandece [Jehova] cu mi, y laga nos halsa su nomber hunto.” (Salmo 34:3) David no a keda satisfecho cu alaba Jehova den priva so. Calurosamente el a invita su compañeronan pa uni cu ne den halsa Dios su nomber. Asina tambe Hesucristo, e David Mayor, tabatin goso den alaba Jehova publicamente; sea tabata na e sinagoga local, na e fiestanan na e tempel di Dios na Jerusalem y den compania di su siguidonan. (Lucas 2:49; 4:16-19; 10:21; Juan 18:20) Ki un privilegio gososo nos tin di por sigui e ehempel di Hesus y alaba Jehova na tur ocasion posibel hunto cu nos rumannan den fe, specialmente awor cu nos “ta mira cu e dia ta yegando cerca”!​—Hebreonan 10:24, 25.

15. (a) Ki efecto e experencia di David tabatin riba su hombernan? (b) Con nos ta beneficia ora nos asisti na nos reunionnan?

¹⁵ “Mi a busca [Jehova], y el a contesta mi, y a libra mi for di tur mi temornan.” (Salmo 34:4) E experencia aki tabata importante pa David. P’esei el a sigui bisa: “E pober hende aki a sclama y [Jehova] a tend’e, y a salb’e for di tur su angustianan.” (Salmo 34:6) Ora nos ta asocia cu nos rumannan den fe, nos tin hopi oportunidad pa conta experencianan edificante cu ta mustra con Jehova a yuda nos wanta circunstancianan dificil. Esaki ta  fortalece e fe di nos rumannan, mescos cu e expresionnan di David a fortalece e fe di su apoyadonan. Den e caso di David, su compañeronan “a hisa cara mira na [Jehova] y a keda radiante, y nunca nan cara lo keda na berguensa.” (Salmo 34:5) Aunke nan tabata hui for di Rei Saul, nan no a sinti berguensa. Nan tabatin sigur cu Dios a respalda David, y nan caranan tabata radiante. Den un manera similar, tanto personanan recien interesa como esnan cu tin hopi aña como cristian berdadero ta acudi na Jehova pa sosten. Como cu personalmente nan a experencia su yudansa, nan caranan radiante ta refleha nan determinacion pa keda fiel.

Sea Gradicido pa e Yudansa for di Angel

16. Con Jehova a uza su angelnan pa rescata nos?

¹⁶ “E angel di [Jehova] ta campa rond di esnan cu ta tem’e, y ta rescata nan.” (Salmo 34:7) David no a mira e echo cu Jehova a rescat’e como algo cu por a pasa cu ne so. Ta berdad cu David tabata e ungi di Jehova, e futuro rei di Israel; pero e tabata sa cu Jehova ta uza su angelnan pa cuida tur su adoradonan fiel, sin importa cu nan ta prominente of di condicion humilde. Den nos tempo, adoradonan berdadero tambe a experencia e proteccion cu Jehova ta duna. Na Alemania Nazi​—y tambe na Angola, Malawi, Mozambique y hopi otro pais mas​—autoridadnan a hiba campaña pa elimina Testigonan di Jehova. Nan esfuersonan tabata en vano. Na luga di ser elimina, e pueblo di Jehova den e paisnan ei ta sigui prospera segun cu nan ta halsa Dios su nomber hunto. Con bin? Pasobra Jehova ta uza su angelnan santo pa proteha y guia su pueblo.​—Hebreonan 1:14.

17. Den ki maneranan e angelnan di Dios ta yuda nos?

¹⁷ Ademas, e angelnan di Jehova por maniobra asuntonan di tal manera cu ken cu ta pone otro hende trompica ta ser saca for di entre e pueblo di Jehova. (Mateo 13:41; 18:6, 10) Anto maske nos kisas no ta conciente di esaki na e momento cu e sosode, angelnan ta elimina obstaculonan cu lo por stroba nos sirbishi na Dios, y nan ta proteha nos di cosnan cu lo por pone nos relacion cu Jehova na peliger. Mas importante ainda, nan ta guia nos den e trabou di declara e bon nobo of “evangelio eterno” na henter humanidad, incluso na luganan caminda ta efectua e trabou di predica bou di circunstancianan peligroso. (Revelacion 14:6) E literatura biblico publica pa Testigonan di Jehova hopi biaha a relata evidencia di yudansa angelical. * E experencianan ei ta mucho hopi pa considera nan como puro casualidad.

18. (a) Kico ta necesario pa nos por beneficia di yudansa angelical? (b) Kico nos lo considera den e siguiente articulo?

¹⁸ Pa sigui beneficia di guia y proteccion angelical, nos tin cu sigui halsa Jehova su nomber a pesar di oposicion. No lubida cu e angel di Jehova ta campa solamente ‘rond di esnan cu ta teme Jehova.’ Kico esaki ta indica? Kico ta e temor di Dios, y con nos por cultiv’e? Dicon un Dios amoroso lo kier pa nos tem’e? Nos lo trata e preguntanan aki den e siguiente articulo.

[Nota]

Con Lo Bo Contesta?

• Ki pruebanan David a wanta como yoncuman?

• Mescos cu David, kico ta nos interes principal?

• Con nos ta mira e reunionnan cristian?

• Con Jehova ta uza su angelnan pa yuda nos?

[Preguntanan di Estudio]

[Mapa na pagina 21]

(Pa e texto den su formato completo , wak e publicacion)

Rama

Gat

Ziklag

Gabaa

Jerusalem

Adulam

Keila

Hebron

Zif

Hores

Maon

Nob

Betlehem

En-gadi

Carmelo

Lama Salo

[Reconocemento]

Mapa: Based on maps copyrighted by Pictorial Archive (Near Eastern History) Est. and Survey of Israel

[Plachi na pagina 21]

Asta como fugitivo, David a halsa Jehova su nomber

[Plachi na pagina 23]

Nos fe ta bira mas fuerte segun cu nos ta scucha e experencianan edificante cu ta ser relata na nos reunionnan cristian