Storia di Bida

Sperando Riba un Reino Cu ‘No Ta Parti di Mundo’

Segun e relato di Nikolai Gutsulyak

Durante 41 dia y anochi, mi a haya mi meimei di un rebelion den prizon. Diripiente zonido di bala di cayon a lanta mi fo’i soño. Tanki di guera y solda a basha bini den e campamento di prizon y ataca e presonan. Mi bida tabata na peliger.

CON bin mi a haya mi den e situacion aki? Laga mi splica. Esaki a sosode na aña 1954. E tempo ei mi tabatin 30 aña. Mescos cu hopi Testigo di Jehova cu tabata biba bou di e regimen Sovietico, autoridadnan a sera mi den prizon pa motibo cu mi a keda neutral den asuntonan politico y pa motibo cu mi a papia cu otro hende tocante e Reino di Dios. Nos grupo di Testigo encarsela tabata consisti di 46 hende homber y 34 hende muher. Nan a tene nos den un campo di trabou forsa den cercania di e pueblito di Kengir, parti central di Kazakhstan. Ei nos tabata biba meimei di miles di otro preso.

Josif Stalin, lider di Union Sovietico, a muri e aña anterior. Hopi preso a spera cu e gobierno nobo na Moscu lo a duna oido na nan reclamonan tocante e condicionnan deplorabel di prizon. Cu tempo malcontento bou di e presonan a hiba na un rebelion abierto den prizon. Durante e confrontacionnan cu a sigui, nos como Testigo di Jehova tabatin cu splica nos posicion na e rebeldenan agita y tambe na e bewakernan militar. Pa nos a tuma e posicion neutral aki nos mester tabatin fe den Dios.

 Rebelion!

Dia 16 di mei e rebelion den e campamento di prizon a cuminsa. Dos dia despues, mas cu 3.200 preso a nenga di bai traha, exigiendo mihor condicionnan den e campamento y cierto derechonan pa esnan cu tabata preso politico. Masha lihe un cos a hiba na otro. Prome, e rebeldenan a core cu e bewakernan for di e campamento. Despues nan a traha buraco den waya di e cura rond di e tereno. Siguientemente nan a tumba e murayanan cu tabata separa e presonan masculino for di esnan femenino, creando e asina yama baraknan di famia. Den e dianan di euforia cu a sigui, algun preso asta a casa cu otro, cu ceremonianan di casamento efectua pa pastornan cu tambe tabata encarsela. Den e tres areanan di e campamento caminda e lantamento a cuminsa, mayoria di e 14.000 presonan a participa den e rebelion.

E rebeldenan a forma un comite di campamento pa negosha cu e militarnan. Sinembargo, no a tarda mucho cu miembronan di e comite a cuminsa discuti cu otro, y control di e campamento a bin cai den man di e elementonan mas extremista. E ambiente a bira mas y mas hostil. E lidernan rebelde a organisa un departamento di siguridad, un departamento militar y un departamento di informacion pa mantene “ordo.” E lidernan tabata uza loudspeaker pega riba staca rond e campamento pa plama mensahenan yen di fervor y asina mantene e animo di rebelion na halto. E rebeldenan a stroba otro hende di hui, a castiga esnan cu tabata contra nan y a declara cu nan lo no a basila pa mata ken cu nan no a aproba. Asta tabata core rumor cu nan a ehecuta algun preso caba.

Ya cu e rebeldenan tabata spera un atake militar, nan a prepara nan mes cuidadosamente pa defende nan mes. Pa haci sigur cu e mayor cantidad di preso posibel lo tabata ekipa pa defende e campamento, e lidernan a duna ordo pa tur preso arma nan mes. Pa haci esei, e presonan a kita e baranan di hero for di e bentananan y a traha cuchiu y otro armanan cu e metal. Asta nan a logra haya scopet y explosivo.

Presion pa Join e Rebelion

Un dia dos rebelde a acerca mi. Un di nan a saca un cuchiu cu nan a caba di slijp. E di: “Tuma esaki! Lo bo bai tin mester di dje pa bo proteccion.” Den silencio mi a pidi Jehova yuda mi keda calmo. Mi a contest’e: “Mi ta un cristian, un Testigo di Jehova. Ami cu e otro Testigonan ta akiden pasobra nos ta bringa, no contra hende, sino contra forsanan spiritual invisibel. Nos armanan contra nan ta nos fe y nos speransa den e Reino di Dios.”​—Efesionan 6:12.

Pa mi sorpresa, e homber a sacudi cabes cu el a  compronde. Sinembargo, e otro homber si a dal mi duro. Despues nan a bai. E rebeldenan tabata pasa di barak pa barak pa purba forsa e Testigonan pa join e lantamento. Pero tur nos rumannan cristian a nenga.

Na un reunion di e comite di e rebeldenan nan a papia tocante e posicion neutral di Testigonan di Jehova. “Miembronan di tur religion​—pentecostal, adventista, baptista y tur otro hende​—ta uniendo nan mes cu e lantamento. Ta Testigonan di Jehova so a nenga”, nan a remarca. “Kico nos ta bai haci cu nan?” Un miembro di e comite a sugeri pa tira un di e Testigonan den e forno di prizon pa hinca miedo den nos. Pero un exoficial militar, un preso respeta, a lanta para y bisa: “No ta sabi pa haci esei. Nos mester sera nan tur den un solo barak net na rand di e campamento, banda di e porta. E ora ei, si e ehersito ataca nos cu tanki, e Testigonan lo ta e promenan cu nan lo pasa riba dje. Anto nos lo no ta esnan culpabel di nan morto.” E otronan a acepta su sugerencia.

Den un Posicion Peligroso

Un poco despues di esei, presonan tabata cana rond den e campamento gritando: “Testigonan di Jehova, sali pafo!” Anto nan a manda nos tur 80 den direccion di un barak na rand di e campamento. Nan a saca e camanan di piso for di e barak pa traha mas espacio paden y a ordena nos pa drenta. E barak ei a bira nos prizon den e prizon.

Pa haya poco privasidad, e rumannan muher cristian den nos grupo a cose laken na otro, y nos a uza nan pa scot e barak den dos seccion: un pa hende homber y e otro pa hende muher. (Despues, un Testigo na Rusia a pinta un cuadro di e barak aki, cu bo por mira akibou.) Den e dianan cu nos a biba preta preta riba otro den e barak aki, hopi bes nos tabata haci oracion hunto, pidiendo Jehova fervientemente pa e duna nos sabiduria y “poder mas aya di loke ta normal.”​—2 Corintionan 4: 7, NW.

Tur e tempo ei, nos tabata den e posicion peligroso entre e rebeldenan y e ehersito Sovietico.  Ningun di nos no tabata sa kico esun of e otro lo a bai haci. Un ruman homber cristian fiel di edad a urgi nos: “Stop di purba rei. Jehova lo no bandona nos.”

Nos kerido ruman muhernan cristian, hoben y bieu, a mustra un perseverancia excepcional. Un di nan tabatin den careda di 80 aña y tabatin mester di mas yudansa. Otronan tabata enfermo y tabatin mester di atencion medico. Tur e tempo ei e portanan di e barak mester a keda habri pa e rebeldenan por a controla nos constantemente. Anochi, presonan arma tabata drenta den nos barak. Algun biaha nos a tende nan bisa: “E Reino di Dios ta na soño.” Den dia, ora nan tabata laga nos bai e comedor di e campamento, semper nos tabata keda hunto y pidi Jehova den oracion pa e proteha nos contra hombernan violento.

Den e barak, nos tabata purba sostene otro spiritualmente. Por ehempel, hopi biaha un ruman homber a conta un relato di Bijbel suficiente duro pa nos tende. Despues e tabata aplica e relato na nos circunstancianan. Specialmente un ruman homber di edad tabata gusta papia tocante e ehersito di Gideon. El a recorda nos: “Den nomber di Jehova, 300 homber cu instrumento musical den nan man a bringa contra 135.000 solda arma. Tur 300 a sali ileso.” (Huesnan 7:16, 22; 8:10) E ehempel biblico aki y otronan mas a duna nos fortalesa spiritual. Mi no tabatin hopi tempo como Testigo di Jehova, pero ora mi a mira e fe fuerte cu e rumannan cu mas experencia tabatin, esei a anima mi hopi. Mi a sinti cu Jehova tabata berdaderamente cu nos.

E Bataya A Cuminsa

Simannan a pasa y e tension den e campamento tabata aumentando. Negociacionnan entre e rebeldenan y autoridadnan a bira mas intenso. E lidernan rebelde a insisti pa e gobierno central na Moscu manda un representante pa reuni cu nan. E autoridadnan a exigi pa e rebeldenan entrega, duna nan armanan y bolbe bai traha. Ningun banda no kier a cede. Na e haltura ei, e campamento tabata rondona pa forsanan militar, cla pa ataca riba e prome comando. E rebeldenan tambe tabata cla pa bringa; nan a lanta baricada y a traha un stock di arma. Tur hende tabata spera e confrontacion final entre e ehersito y e presonan un ora pa otro.

Dia 26 di juni, e zonido masha duro mes di un gran cantidad di bala di cayon a lanta nos for di soño. Tanki di guera a tumba e cura y a basha bin den e campamento. Tras di nan a sigui trupanan militar di atake tirando cu mitraileur. Presonan​—homber y muher​—a core bai riba e tankinan cu tabata drentando, gritando “Hura!” y tirando piedra, bom cu nan mes a traha y tur otro cos cu nan por a haya den nan caminda. A sigui un bataya feros, y nos como Testigo a haya nos meimei di dje. Con Jehova lo a contesta nos oracionnan pa yudansa?

 Diripiente, soldanan a core drenta den nos barak. “Boso, santonan, sali pafo!” nan a grita. “Haci lihe, wak pa boso sali pafo di e cura!” E oficial na mando a bisa e soldanan pa no tira nos pero pa keda cerca nos y proteha nos. Mientras cu e bataya tabata den su furia, nos a sinta riba e tereno di yerba djis pafo di e campamento. Pa cuater ora largo nos a tende explosion, tiro, grito y kehamento ta bin for di paden di e campamento. Despues, tur cos a keda keto. Mas lat, den e rayonan di lus di mainta nos a mira con soldanan tabata carga cadaver saca for di e campamento. Nos a tende despues cu cientos di preso a sufri lesion of perde nan bida.

Mas lat riba e dia ei, un oficial cu mi tabata conoce a bini cerca nos. El a puntra mi orguyosamente: “Pues anto Nikolai, ken a salba boso? Nos of Jehova?” Nos a gradicie sinceramente pa a salba nos bida y a agrega: “Nos ta combenci cu nos Dios todopoderoso, Jehova, a motiva boso pa spar nos, mescos cu el a motiva otronan pa libra su sirbidornan den temponan biblico.”​—Esdras 1:1, 2.

E mesun oficial ei a splica nos tambe con e soldanan a haya sa ken nos tabata y na unda nos tabata keda. El a bisa cu durante un di e sesionnan di negociacion entre e militarnan y e rebeldenan, e militarnan a acusa e rebeldenan di a mata presonan cu no tabata apoya nan. E rebeldenan a defende nan mes bisando cu Testigonan di Jehova no a participa den e lantamento, pero nan no a mata nan. En bes di esei, como castigo, a sera tur e Testigonan den un solo barak. E oficialnan militar a corda e declaracion ei.

Nos A Para Firme pa e Reino

E autor Ruso bon conoci Aleksandr Solzhenitsyn a menciona den su buki The Gulag Archipelago (E Archipielago di Gulag) e rebelion cu nos a experencia den prizon. Relaciona cu e suceso ei, el a skirbi cu e rebelion a cuminsa pasobra, manera el a bisa, “ta claro cu nos kier libertad, . . . pero ken por duna nos e?” Como Testigo di Jehova den e mesun campamento di prizon, nos tambe a anhela libertad. Pero no djis un libertad for di prizon sino libertad cu e Reino di Dios so por percura. Tempo nos tabata den prizon, nos tabata sa cu nos tabatin mester di e forsa di Dios pa para firme na fabor di su Reino. Y Jehova a duna nos tur loke nos tabatin mester. El a duna nos victoria sin uza cuchiu of granada.​—2 Corintionan 10:3.

Hesucristo a bisa Pilato: “Mi reino no ta [parti] di e mundo aki. Si mi reino tabata di e mundo aki, mi sirbidornan lo a bringa.” (Juan 18:36) P’esei, como siguido di Cristo, nos no ta participa den luchanan politico. Nos tabata contento cu tanto durante como despues di e lantamento, nos lealtad na e Reino di Dios tabata bisto pa tur hende. Solzhenitsyn a skirbi tocante nos conducta den e dianan ei: “Testigonan di Jehova a sinti nan liber pa sigui nan reglanan strictamente y a nenga di construi fortificacionnan of di para como bewaker.”

Mas cu 50 aña a pasa desde e sucesonan turbulento ei. Sinembargo, hopi biaha mi ta corda cu gratitud riba e tempo ei pasobra mi a siña algun les duradero, manera, warda riba Jehova y confia plenamente den su brasa poderoso. Si, mescos cu hopi otro Testigo stima den ex Union Sovietico, mi a experencia cu Jehova en berdad ta duna libertad, proteccion y salbacion na esnan cu ta spera riba e Reino cu no ta ‘parti di e mundo aki.’

[Plachi na pagina 8, 9]

E campo di trabou forsa na Kazakhstan caminda nos tabata encarsela

[Plachi na pagina 10]

Un pintura di e seccion di hende muher di e barak di e Testigonan

[Plachi na pagina 11]

Cu rumannan cristian despues cu nos a sali liber