Ta Importa Cua Religion Bo Ta Scohe?

MAYORIA di nos gusta haya un bon surtido pa nos por scohe for di dje ora nos ta haci compras. Ora un plasa ta ofrece un variedad di fruta y berdura, nos por scohe esnan cu mas nos ta gusta y cu ta bon pa nos famia. Si un pacus ta ofrece un surtido grandi di estilo y color di paña cu nos por afford, nos por scohe loke ta pas mihor cu nos. Algun escohencia cu nos ta haci den bida ta simplemente un cuestion di gusto personal. Pero tin otro escohencia cu ta influencia nos bienestar, por ehempel nos escohencia di cuminda saludabel of di bon amigo. Pues, kico di nos escohencia di religion? Acaso nos forma di adoracion mester ta simplemente un cuestion di gusto personal? Of e ta un asunto cu ta influencia nos bienestar seriamente?

Tin un gran variedad di religion cu nos por scohe for di dje. Awendia, mayoria di pais ta garantisa libertad di religion, y mas y mas hende ta sinti nan liber pa bandona e religion di nan mayornan. Un encuesta na Merca a saca na cla cu 80 porciento di Mericano “ta kere cu mas cu un religion por hiba na salbacion.” Segun e mesun encuesta ei, “un di cada cinco persona a bisa cu ora nan a bira adulto nan a cambia di religion.” Un encuesta na Brazil a revela cu casi un cuart di tur Brasileño a cambia di religion.

Den pasado, hende tabata discuti pisa riba e doctrinanan cu a distingui un religion for di otro. Awendia e punto di bista popular ta: ‘No ta importa cua religion bo scohe.’ Pero esei ta berdad? E religion cu bo scohe por tin efecto riba bo?

Mescos cu cumpradonan sabi ta haci pregunta tocante origen di e productonan cu ta ser ofreci, asina tambe ta sabi di bo parti pa puntra: ‘Con tur e diferente religionnan aki a cuminsa, y dicon?’ Bijbel ta duna e contesta.

 Con Religionnan Ta Cuminsa?

Den Israel di antiguedad, Rei Jeroboam a funda un religion casi mil aña prome cu Hesus a bin na Tera. Jeroboam tabata e prome Rei di Israel su reino independiente di noord. E tabatin e tarea dificil di uni e pueblo pa defende su causa. “[E] Rei a busca conseho y a traha dos bishe di oro, y el a bisa [e pueblo]: ‘Ta mucho molester pa boso bai Jerusalem; ata boso diosnan, o Israel.’” (1 Reinan 12:28) Tabata bisto cu e Rei kier a uza religion pa kita e pueblo su lealtad for di Jerusalem, caminda nan tabatin e custumber di bai pa rindi adoracion. E religion cu Jeroboam a cuminsa cu ne a dura siglonan y cu tempo a resulta den morto of exilio di miyones di hende ora Dios a ehecuta huicio riba e nacion apostata di Israel. E religion di Jeroboam tabata pa sirbi interesnan politico. Te awe tin algun religion di estado cu tambe a cuminsa como un intento pa consolida poder politico.

Apostel Pablo a revela un otro motibo pakico hende ta cuminsa cu un religion nobo ora el a bisa: “Mi sa cu despues cu mi bai, lobo brabo lo drenta meimei di boso, cu lo no tin misericordia di e tou; y for di meimei di boso mes lo lanta hombernan cu ta papia cosnan perverso, pa desvia e discipelnan y haci nan bai nan tras.” (Echonan 20:29, 30) Lidernan orguyoso hopi biaha ta cuminsa cu movementonan religioso pa hala atencion na nan mes. Iglesianan cu ta pretende di ta cristian a split den varios faccion.

Ken Religionnan Kier Agrada?

Algun hende ta cuminsa un religion nobo como reaccion riba demanda popular. Por ehempel, e revista Economist tabatin un reportahe tocante e asina yama mega iglesianan na Merca. E articulo a bisa cu e iglesianan aki ta creciendo pasobra nan ta “basa riba e mesun principio di tur negoshi exitoso, esta, cu cliente ta rei.” Algun di e mega iglesianan ei ta “entretene nan miembronan cu video, drama y muzik contemporaneo durante nan sirbishinan.” Cierto lidernan religioso den e iglesianan aki ta pretende cu nan ta siña nan miembronan con nan por hiba un bida “rico, saludabel y sin problema.” Aunke e iglesianan ei ta wordo critica pasobra nan ta den e industria di entretenimento of den e ‘negoshi di yuda bo mes’, e revista ya menciona ta bisa: “Simplemente nan ta reaccionando riba loke nan miembronan ta pidi.” E reportahe a conclui: “E combinacion di negoshi cu religion a resulta sumamente exitoso.”

Aunke otro religionnan kisas no ta dje abiertamente comercial ei, iglesianan cu ta “reaccionando riba loke e miembronan ta pidi” ta pone nos corda riba un spiertamento cu Pablo a duna. El a skirbi: “E tempo lo bin cu nan lo no soporta doctrina sano mas; ma al contrario, pa satisface nan mes deseonan, nan lo acumula pa nan mes siñadonan pa bisa nan loke nan horea cu ta kishiki kier tende, y lo bira nan horea for di e berdad, y lo bolbe na fabula.”​—2 Timoteo 4:3, 4.

Siendo cu hopi religion a surgi for di un deseo pa poder politico, pa prestigio y pa aceptacion popular mas bien cu for di un deseo pa agrada Dios, no ta un sorpresa cu religion ta envolvi den cosnan malo manera abuso sexual di mucha, fraude, guera y terorismo. Mayoria di biaha, religion no ta loke e ta parce. Con bo por evita di ser gaña?

[Comentario na pagina 4]

Hopi religion a surgi for di un deseo pa poder politico, pa prestigio y pa aceptacion popular mas bien cu for di un deseo pa agrada Dios