Con Ana A Haya Pas Mental

UN MUHER fiel a alaba Jehova den un oracion na bos halto. El a sinti cu Dios a lant’e for di den stof y remplasa su tristesa cu hubilo.

E muher aki yama Ana. Kico a causa e cambio remarcabel aki den su sintimentonan? Dicon e tabata asina contento awor? Con nos por beneficia di su experencia? Pa nos haya contesta riba e preguntanan aki, laga nos considera e historia di Ana.

Un Famia bou di Stress

Ana tabata un di e dos esposanan di Elcana, un Levita cu tabata biba den e teritorio di Efrain. (1 Samuel 1:1, 2a; 1 Cronicanan 6:33, 34) Aunke e proposito original di Dios no tabata pa un homber casa cu mas cu un muher, e Lei di Moises a permiti y regula esaki. Elcana su famia tabata adorado di Jehova, pero hopi bes matrimonionan poligamo ta trece conflicto, manera e asuntonan familiar di Elcana a ilustra.

Ana tabata steril, mientras cu Penina, e otro esposa di Elcana, si tabatin varios yiu. Penina tabata rival di Ana.​—1 Samuel 1:2b.

Pa e Israelitanan di e tempo ei, tabata un berguensa cu un muher no por a haya yiu y hende tabata mira esei asta como un señal cu e muher no tabata digno den bista di Dios. Pero no tin ningun indicacion cu e echo cu Ana no por a haya yiu tabata pasobra el a desagrada Dios. Sinembargo, en bes di purba consola Ana, Penina a uza e echo cu e si por a haya yiu pa amarga su rival.

Biahenan pa e Santuario di Jehova

A pesar di e situacion tenso aki, tur aña e famia di Elcana tabata biaha bai na e santuario di Jehova na Silo pa ofrece sacrificio. * Probablemente nan tabata haci e biahe ida y buelta aki di mas o menos 60 kilometer na pia. E ocasionnan aki lo mester tabata hopi dificil pa Ana pasobra nan tabata duna Penina cu su yiunan varios porcion di e sacrificio di comunion, mientras cu Ana tabata ricibi solamente un porcion. Penina tabata probecha di e oportunidadnan ei pa provoca Ana y pon’e sinti su mes angustia pasobra tur cos tabata mustra cu ta Jehova “a sera su matris.” Tur aña e situacion fastioso aki tabata presenta, cu e resultado cu Ana tabata yora y no kier a come. Asina e biahenan cu mester tabata gososo p’e a bira momentonan di angustia. Pero, asina mes Ana tabata haci e biahenan aki pa e santuario di Jehova.​—1 Samuel 1:3-7.

Bo ta mira ki bon ehempel Ana a pone pa nos? Ora bo ta desanima, con bo ta reacciona? Bo ta isola bo mes y stop di asocia cu bo rumannan di fe? Ana no a haci esei. El a tuma pa custumber pa ta entre e adoradonan di Jehova. P’esei aunke nos por ta bou di stress, nos mester haci mescos.​—Salmo 26:12; 122:1; Proverbionan 18:1; Hebreonan 10:24, 25.

Elcana a purba consola Ana y a anim’e pa e desahoga su mes. El a puntr’e:  “Ana, pakico bo ta yora y pakico bo no ta come y pakico bo curason ta tristo asina? Mi no ta nifica mas pa bo cu dies yiu homber?” (1 Samuel 1:8) Kisas Elcana no tabata na haltura di e manera sin heful cu Penina tabata trata Ana, y podise Ana lo a prefera di sufri den silencio en bes di keha. En todo caso, como un persona spiritual, Ana a busca pas mental dor di acudi na Jehova den oracion.

Ana A Haci un Promesa

E hendenan tabata come sacrificio di comunion na e santuario di Jehova. Despues cu Ana a sali for di e comedor, el a haci oracion na Dios. (1 Samuel 1:9, 10) El a roga: “O SEÑOR di ehersitonan, si di berdad bo mira e afliccion di bo sirbiente y corda riba mi y no lubida riba bo sirbiente, ma duna bo sirbiente un yiu homber, e ora ei lo mi dun’e na SEÑOR tur e dianan di su bida, y nunca nabaha lo no pasa riba su cabes.”​—1 Samuel 1:11.

E oracion di Ana tabata specifico. El a pidi pa un yiu homber y a priminti cu lo el a dedic’e na Jehova como un Nazareo pa henter su bida. (Numbernan 6:1-5) E promesa ei mester a haya aprobacion di su esposo, y e manera cu Elcana a actua despues a demostra cu el a aproba e promesa di su esposa stima.​—Numbernan 30:6-8.

E manera cu Ana a haci oracion a pone e sumo sacerdote Eli pensa cu e tabata burachi. Su lipnan tabata move, pero Eli no tabata tende ningun palabra pasobra Ana tabata papia den su curason. E oracion tabata masha ferviente. (1 Samuel 1:12-14) Imagina bo con Ana a sinti su mes ora Eli a tira na su cara cu e tabata burachi! Toch, el a contesta e sumo sacerdote cu respet. Ora Eli a realisa cu ta oracion Ana tabata haciendo “for di [su] precupacion grandi y for di [su] afliccion”, e di: “Cu e Dios di Israel duna bo bo peticion.” (1 Samuel 1:15-17) Despues di esei, Ana a cohe su caminda bai y a come, y “su cara no tabata tristo mas.”​—1 Samuel 1:18.

Kico nos por siña for di tur esaki? Ora nos ta haci oracion na Jehova tocante nos ansiedadnan, nos por papia cu ne tocante nos sintimentonan y pidie di curason pa e yuda nos. Si nos no por haci nada mas pa resolve e problema, nos mester laga e asunto den su man. Esei ta e mihor cos cu nos por haci.​—Proverbionan 3:5, 6.

Como sirbidor di Jehova, despues di haci oracion ferviente, muy probablemente nos lo por sinti e mesun pas mental cu Ana tabatin. Encuanto oracion, apostel Pablo a skirbi: “No precupa pa nada; ma den tur cos, pa medio di oracion y suplica cu gradicimento, laga boso peticionnan ta conoci dilanti di Dios. Y e pas di Dios, cu ta surpasa tur comprondemento, lo warda boso curason y boso mente den Cristo Hesus.” (Filipensenan 4:6, 7) Ora nos tira nos carga riba Jehova, nos mester laga cosnan den su man. Anto, mescos cu Ana, nos no tin nodo di precupa mas cu e asunto.​—Salmo 55:22.

Un Yiu Dedica na Jehova

E ora ei Dios a dirigi su atencion na Ana; Ana a sali na estado y a duna lus na un yiu homber. (1 Samuel 1:19, 20) Esaki ta un di e poco ocasionnan registra den Bijbel cu Dios a asumi responsabilidad pa e nacemento di un persona cu lo a bira su sirbidor. Samuel, yiu di Elcana y Ana, a bira un profeta di Jehova cu mester a hunga un papel importante den establecimento di e monarkia di Israel.

Sin duda, Ana a cuminsa siña Samuel for di infancia tocante Jehova. Pero el a lubida e promesa cu el a haci? Claro cu no! El a bisa: “Ora cu mi kita e yiu for di pecho; e ora ei lo mi hib’e, pa e aparece dilanti di SEÑOR y keda ayanan pa semper.” Ora Ana a kita Samuel for di pecho, talbes tempo e tabatin tres aña di edad of un poco mas grandi, Ana a hib’e na e santuario di Jehova pa e biba einan, manera Ana a priminti.​—1 Samuel 1:21-24; 2 Cronicanan 31:16, BPK.

 Despues cu Ana y su esposo a ofrece un sacrificio na Jehova, nan a hiba Samuel pa Eli. Muy probablemente Ana tabatin e man di su yiu homber chikito teni ora el a bisa Eli: “O mi señor! Manera bo alma ta biba, mi señor, ta ami ta e muher cu tabata para akibanda di bo ta haci oracion na SEÑOR. Pa e mucha aki mi a haci oracion, y SEÑOR a duna mi mi peticion cu mi a haci na dje. P’esei tambe mi a dedic’e na SEÑOR; tanten cu e ta na bida e ta dedica na SEÑOR.” Di e forma ei Samuel a cuminsa su bida di sirbishi special na Dios.​—1 Samuel 1:25-28; 2:11.

Aunke a pasa añanan, Ana sigur no a lubida Samuel. E Scritura ta indica: “Su mama tabata traha un mantel chikito p’e y tabata trece esaki tur aña p’e ora cu e tabata bin cu su esposo pa ofrece e sacrificio di tur aña.” (1 Samuel 2:19) Ana sigur a sigui haci oracion pa Samuel. Na su bishitanan di tur aña, sin duda e tabata anim’e pa e sigui sirbi Dios fielmente.

Na un di e ocasionnan ei, Eli a bendiciona e mayornan di Samuel y a bisa Elcana: “Cu SEÑOR duna bo yiunan for di e muher aki na luga di esun cu el a dedica na SEÑOR.” E palabranan ei a cumpli ora Ana y Elcana a ser bendiciona cu tres otro yiu homber y dos yiu muher.​—1 Samuel 2:20, 21.

Esta un bon ehempel Elcana y Ana a percura pa mayornan cristian! Hopi mama cu tata tabata dispuesto pa, na moda di papia, dedica nan yiunan na Jehova dor di anima nan pa sigui un of otro forma di sirbishi di tempo completo leu for di cas. Tal mayornan amoroso ta digno di elogio pa e sacrificionan cu nan ta haci. Y Jehova lo recompensa nan.

Ana Su Oracion Gososo

Ana, cu un tempo tabata steril, a bira masha contento! Den e Scritura tin masha poco oracion cu hende muher a yega di haci. Sinembargo, den e caso di Ana, nos sa tocante dos di nan. E prome ta contene su sintimentonan ora el a sinti su mes provoca y tabata aflihi, y e di dos ta un oracion gososo di gradicimento. Ana a cuminsa su oracion, bisando: “Mi curason ta regociha den SEÑOR.” El a alegra cu “asta esun steril ta duna lus”, y el a alaba Jehova como Esun cu “ta halsa.” “E ta lanta e pober for di den stof.” En berdad, “e ta hisa esun den necesidad for di e monton di shinishi.”​—1 Samuel 2:1-10.

E relato inspira tocante Ana ta mustra cu e imperfeccion of malicia di otro hende por ofende nos. Pero nos no mester laga e pruebanan ei kita nos goso di sirbi Jehova. E ta e gran Tendedor di oracion, kende ta responde na e gritonan di su pueblo fiel, librando nan for di afliccion y dunando nan pas abundante y otro bendicionnan.​—Salmo 22:23-26; 34:6-8; 65:2.

[Nota]

[Plachi na pagina 17]

Ana a dedica Samuel na Jehova