Con Angel Ta Influencia Bida di Hende

“Despues di e cosnan aki mi a mira un otro angel ta baha for di shelo, kende tabatin gran autoridad . . . Y el a grita cu un bos poderoso, bisando: ‘At’el a cai! At’e gran Babilonia a cai!’”​—REVELACION 18:1, 2.

1, 2. Kico ta mustra cu Jehova ta uza angel pa cumpli cu su boluntad?

APOSTEL Juan na edad avansa tabatin e privilegio di haya visionnan profetico mientras e tabata den exilio riba e isla di Patmos. El a mira sucesonan emocionante ora cu “mediante inspiracion” el a haya su mes den “e dia di Señor.” E dia ei a cuminsa cu e entronisacion di Hesucristo na aña 1914, y ta core te na fin di su Reinado di Mil Aña.​—Revelacion 1:10, NW.

² Jehova Dios no a duna e revelacion aki directamente na Juan. El a uza un canal di comunicacion. Revelacion 1:1 ta declara: “E revelacion di Hesucristo, cu Dios a dun’e pa mustra su sirbidornan e cosnan cu mester sosode pronto; y el a manda esaki y a comunic’e pa medio di su angel na su sirbidor Juan.” Jehova, mediante Hesus, a uza un angel pa informa Juan di e cosnan maraviyoso relaciona cu “e dia di Señor.” Na un dado momento, Juan a mira tambe “un otro angel ta baha for di shelo, kende tabatin gran autoridad.” Kico tabata e tarea di e angel aki? “El a grita cu un bos poderoso, bisando: ‘At’el a cai! At’e gran Babilonia a cai!’” (Revelacion 18:1, 2) E angel poderoso aki tabatin e privilegio di anuncia e caida di Babilonia e Grandi, e imperio mundial di religion falso. Pues, un cos ta sigur, Jehova ta uza e angelnan den un manera importante pa cumpli cu su boluntad. Pero prome cu nos bai analisa detayadamente ki papel angel ta hunga den e proposito di Dios y con nan ta influencia nos bida, laga nos considera e origen di e criaturanan spiritual aki.

Di Unda Angel A Bin?

3. Ki idea robes hopi hende tin tocante angel?

³ Miyones di hende awe ta kere cu angel ta existi. Pero hopi di nan tin idea robes tocante angel y nan origen. Por ehempel, algun hende religioso ta kere cu ora un ser keri muri, e persona ei ta haya un yamada pa bai cerca Dios y ta bira un angel. Pero ta esei e Palabra di Dios ta siña tocante e creacion, e existencia y e proposito di angel?

4. Kico e Scritura ta conta nos tocante e origen di angel?

⁴ E angel cu tin mas poder y autoridad​—e angel principal​—yama Miguel e arcangel. (Judas 9) E no ta ningun otro sino Hesucristo. (1 Tesalonicensenan 4:16) Masha, masha hopi siglo pasa ora cu Jehova a dicidi di bira Creador, e prome prome cos cu el a crea tabata e Yiu angelical aki. (Revelacion 3:14) Despues, mediante e Yiu primogenito aki, Jehova a crea tur otro criatura spiritual. (Colosensenan 1:15-17) Referiendo na e criaturanan angelical aki como su yiunan, Jehova a puntra patriarca Job: “Na unda bo tabata tempo cu mi a pone fundeshi di mundo? Bisa mi, si bo tin comprondemento. . . . Ken a pone su piedra-di-skina, tempo cu e streyanan di marduga tabata canta hunto, y tur e yiu hombernan di Dios tabata grita di alegria?” (Job 38:4, 6, 7) Ta bisto anto cu angel ta un creacion di Dios, y nan a bin na existencia hopi tempo prome cu hende.

5. Con e angelnan ta organisa?

⁵ “Dios no ta un Dios di confusion, sino di  pas”, segun 1 Corintionan 14:33. Pues na harmonia cu esei, Jehova a organisa su yiunan spiritual den tres categoria basico: (1) serafin, kende ta fungi como sirbidor na e trono di Dios, ta declara su santidad y ta mantene su pueblo spiritualmente limpi; (2) kerubin, kende ta sostene Jehova su soberania; y (3) otro angelnan cu ta cumpli cu su boluntad. (Salmo 103:20; Isaias 6:1-3; Ezekiel 10:3-5; Daniel 7:10) Cua ta algun manera cu e criaturanan spiritual aki ta influencia e bida di hende?​—Revelacion 5:11.

Ki Papel Angel Ta Hunga?

6. Con Jehova a uza kerubin en conexion cu e hofi di Eden?

⁶ Bijbel ta menciona criaturanan spiritual directamente pa prome biaha na Genesis 3:24. Ei nos ta lesa: “[Jehova] a saca e homber afo; anto parti pariba di hofi di Eden el a staciona e kerubinnan y un spada tur na vlam di candela cu tabata bira den tur direccion, pa warda e caminda cu ta bai na e palo di bida.” E kerubinnan aki a stroba Adam cu Eva di bolbe drenta nan hogar paradisiaco original. Esei tabata na comienso di historia humano. Ki papel angel a hunga djei padilanti?

7. Kico e nificacion di e palabra pa “angel” na e idiomanan original ta indica tocante un di e papelnan cu angel ta hunga?

⁷ Bijbel ta menciona angel casi 400 biaha. Por traduci tanto e palabra Hebreo como e palabra Griego pa “angel” como “mensahero.” Pues angel a fungi como un medio di comunicacion entre Dios y humanidad. Manera a keda menciona den e prome dos paragrafnan di e articulo aki, Jehova a uza un angel pa entrega su mensahe na apostel Juan.

8, 9. (a) Ki efecto e bishitanan di un angel tabatin riba Manoa cu su casa? (b) Kico mayornan por siña for di Manoa su encuentro cu e angel di Dios?

⁸ Dios ta uza angel tambe pa duna sosten y animacion na su sirbidornan riba Tera. Por ehempel, den tempo di e Huesnan di Israel, Manoa cu su esposa steril tabatin masha deseo di haya un yiu. Jehova a manda su angel bai informa e casa di Manoa cu lo e haya un yiu homber. E relato ta conta nos cu e angel a bisa: “Mira, lo bo concebi y duna lus na un yiu homber, y nabaha lo no pasa riba su cabes, pasobra e mucha lo ta un Nazareo pa Dios for di den bariga di su mama; y e lo cuminsa libra Israel for di man di e Filisteonan.”​—Huesnan 13:1-5.

⁹ E casa di Manoa cu tempo a duna lus na un yiu homber, Samson, kende a bira famoso den historia biblico. (Huesnan 13:24) Prome cu e yiu a nace, Manoa a pidi pa e angel bolbe pasa pa instrui nan con nan tin cu lanta e mucha. Manoa a puntra: “Con e mucha su manera di biba y su vocacion mester ta?” E angel di Jehova a ripiti e instruccionnan cu el a duna na e casa di Manoa. (Huesnan 13:6-14) Manoa lo mester a sinti su mes hopi anima! Awendia angel no ta bishita hende mas dje manera ei, pero mescos cu Manoa, mayornan por busca Jehova su instruccion ora di entrena nan yiunan.​—Efesionan 6:4.

10, 11. (a) Ki efecto e invasion di e ehersito Sirio tabatin riba Eliseo y su sirbidor? (b) Ki beneficio nos por saca si nos medita riba e suceso aki?

 ¹⁰ Den tempo di profeta Eliseo tabatin un ehempel impresionante di sosten di angel. Eliseo tabata kedando na Dotan, un stad den Israel. Un dia, ora cu e sirbidor di Eliseo a lanta mainta tempran y a wak pafo, el a mira cu e stad tabata rondona pa cabai y garoshi di guera. E rei di Siria a manda un forsa militar poderoso pa captura Eliseo. Con e sirbidor di Eliseo a reacciona? Morto spanta, y kisas den panico, el a sclama: “Ai, mi shon! Kico nos lo haci?” Den su bista, tur cos tabata perdi. Pero Eliseo a contesta: “No tene miedo, pasobra esnan cu ta cu nos ta mas cu esnan cu ta cu nan.” Kico e tabata kiermen?​—2 Reinan 6:11-16.

¹¹ Eliseo tabata sa cu tin un ehersito di angel presente pa yud’e. Sinembargo, su sirbidor no a mira nada. P’esei “Eliseo a haci oracion y a bisa: ‘O Jehova, mi ta pidi bo, habri su wowo pa e mira.’ Y [Jehova] a habri wowo di e sirbidor y el a mira, y at’e sero tabata yen di cabai y garoshi di candela tur rond di Eliseo.” (2 Reinan 6:17) E ora ei e sirbidor por a mira e ehersito di angel cu tabatin. Si nos tin perspicasia spiritual, nos tambe por ta conciente di e echo cu e angelnan, tur bou di e direccion di Jehova y Cristo, ta duna yudansa y proteccion na e pueblo di Jehova.

Sosten di Angel den Tempo di Cristo

12. Ki sosten Maria a haya for di angel Gabriel?

¹² Considera e sosten cu e birgen Hudiu Maria a haya ora cu el a tende e noticia: “Lo bo concebi den bo matris y duna lus na un yiu homber, y lo bo yam’e Hesus.” Un poco prome cu angel Gabriel​—kende Dios a manda​—a entrega e mensahe sorprendente aki, el a bisa Maria: “No tene miedo, Maria, pasobra bo a haya gracia cerca Dios.” (Lucas 1:26, 27, 30, 31) Maria lo mester a sinti su mes hopi anima y fortifica pa e palabranan aki cu a sigur’e cu e tabatin Dios su aprobacion!

13. Con angel a sostene Hesus?

¹³ Un otro ocasion caminda angel a duna sosten tabata despues cu Hesus a resisti e tres tentacionnan cu Satanas a pone Su dilanti den desierto. E relato ta conta nos cu na final di e pruebanan, “Diabel a lag’e; y mira, angelnan a bin y a sirbie.” (Mateo 4:1-11) Algo similar a pasa e anochi prome cu Hesus a muri. Den angustia, Hesus a hinca rudia y a cuminsa haci oracion, bisando: “‘Tata, si ta bo boluntad, kita e copa aki for  di mi; sinembargo, no mi boluntad, ma di bo sosode.’ Awor a aparece un angel for di shelo na dje pa fortalec’e.” (Lucas 22:42, 43) Pero ki clase di sosten di angel nos ta haya awe?

Sosten di Angel den Nos Tempo

14. Ki persecucion Testigonan di Jehova tabatin cu wanta den nos tempo, y kico tabata e resultado?

¹⁴ Nos ta mira evidencia di sosten di angel ora nos considera e historia di e trabou di predica di Testigonan di Jehova den nos tempo. Por ehempel, e pueblo di Jehova a logra wanta e atake di nazismo na Alemania y West Europa prome y durante Segundo Guera Mundial (añanan 1939-45). Bou di e regimennan di fascismo catolico na Italia, Spaña y Portugal, e Testigonan tabatin cu resisti persecucion pa asta mas tanto aña. Anto durante decadanan largo nan a wanta persecucion na ex Union Sovietico y na e nacionnan cu tabata bou di su dominio. Anto no mester lubida e persecucion cu e Testigonan a wanta den algun nacion Africano. * Den añanan mas recien, e sirbidornan di Jehova a sufri di persecucion feros den e pais di Georgia. Satanas a haci tur loke ta na su alcance pa pone un fin na e actividad di Testigonan di Jehova. Sinembargo, como organisacion, nan a sobrevivi tal oposicion y a prospera. Pa un parti, esei ta debi na e escudo protectivo cu angel a percura.​—Salmo 34:7; Daniel 3:28; 6:22.

15, 16. Ki sosten di angel Testigonan di Jehova ta haya den nan ministerio mundial?

¹⁵ Testigonan di Jehova ta tuma masha na serio nan encargo di predica e bon nobo di e Reino di Dios rond mundo y di haci discipel dor di siña e berdad di Bijbel na hende interesa tur caminda. (Mateo 28:19, 20) Sinembargo,  e Testigonan ta bon conciente di e echo cu nan no por cumpli cu e encargo aki sin e sosten di angel. P’esei, loke tin para na Revelacion 14:6 y 7 tabata semper un fuente di animacion pa nan. Einan nos ta lesa loke apostel Juan a skirbi: “Mi a mira un otro angel ta bula meimei di shelo, kende tabatin un evangelio eterno pa predica na esnan cu ta biba riba Tera, y na tur nacion y tribu y lenga y pueblo; y el a bisa na bos halto: ‘Teme Dios y dun’e gloria, pasobra e ora di su huicio a yega; y adora Esun cu a traha shelo y Tera y lama y fuentenan di awa.’”

¹⁶ E palabranan aki ta mustra bon cla cu e gran trabou di predica e bon nobo rond mundo cu Testigonan di Jehova ta efectuando, tin e respaldo y guia di angel. Jehova ta uzando su angelnan pa dirigi hende sincero na su Testigonan. E angelnan a yega di dirigi e Testigonan tambe na hende merecedor. Esaki lo por splica dicon na asina tanto ocasion​—demasiado biaha pa esei por ta simplemente coincidencia​—un Testigo di Jehova ta topa un persona net na momento cu e persona ta pasando den un crisis y tin mester di yudansa spiritual.

Un Papel Dramatico den Futuro Cercano

17. Kico a pasa cu e Asirionan ora cu un solo angel a ataca nan?

¹⁷ Fuera di fungi como mensahero y yudansa fortalecedor pa e adoradonan di Jehova, angel ta sirbi un otro proposito mas. Den pasado, nan a ehecuta e huicionan di Dios. Por ehempel, den siglo 8 prome cu nos era, Jerusalem tabata bou di menasa di un inmenso ehersito di solda Asirio. Con Jehova a reacciona? El a bisa: “Ami lo defende e stad aki, pa salb’e pa mi mes causa y pa causa di mi sirbidor David.” E relato biblico ta conta nos loke a pasa: “Anto a sosode cu e anochi ei e angel di SEÑOR a sali mata shentiochenticinco mil hende den e campamento di e Asirionan; y ora cu e hendenan a lanta su manece, ata tur esakinan tabata morto.” (2 Reinan 19:34, 35) Ki insignificante e ehersitonan di hende ta na comparacion cu e forsa di un solo angel!

18, 19. Ki papel dramatico angel lo hunga den futuro cercano, y ki efecto esei lo tin riba humanidad?

¹⁸ Angel lo fungi como Dios su forsa di ehecucion den futuro cercano. Muy pronto, Hesus lo bin “cu su angelnan poderoso den candela tur na vlam.” Nan mision lo ta pa “duna pago mereci na esnan cu no conoce Dios y na esnan cu no ta obedece e evangelio di nos Señor Hesus.” (2 Tesalonicensenan 1:7, 8) Ki un gran efecto e accion aki lo tin riba humanidad! E hendenan cu ta nenga di reacciona faborablemente riba e bon nobo di e Reino di Dios cu awor ta ser proclama rond mundo, lo sufri destruccion. Ta solamente esnan cu busca Jehova, busca husticia y humildad ‘lo wordo scondi riba e dia di e rabia di Jehova’, sin sufri ningun daño.​—Sofonias 2:3.

¹⁹ Nos por ta gradicido cu Jehova ta uza su angelnan poderoso pa sostene y fortalece su adoradonan riba Tera. Ta un gran consuelo pa nos cu nos ta compronde e papel cu angel ta hunga den e proposito di Dios, ya cu tin angel cu a rebela contra Jehova y a bin cai bou di e liderato di Satanas. E siguiente articulo lo trata ki medidanan cristiannan berdadero por tuma pa proteha nan mes contra e influencia poderoso di Satanas e Diabel y su demoñonan.

[Nota]

Kico Bo A Siña?

• Con angel a origina?

• Con Dios a uza angel den tempo biblico?

• Kico Revelacion 14:6 y 7 ta revela tocante e actividad di e angelnan awe?

• Ki papel dramatico angel lo hunga den futuro cercano?

[Preguntanan di Estudio]

[Plachi na pagina 22]

Manoa cu su casa a haya animacion di un angel

[Plachi na pagina 23]

“Esnan cu ta cu nos ta mas cu esnan cu ta cu nan”