Con Nos Por Resisti e Demoñonan?

“Angelnan cu no a warda nan mes posicion, ma a bandona nan propio luga di biba, [Dios] a tene na cadena eterno den scuridad pa e huicio di e gran dia.”​—JUDAS 6.

1, 2. Ki preguntanan ta surgi tocante Satanas e Diabel y e demoñonan?

“SEA sobrio, sea alerta”, apostel Pedro a spierta. “Boso adversario, e Diabel, ta cana rond manera un leon cu ta gruña, buscando ken e por devora.” (1 Pedro 5:8) Relaciona cu e demoñonan, apostel Pablo a bisa: “Mi no kier pa boso tin comunion cu demoño. Boso no por bebe e copa di Señor y e copa di demoñonan; boso no por tuma parti na e mesa di Señor y na e mesa di demoñonan.”​—1 Corintionan 10:20, 21.

² Pero ken Satanas e Diabel y e demoñonan ta? Con nan a origina y na ki tempo? Ta Dios a crea nan? Con poderoso nan influencia riba hende ta? Nos tin un defensa contra nan?

Di Unda Satanas y e Demoñonan A Bin?

3. Con un angel di Dios a bira Satanas e Diabel?

³ For di principio di historia humano, ora humanidad a cuminsa biba den hofi di Eden, un angel di Dios a bira rebelde. Dicon? Pasobra e no tabata satisfecho cu su papel den e organisacion celestial di Jehova. Despues di e creacion di Adam cu Eva, e angel ei a mira un oportunidad pa kita nan obediencia y adoracion for di e Dios berdadero y dirigi esei na su mes. E angel aki a haci su mes Satanas e Diabel ora el a rebela contra Dios y a pone e prome pareha sigui un rumbo pecaminoso. Cu tempo, otro angelnan a join Satanas den su rebelion. Con nan a hacie?​—Genesis 3:1-6; Romanonan 5:12; Revelacion 12:9.

4. Kico algun angel rebelde a haci prome cu e Diluvio di tempo di Noe?

⁴ E Scritura inspira ta conta nos cu algun tempo prome cu e gran Diluvio di tempo di Noe, cierto angelnan a cuminsa mustra un interes inusual den hende muher riba Tera. Cu mal intencion, “e yiu hombernan [celestial] di Dios a mira cu e yiu muhernan di hende tabata bunita”, Bijbel ta declara, “y nan a tuma esposanan pa nan mes, esun cu nan tabata kier a scohe.” E unionnan aki tabata  innatural, y nan a produci yiunan hibrido, conoci na e idioma original como nefilim. (Genesis 6:2-4) Pues, e criaturanan spiritual cu a desobedece Dios, a join e rebelion di Satanas contra Jehova.

5. Kico a pasa cu e rebeldenan ora Jehova a trece destruccion pa medio di e gran Diluvio?

⁵ Ora Jehova a trece e Diluvio riba humanidad, e nefilim y nan mamanan humano a muri. E angelnan rebelde a haya nan obliga ta kita nan curpa humano y bolbe na e region di spirito. Sinembargo, nan no por a bolbe na ‘nan posicion’ original cerca Dios. Mas bien, nan a ser entrega na “scuridad [spiritual] diki”, conoci como Tartaro.​—Judas 6; 2 Pedro 2:4, NW.

6. Con e demoñonan ta gaña hende?

⁶ For di momento cu e angelnan malbado a perde ‘nan posicion’ original, nan a bira e compañeronan demoño di Satanas y a sirbi su interesnan malbado. Djei padilanti, e demoñonan no tabatin e poder mas pa bisti curpa humano. Sinembargo, nan por tenta hende homber y hende muher pa participa den varios forma di relacion sexual abnormal y inaceptabel. Demoñonan ta gaña hende activamente tambe pa medio di spiritismo, locual por ensera cosnan manera uzo di palabranan magico, vudu y medium spiritista. (Deuteronomio 18:10-13; 2 Cronicanan 33:6) E angelnan malbado y Diabel tin mesun destino, esta, destruccion eterno. (Mateo 25:41; Revelacion 20:10) Pero tanten cu nan t’ei nos tin cu para firme y resisti nan. Ta sabi di nos parti pa considera con poderoso Satanas ta y con nos por logra resisti e y su demoñonan.

Con Poderoso Satanas Ta?

7. Ki poder Satanas tin riba mundo?

⁷ Satanas a calumnia Jehova durante henter historia. (Proverbionan 27:11) Es mas, el a influencia un gran parti di humanidad. “Henter mundo ta bou di control di e malbado”, segun 1 Juan 5:19. Ta p’esei Diabel por a tenta Hesus cu e oferta di dun’e e autoridad y e gloria di “tur e reinonan di mundo.” (Lucas 4:5-7) Apostel Pablo a bisa en conexion cu Satanas: “Si nos evangelio ta tapa cu velo, e ta tapa pa esnan cu ta bai perdi, den kende nan caso e dios di e mundo aki a ciega mente di esnan cu no ta kere, pa nan no mira e lus di e evangelio di e gloria di Cristo, kende ta e imagen di Dios.” (2 Corintionan 4:3, 4) Satanas ta “un gañado y e tata di mentira”, pero e ta presenta su mes como “un angel di lus.” (Juan 8:44; 2 Corintionan 11:14) E tin e poder y e metodonan necesario pa ciega mente di e gobernantenan di mundo y nan subditonan. Satanas a gaña humanidad pa medio di informacion incorecto y tambe mito- y mentiranan religioso.

8. Kico Bijbel ta indica tocante e influencia di Satanas?

⁸ E poder y influencia di Satanas tabata bisto den tempo di profeta Daniel, un cinco siglo prome cu nos era comun. Ora Jehova a manda un angel pa entrega un mensahe di estimulo na Daniel, “e prins [demoño] di e reino di Persia” a resistie. E angel fiel a wordo stroba 21 dia largo te ora cu “Miguel, un di e prinsnan principal”, a bin yud’e. E mesun relato ta papia tambe di “e prins [demoño] di Grecia.” (Daniel 10:12, 13, 20) Anto na Revelacion 13:1 y 2, Bijbel ta describi Satanas como “e dragon” cu ta duna e bestia salbahe politico “su poder y su trono y gran autoridad.”

9. Contra ken cristiannan ta lucha?

⁹ P’esei no ta straño cu apostel Pablo a skirbi: “Nos lucha no ta contra carni y sanger, sino contra e gobernantenan, contra e podernan, contra e forsanan mundial di e scuridad aki, contra e forsanan spiritual di maldad den e luganan celestial.” (Efesionan 6:12) Te cu awe, forsanan demoniaco bou di  control di Satanas e Diabel ta tras di escenario, eherciendo influencia riba gobernantenan humano y riba humanidad en general, motivando nan pa comete actonan monstruoso di genocidio, terorismo y asesinato. Laga nos ban analisa con nos por resisti e forsanan spiritual poderoso aki cu exito.

Ki Defensa Nos Tin Contra Demoño?

10, 11. Con nos por resisti Satanas y su angelnan malbado?

¹⁰ Nos no por resisti Satanas y su angelnan malbado riba nos mes forsa, sea ta forsa fisico of mental. Pablo a conseha nos: “Sea fuerte den Señor, y den e forsa di su poder.” Nos tin cu acudi na Dios pa haya proteccion. Pablo a agrega: “Bisti e armadura completo di Dios, pa boso por para firme contra e trampanan di Diabel ... Tuma e armadura completo di Dios, pa boso por resisti den e dia malo, y despues di a haci tur cos, para firme.”​—Efesionan 6:10, 11, 13.

¹¹ Dos biaha Pablo a urgi su compañeronan cristian pa bisti “e armadura completo di Dios.” E palabra “completo” ta duna di compronde cu un actitud indiferente lo no ta suficiente pa resisti atakenan demoniaco. Pues, kico ta e componentenan masha importante di e armadura cu cristiannan djawe urgentemente tin mester pa nan por resisti e demoñonan?

“Para Firme”​—Con?

12. Con cristiannan por faha nan heup cu berdad?

¹² Pablo a splica: “Para firme anto, cu boso heup faha cu berdad, y cu e corasa di husticia bisti.” (Efesionan 6:14) E dos partinan di armadura cu Pablo a referi na dje aki ta un faha y un corasa. Un solda tabatin cu tene su faha bon mara pa asina e proteha su heup (locual a inclui su cintura, meimei di su pia y e parti abou di su bariga) y pa carga e peso di su spada. Den e mesun manera, e berdad biblico mester ta bon mara rond di nos curpa, na moda di papia, di manera cu nos ta biba na harmonia cu ne. Nos tin un programa pa lesa Bijbel tur dia? Henter e famia ta envolvi den esei? Nos tin un rutina pa considera e texto di dia como famia? Ademas, nos ta keda al dia cu e splicacionnan cu ta sali den e publicacionnan cu “e esclabo fiel y prudente” ta percura? (Mateo 24:45) Si ta asina, anto esei ta mustra cu nos ta haciendo esfuerso pa aplica e conseho di Pablo. Ademas, nos tin varios video y DVD cu por duna guia biblico. Si nos tin un gara firme riba e berdad, esei por yuda nos tuma decisionnan sabi y ta proteha nos di sigui un caminda robes.

13. Con nos por proteha nos curason figurativo?

¹³ E corasa literal a sirbi pa proteha e solda su pecho, curason y otro organonan importante. Un cristian por proteha su curason figurativo​—es decir, e persona cu e ta di paden​—cultivando amor pa e husticia di Dios y pegando na e normanan husto di Jehova. E corasa figurativo ta proteha nos pa nos no minimisa e importancia di e Palabra di Dios. Segun cu nos ta siña “odia maldad, stima bondad”, nos ta frena nos pianan  “for di tur mal caminda.”​—Amos 5:15; Salmo 119:101.

14. Kico ta nifica cu nos tin nos “pianan bisti cu e preparacion di e evangelio di pas”?

¹⁴ E pianan di soldanan Romano por lo general tabata ekipa cu sapato apropia pa haci marchanan largo riba e miles di kilometernan di caretera Romano cu a abarca henter e imperio. Kico e expresion “pianan bisti cu e preparacion di e evangelio di pas” ta nifica pa cristiannan? (Efesionan 6:15) E ta nifica cu nos ta prepara pa actua. Nos ta cla pa comparti e bon nobo di e Reino di Dios na tur ocasion apropia. (Romanonan 10:13-15) E echo cu nos ta activo den e ministerio cristian ta un proteccion contra e “trampanan” di Satanas.​—Efesionan 6:11.

15. (a) Kico ta mustra cu e escudo grandi di fe ta masha importante? (b) Ki “flechanan sendi” por tin un efecto perhudicial riba nos fe?

¹⁵ Pablo a sigui bisa: “Riba tur cos, tumando e escudo di fe, cu cual boso lo por paga tur e flechanan sendi di e malbado.” (Efesionan 6:16) E conseho pa tuma e escudo grandi di fe ta ser introduci cu e expresion “riba tur cos”, locual ta indica cu e parti aki di e armadura ta masha importante. Nos fe no mag di tin deficiencia. Mescos cu un escudo protectivo grandi, nos fe ta proteha nos di e “flechanan sendi” di Satanas. Kico e flechanan ei lo por representa awe? Nan por ta insulto, mentira y mitar berdadnan cu ta doloroso y cu enemigo y apostata ta plama den un intento pa debilita nos fe. E “flechanan” aki por ta tambe varios tentacion pa ser materialista, locual por pone nos bira  completamente absorba den cumpramento di hopi cos y asta influencia nos pa competi cu personanan cu a sucumbi pa un estilo di bida di luho y di pronk cu loke nan tin. Podise nan a inverti den cas y auto mas grandi y mas mihor of nan ta pronk cu nan hoyanan caro y e ultimo estilonan di paña. Sin importa kico otro hende ta haci, nos mester tin fe cu ta suficiente fuerte pa desvia e “flechanan sendi” aki. Con nos ta edifica y mantene fe fuerte?​—1 Pedro 3:3-5; 1 Juan 2:15-17, BPK.

16. Kico por yuda nos edifica un fe fuerte?

¹⁶ Nos por hala cerca Dios pa medio di estudio personal y regular di Bijbel y pa medio di oracion sincero. Nos por roga Jehova pa duna nos un fe mas fuerte, anto caba nos ta dal e pasonan necesario pa traha na harmonia cu nos oracionnan. Por ehempel, nos ta prepara cuidadosamente pa e Estudio di Toren di Vigilancia semanal cu e intencion di participa? Nos fe lo ta fuerte si nos ta studia Bijbel y publicacionnan basa riba Bijbel.​—Hebreonan 10:38, 39; 11:6.

17. Con nos por “tuma e helm di salbacion”?

¹⁷ Pablo a conclui su descripcion di e armadura spiritual cu e conseho: “Tuma e helm di salbacion, y e spada di e spirito, cual ta e Palabra di Dios.” (Efesionan 6:17) E helm a proteha e solda su cabes y celebro, e centro di tumamento di decision. Den e mesun manera, nos speransa cristian ta proteha nos facultadnan mental. (1 Tesalonicensenan 5:8) En bes di yena nos mente cu metanan mundano y deseonan materialista, nos lo mester enfoca nos pensamento riba e speransa cu Dios a duna nos, manera Hesus tambe a haci.​—Hebreonan 12:2.

18. Dicon nos no mester neglisha nos programa di lesamento regular di Bijbel?

¹⁸ Nos ultimo proteccion contra e influencia di Satanas y su demoñonan ta e palabra, of mensahe, di Dios cu tin para den Bijbel. Esaki ta un motibo mas pakico nos no mester neglisha nos programa di lesamento regular di Bijbel. Un bon conocemento di e Palabra di Dios ta proteha nos contra e mentiranan di Satanas, contra informacion incorecto di e demoñonan y tambe contra e publicacionnan y palabranan amarga di apostatanan.

Sigui Haci Oracion “Tur Ora Bai”

19, 20. (a) Kico ta spera Satanas y su demoñonan? (b) Kico por fortifica nos spiritualmente?

¹⁹ Eliminacion di Satanas, su demoñonan y e mundo malbado ta cerca. Satanas sa cu “ta ked’e solamente un poco tempo mas.” E ta furioso y ta haci guera contra esnan cu ‘ta warda e mandamentonan di Dios y ta duna e testimonio di Hesucristo.’ (Revelacion 12:12, 17) Ta masha importante pa nos resisti Satanas y su demoñonan.

²⁰ Nos por ta hopi gradicido pa e instruccion pa bisti e armadura completo di Dios! Pablo a conclui su consideracion di e armadura spiritual cu e conseho aki: “Cu tur oracion y suplica pidi tur ora bai den spirito, y cu esaki na bista, sea alerta cu tur perseverancia y suplica pa tur e santonan.” (Efesionan 6:18) Oracion por fortifica nos spiritualmente y yuda nos keda alerta. Laga nos tuma e palabranan di Pablo na pecho y sigui haci oracion, pasobra esaki lo yuda nos resisti Satanas y su demoñonan.

Kico Bo A Siña?

• Con Satanas y su demoñonan a origina?

• Con poderoso Diabel ta?

• Ki defensa nos tin contra Satanas y su demoñonan?

• Con nos por bisti e armadura completo di Dios?

[Preguntanan di Estudio]

[Plachi na pagina 26]

‘E yiu hombernan di Dios a mira e yiu muhernan di hende’

[Plachi na pagina 28]

Bo por identifica e seis componentenan di nos armadura spiritual?

[Plachi na pagina 29]

Con participacion den e actividadnan aki ta un defensa contra Satanas y su demoñonan?