“El A Obliga Nos di Acepta”

PAISNAN di Oriente ta bon conoci pa nan hospitalidad. Por ehempel, na India un famia por asta keda sin come pa nan duna un bishitante inespera cuminda. Na Iran, ta normal cu un mama semper ta stock su frishider cu cuminda ya asina e por mustra hospitalidad na bishitantenan inespera.

E actitud ei di duna generosamente tabata bisto cerca hopi persona menciona den Bijbel. Un ehempel sobresaliente ta Lidia, kende probablemente tabata un proselito Hudiu biba na Filipos, e stad principal di e districto di Macedonia. Riba un dia di sabat, apostel Pablo cu su compañeronan di biahe a topa Lidia cu algun hende muher banda di un riu pafo di Filipos. Jehova a habri Lidia su curason mientras cu Pablo tabata papia na e ocasion ei. Como resultado, Lidia a batisa hunto cu miembronan di su famia. Caba el a roga e biaheronan: “Si boso a husga cu mi ta fiel na Jehova, drenta den mi cas y keda.” Pablo su compañero Lucas, a declara: “Simplemente el a obliga nos di acepta.”​—Echonan 16:11-15, NW.

Mescos cu Lidia, cristiannan djawe tambe ta mustra hospitalidad na rumannan den fe, manera por ehempel superintendentenan biahero y nan esposa. E anfitrionnan simplemente ta ‘obliga nan di acepta.’ Esnan cu mustra hospitalidad, na nan turno, ta ser bendiciona cu combersacion edificante y asociacion spiritual. Aunke mayoria di Testigo di Jehova tin poco recurso, nan ta ‘practica hospitalidad.’ (Romanonan 12:13; Hebreonan 13:2) Nan actitud di duna ta haci nan felis. Definitivamente Hesus tabatin rason ora el a bisa: “Ta mas bendiciona pa duna cu pa ricibi.”​—Echonan 20:35.