Loke e Binida di Cristo Lo Logra

“TEROR NA SÃO PAULO.” Asina e revista Veja a describi e cuater dianan den mei 2006 ora crimen organisa a humilia e stad di mas grandi y mas rico di Brazil. Entre e mas o menos 150 personanan cu a perde nan bida durante “mas cu 100 ora di teror” tabatin polis, criminal y ciudadano comun.

Violencia ta alcansando titularnan di noticia den practicamente tur skina di Tera, y no ta parce cu lidernan humano por pone fin na dje. Nos mundo ta birando un luga mas y mas peligroso pa biba ariba. Talbes bo ta sinti bo desanima pasobra unda cu bo bira, tin mal noticia. Sinembargo, e tempo pa un cambio ta dilanti porta.

Hesus a siña su siguidonan pidi pa e Reino di Dios bini y pa Dios su boluntad sosode “na Tera mescos cu den shelo.” (Mateo 6:9, 10) E Reino aki ta un gobierno den cua Dios a nombra Cristo Hesus como Rei. Lo e resolve tur problema di humanidad. Sinembargo, pa e Reino di Dios trece cambio riba Tera, gobernacion humano mester traha luga pa e gobernacion di Cristo. Y esaki ta exactamente loke e binida di Cristo lo logra.

Un Cambio Pacifico?

E nacionnan lo somete nan pasificamente na e gobernacion di Cristo? Apostel Juan a haya un vision cu ta duna e contesta. E ta conta: “Mi a mira e bestia [e sistema politico di mundo] y e reinan di Tera y nan ehersitonan, reuni tur hunto pa haci guera contra esun [Hesus] cu tabata sinta riba e cabai, y contra su ehersito.” (Revelacion 19:19) Kico lo para di e reinan di Tera den e guera aki? Segun Bijbel, e Rei ungi di Jehova lo “kibra nan cu bara di hero, lo [e] kibra nan na pida-pida manera cos traha di klei.” (Salmo 2:9) Lo e caba cu e sistema politico completamente. E Reino di Dios “lo garna y pone un fin na tur e reinonan [humano] aki, ma e mes lo dura pa semper.”​—Daniel 2:44.

Kico lo para di hende cu ta contra e Reino di Dios? “Ora Señor Hesus wordo manifesta for di shelo cu su angelnan poderoso den candela tur na vlam”, Bijbel ta bisa cu Hesus lo “duna pago mereci na esnan cu no conoce  Dios y na esnan cu no ta obedece e evangelio.” (2 Tesalonicensenan 1:7, 8) Proverbionan 2:22 ta bisa: “E malbadonan lo wordo corta kita for di Tera, y e traidornan lo wordo ranca for di dje cu raiz cu tur.”

Relaciona cu e binida di Cristo, Bijbel ta bisa: “Mira, e ta bin cu e nubianan, y tur wowo lo mir’e.” (Revelacion 1:7) Hende lo no mir’e cu nan wowo literal. For di dia Hesus a subi na shelo, e ta un spirito cu “ta biba den e lus inaccesibel; kende ningun hende no a mira ni por mira.”​—1 Timoteo 6:16.

Hesus no tin nodi tuma un curpa humano pa e habitantenan di Tera “mir’e”, mescos cu Jehova tampoco no tabatin nodi aparece visiblemente ora el a trece e Dies Plaganan riba e Egipcionan den tempo di Moises. E hendenan di e tempo ei no tabatin duda cu ta Jehova tabata causando e plaganan, y nan a haya nan forsa ta reconoce su poder. (Exodo 12:31) Mescos tambe, ora Cristo tuma accion como Ehecutor di Dios, e malbadonan lo haya nan forsa ta “mir’e”, of compronde cu Dios ta husgando nan pa medio di Hesus. Nan lo sa esaki pasobra humanidad lo a ser spierta di antemano. Si, “tur wowo lo mir’e [Hesus], ... y tur e tribunan di Tera lo lamenta pa su motibo.”​—Revelacion 1:7.

Pa berdadero pas y prosperidad por ser reestableci riba Tera, mester destrui e malbadonan y elimina gobernacion malbado. Y esei ta algo cu Cristo lo haci. E ora ei lo e tuma mando completo di tur asunto riba Tera, y cambionan decisivo lo sigui.

Un Restauracion Cu Ta Trece Beneficio

Apostel Pedro a papia tocante e “restauracion di tur cos, di cua Dios a papia pa medio di boca di su profetanan santo for di antiguedad.” (Echonan 3:21) E restauracion aki ta inclui e transformacion cu lo tuma luga riba Tera durante e gobernacion di Cristo. Un di e profetanan pa medio di ken Dios a papia di e “restauracion di tur cos” riba Tera ta profeta Isaias, kende a biba den siglo 8 prome cu nos era. El a profetisa cu Hesucristo, e “Prins di Pas”, lo restaura pas riba Tera. Relaciona cu e gobernacion di Cristo, e profesia di Isaias ta declara: “Lo no tin fin na e aumento di su gobernacion y di pas.” (Isaias 9:6, 7) Hesus lo educa pueblonan di Tera pa nan biba na pas. E habitantenan di e Tera di e tempo ei “lo deleita nan mes den pas abundante.”​—Salmo 37:11.

Kico lo sosode cu pobresa y hamber bou di e gobernacion di Cristo? Isaias a bisa: “SEÑOR di ehersitonan lo prepara un bankete luhoso pa tur pueblo riba e sero aki, un bankete di biña bieu, e mihor pida-pidanan di carni y tuti y biña bieu refina.” (Isaias 25:6) E salmista a canta: “Lo tin abundancia di maishi den e Tera, riba cabes di e seronan [“lo tin sobreabundancia”, NW].” (Salmo 72:16) Ademas, relaciona cu e habitantenan di Tera, nos ta lesa: “Nan lo traha cas y biba den nan; tambe nan lo planta cunucunan di wendruif y come nan fruta. Nan lo no traha cas pa otro hende biba aden, ni planta pa otro hende come; pasobra manera e dianan di un palo, asina e dianan di mi pueblo lo ta; y mi scohinan lo disfruta di e obra di nan mannan pa hopi tempo.”​—Isaias 65:21, 22.

Isaias a profetisa tambe cu lo bini un fin na malesa y morto. Mediante Isaias, Dios a bisa: “E ora ei wowo di e ciegonan lo mira, y horea di e sordonan lo tende. Anto e cohonan lo bula manera bina, y lenga di e mudo lo grita di alegria.” (Isaias 35:5, 6) E tempo ei, “ningun habitante lo no bisa: ‘Mi ta malo.’” (Isaias 33:24) Dios “lo traga morto pa semper, y Señor DIOS lo seca awa di wowo for di tur cara.”​—Isaias 25:8.

 Kico di tur e mortonan “den graf”? (Juan 5:28, 29) Isaias a profetisa: “Bo mortonan lo biba; nan . . . lo lanta.” (Isaias 26:19) Si, esnan cu a muri lo bolbe bek na bida!

“Dios Ta Bo Trono pa Semper”

E binida di Cristo lo hiba na e restauracion completo di planeta Tera. Tera lo ser transforma den un paradijs glorioso y humanidad lo ta uni den adoracion di e Dios berdadero. Nos por tin e siguransa cu Hesucristo lo logra elimina maldad for di Tera y crea condicionnan husto?

Pensa riba e fuente di e poder y autoridad cu Hesus a ricibi. En conexion cu e Yiu, Bijbel ta declara: “Dios ta bo trono pa semper hamas, y e bara di bo reino ta e bara di husticia. Bo a stima husticia, y a odia maldad.” (Hebreonan 1:8, 9, NW) E fuente di Hesus su trono, esta, su funcion of autoridad, ta Jehova. Dios ta esun cu a duna Hesus su trono. Lo no tin ningun problema mucho dificil pa Hesus resolve.

Despues di Hesus su resureccion, el a bisa su discipelnan: “Tur autoridad a wordo duna na mi den shelo y riba Tera.” (Mateo 28:18) Prome Pedro 3:22 ta declara: “Angelnan y autoridadnan y podernan a wordo someti na dje.” Ningun poder of autoridad cu bai contra Hesus lo tin exito. No tin nada cu por strob’e di trece beneficio duradero pa humanidad.

Ki Efecto e Binida di Cristo Tin Riba Hende?

Den e carta cu apostel Pablo a skirbi na e Tesalonicensenan, el a bisa: “Nos ta tene presente tur ora boso fiel obra y boso amoroso labor y boso perseverancia debi na boso speransa den nos Señor Hesucristo dilanti nos Dios y Tata.” (1 Tesalonicensenan 1:3, NW) Pablo a atribui labor fructifero y perseverancia na speransa den Hesucristo. E speransa ei ta inclui fe den e binida di Cristo y den e restauracion pa cua e ta habri caminda. E mesun speransa ei por sostene cristiannan berdadero, of yuda nan persevera, a pesar cu nan haya nan den situacionnan sumamente dificil.

Tuma por ehempel Carlos, kende ta biba na São Paulo, Brazil. Na augustus 2003, Carlos a haya sa cu e tabatin cancer. Djei padilanti, el a haci ocho operacion cu a debilit’e y caus’e hopi dolor. Toch, el a sigui ser un fuente di animacion pa otro hende. Por ehempel, un biaha cu e tabata predica riba caya dilanti di un hospital grandi, el a topa un Testigo di Jehova, kende su esposo tabata hayando chemotherapie. Como cu Carlos mes tambe tabata sinti e efectonan devastador di cancer, e por a anima y consola tanto e esposo como e esposa. Despues, e pareha a comenta cu e combersacion ei a lanta nan animo. Asina Carlos a sinti cu en berdad e siguiente palabranan di Pablo a cumpli den su caso: “[Dios] ta consola nos den tur nos afliccion, pa asina nos tambe por consola esnan cu ta den cualkier afliccion cu e mesun consuelo cu Dios a consola nos cu ne.”​—2 Corintionan 1:4.

Kico ta yuda Carlos haya e forsa pa sigui anima otro hende a pesar di su enfermedad? E speransa di e binida di Cristo y tur loke esei lo logra ta motiva Carlos pa sigui “haci bon.”​—Galationan 6:9.

Considera tambe e caso di Samuel, kende su ruman homber a ser asesina apenas 50 meter for di e cas di nan tata. Su ruman a ricibi dies tiro y e cadaver a keda ocho ora riba acera mientras polis tabata investiga e crimen. Samuel no por lubida loke a pasa e dia ei. Sinembargo, loke a sosten’e tabata e speransa cu Cristo lo caba cu tur maldad for di riba Tera y cu e gobernacion husto cu lo sigui despues di esei lo trece bendicion pa humanidad. Hopi biaha e ta imagina su  mes con e ta brasa su ruman resusita den Paradijs riba Tera.​—Echonan 24:15.

Kico Bo Mester Haci?

Lo bo haya hopi consuelo den e speransa di e binida di Cristo y loke lo e logra. Sin duda, Hesucristo lo resolve tur e causanan basico di e problemanan di humanidad y elimina tur e maldad cu ta aflihi nos.

Kico bo mester haci pa disfruta di e bendicionnan cu e gobernacion di Cristo lo drama riba humanidad? Studia Bijbel, e Palabra di Dios, cuidadosamente. Den un oracion na su Tata, Hesus a bisa: “Esaki ta bida eterno, cu nan por conoce bo, e unico Dios berdadero, y Hesucristo, kende bo a manda.” (Juan 17:3) Pone e meta pa analisa loke Bijbel ta siña. Testigonan di Jehova den bo area lo ta contento pa yuda bo cu esaki. Nos ta invita bo calurosamente pa tuma contacto cu nan of pa skirbi e editornan di e revista aki.

[Plachi na pagina 7]

E binida di Cristo lo hiba na e restauracion completo di Tera

[Reconocemento]

Potret chikito, solamente den fondo: Rhino and Lion Park, Gauteng, South Africa