Pregunta di Lector

Cuanto bestia limpi Noe a bai cu ne den e arca, shete di cada sorto di bestia limpi of shete par di cada un?

Despues cu Noe a caba di traha e arca, Jehova a bis’e: “Drenta den e arca, abo y henter bo famia, pasobra bo ta esun husto cu mi a mira dilanti mi den e generacion aki. Bo mester hiba cu bo shete shete di tur bestia limpi, e macho y su embra, y di tur bestia cu no ta limpi solamente dos, e macho y su embra.” (Genesis 7:1, 2, NW) Algun traduccion, manera Beibel Santu y Beibel na papiamentu koriente ta traduci e Hebreo original cu “shete par.”

E expresion “shete shete” na e idioma original ta un ripiticion di e number shete. (Genesis 7:2, NW, nota na pia di pagina) Sinembargo, ripiticion di un number na idioma Hebreo no necesariamente ta nifica cu mester conta e numbernan hunto. Por ehempel, 2 Samuel 21:20 ta describi “un homber di gran estatura cu tabatin seis dede na cada man y seis dede na cada pia.” Na Hebreo, e number “seis” ta ser ripiti. Pero esaki no kiermen cu e gigante tabatin seis par di dede (esta, 12 dede) na cada man y seis par di tenchi na cada pia. Segun e reglanan di gramatica di idioma Hebreo, e ripiticion ta pa solamente transmiti e idea cu tabatin seis dede na cada man y seis tenchi na cada pia.

Pues “shete shete” na Genesis 7:2 no kiermen shete par (esta, 14 bestia), mescos cu ora Genesis 7:9 y 15 ta menciona “dos-dos”, e no kiermen dos par, esta cuater. Pues, aunke Noe a bai cu “shete shete” di e bestianan limpi den e arca, ta “solamente dos” di esnan cu no ta limpi el a bai cu ne.

Pero kico di e expresion “e macho y su embra” menciona inmediatamente despues di e palabra “shete shete” na Genesis 7:2? Esaki a pone algun hende pensa cu Noe a haya e instruccion pa bai cu shete par di tur sorto di bestia limpi. Sinembargo, no ta pa e proposito di procreacion so a conserva e bestianan limpi. Genesis 8:20 ta conta nos cu despues di a sali for di e arca, “Noe a traha un altar pa SEÑOR y a cohe for di tur bestia limpi y for di tur parha limpi y a ofrece ofrendanan kima riba e altar.” E echo cu Noe tabatin e di shete bestia di cada sorto limpi a permitie ofrece un bestia pa sacrificio, lagando tres par pa procrea nan sorto riba Tera.