Apoya Cristo y Su Esclabo Fiel Lealmente

“Su shon ... lo lag’e keda na encargo di tur su propiedadnan.”​—MATEO 24:45-47.

1, 2. (a) Segun e Scritura, ken ta nos Lider? (b) Kico ta mustra cu Cristo ta dirigi e congregacion cristian activamente?

“TAMPOCO sea yama ‘lider’, pasobra un so ta boso Lider, e Cristo.” (Mateo 23:10, NW) Cu e palabranan aki Hesus a mustra su siguidonan bon cla cu ni un hende riba Tera lo ta nan lider. Nan unico Lider lo ta uno celestial​—Hesucristo mes. Esun cu a nombra Hesus na e posicion aki ta Jehova, kende “a lant’e for di e mortonan, y . . . a duna e como cabes riba tur cos na e iglesia [“congregacion”, NW], cual ta su curpa.”​—Efesionan 1:20-23.

² Siendo cu Cristo ta “cabes riba tur cos” relaciona cu e congregacion cristian, e ta eherce autoridad riba tur loke ta tuma luga den e congregacion. E ta mira tur loke ta pasa den e congregacion. E ta observa bon e condicion spiritual di cada grupo di cristian of congregacion. Nos por deduci esei claramente for di e revelacion cu apostel Juan a haya na fin di e prome siglo di nos era. Hesus a declara cinco biaha na shete congregacion cu e tabata sa di nan echonan, nan puntonan fuerte y nan puntonan debil, y el a duna conseho y animacion di acuerdo cu esei. (Revelacion 2:2, 9, 13, 19; 3:1, 8, 15) Nos tin tur motibo pa kere cu Cristo tabata na haltura tambe di e condicion spiritual di otro congregacionnan na Asia Menor, Palestina, Siria, Babilonia, Grecia, Italia y otro caminda. (Echonan 1:8) Kico djawe?

 Un Esclabo Fiel

3. Pakico ta apropia pa compara Cristo cu un cabes y su congregacion cu un curpa?

³ Despues cu Hesus a resusita y un poco prome cu el a subi bai cerca su Tata den shelo, el a bisa su discipelnan: “Tur autoridad a wordo duna na mi den shelo y riba Tera.” El a bisa tambe: “Mira, mi ta cu boso semper, te na fin di mundo.” (Mateo 28:18-20) E lo a sigui dirigi nan activamente como nan Cabes. Den e cartanan cu apostel Pablo a skirbi e cristiannan na Efeso y Colosas, el a compara e congregacion cristian cu un “curpa”, di cua Cristo ta e Cabes. (Efesionan 1:22, 23; Colosensenan 1:18) The Cambridge Bible for Schools and Colleges ta declara cu e comparacion aki ta “indica no solamente cu union cu e Cabes ta esencial, sino tambe cu e boluntad di e Cabes ta ser eherce atrabes di e miembronan. Nan ta Su instrumentonan.” Ken Cristo ta uza como su instrumento colectivo for di tempo cu el a haya poder di Reino na 1914?​—Daniel 7:13, 14.

4. Segun e profesia di Malakias, kico Jehova y Cristo Hesus a haya ora nan a bini pa inspecciona e tempel spiritual?

⁴ E profesia di Malakias a pronostica cu Jehova, “e Señor” berdadero, acompaña pa su “mensahero di e aliansa”, su Yiu Cristo Hesus recien entronisa, lo a bini pa husga y inspecciona Su “tempel”, of cas spiritual di adoracion. Tur cos ta indica cu e “tempo pa huicio cuminsa cu e hendenan di e cas di Dios” a yega na 1918. * (Malakias 3:1; 1 Pedro 4:17) Esnan cu a pretende di representa Dios y su adoracion berdadero riba Tera a keda debidamente examina. E iglesianan di cristiandad, cu pa siglonan a siña hende doctrinanan cu ta deshonra Dios y cu tabata hopi envolvi den e masacrenan di Prome Guera Mundial, a ser rechasa. Un resto fiel di cristian ungi cu spirito a ser getest, refina como si fuera cu candela y aproba. Asina nan a bira un pueblo cu ta “presenta ... ofrendanan den husticia” na Jehova.​—Malakias 3:3.

5. Na harmonia cu e profesia di Hesus relaciona cu su “presencia”, ken a resulta di ta e “esclabo” fiel?

⁵ Na harmonia cu e profesia di Malakias, e señal componi cu Hesus a duna su discipelnan pa yuda nan reconoce e tempo di su “binida [“presencia”, NW] y di e fin di tempo” a inclui e identificacion di un “esclabo” colectivo. Hesus a declara: “Ken anto ta e esclabo fiel y prudente cu su shon a laga encarga cu su cas pa duna nan nan cuminda na su debido tempo? Bendiciona ta e esclabo ei, cu su shon ta haya ta haci asina ora cu e bin. Di berdad mi ta bisa boso cu e lo lag’e keda na encargo di tur su propiedadnan.” (Mateo 24:3, 45-47) Ora Cristo a “bin” pa inspecciona e “esclabo” na 1918, el a haya un resto di discipel fiel ungi cu spirito cu for di 1879 ta uzando e revista aki y otro publicacionnan basa riba Bijbel pa percura “cuminda [spiritual] na su debido tempo.” El a reconoce nan como su instrumento, of “esclabo”, colectivo, y na 1919 el a encarga nan cu maneho di tur su propiedadnan riba Tera.

Maneho di Cristo Su Propiedadnan Riba Tera

6, 7. (a) Ki otro palabra Hesus a uza pa su “esclabo” fiel? (b) Kico Hesus tabata kiermen cu e palabra “mayordomo”?

⁶ Un par di luna prome cu Hesus a duna su profesia tocante e señal di su presencia, cu a inclui e existencia di un “esclabo” cu ta represent’e riba Tera, el a papia di e “esclabo” aki uzando un palabra un poco diferente. E palabra ei a revela ta kico ta e responsabilidadnan di e esclabo. Hesus a declara: “Ken anto ta e fiel y prudente mayordomo, kende su shon lo nombra riba su sirbidornan, pa duna nan nan parti di cuminda na su debido tempo? Di berdad mi ta bisa boso cu e lo lag’e keda na encargo di tur su propiedadnan.”​—Lucas 12:42, 44.

⁷ Aki e esclabo ta ser yama un mayordomo,  un palabra traduci for di un expresion Griego cu ta duna e idea di “esun cu ta maneha un cas of propiedad.” E mayordomo colectivo no ta simplemente un grupo di intelectual cu ta splica puntonan interesante for di Bijbel. Ademas di percura alimento spiritual nutritivo “na su debido tempo”, e ‘mayordomo fiel’ lo a ser nombra riba henter e cuerpo di Cristo su sirbidornan y lo a haya e encargo pa maneha tur Cristo su interesnan riba Tera, esta, “tur su propiedadnan.” Kico tur esaki lo a ensera?

8, 9. Ki ‘propiedad’ e esclabo a haya e encargo pa maneha?

⁸ Un di e responsabilidadnan di e esclabo ta pa supervisa e facilidadnan fisico cu siguidonan di Cristo ta uza pa cumpli cu nan actividadnan cristian, manera e sede mundial y sucursalnan di Testigonan di Jehova, y tambe nan luganan di adoracion, manera Salon di Reino y Salon di Asamblea na tur parti di mundo. Pero mas importante ainda, e esclabo ta supervisa tambe e programanan spiritual edificante di estudio di Bijbel na reunionnan semanal, y na asamblea- y congresonan cu ta tuma luga periodicamente. Na e reunionnan aki, e esclabo ta duna informacion riba con profesianan di Bijbel ta cumpli, y tambe guia oportuno riba con pa aplica principionan di Bijbel den bida diario.

⁹ Un otro responsabilidad di e mayordomo ta pa supervisa e trabou importantisimo di predica ‘e evangelio di e reino’ y haci ‘hende di tur nacion discipel.’ Esaki ta ensera siña hende cumpli cu tur loke Cristo, Cabes di e congregacion, ta manda nan haci durante e tempo di fin. (Mateo 24:14; 28:19, 20, NW; Revelacion 12:17) E trabou di predica y di siña a produci “un multitud grandi” di compañeronan leal di e resto ungi. Indudablemente, mester conta tal “rikesa di tur nacion” den e “propiedadnan” precioso di Cristo cu e esclabo fiel ta maneha.​—Revelacion 7:9; Hageo 2:7.

Un Cuerpo Gobernante Cu Ta Representa e Esclabo

10. Ki cuerpo encarga cu tumamento di decision a existi den e prome siglo, y ki efecto esaki tabatin riba e congregacionnan?

¹⁰ Obviamente, pa motibo di e responsabilidadnan di peso cu e esclabo fiel tin, e tin cu tuma hopi decision. Den e congregacion cristian di prome siglo, e apostel- y ancianonan na Jerusalem a representa e esclabo, y nan a tuma decision pa henter e congregacion cristian. (Echonan 15:1, 2) E decisionnan di e cuerpo gobernante aki di prome siglo a ser manda na e congregacionnan pa medio di carta y representantenan biahero. E prome cristiannan tabata masha contento di por a ricibi e instruccionnan cla aki, y nan cooperacion di buena gana cu e cuerpo gobernante a fomenta pas y union.​—Echonan 15:22-31; 16:4, 5; Filipensenan 2:2.

11. Ken Cristo ta uzando awe pa dirigi su congregacion, y con nos mester mira e grupo di cristian ungi aki?

 ¹¹ Mescos cu na cuminsamento di e era cristian, un grupo chikito di superintendente ungi cu spirito ta forma e Cuerpo Gobernante di Cristo su siguidonan riba Tera awe. Pa medio di su “man drechi” di poder den accion, Cristo, como Cabes di e congregacion, ta dirigi e hombernan fiel aki segun cu nan ta supervisa e obra di Reino. (Revelacion 1:16, 20) Albert Schroeder, kende pa hopi aña tabata miembro di e Cuerpo Gobernante y cu recientemente a termina su bida riba Tera, a skirbi den su storia di bida: “E Cuerpo Gobernante ta reuni tur diaranson; nan ta cuminsa e reunion cu oracion y ta pidi e guia di Jehova su spirito. E rumannan aki ta haci un berdadero esfuerso pa haci sigur cu tur asunto cu nan atende y tur decision cu nan tuma ta na harmonia cu Bijbel, e Palabra di Dios.” * Nos por tin confiansa den e fiel cristiannan ungi ei. Specialmente relaciona cu nan, nos mester haci caso di e ordo di apostel Pablo: “Sea obediente na esnan cu ta hiba delantera den boso y sea sumiso, pasobra nan ta vigila riba boso alma.”​—Hebreonan 13:17, NW.

Mustra Debido Respet pa e Esclabo Fiel

12, 13. Ki motibo biblico tin pa mustra respet pa e clase di esclabo?

¹² Un motibo fundamental pakico nos mester mustra debido respet pa e clase di esclabo fiel ta pasobra ora nos haci esei, en realidad nos ta mustrando respet pa e Shon, Hesucristo. Pablo a skirbi di e unginan: “Esun cu a wordo yama siendo liber, ta esclabo di Cristo. Boso a wordo cumpra pa un prijs.” (1 Corintionan 7:22, 23; Efesionan 6:6) P’esei, ora nos somete nos lealmente na e guia di e esclabo fiel y su Cuerpo Gobernante, nos ta sometiendo nos na Cristo, e Shon di e esclabo. Ora nos mustra debido respet pa e instrumento cu Cristo ta uzando pa maneha su propiedadnan riba Tera, nos ta reconoce publicamente cu “Hesucristo ta Señor, pa e gloria di Dios [e] Tata.”​—Filipensenan 2:11.

¹³ Un otro motibo biblico pakico nos mester mustra respet pa e esclabo fiel ta pasobra Bijbel ta describi cristiannan ungi como un “tempel” cu Jehova ta habita “den spirito.” Como tal, nan ta “santo.” (1 Corintionan 3:16, 17; Efesionan 2:19-22) Ta na e grupo aki, describi como un tempel santo, Hesus a encarga su propiedadnan riba Tera. Esei ta nifica cu tin cierto derecho y responsabilidad den e congregacion cristian cu ta e esclabo colectivo aki so tin. Pa e motibo aki, tur miembro di e congregacion ta compronde cu nan tin un deber sagrado di sigui y apoya e guia cu ta bini di e esclabo fiel y su Cuerpo Gobernante. Si, pa e “otro carnenan” ta un berdadero honor di por yuda e clase di esclabo cuida e interesnan di e Shon.​—Juan 10:16.

Apoya Nan Lealmente

14. Segun e profesia di Isaias, con e otro carnenan ta cana tras di e clase di esclabo ungi y sirbi como ‘trahado sin pago’?

¹⁴ Profeta Isaias a papia di e manera humilde cu e otro carnenan lo somete nan na e miembronan ungi di Israel spiritual, bisando: “Esaki ta loke Jehova a bisa: ‘E trahadonan sin pago di Egipto y e comerciantenan di Etiopia y e Sabeonan, hombernan di estatura halto, nan mes lo bini na bo, y di bo nan lo bira. Bo tras nan lo cana; gebui nan lo bini, y na bo nan lo buig. Na bo nan lo haci oracion y bisa: “Realmente Dios ta den union cu bo, y no tin ningun otro; no tin ningun otro Dios.”’” (Isaias 45:14, NW) Awe, na un manera simbolico, e otro carnenan ta cana tras di e clase di esclabo ungi y su Cuerpo Gobernante, siguiendo nan guia. Como “trahadonan sin pago”, di buena gana e otro carnenan ta ofrece nan vigor y nan recursonan pa apoya  e obra mundial di predicacion cu Cristo a encarga su siguidonan ungi riba Tera cu ne.​—Echonan 1:8; Revelacion 12:17.

15. Con e profesia di Isaias 61:5 y 6 ta describi e relacion cu ta existi entre e otro carnenan y Israel spiritual?

¹⁵ E otro carnenan ta contento y gradicido di por sirbi Jehova bou di supervision di e clase di esclabo y su Cuerpo Gobernante. Nan ta reconoce e unginan como miembro di “e Israel di Dios.” (Galationan 6:16) Como hende cu na moda di papia ta ‘desconoci’ y ‘stranhero’, den asociacion cu Israel spiritual, nan ta sirbi gososamente como ‘cunukero’ y ‘cuidado di cunucu di wendruif’ bou di direccion di e unginan, e ‘sacerdotenan di Jehova’ y ‘sirbidornan di Dios.’ (Isaias 61:5, 6) Nan ta participa celosamente den e trabou di predica e bon nobo di Reino y haci hende di tur nacion discipel. Di curason nan ta yuda e clase di esclabo pastorea y cuida e hendenan nobo semehante na carne.

16. Kico ta motiva e otro carnenan pa apoya e esclabo fiel y prudente lealmente?

¹⁶ E otro carnenan ta reconoce cu nan a beneficia masha hopi di e esfuersonan diligente cu e esclabo fiel ta haci pa duna nan cuminda spiritual oportuno. Nan ta reconoce humildemente cu si no tabata pa e esclabo fiel y prudente, nan lo no tabata sa casi nada of nada mes di e berdadnan precioso di Bijbel, manera e soberania di Jehova, e santificacion di su nomber, e Reino, e shelo nobo y Tera nobo, e alma, e condicion di e mortonan y e berdadero identidad di Jehova, di su Yiu y di spirito santo. Motiva pa nan profundo gratitud y lealtad, e otro carnenan ta apoya amorosamente e “rumannan” ungi di Cristo riba Tera durante e tempo di fin aki.​—Mateo 25:40.

17. Kico e Cuerpo Gobernante a haya cu ta necesario pa haci, y kico nos lo considera den e siguiente articulo?

¹⁷ En bista cu e cantidad di unginan riba Tera ta menguando, nan no por ta presente den tur congregacion pa maneha e propiedadnan di Cristo. P’esei mes e Cuerpo Gobernante ta nombra homber for di entre e otro carnenan como superintendente pa supervisa sucursal-, districto-, circuito- y congregacionnan di Testigo di Jehova. Bo actitud pa cu e subwardadonan aki tin efecto riba bo lealtad na Cristo y su esclabo fiel? Nos lo considera esaki den e siguiente articulo.

[Nota]

Como Repaso

• Ken ta nos Lider, y kico ta mustra cu e ta na haltura di e condicion di e congregacionnan?

• Ora Jehova y Cristo Hesus a bini pa inspecciona e “tempel”, ken nan a haya ta sirbi como un esclabo fiel, y ki propiedad a ser encarga na dje?

• Ki motibonan biblico tin pa apoya e esclabo fiel lealmente?

[Preguntanan di Estudio]

[Plachi na pagina 23]

E “propiedadnan” cu e “mayordomo” ta supervisa ta inclui facilidadnan fisico, programanan spiritual y e actividad di predica

[Plachi na pagina 25]

Miembronan di e otro carnenan ta apoya e clase di esclabo fiel cu nan predicacion celoso