Contestanan Practico!

MAYORIA di conseho cu bo ta haya den e tantisimo bukinan pa yuda bo mes cu tin riba mercado awe, ta enfoca riba yuda hende kende nan bida na e momentonan aki ta den un crisis. Bijbel ta otro. Aunke su conseho por yuda hende den angustia, Bijbel ta haci mas cu esei. Su conseho ta yuda un persona evita di comete erornan cu por haci bida innecesariamente dificil.

Bijbel por “haci esnan inexperto spierto, duna un hoben conocemento y capasidad di pensa.” (Proverbionan 1:4, NW) Si bo aplica e conseho cu tin den Bijbel, “capasidad di pensa mes lo vigila bo, discernimento mes lo proteha bo, pa libra bo for di e mal caminda.” (Proverbionan 2:11, 12, NW) Ban considera algun ehempel specifico cu ta mustra con ora bo sigui e conseho di Bijbel esei por proteha bo salud, drecha bo bida di famia y haci bo un mihor empleado of un mihor doño di trabou.

Sea Rasonabel den Uzo di Alcohol

Bijbel no ta condena uzo modera di alcohol. Apostel Pablo a indica e beneficionan medico di biña ora el a conseha e hoben Timoteo: “Tuma un poco biña pa motibo di bo stoma y bo enfermedadnan frecuente.” (1 Timoteo 5:23) Otro textonan di Bijbel ta mustra cu Dios su proposito tabata pa hende uza biña pa mas cu simplemente remedi. Segun e descripcion di Bijbel, biña ta haci “curason di hende contento.” (Salmo 104:15) Sinembargo, Bijbel ta spierta pa no bira “sclabisa na biña.” (Tito 2:3) E ta declara: “No anda cu esnan cu ta gusta dal nan biña [“bebedonan di demasiado biña”, NW], ni cu esnan cu ta golos pa come carni. Pasobra e burache y e hende golos lo bira pober.” (Proverbionan 23:20, 21) Kico ta e resultado ora hende no ta haci caso di tal conseho balansa? Tuma nota di algun echo di djis un par di pais.

Organisacion Mundial di Salud su Informe 2004 di e Estado di Mundo pa Loke Ta Alcohol ta bisa: “Problemanan liga cu alcohol ta costa e pueblo di Irlanda aproximadamente 2.400 miyon euro [3.000 miyon dollar] pa aña.” Segun e informe, e inmenso carga financiero aki ta ensera “gastonan di cuido medico (279 miyon euro), gastonan di accidente di trafico (315 miyon euro), gastonan di crimen liga cu alcohol (100 miyon euro), perdida di  productividad debi na ausencia for di trabou liga cu alcohol (1.034 miyon euro).”

Mas importante cu e costo financiero di mal uzo di alcohol ta e costo den sufrimento humano. Por ehempel, na Australia den un solo periodo di 12 luna, mas cu mei miyon persona a sufri di maltrato fisico na man di hende bou di influencia di alcohol. Na Francia, mal uzo di alcohol ta responsabel pa mas o menos 30 porciento di tur violencia domestico. En bista di e echonan aki, bo no ta haya cu e conseho biblico tocante alcohol ta rasonabel?

Evita Practicanan Cu Ta Contamina Curpa

For di aña 1942, tempo cu ainda tabata mira humamento como un cos na moda, e revista aki a yuda su lectornan compronde cu uzo di tabaco ta viola principionan biblico y cu p’esei nan lo mester evit’e. Un articulo publica e aña ei a rasona cu si un hende kier agrada Dios, anto e mester sigui e mandamento biblico pa “purifica [su] mes di tur impuresa di carni y spirito.” (2 Corintionan 7:1) Awe, un 65 aña despues, e conseho aki basa riba Bijbel no a resulta di ta sabi?

Na aña 2006, Organisacion Mundial di Salud a describi uzo di tabaco como “e di dos causa principal di morto na mundo.” Tur aña, rond di cinco miyon hende ta muri debi na uzo di tabaco. Na comparacion, rond di tres miyon hende ta muri pa aña di HIV/AIDS. Durante siglo 20, humamento a mata segun calculo 100 miyon hende; casi mes tanto hende cu a ser mata den tur e gueranan den e siglo ei. De echo, awor tur caminda hende ta acepta e sabiduria di evita tabaco.

“Hui di Inmoralidad”

Loke si hende ta menos dispuesto pa acepta ta loke Bijbel ta bisa tocante asuntonan sexual. Contrario na loke religion a laga hopi hende kere, Bijbel no ta condena tur deseo sexual como pecaminoso. Pero si e ta duna conseho sano encuanto con hende mester actua pa cu nan deseonan sexual. Bijbel ta siña nos cu relacion sexual ta ser permiti solamente entre un homber y un muher cu ta casa cu otro. (Genesis 2:24; Mateo 19:4-6; Hebreonan 13:4) Relacion sexual ta un manera pa parehanan casa expresa y ricibi amor y tierno cariño. (1 Corintionan 7:1-5) Yiunan cu nace di tal union ta beneficia pa e echo cu nan tin dos mayor cu ta stima otro.​—Colosensenan 3:18-21.

Bijbel ta duna e mandamento aki encuanto tenemento di relacion sexual cu hopi partner: “Hui for di inmoralidad.” (1 Corintionan 6:18) Cua ta un motibo pa haci esaki? E versiculo ta sigui bisa: “Tur otro pica cu un hende comete ta pafo di e curpa, ma e hende inmoral ta peca contra su mes curpa.” Kico ta e  resultado ora hende no ta haci caso di e conseho biblico relaciona cu asuntonan sexual?

Wak kico ta pasando na Merca. E pais ei tin awor e porcentahe mas halto di embaraso hubenil den e mundo industrialisa, aproximadamente 850.000 embaraso pa aña. Hopi di e babynan cu no a ser aborta ta nace di mama soltero. Sin duda, hopi di e mamanan hoben aki ta haci nan best pa lanta nan yiunan cu amor y disciplina, y algun di nan ta logra. Sinembargo, e realidad duro ta cu yiu homber di mamanan teenager tin mas chens di cai sera y yiu muher tin mas chens di bira mama teenager nan mes tambe. Despues di a repasa e estadisticanan di e ultimo decadanan, e investigado Robert Lerman a skirbi: “E cambio den direccion di mas famia cu ta consisti di un solo mayor kisas a contribui na mas caso di otro problemanan social, manera un porcentahe halto di dropout di scol, di uzo di alcohol y droga, di adolescentenan na estado y cu ta duna lus y di delincuencia hubenil.”

Hende cu ta tene relacion sexual cu hopi partner ta confronta tambe riesgonan mas grandi pa nan salud, tanto salud fisico como mental. Por ehempel, e revista Pediatrics a informa: “Datonan ta parce di indica cu adolescentenan sexualmente activo ta core un riesgo halto di sufri di depresion y di comete suicidio.” Encuanto otro peligernan di salud, e Asociacion Mericano di Salud Social a declara: “Tardi of tempran, mas cu mitar di tur hende [na Merca] lo haya un malesa transmiti sexualmente.” Pensa riba e dolor di curason y sufrimento cu hende lo por evita si nan ta sigui e conseho practico di Bijbel relaciona cu sex!

Edifica Lasonan Fuerte di Famia

Bijbel ta haci mas cu djis spierta nos pa practicanan destructivo. Tuma nota di su conseho practico encuanto con pa mehora bida di famia.

E Palabra di Dios ta bisa: ‘Esposonan mester stima nan esposa manera nan mes curpa.’ (Efesionan 5:28) En bes di menosprecia e balor di nan esposa, Bijbel ta urgi esposonan pa biba cu nan esposa “cu comprension, manera cu un vaso mas delicado, como cu e ta hende muher; y dun’e honor.” (1 Pedro 3:7) Pa loke ta disputanan cu por surgi, esposonan ta haya e conseho: “Stima boso esposanan, y no sea amarga contra nan.” (Colosensenan 3:19) Bo no ta kere cu un esposo cu ta aplica e conseho aki lo gana e amor y respet di su esposa?

Bijbel ta duna hende muher casa e siguiente instruccion: “Esposanan, sea sumiso na boso mes esposo, manera na Señor. Pasobra e esposo ta cabes di e esposa, mescos cu Cristo tambe ta cabes di e iglesia . . . E esposa percura pa e respeta su esposo.” (Efesionan 5:22, 23, 33) Bo no ta kere cu tin mas chens cu un esposo lo stima profundamente un esposa cu ta aplica e conseho aki ora cu e esposa ta papia cu ne of ta papia di dje?

Encuanto entrenamento di yiu, Bijbel su conseho pa boso como mayor ta pa boso comunica cu boso yiunan “ora bo ta sinta den bo cas, ora bo ta cana riba caminda, ora bo ta bai drumi y ora bo ta lanta.” (Deuteronomio 6:7) Specialmente tatanan ta haya e instruccion pa percura guia moral y disciplina amoroso pa nan yiunan. E Palabra di Dios ta bisa: ‘Tatanan, no provoca boso yiunan na rabia, ma lanta nan den e disciplina y instruccion di Jehova.’ (Efesionan 6:4) Bijbel ta bisa yiunan, na nan turno: “Obedece boso mayornan” y “honra bo tata y bo mama.” *​—Efesionan 6:1, 2.

Bo ta kere cu famianan lo beneficia si nan aplica e conseho aki? Podise bo ta bisa: ‘Si, e ta zona bon den teoria, pero e ta duna resultado?’ Nos ta invita bo pa bishita e Salon di Reino local di Testigonan di Jehova. Einan lo bo topa famianan cu ta haciendo esfuerso pa aplica e conseho sabi di Bijbel. Papia cu nan. Observa e manera cu miembronan di famia ta trata cu otro. Lo bo mira personalmente cu si  hende ta biba segun principionan biblico esei realmente ta haci famianan felis!

Un Trahado Diligente y un Doño di Trabou Husto

Kico Bijbel tin di bisa tocante e lucha constante pa keda cu bo trabou? E ta bisa cu un trahado cu siña haci su trabou bon, probablemente lo ser aprecia y recompensa. Rei sabi Salomon a puntra: “Bo ta mira un hende cu habilidad den su trabou?” El a contesta: “E lo para dilanti di reinan.” (Proverbionan 22:29) Di otro banda, “e floho” ta iritante manera ‘huma den wowo’ di su doño di trabou. (Proverbionan 10:26) Bijbel ta anima trahadonan pa nan ta honesto y diligente. “Laga esun cu ta horta, no horta mas; ma mas bien, lag’e traha, haciendo cu su mes mannan loke ta bon.” (Efesionan 4:28) E conseho aki ta aplica asta ora un doño di trabou no ta wak bo. “Den tur cos obedece esnan cu ta boso shonnan riba Tera, no pa bista, manera esnan cu solamente ta agrada hende, ma cu sinceridad di curason, y cu temor pa Señor.” (Colosensenan 3:22) Si bo ta un doño di trabou, lo bo no duna gran balor na un trahado cu ta aplica e conseho aki?

Pa doñonan di trabou, Bijbel tin e siguiente recordatorio: “E trahado ta digno di su sueldo.” (1 Timoteo 5:18) E Lei cu Dios a duna e Israelitanan a bisa cu doñonan di trabou mester a paga nan trahado mesora y na un manera husto. Moises a skirbi: “No oprimi bo prohimo, ni hort’e. Pago di un homber contrata no mag keda cerca bo henter anochi te mainta.” (Levitico 19:13) Abo lo no traha cu smak pa un doño di trabou cu ta obedece e instruccion biblico y ta paga bo mesora y na un manera husto?

Un Fuente Superior di Sabiduria

Ta un sorpresa pa bo cu un buki asina bieu manera Bijbel ta contene conseho cu ta practico pa nos tempo? E motibo pakico Bijbel a keda te awe mientras cu otro bukinan a perde nan balor ta pasobra Bijbel ta contene, no e palabra di hende, sino “e palabra di Dios.”​—1 Tesalonicensenan 2:13.

Nos ta anima bo pa tuma tempo pa familiarisa bo mes mas cu e Palabra di Dios. Si bo hacie, lo bo desaroya un amor pa e Autor di Bijbel, Jehova Dios. Aplica e conseho cu e ta ofrece, y wak con e conseho ei ta proteha bo di daño y ta yuda bo mehora bo bida. Haciendo esei, lo bo ‘hala cerca Dios y e lo hala cerca bo.’ (Santiago 4:8) Ningun otro buki por yuda bo den e manera ei.

[Nota]

[Plachi na pagina 4]

Bo ta haya cu Bijbel su punto di bista di alcohol ta practico?

[Plachi na pagina 5]

Bo ta di acuerdo cu e conseho basa riba Bijbel pa evita tabaco?

[Plachi na pagina 7]

Si nos sigui e conseho di Bijbel, esei ta mehora nos bida di famia

[Reconocemento pa Potret na pagina 5]

Globo: Basa riba potret di NASA